Lewiy 6
6
1Rmengo Moseh ka Utux Tmninun: 2“Nasi mnoda qnquwan noda, mnoda qnquwan quri Utux Tmninun, kiya ka mberiq qyqeya pnseku daha ma, pnririh daha. Uxe uri we gmeeluk ma tmsiiyax seediq ssiyo, 3Uxe uri ma mberiq mangal qyqeya pntuting daha ma mberiq psdehu, mnoda qnquwan ani maanu noda ka seediq. 4Heya we niqan qnquwan noda na de, asi ka prrihan na ka qyqeya gnlekan na. Uxe uri we nangal na tnsiyax seediq, uxe uri ma pnseku seediq ma qyqeya nangal na pnttingan seediq. 5Uxe uri we nangal na pneeyah mberiq psdehu. Kana nii we asi ka prrihan na kana, kiya we prnaun na mege 1 tnugrmaan nana. Wada daha klaun ka qnquwan noda na ali ciida, asi ka spririh na mege nhari ka seediq. 6Heya we asi ka mege 1 baus miric rudu mttuku hnyegan, bege na Utux Tmninun spuhan prtaso qnquwan. Uxe uri we spooda so knttuku pnuyu snpegan su mege msapuh ngalun na spuhan prtaso qnquwan. 7Msapuh we mpririh psruwa qnquwan noda na meniq berah Utux Tmninun. Ani maanu noda na ma, niqan qnquwan noda we, maha srwaun kana.”
Ooda Smapuh Psqama Ooda Msapuh Smapuh Psqama
8Rmengo Moseh ka Utux Tmninun: 9“Rngagi ka Aharon ma lqlaqi laqi na, so nii ka gaya msapuh smapuh psqama. Snapuh psqmaun we psai bobo spuhan peeyah keeman betaq mgrebu. Puniq gaga bobo spuhan hiya we iya bale psteqi psqama. 10Msapuh we asi ka mlukus lukus snmalu rila tninun nuqah malu. Kiya ma kciici puto caic tninun nuqah malu. Psseli ka knrngiyan pnsqmaan snpuhan psqama. Posa ssiyo spuhan mrtaso. 11Kiya de, ngalun na ka lukus nii ma, mplukus lukus kingal nanak. Desun na nniqan uka rutiq nganguc kobu mrtaso ka qbulic. 12Puniq bobo spuhan we iya psteqi psqama. Mgrebu klaali, asi ka mtahu qhuni bobo spuhan ka msapuh. Psaun na bobo hiya ka snapuh psqmaun. Kiya ma psqmaun na ka kadi bnege daha snapuh ptbale. 13Iya bale psteqi psqama ka puniq bobo snapuh. Iya bale phengi.
Ooda Smapuh Mege Pnhgalang
14Gaya ssapuh mege pnhgalang we so nii: Lqlaqi laqi Aharon we asi ka sbege daha Utux Tmninun bobo spuhan ka snpuhan nii. 15Msapuh we asi ka mangal 1 karuk baga malu nemu mugi. Kiya ma mangal duma abura ma sknexan snapuh pnhgalang. Kana nii we sqmaun na bobo spuhan hiya. Nii we kiya ka snapuh sknexan bbege Utux Tmninun. 16Mekan mnsngari snpuhan pnhgalang ka Aharon ma lqlaqi laqi na. Asi ka mekan pang ini psai tgeda nniqan mrtaso hiya ma mekan nganguc kobu mrtaso hiya ka dheya. 17Muduh pang we iya psai tgeda. Ckceka bbege namu spuhan puniq kenan hiya we niqan 1 ka ndheya. Mntena so snapuh psruwa qnquwan noda ma snapuh prtaso qnquwan. Mrtaso riyung ka nii. 18Asi ka mekan nii ka rseno lqlaqi laqi Aharon. Ado ngngalun namu betaq ani knuwan knxalan peeyah ckceka snapuh puniq bbege Utux tmninun ka nii. Kana tmnelung spuhan nii we mprtaso ka dheya.”
19Rmengo Moseh ka Utux Tmninun: 20“Ali hmeruy abura Aharon ka nii. Bbege daha Utux Tmninun ka kiya ma lqlaqi laqi na so nii: 1 tnugmxalan igipa nemu mugi. Mntena so snapuh pnhgalang bnege namu klaali. Mgrebu we dmeka, keeman we dmeka. 21Gmaxi abura bobo supih tapaq. Mnhedu de saanun muduh. Mhada ka nduhan snapuh pnhgalang de, asi ka gbingun ssbiciq. Nii we kiya ka snapuh sknexan bbege Utux Tmninun. 22Mplutuc msapuh hnrigan abura ka lqlaqi laqi Aharon we, asi ka mege spuhan pnhgalang, sqmaun na mege Utux Tmninun kana. Pnugaya betaq ani knuwan ka nii. 23Msapuh we asi ka psqmaun na kana ka snapuh pnhgalang. Iya bale uqi ka kiya.”
Ooda Snapuh Psruwa Qnquwan Noda
24Rmengo Moseh ka Utux Tmninun: 25“Rngagi ka Aharon ma lqlaqi laqi na ka gaya snapuh psruwa qnquwan noda. Smeeliq namu spuhan psruwa qnquwan noda we: Asi ka meniq spuhan psqama berah Utux Tmninun hiya. Mrtaso riyung ka nii. 26Msapuh bnege snapuh psruwa qnquwan noda we, asi ka mekan snpuhan nii. Asi ka meniq nniqan mrtaso, mekan kiya ka nganguc kobu mrtaso snpuhan nii. 27Kana dmnoi spuhan nii we mprtaso. Nasi tricuh lukus na ka dara snpuhan nii de, asi su ka meniq nniqan mrtaso smino lukus rncuhan dara nii. 28Asi ka ptnmean ka supih hnpure snpuhan nii. Nasi hnngedan supih limuk de, asi ka blequn ba smino qsiya ka supih limuk nii. 29Drseno msapuh we ani nak mekan kana. Mrtaso riyung ka nii. 30Nasi dara snpuhan daha psruwa qnquwan noda ka desun daha kobu mrtaso, quri so psruwa qnquwan noda meniq nniqan mrtaso de, heya we asi ka ini uqi. Asi ka psqmaun na puniq kana.”
Currently Selected:
Lewiy 6: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020