Spegan 20
20
Qsiya Meribah
(Lnt 17:1-7)
1Tgkingal idas, betaq tadus brenux Cin ka kana seediq Israel. Pkobu meniq Qades ka dheya. Mhuqil hiya ka Miryam ma skuun daha hiya. 2Uka qsiya ka kana seediq dema, meyah msseli smeriq quri Moseh ma Aharon ka dheya. 3Smeriq smnetur Moseh ka seediq, rmengo: “Nuuqu msuupu mhuqil mtswai ta meniq berah Utux Tmninun ka ita. 4Hmuwa namu ba dmudul dseediq Utux Tmninun betaq tadus brenux nii. Phqilun su hini ka dyami ma tnubugan nami peni? 5Hmuwa, ma namu dmudul menan platac peeyah Micrayim, pdhekun namu dxeral uka brihan nii ho? Dxeral nii uka tkuyun. Uka ka qhuni nunuh, lipas ma, qutirodux. Ani qsiya uka uri.”
6Mlatac peeyah seediq ka Moseh ma Aharon, mosa rhengun kobu mrtaso ma tgtemaq dxeral ka dqeras daha. Msquri dheya pledax ka ledax Utux Tmninun. 7Rmengo Moseh ka Utux Tmninun: 8“Adis hukuc su, theyaq Aharon qbsuran su sai psseli ka dseediq. Eniq berah daha ma peeyah qsiya kesi ka tasil. Kiya de meyah asi criyu peeyah tasil ka qsiya. Pmahi ka kana seediq ma tnbugan daha.”
9Moseh we muyu kari Utux Tmninun moda ka heya ma, mosa mangal hukuc peeyah berah Utux Tmninun. 10Moseh ma Aharon we psseli seediq meyah berah tasil. Rmengo dheya ka Moseh: “Qbahang, dyamu seediq mptbrinah nii! Yami we mplawa nami tasil so mpheru qsiya piimah miyan yamu peni?” 11Pheyu baga ka Moseh ma, mn2 smebuc tasil ka hukuc na. Kiya de asi heru ka egu ba qsiya, wada mimah kana ka seediq ma tnbugan daha da. 12Kiya de rmengo Moseh ma Aharon ka Utux Tmninun: “Ado namu ini snhii kenan ma, ini namu psparu prtaso kenan meniq berah seediq Israel, kiya de yamu we uxe namu mpdudul dseediq nii mremux dxeral bnege mu dheya.” 13Kiya ka qsiya Meribah ka nii. Ado smeriq smnetur Utux Tmninun ka seediq Israel ma, Utux Tmninun we ptuura knrtaso na meniq berah daha ka heya.
Ini Sruwa Pooda ka Qbsuran Paru Edom
14Smkagul snkgulan peeyah Qades mosa qbsuran paru Edom hiya ka Moseh. Rmengo: “Mtswai su Israel we so nii kari na. Klaun su ka kana ndaan miyan mqraqil. 15Ddrudan cbeyo we mnosa Micrayim ma, bsiyaq miyan knkawas meniq dxeral hiya. Ani so kiya, seediq Micrayim we tmraqil yami ma ddrudan nami. 16Mlawa miyan Utux Tmninun de, mbahang hrenang miyan ka heya. Smkagul snkgulan na dmnudul menan mlatac peeyah Micrayim. Tai! Betaq miyan Qades ssiyo ayus qlhangan su. 17Braho misu pdai miyan hmrinas dxeral su. Uxe miyan mooda ckceka qnpahan ma qnpahan lipas, uxe miyan miimah qsiya gaga kbbulan uri. Wano elu paru ka daun miyan, uxe miyan mpridil betaq miyan hmrinas ayus dxeral su.”
18Kiya de, cmiyuk heya ka qbsuran paru Edom: “Iya oda hmrinas hini ka isu! Nasi su moda de, mdoi ku hlmadac mphuqil ku isu ka yaku.” 19Rmengo heya ka dseediq Israel: “Wano elu paru ka daun miyan. Nasi mnimah qsiya namu ka yami ma tnbugan miyan de mbege miyan pila. Uxe miyan mppesa maanu, wano nanak mtnooda mkkesa hmrinas hiya nanak.” 20Rmengo ka seediq Edom: “Iya oda hiya!” Kiya de madis rahul supi meyah smterung mekan seediq Israel ka heya. 21So kiya de, ini sruwa pooda dxeral daha ka dseediq Edom. Kiya de pspgeriq ka seediq Israel ma, mlatac heya da.
Mgedang ka Aharon
22Kndalax Qades betaq dgiyaq Hor ka kana dseediq Israel. 23Meniq dgiyaq Hor ayus dxeral Edom de, rmengo Moseh ma Aharon ka Utux Tmninun: 24“Aharon we mptuumal dpusu rudan na ka heya da. Heya we uxe mpremux dxeral bbege mu dseediq Israel ka heya. Ado wada namu tbrinah pnosa mu kari quri qsiya Meribah hiya ka yamu. 25Isu we adis dgiyaq Hor ka Elajar laqi Aharon. 26Lhlahi ka lukus mrtaso Aharon, plkusi Elajar laqi na. Maha ka heya ma, mphuqil hiya ka heya.” 27Kiya de muyu kari Utux Tmninun moda ka Moseh. Meniq berah kana seediq steetu Dgiyaq Hor ka dheya. 28Moseh we lhlahun na ka lukus mrtaso Aharon ma, plkusun na Elajar laqi na. Kiya de mhuqil bungu dgiyaq hiya ka Aharon da. Bobo na, hmeruc peeyah dgiyaq ka Moseh ma Elajar. 29Klaun daha wada mhuqil ka Aharon de, mk30 ali tsdamac lmingis heya kana seediq Israel.
Currently Selected:
Spegan 20: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020