Spegan 18
18
Qpahun Msapuh ma Qpahun Dseediq Lewiy
1Rmengo Aharon ka Utux Tmninun: “Isu ma lqlaqi su, kiya uri ma dseediq tnsapah tama su we, asi ka msuupu mapa qnquwan noda mrtaso truma. Isu ma lqlaqi su we asi ka mapa qnquwan noda namu quri qpahun msapuh. 2Adis ka seediq Lewiy mtswai su, kiya ka dseediq pnswayan rudan namu, maha mtheyaq isu ma mdayo sunan. Isu ma lqlaqi su we mptheyaq namu meniq berah kulu pnsdhegan kobu mrtaso ka yamu. 3Mpuyu tnugesa su ka dheya ma, mpqlahang kana kobu mrtaso ka qqpahun daha. Kiya de uxe mphuqil ka dheya ma dyamu. 4Mdayo sunan ka dheya ma, mpqlahang kobu mrtaso ma kana ooda ckceka kobu mrtaso ka qpahun daha. Kiya de, iya bale psdlingi yamu ka seediq icil. 5Mpqlahang namu truma mrtaso ma spuhan ka yamu. Kiya ka uxe meeyah seediq Israel ka seang. 6Tai! Gmnao ku seediq Lewiy mtswai namu peeyah ckceka seediq Israel. Bbege mu yamu ma nuUtux Tmninun mqeepah ooda ckceka kobu mrtaso. 7Qlahang bale meepah msapuh ma kana ooda spuhan ma ddaun ckceka kobu mrtaso. Sbege mu yamu ka qpahun msapuh, bnege mu yamu kiya ka tduwa namu qmeepah kenan. Kana seediq meyah smdaling na we asi ka phqilun.”
Ngngalun Msapuh ma Seediq Lewiy
8Rmengo Aharon ka Utux Tmninun: “Tai! Gisu mu sbege yamu qmlahang snapuh pheyu, kiya ka kana qyqeya pnsnakan mrtaso dseediq Israel. Bege mu isu ma lqlaqi laqi su ka snapuh abura ma, ngalun namu ani betaq knuwan ka nii. 9Sbege mu yamu pneeyah ckceka snapuh mrtaso ka nii. Kana mrtaso riyung snapuh daha pnhgalang, snapuh psruwa qnquwan noda, snapuh prtaso qnquwan, kiya ka kana ini dai psqama snapuh ckceka nii we, mpnisu ma lqlaqi laqi su. 10Ngali uqun mrtaso ma ekan ka kiya. Kana rseno we ani nak mekan. Isu we ngali mrtaso ka snapuh nii. 11Snapuh pheyu ma snapuh slgelu dseediq Israel we nisu uri. Wada mu sbege isu ma, lqlaqi su ma ngngalun namu betaq ani knuwan ka nii. Kana dseediq bgurah tnsapah namu we ani namu nak mekan kana. 12Kana malu ba abura bgurah, malu ba sino bgurah ma, pnhgalang, kiya ka pnhgalang hani mghei bege Utux Tmninun we, bege mu sunan kana. 13Kana bnege daha Utux Tmninun pnhgalang hani mghei pneeyah dxeral we nnisu uri. Kana dseediq bgurah tnsapah namu we mekan kana. 14Kana snapuh bnege dseediq Israel we mpnisu kana. 15Kana bnege daha snapuh Utux Tmninun, ani seediq ma tnbegan, pnlale ba mtuting we maha nisu kiya. Tgqbsuran seediq we, asi ka prihun maruy kiya. Tnbugan pnlaale mtuting uxe bgurah we, asi ka prihun maruy uri. 16Bobo mntuting 1 idas we, asi ka mpuyu pnrngagan skere kobu mrtaso mbege 5 skere ging mpririh maruy ka heya. 17Kiya de wawa dapa pnlaale mtuting, miric rudu ma, miric we iya brihi maruy kiya. Ado mrtaso ka dheya. Asi ka brsanun spuhan ka dara daha, daruk na we psqmaun ma ngalun snapuh pskenux bbege Utux Tmninun kiya. 18Heyi daha we mpnisu kiya. Mntena so heyi teerang slgelu ma heyi pheyu bteriq tgnarac we mpnisu kiya. 19Kana mrtaso snapuh Utux Tmninun ckceka snapuh pheyu pneeyah kana seediq Israel we, bege mu isu ma lqlaqi su ani betaq knuwan ngngalun namu ka nii. Sndhegan timu isu ma laqi ltlutuc su meniq berah Utux Tmninun ani betaq knuwan ka nii.” 20Rmengo Aharon ka Utux Tmninun: “Iya angal dxeral peeyah dxeral seediq Israel ka isu ma, mpuuka ka namu meniq ckceka daha. Meniq ckceka seediq Israel we nnamu ma ngngalun namu we yaku.”
21“Quri so lqlaqi laqi seediq Lewiy, qtai! Wada mu sbege dheya ka kana 1 tnugmxalan bnege dseediq Israel. Nii we snadu qnpahan daha kobu mrtaso. 22Seediq Israel de iya smdaling kobu mrtaso da, so namu uxe mphuqil mapa qnquwan noda namu. 23Wano dseediq Lewiy nanak ka mpqeepah qpahun kobu mrtaso. Dheya we mpheal qnquwan noda ka dheya ma, gaya namu betaq ani knuwan. Dheya we uxe pdoi pusu dnoi ckceka seediq Israel. 24Ado 1 tnugmxalan pnhgalang dseediq Israel we, kiya ka snapuh pheyu bnege daha Utux Tmninun ge wada mu sbege ddoi dseediq Lewiy kiya di. Kiya ka rmengo ku dheya: Uxe pdoi dxeral pusu dnoi dseediq Israel ka dheya.”
Bbege 1 Tnugmxalan Dseediq Lewiy
25Rmengo Moseh ka Utux Tmninun: 26“Tgsai ka seediq Lewiy ma, rngagi ka dheya: Nangal namu 1 tnugmxalan peeyah seediq Israel we, kiya ka pusu dnoi bnege mu yamu. Angal 1 tnugmxalan bnege daha nii ma, ngali snapuh pheyu mege Utux Tmninun. 27Nii we snapuh namu pheyu ka nii. Mntena so mugi meniq qnpahan ma, asu sino we stngayan pstenge sino. 28Maanu so kiya de, kana nagal namu 1 tnugmxalan peeyah seediq Israel we, ngali duma ckceka hiya ngali snapuh pheyu bege Utux Tmninun. Snapuh pheyu bnege namu Utux Tmninun we maha bege Aharon msapuh kiya. 29Psaanak prtaso ma geegi peeyah kana bnege namu ka tgmalu riyung na. Kiya ka ngali snapuh pheyu bege Utux Tmninun. 30Rngagi ka dseediq Lewiy: Bobo namu bnege tgmalu riyung snapuh pheyu ciida de, maha nnamu ka mnsngari uqun mneniq qnpahan ma sino mneniq asu sino na hiya 31Yamu ma tnsapah namu we ani namu uqun ani inu. Ado bbege mu yamu ka nii ma, snadu mu yamu qneepah namu kobu mrtaso ka nii. 32Betaq namu mege malu riyung snapuh pheyu de, uxe namu mpheal qnquwan noda ka yamu da. So namu uxe mphuqil, iya bale srtiqi ka qyqeya mrtaso nseediq Israel.”
Currently Selected:
Spegan 18: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020