Spegan 10
10
Iyuk Ging
1Rmengo Moseh ka Utux Tmninun: 2“Slmei 2 iyuk tnuting snmalu ging, kiya ka ddooyun su psseli kana seediq ma ptheruy kobu ka kiya. 3Miyuk Iyuk ciida, asi ka mosa isu hiya ka kana seediq ma psseli rhengun kobu mrtaso hiya. 4Nasi mnexal bale miyuk ka iyuk we kana mdudul, kiya ka qbsuran mdudul seediq Israel we, asi ka meyah msseli isu hiya kana ka dheya. 5Prparu hrenang mniyuk namu iyuk ciida de, asi ka psnama theruy ka kobu gaga meniq nklaan hido. 6Mn2 miyuk iyuk ciida de, mptheruy ka kobu gaga meniq toma. Theruy ciida we asi ka phrenang iyuk. 7Kiya de psseli namu kana seediq ciida, asi namu ka miyuk iyuk, kiya we iya phrenang paru hrenang. 8Lqlaqi laqi Aharon gaga ngalan msapuh ka mpiiyuk iyuk nii. Nii we ngalun namu gaya betaq ani knuwan yamu ka nii. 9Meniq namu dxeral namu ma, mccebu namu pais tnraqil yamu ciida we, asi namu ka phrenang paru hrenang iyuk nii. Kiya de mplngelung yamu ka Utux Tmninun, Utux Baro namu ma, mpdoi baga yamu mpeeyah pais namu uri. 10Ali qrasun, smseman ma tgkingal ali knkingal idas, kiya ka mege namu snapuh sqmaun ma snapuh ptbale ciida, asi namu ka miyuk iyuk. Kiya ka mplngelung yamu meniq berah Utux Tmninun. Yaku we Utux Tmninun, Utux Baro namu.”
Mlatac Peeyah dgiyaq Sinay
11Ali 20 idas 2 tg2 knkawas, bobo mnkala baro peeyah kobu mrtaso ka plabu. 12Mlatac peeyah tadus brenux Sinay ka seediq Israel ma theruy mquri berah. Plabu we msange tadus brenux Paran. 13Dheya we muyu kari Utux Tmninun tnugesa na Moseh texal bale mquri berah theruy ka dheya. 14Plaale ba theruy we pnskraya pnslawa seediq Yehudah. Mpdudul na we Naxson laqi Aminadab. 15Dmnudul pnswayan rudan Yisaskar we Netanel laqi Cuar. 16Mpdudul pnswayan rudan Jebulun we Eliyab laqi Xelon.
17Bobo mhedu hmurah kobu mrtaso de lqlaqi laqi Gerson ma Merariy we mpheal kobu mrtaso theruy. 18Mpsnegul na we pnskraya pnslawa seediq Reuben. Mpdudul na we Elicur laqi Sedeyur. 19Mpdudul pnswayan rudan Simeon we Selumiel laqi Curisaday. 20Mpdudul pnswayan rudan Gad we Elyasap laqi Deuel.
21Mquri berah theruy mheal qyqeya mntaso ka seediq Qahat. Ini dehuk ka dheya na we asi ka tena mhedu pheyu ka kobu mrtaso. 22Bukuy mpsnegul na we pnskraya pnslawa seediq Eprayim. Mpdudul na we Elisama laqi Amihud. 23Mpdudul pnswayan rudan Menaseh we Gamliel laqi Pedahcur. 24Mpdudul pnswayan rudan Binyamin we Abidan laqi Gidiuni.
25Mpqlahang quri bukuy mpthiti na we pnskraya pnslawa seediq Dan. Mpdudul na we Axiejer laqi Amisaday. 26Mpdudul pnswayan rudan Aser we Pagiel laqi Okran. 27Mpdudul pnswayan rudan Naptaliy we Axira laqi Eynan. 28Seediq Israel we so nii mssunegul theruy mosa mquri berah ka dheya.
29Rmengo mtswai na, Xobab laqi Reuel seediq Midyan ka Moseh: “Yami we ptheruy miyan quri berah, maha miyan dxeral tnugesa Utux Tmninun. Rnengo ka heya: ‘Bege mu yamu ka dxeral nii.’ Saya de, theyaq yami mosa. Mpsbleyaq miyan yamu ka yami. Ado tena sntangan bbege qqbleyaq seediq Israel ka Utux Tmninun.” 30Rmengo ka Xobab: “Uxe ku maha. Mpbrinah ku mosa tndxeral mu ma tnpusu rudan mu.” 31Rmengo ka Moseh: “Iya ba alix yami. Ado mpkobu nami tadus brenux ka yami de, maha namu qmlahang kenan ka yamu. 32Nasi su theyaq menan mosa ka isu ge, nexal we smbleyaq maanu ka Utux Tmninun we, maha so kiya snbleqan nami yamu uri.”
Mquri Berah Theruy ka Kulu Pnsdhegan ma Seediq
33Seediq Israel we mlatac peeyah dgiyaq Utux Tmninun mquri berah theruy mk3 ali mkkesa. Mk3 ali meniq berah ttheruy ka kulu pnsdhegan Utux Tmninun. Mosa migin dxeral sngayun daha. 34Theruy mquri berah ka dheya, diyan we niqan ka plabu Utux Tmninun meniq bobo baro daha. 35Mquri berah theruy ka kulu pnsdhegan ciida, rmengo ka Moseh:
“Utux Tmninun! Ani ba rabang tutuy!
Tai so pqduriq ka pais su!
Tai so qduriq peeyah berah su ka seediq tmraqil isu!”
36Msange ka kulu pnsdhegan ciida de, rmengo ka heya:
“Utux Tmninun nknhbragan seediq Israel! Ani ba rabang eyah ka isu!”
Currently Selected:
Spegan 10: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020