Spegan 27
27
Dweewa Celapxad
1Dpusu rudan Menaseh lqlaqi Yosehu we, niqan ka lqlaqi laqi Menaseh, lqlaqi laqi Makir, laqi laqi Gilad, laqi Xeper dweewa lqlaqi mqedil Celapxad we Maxlah, Noah, Xoglah, Milkah ma Tircah. Meyah kana ka dheya. 2Mheyu rhengun kobu mrtaso ka dheya ma, meniq berah Moseh, Elajar msapuh, dqbsuran mdudul ma kana seediq ka heya. Rmengo: 3“Tama miyan ge, wada mhuqil tadus brenux. Ini miyan theyaq Qorax tnbrinah Utux Tmninun ka dyami. Mnhuqil ckceka qnquwan noda miyan nanak ka yami. Heya we uka laqi na rseno 4Hmuwa ririh uka rseno ka tama miyan we, wada asi pkngali peeyah pusu rudan na ka ngayan na ho? Braho namu bale, peeniq ckceka mtswai tama mu hiya psugi miyan dxeral ka yami uri.”
5Kiya de, Moseh we adis na berah Utux Tmninun ka ooda nii. 6Rmengo Moseh ka Utux Tmninun: 7“Bale niqan elu ka kari dweewa lqlaqi Celapxad. Asi su ka pssugun dxeral meniq ckceka mtswai tama na ka dheya uri. Biqi dheya ka dxeral ntama daha. 8Tgsai ka dseediq Israel uri: ‘Wada mhuqil ka seediq, nasi uka ka laqi na rseno de, asi ka sbege laqi na mqedil ka dxeral.’ 9Nasi uka ka laqi na mqedil de, biqi mtswai na rseno ka dxeral. 10Nasi uka ka mtswai na rseno we biqi mtswai rseno tama na ka dxeral. 11Nasi uka ka mtswai rseno tama na ge, asi ka biqun tgdaling ba lutuc na ka pllutuc dxeral. Kari pndakar ma gaya bneku seediq Israel ka nii. Pnuyu tnugesa Utux Tmninun rnengo na Moseh.”
Geegan Mplutuc Moseh ka Yehosua
(Meg 31:1-8)
12Rmengo Moseh ka Utux Tmninun: “Osa mnkala dgiyaq Abarim. Qtai ka dxeral bbege mu seediq Israel. 13Bobo su qmnita de asi su ka mquri ddrudan su hiya ka isu da. Mntena so wada saun Aharon mtswai su. 14Ado su mneniq Cin tadus brenux hiya ciida we, wada su ini qbahang kari rnengo mu tbrinah smnetur kenan ka seediq ciida. Noda so mangal qsiya nii we ini su prtaso psparu kenan meniq berah seediq ciida.” Qsiya ckceka Cin tadus brenux ka nii, kiya ka qsiya Meribah dxeral Kadis.
15Rmengo Utux Tmninun ka Moseh: 16“Tai so Utux Tmninun, Utux Baro bnege hengak kana seediq we, phyegi ka 1 seediq mpdudul kana seediq. 17Kiya de meeniq ckceka seediq ma mpdudul kana seediq. Kiya de uxe pntena so miric uka seediq mtabu miric ka dseediq Utux Tmninun.” 18Rmengo Moseh ka Utux Tmninun: “Yehosua laqi Nun we niqan Bgihur Utux. Adis hini ka heya ma, psai baga su ka tunux na. 19Phyegi berah Elajar msapuh ma berah kana seediq biqi qpahun ka heya. 20Kiya uri ma biqi heya duma ka beyax su, so maha mbahang heya ka dseediq Israel. 21Asi ka mheyu berah Elajar ka heya. Elajar we mpdoi Uring smeung ma, mpsiling quri heya meniq berah Utux Tmninun. Heya ma kana seediq Israel we asi ka mbahang tnugesa Elajar kana.” 22Kiya de muyu tnugesa Utux Tmninun moda ka Moseh. Desun na ka Yehosua ma, phyegun na berah Elajar msapuh Utux ma berah kana seediq ka heya. 23Psaun na baga ka tunux na ma, sbege na qpahun. Pnuyu na tnugesa Utux Tmninun rnengo Moseh ka nii.
Currently Selected:
Spegan 27: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020