Spegan 25
25
Thmuku Baal Meniq Peor
1Meniq Sitim ciida ka seediq Israel we, prading mmhemuc msuupu dweewa seediq Moab. 2Dweewa nii we madis seediq mosa mege snapuh utux daha. Mnekan snpuhan daha ka seediq ma, thmuku utux daha ka dheya uri. 3Niqan pnugluban daha Baal Peor ka Israel de, mquri Israel mseang ka Utux Tmninun. 4Rmengo Moseh ka Utux Tmninun: “Qeraq kana ka dqbsuran mdudul Israel. Psquri hido pqeya mekuy dheya meniq berah mu. Betaq mtlebu ka seang mu Israel.” 5Kiya de rmengo dmpsgao Israel ka Moseh: “Nasi niqan pnugluban Baal Peor ka dseediq su we, phuqil nanak yamu ka dheya.” 6Gisu lmingis rhengun kobu daha ka Moseh ma kana seediq Israel. Tai! Niqan 1 seediq Israel, madis 1 mqedil seediq Midyan meyah mtswai na hiya. 7Qmita ka Pinexas laqi Elajar lqlaqi laqi Aharon de, mtutuy peeyah ckceka seediq ma, mangal snbragan ka baga na. 8Smnegul seediq Israel nii mremux betaq truma kobu. Btaqan na smbrangan ka 2 seediq nii. Kiya ka nbuyas seediq Israel ma mqedil nii. Kiya de pnkdira pknarux punu Israel we asi alix da. 9Wada mhuqil pnkdira mnarux punu nii ciida we niqan 2 mang 40'00 heyi.
10Rmengo Moseh ka Utux Tmninun: 11“Pinexas laqi Elajar lqlaqi laqi Aharon msapuh ge, wada pbrinah seang mu quri seediq Israel ka heya da. Ado meniq ckceka daha we, wada na ngalun snhuur na ka snhuuran mu, ini ku eniq snhuuran mu phuqil seediq Israel ka heya. 12So kiya de, mprengo su: ‘Tai! Bbege mu sunan ka pnsdhegan msbleyaq. 13Pnsdhegan heya ma laqi ltlutuc na betaq ani knuwan mpqeepah msapuh ka nii. Ado ririh Utux Baro ka snhurun na. Heya ka wada pririh smruwa qnquwan noda seediq Israel.’”
14Wada pspuun phuqil weewa Midyan ka seediq Israel we, Jimriy ka ngayan na, laqi Salu ma, qbsuran mdudul 1 sapah Simeon. 15Weewa Midyan wada phqilun kiya we, Kojbiy ka ngayan na ma, laqi mqedil Cur. Cur we qbsuran mdudul 1 sapah Midyan ka heya.
16Rmengo Moseh ka Utux Tmninun: 17“Sai psqrinuc ka seediq Midyan ma, phqili ka dheya. 18Ado dheya we wada smeeliq yamu meniq oda Peor ma weewa daha ma, mberiq yamu meniq oda weewa Kojbiy qbsuran mpdudul Midyan ka dheya. Meniq ali mnarux punu ciida, ririh oda Peor nii wada phqilun ka weewa nii.”
Currently Selected:
Spegan 25: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020