Lewiy 8
8
Qpahun Msapuh
(Lnt 29:1-37)
1Rmengo Moseh ka Utux Tmninun: 2“Adis hini ka Aharon ma lqlaqi na. Kiya ma psuupu madis ka lukus mrtaso, abura ma, ssapuh bbege psruwa qnquwan ka 1 dapa, 2 miric rudu ma, pang ini psai tgeda. 3Kiya de psseli rhengun kobu mrtaso ka kana seediq.” 4Moseh ge, muyu so kari nuUtux Tmninun de msseli rhengun kobu mrtaso ka kana seediq da. 5Rmengo kana seediq ka Moseh: “Pnosa kari Utux Tmninun asi ta ka daun ka nii.”
6Dmudul Aharon ma lqlaqi na meyah ka Moseh de, ptrmaun na qsiya. 7Plkusan na pstrmaun, phbikan, pbragun lukus rila ma posa ipudi, phbikun malu ba habik ma, pskere ipudi meniq heyi na. 8Kiya ma psaun na torih ka Aharon, psaun na ckceka torih hiya ka Uring ma Tuming. 9Pkbnuhan na bunuh ptgaya ka tunux Aharon, berah bunuh we psaun na pila king pnskraya pnrtaso. Pnuyu Utux Tmninun rnengo na Moseh ka nii.
10Moseh we mangal abura ma rcuhan na abura ka kobu mrtaso ma kana qyqeya gaga toma na hiya. Kiya de mrtaso kana da. 11Dungal we dmoi abura mn7 rmehak bobo spuhan. Sricuh na spuhan ma kana qyqeya spuhan, kiya ma ribo trmaan ma tluungan ribo, so maha mrtaso kana daha. 12Hrigi abura mrtaso ka tunux Aharon, mprtaso heya. 13Madis lqlaqi Aharon ka Moseh, plkusi na lukus rila pstrmaun. Hbiki habik ma mekuy tunux. Nii ge pnuyu Utux Tmninun rnengo na Moseh ka nii.
14Heya we madis dapa balas spuhan psruwa qnquwan noda. Aharon ma lqlaqi na posa baga tunux dapa balas spuhan psruwa qnquwan noda nii. 15Kiya de sliqan daha ka dapa balas nii. Mangal dara ka Moseh, rbgaani tluding baga na rcuhi 4 urung gaga mxmuxi spuhan, prtaso spuhan. Kiya de dara mnsngari we hrigan na tluungan spuhan, prtaso spuhan ma, psruwa qnquwan noda spuhan. 16Moseh we ngalun na ka kana daruk biciq ma kadi rumul. Kiya ma ngalun na ka 2 rmume ma kadi rmume, psqmaun na bobo spuhan kana. 17Quri so dapa balas we, ani qraqil ma quti na we asi ka psqmaun nganguc kobu mrtaso. Pnuyu Utux Tmninun tnugesa na Moseh ka nii.
18Heya we madis baus miric rudu spuhan psqmaan. Aharon ma lqlaqi na posa baga bobo tunux miric. 19Kiya de sliqan daha ka miric. Moseh we hrgaani na mtqiri spuhan ka dara. 20Byakun na ka miric, tunux ma heyi, kiya ma kadi we saun na psqama. 21Heya we snagun na qsiya ka rkebul ma papak de, psqmaun na bobo spuhan hiya kana ka miric. Kiya ka malu sknexan snapuh psqmaan. Spuhan puniq bege Utux Tmninun ka nii. Pnuyu Utux Tmninun rnengo na Moseh ka kana nii.
22Heya we madis tg2 baus miric dungal. Kiya ka miric dooyun smapuh. Aharon ma lqlaqi na posa baga bobo miric. 23Kiya de sliqun daha ka miric. Moseh we sricuh na waso narac birac, bbaki narac baga ma, bbaki narac papak Aharon ka dara. 24Heya we dmudul lqlaqi Aharon. Dmoi dara sricuh na waso narac birac, bbaki narac baga ma, bbaki narac papak daha. Dara mnsngari de, Moseh we sheruy na ssiyo mtqiri spuhan. 25Heya we mangal siyang, siyang ngungu, kana kadi lhebun, kadi rumul, 2 rmume, kadi rmume ma, papak tgnarac. 26Kiya de ngali 1 pang ini psai tgeda, 1 pang pnugmaxan abura ma, 1 pang mepux gaga meniq rawa tqriyan paang ini psai tgeda peeyah berah Utux Tmninun. Kana nii we psaun na bobo kadi ma papak tgnarac. 27Heya we psaun na baga Aharon ma lqlaqi na ka kana nii. Slgelu na berah Utux Tmninun, kiya ka snapuh mlgelu ka nii. 28Mangal snapuh nii peeyah baga daha ka Moseh. Psqmaun na bobo spuhan psqmaan hiya. Malu sknexan snapuh psqama bbege Utux Tmninun ka snapuh nii. 29Moseh we mangal heyi berah. Slgelu na berah Utux Tmninun, kiya ka snapuh slgelu. Bbege Moseh 1 ka miric snapuh nii. Pnuyu Utux Tmninun rnengo na Moseh ka nii.
30Mangal abura ma dara bobo spuhan ka Moseh, srehak na Aharon ma bobo lukus na ma, laqi na ma lukus laqi na. Kiya ka prtaso Aharon ma lukus na ma, prtaso laqi na ma lukus daha.
31Rmengo Aharon ma lqlaqi Aharon ka Moseh: “Hngedi rhengun kobu mrtaso hiya ka heyi. Puyu so tnugesa mu heyi nii ma pang gaga ckceka rawa we asi ka uuqun namu ka kiya: 32Mnsngari na ka heyi ma pang de asi namu ka psqmaun puniq. 33Mk7 ali nii we, iya bale osa nganguc kobu mrtaso ka yamu. Asi ka betaq mnhedu ka qneepah namu msapuh. Ado qqeepah namu smapuh mrtaso we asi ka mk7 ali. 34Ndaan namu saya we, rnengo Utux Tmninun kana. Kiya ka maha srwaun qnquwan namu. 35Mk7 ali nii we, asi namu ka meniq ckceka kobu mrtaso, ani diyan ma keeman. Pyugi bale ka rnengo Utux Tmninun, kiya ka uxe namu mphuqil. Ado so nii ka tnugesa na yaku.” 36Kiya de, mnoda meepah kana ooda Utux Tmninun rnengo na Moseh ka Aharon ma lqlaqi na da.
Currently Selected:
Lewiy 8: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020