Lewiy 7
7
Ooda Msapuh Snapuh Prtaso Qnquwan
1So nii ka gaya smapuh bbege prtaso qnquwan. Mrtaso riyung ka smapuh nii. 2Smeeliq inu bbege na snapuh psqmaun ka seediq we, asi ka meniq nanak hiya smeeliq snapuh prtaso qnquwan. Dara na we, rsani mtqiri spuhan psqmaan. 3Msapuh we asi na ka sbege kana ka daruk. Siyang gaga ngungu na, daruk gaga lmabu rkebul. 42 rmume ma daruk rmume, kiya ka kadi smdaling rmume. Kiya ma kadi rumul, theyaq rmume angal kana. 5Msapuh we asi na ka psqmaun bobo spuhan, snapuh psqama bbege na snpuhan prtaso qnquwan Utux Tmninun. 6Kana rseno ckceka msapuh we asi ka mekan snpuhan nii. Asi ka mekan nniqan mrtaso. Mrtaso riyung ka nii. 7So hmuwa mesa ka spuhan psruwan qnquwan noda de, mpuso kiya smapuh ta prtaso qnquwan, mntena ka gaya daha. Msapuh mnoda psruwa qnquwan pnoda spuhan prtaso qnquwan we asi ka mangal snapuh nii. 8Msapuh mbege snapuh psqmaan we, ani ima ka sbege na we, asi na ka ngalun ka qraqil snpuhan ppsqmaan bege na msapuh. Ndheya ka kiya. 9Ani maanu snapuh pnhgalang, ani nuduh ckceka rqeda, ani nuduh xiluy sapo ma snmalu daha bobo supih xiluy sapo we, asi ka sbege na msapuh bnege snapuh. 10Ani maanu ka snapuh pnhgalang, ani pnugmaxan abura ma, mndengu na we, asi ka bege lqlaqi laqi Aharon kana. Dkaun daha maasu kana.
Ooda Msapuh Smapuh Ptbale Lhebun
11Gaya smapuh ptbale bege Utux Tmninun we so nii: 12Nasi mege snapuh na qnrasan ka seediq, asi ka mege pang ini psai tgeda, pang rncuhan ini psai tgeda ma, pang pnugmaxan abura ka malu nemu mugi. Theyaq snapuh qnrasan mege. 13Pang pnsaan tgeda ma bnege daha snapuh ptbale we, thiqi snapuh mege kana. 14Heya we mangal pang peeyah knkingal klegal snapuh, sbege na Utux Tmninun spuhan pheyu. Nii we asi ka sbege msapuh mnoda rmicuh dara snapuh ptbale. 15Heyi bnege daha snpuhan ptbale we, asi ka uqun smapuh ciida. Iya bale rngii betaq mgrebu. 16Nasi snapuh bbege snpuhan ma snapuh pneeyah lhebun we, asi ka uqun ali snapuh ciida. Msngari na we ani namu nak uqun so kusun na. 17Mk3 ali msngari ka heyi snpuhan we asi ka psqmaun. 18Netun mk3 ali di ma mekan heyi snpuhan ptbale dungal de, maha uxe qqrasun mangal. Bnege na we uxe kesun snapuh. Snapuh nii we niqan rutiq. Kana mekan snapuh nii we, asi ka mheal qnquwan noda daha nanak.
19Heyi mnoda treeru heyi mrutiq we, iya bale uqi, asi ka psqmaun puniq. Kiya ka duma heyi we, ani nak uqun dseediq uka rutiq kiya. 20Kiya de dseediq niqan rutiq we, nasi mekan heyi snapuh ptbale bnege daha Utux Tmninun we, asi ka pkngalun daha peeyah seediq ka seediq nii. 21Netun tmnelung niqan rutiq ka seediq we, ani heyi seediq niqan rutiq ma bsaniq, uxe uri we heyi camac niqan rutiq ma, heyi pntgaya niqan rutiq, mekan heyi snapuh ptbale bnege Utux Tmninun we, asi ka pkngalun peeyah dseediq ka seediq nii.
22Rmengo Moseh ka Utux Tmninun: 23“Rngagi ka dseediq Israel: Daruk dapa, miric rudu, miric we iya bale uqi. 24Daruk camac mnhuqil nanak ma snliqan camac we ani namu nak dooyun quri icil. Iya bale uqi ka kiya. 25Ani ima wada mekan daruk snapuh snpuhan psqama bnege Utux Tmninun we, asi ka pkngalun peeyah dseediq ka seediq nii. 26Kana nniqan namu, ani dara qbheni ma camac we, iya bale uqi yamu. 27Ani ima mnekan dara nii we, asi ka pkngalun peeyah dseediq ka seediq nii.”
28Rmengo Moseh ka Utux Tmninun: 29“Rngagi ka seediq Israel: Mege snapuh Utux Tmninun ptbale we, asi ka mangal duma peeyah snapuh ptbale hiya bege na Utux Tmninun. 30Asi ka heya nanak ka madis snpuhan psqama bbege na Utux Tmninun. Desun na ka kadi ma heyi berah uri. Slgelu na berah Utux Tmninun. Ngalun na snapuh slgelu. 31Msapuh we asi ka psqmaun na bobo spuhan ka daruk. Kiya ma heyi berah we asi ka sbege na Aharon ma lqlaqi laqi na. 32Asi ka ngalun namu snapuh pnheyu ka narac papak snapuh ptbale, bege msapuh. 33Lqlaqi laqi Aharon we, asi ka bnege dara snpuhan ptbale ma kadi na ka nangal bteriq tgnarac nii. Asi ka ngngalun na ka nii. 34Ado peeyah snapuh ckceka snpuhan ptbale we, bege Aharon msapuh ma lqlaqi laqi na ka heyi teerang snapuh slgelu ma, bteriq snapuh pheyu kiya. Ngngalun daha betaq ani knuwan meniq ckceka seediq Israel ka nii.”
Nhdean Kari Ooda Msapuh
35Nangal peeyah snapuh puniq bnege daha Utux Tmninun ka nii. Ngalun Aharon ma lqlaqi laqi mnoda snapuh abura. Kiya ka pnlaale ali pnlawa Moseh, mnangal qpahan msapuh Utux Tmninun ciida. 36Nii we kiya ka ali pnheyu Moseh ka dheya. Pnooda kari Utux Tmninun dheya, ngngalun daha betaq ani knuwan qnlangan meniq ckceka seediq Israel ka nii. 37Kiya ka snapuh psqama, snapuh pnhgalang, snapuh psruwa qnquwan noda, smnapuh prtaso qnquwan, gaya ooda mrtaso ma gaya smnapuh ptbale ka nii. 38Tnugesa na Moseh ka Utux Tmninun meniq dgiyaq Sinay. Tnugesa na dseediq Israel meniq tadus brenux Sinay, ali bbege daha Utux Tmninun ciida ka kana nii.
Currently Selected:
Lewiy 7: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020