Spegan 19
19
Qbulic Bubu Dapa Mtanah
1Rmengo Moseh ma Aharon ka Utux Tmninun: 2“Ckceka rnengo gaya Utux Tmninun hiya we, niqan 1 gaya so nii ka rnengo na: Tgsai ka seediq Israel, desi hini ka 1 bubu dapa mtanah mtbeno, uka luqah ma, uxe pnaapa kudo nduyung. 3Biqi Elajar msapuh ka dapa nii. Heya de desun na bukuy kobu pphuqil na berah seediq hiya. 4Elajar msapuh we mptelung dara dapa nii ka tluling baga na ma, pqriun na kobu mrtaso srehak na mn7. 5Asi ka sqmaun berah daha ka bubu dapa nii. Psqmaun kana ka qraqil, heyi, dara ma quti na. 6Psqmaun bobo puniq qulic bale ka dapa nii, waso dapa ma, snuyuk mtanah. 7Asi ka mahu lukus ka msapuh ma, trima heyi na ka msapuh, kiya ka tduwa mremux truma kobu. Mrutiq betaq keeman ka msapuh. 8Dseediq pnsqama dapa we asi ka mahu lukus daha uri ma trima heyi. Mrutiq betaq keeman ka dheya. 9Seediq bgurah na we, kiya ka meyah psseli qbulic bubu dapa ma, saun na posa bgurah nniqan nganguc kobu. Nii we psramal dooyun daha psbgurah rutiq qsiya dseediq Israel. Dooyun daha pkuuka qnquwan noda ka nii. 10Seediq mnosa mangal qbulic we asi ka mahu lukus, mrutiq betaq keeman. Pnugaya ani betaq knuwan dseediq Israel ma dseediq tnooda ckceka namu ka nii.
11Seediq tmnelung heyi mnhuqil we mk7 ali mrutiq. 12Seediq kiya we asi ka moda psbgurah heya nanak meniq tg3 ma tg7 ali. Kiya de bgurah ka heya da. Nasi ini oda psbgurah heya nanak meniq tg3 ma tg7 ali ka heya de, mrutiq ka heya na. 13Kana tmnelung heyi mnhuqil, kiya ka heyi wada mhuqil ma, ini oda psbgurah heya nanak dungal we, gisu psrutiq kobu mrtaso Utux Tmninun ka heya. Seediq nii we asi ka pkngalun peeyah ckceka Israel kiya. Ado qsiya psbgurah rutiq nii we ini brsani heyi na. Kiya de ini pkbgurah ka heya ma, gaga meniq heyi nana ka rutiq na.
14Nasi mnhuqil truma kobu ka seediq, so nii ka gaya na. Kana mnremux kobu ka seediq ma, dseediq mneniq ckceka kobu we, asi ka mrutiq mk7 ali. 15Ini bkei negul ma gmukun ka kana qyqeya we ini pkbgurah uri. 16Kana tmnelung heyi pnhuqil hlmadac seediq, uxe uri we heyi wada mhuqil, buuc seediq ma, habung we ini pkbgurah mk7 ali. 17Ngali qbulic psbgurah rutiq ka seediq ini pkbgurah nii. Posa toma rusuq ma ngali qsiya bgurah. 181 seediq uka rutiq we mangal waso dapa rbegun na qsiya nii ma, pqriun na kobu, kana qyqeya ma, kana heyi seediq mneniq truma kobu hiya merus qsiya. Dungal we reesun na qsiya ka dseediq tmnelung buuc, heyi pnhuqil ma, mnhuqil na, uxe uri we heyi dseediq tmnelung habung. 19Seediq bgurah kiya we asi ka meniq tg3 ma tg7 ali ciida moda merus qsiya heyi dseediq ini kbgurah. Tg7 ali ciida de pkbgurah ka seediq kiya. Seediq kiya we, asi ka mahu lukus ma, trima heyi. Betaq keeman de pkbgurah ka heya da. 20Kiya de kana seediq ini kbgurah we, nasi ini oda pkbgurah dheya nanak de, asi ka pkngalun peeyah ckceka rahul ka heya. Ado smrutiq kobu mrtaso Utux Tmninun ka heya. Qsiya psbgurah rutiq we ini bresi heyi na. Kiya de ini pkbgurah ka heya. 21Gaya mpbetaq ani knuwan ka nii. Kiya uri we, seediq mnoda psbgurah rutiq dseediq we, asi ka mahu lukus na uri. Kana tmnelung qsiya psbgurah rutiq we, asi ka ini pkbgurah betaq keeman. 22Kana qyqeya tnelung seediq ini pkbgurah we ini kbgurah kiya. Seediq tmnelung qyqeya nii we maha ini kbgurah betaq keeman.”
Currently Selected:
Spegan 19: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020