Lewiy 9
9
Smapuh ka Aharon
1Dehuk tg8 ali de, mlawa Aharon, lqlaqi Aharon ma, kana ddrudan mpqlahang Israel ka Moseh. 2Rmengo Aharon: “Asi su ka madis 1 wawa dapa balas ngali spuhan psruwa qnquwan. 1 ka miric rudu ngali spuhan psqmaan. Asi ka mttuku hnyegan na bbege berah Utux Tmninun. 3Rngagi ka seediq Israel: ‘Asi ka madis namu 1 wawa dapa balas ngali spuhan psruwa qnquwan. Kiya ma adis 1 wawa dapa ma 1 miric rudu. Kana nii we asi ka 1 knkawas ma mttuku hnyegan na. Kiya ka ngalun spuhan psqama. 4Kiya ma asi ka madis 1 balas dapa, 1 ka baus miric ngali spuhan ptbale. Sgliqi ma bege berah Utux Tmninun. Kiya ma gmaxi abura mege snpuhan pnhgalang. Ado saya we meeyah tqita yamu ka Utux Tmninun.’” 5Kiya de, desun daha berah kobu mrtaso ka tnugesa Moseh. Smdaling meeyah berah ma mpheyu berah Utux Tmninun ka kana seediq. 6Rmengo ka Moseh: “Rnengo Utux Tmninun kana ka noda namu nii. Mptqita yamu ka knledax Utux Tmninun.” 7Rmengo Aharon ka Moseh: “Osa smdaling berah spuhan ka isu, bege ka snapuh su psruwa qnquwan ma snapuh psqmaan. Psrwai ka qnquwan su ma qnquwan dseediq. Kiya ka mbege su snapuh dseediq pririh psruwa qnquwan daha. Pnuyu rnengo Utux Tmninun kana ka nii.”
8Kiya de, meyah smdaling berah spuhan ka Aharon. Smeeliq wawa dapa kiya ka psruwa qnquwan na. 9Lqlaqi Aharon we sbege daha Aharon ka dara. Kiya de rbegan na dara ka tluding baga na. Sricuh na 4 urung gaga mxmuxi spuhan. Dara mnsngari na we hrigan na tluungan spuhan psqmaan. 10Heya we saun na psqama bobo spuhan hiya ka kadi, rmune ma, kadi rumul. Pnuyu na Utux Tmninun rnengo na Moseh ka nii. 11Heya we psqmaun na puniq ka heyi ma qraqil meniq nganguc kobu mrtaso. 12Mhedu smeeliq snapuh psqmaan ka Aharon. Laqi na mege dara heya. Heya we sheruy na ssiyo mtqiri spuhan ka dara. 13Kiya ma sk1 mege heyi snapuh psqmaan ka dheya, stheyaq na tunux mege Aharon. Kiya de heya we psqmaun na bobo spuhan. 14Heya duri we snagan na ka rkebul ma papak, psqmaun na bobo spuhan psqama.
15Bukuy na de, mege snapuh dseediq ka heya. Heya we madis baus miric snapuh dseediq ngalun daha snapuh psruwa qnquwan noda. Wada na sliqun ma sbege na snapuh psruwa qnquwan noda, mntena so pnlaale. 16Mbege snapuh psqama, mntena gaya bbege. 17Mbege snapuh pnhgalang ka heya uri. Mangal 1 kemux baga psqmaun bobo spuhan. Nii we daun mgrebu uxe wano smapuh psqmaan. 18Mhedu smeeliq balas dapa ma baus miric snapuh ptbale ka Aharon de, mege dara heya ka laqi na. Heya de sheruy na ssiyo mtqiri spuhan ka dara. 19Sbege daha heya kana ka kadi balas dapa ma baus miric, siyang ngungu, kadi lhebun, rmune ma kadi rumul. 20Psaun daha bobo heyi berah ka kadi nii, kiya de psqmaun daha bobo spuhan. 21Aharon we slgelu na berah Utux Tmninun ka heyi berah ma papak tgnarac. Nii ka snapuh mlgelu, pnuyu Utux Tmninun rnengo na Moseh ka nii.
22Pheyu baga na ka Aharon, smbleyaq dheya. Mnhedu mege snapuh psruwa qnquwan noda, snapuh psqama ma, snapuh ptbale ka heya de meyah truma da. 23Mremux mosa kobu mrtaso ka Moseh ma Aharon. Meyah nganguc ka dheya, meyah smbleyaq dseediq. Ptuura kana seediq ka knledax Utux Tmninun. 24Mtruura meyah puniq pneeyah berah Utux Tmninun. Kiya ka wada psqama snapuh ma kadi bobo spuhan hiya. Qmnita so nii ka dseediq de, mqaras mlawa kana ma, tgtemaq dxeral ka dqeras daha.
Currently Selected:
Lewiy 9: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020