Spegan 8
8
7 Sara Pcmagan
1Rmengo Moseh ka Utux Tmninun: 2“Isu we rngagi ka Aharon: Pcamo su ciida, 7 sara pcmagan we asi ka pkledax berah pcmagan ka ledax.” 3Aharon we muyu moda ka heya. Heya we pcamo ma, pkledax berah pcmagan. Mntana Utux Tmninun rnengo na Moseh. 4So nii ka smmalu pcmagan: Tntingan king ka pccmagan phepah ma pnsqapah tluungan na we tntingan kana. Moseh we muyu tnugesa Utux Tmninun smalu pcmagan ka heya.
Gaya Psbgurah ma Bbege Seediq Lewiy
5Rmengo Moseh ka Utux Tmninun: 6“Geegi peeyah ckceka seediq Israel ka seediq Lewiy ma psbgrahi ka dheya. 7Mooda su so nii psbgurah dheya: Reesi qsiya bgurah ka heyi daha. Kiya ma kgusi kana ka ubal heyi daha. Kiya de phei ka lukus ma psbgurah dheya nanak. 8Kiya de mangal 1 wawa dapa balas ma nemu mugi gnmaxan abura curung ngalun snapuh mege pnhgalang. Dungal we desi 1 wawa dapa balas ngalun snapuh psruwa qnquwan noda. 9Isu we desi berah kobu mrtaso ka seediq Lewiy. Kiya ma psseli kana ka seediq Israel. 10Isu ka maadis seediq Lewiy mosa berah Utux Tmninun. Kiya de mposa baga tunux dseediq Lewiy ka baga dseediq Israel. 11Aharon we, ngalun na snapuh slgelu bege na berah Utux Tmninun ka seediq Lewiy peeyah ckceka seediq Israel. Kiya ka ani nak meepah qpahun daha Utux Tmninun ka dheya. 12Seediq Lewiy we asi ka posa tunux 2 dapa balas ka baga daha. 1 we ngalun daha snapuh psruwa qnquwan noda, 1 we ngalun daha snapuh psqama bbege daha Utux Tmninun mpririh psruwa qnquwan noda seediq Lewiy. 13Isu ge, pheyu berah Aharon ma lqlaqi na ka seediq Lewiy. Ngali so snapuh slgelu sbege Utux Tmninun ka dheya.
14Psnaki peeyah ckceka seediq Israel ka seediq Lewiy. Seediq Lewiy we nnaku kiya da. 15Bobo wada psbgrahun ka seediq Lewiy ma mhedu smapuh snapuh slgelu de, malu ka mremux meepah qpahun kobu mrtaso ka dheya. 16Ado dheya we wada sbege bale kenan peeyah ckceka seediq Israel ka dheya. Gneegan mu mpnaku ka dheya. Mpririh kana qbsuran ba laqi seediq Israel ka dheya. 17Ado kana pnlaale ba mtuting pneyah seediq Israel we, ani seediq ma tnbugan we nnaku kana. Phuqil ku kana pnlaale ba mtuting meniq dxeral Micrayim ali ciida de, tena mu pnsnakan mpnaku ka dheya. 18Yaku we gmao ku seediq Lewiy mpqbsuran ba laqi mpririh kana seediq Israel ka dheya. 19Speeyah mu ckceka seediq Israel bbege mu Aharon ma lqlaqi na ka seediq Lewiy. Dheya ka mpqeepah seediq Israel meniq ckceka kobu mrtaso. Kiya uri ma mpsruwa qnquwan noda dseediq Israel. So uxe maangal snliqan smdaling nniqan mrtaso ka seediq Israel.”
20Moseh, Aharon ma, kana seediq Israel we wada so nii moda quri seediq Lewiy ka dheya. Quri so seediq Lewiy, kana so kari Utux Tmninun rnengo na Moseh, seediq Israel we muyu so nii moda ka dheya. 21Kiya de seediq Lewiy asi ka psbgurah dheya nanak peeyah qnquwan noda ma mahu lukus daha. Aharon we ngalun na snapuh slgelu sbege na berah Utux Tmninun ka dheya. Kiya uri ma psruwa qnquwan noda daha ma, psbgurah dheya. 22Bobo na de mpremux mosa truma ka seediq Lewiy, mqeepah kobu mrtaso meniq berah Aharon ma lqlaqi na ka seediq Lewiy. Quri seediq Lewiy we, hmuwa mesa kari Utux Tmninun rnengo na Moseh de, so kiya ka daun daha mquri seediq Lewiy.
23Rmengo Moseh ka Utux Tmninun: 24“Quri so seediq Lewiy ka nii: Kana hmrinas 25 knkawas ka seediq Lewiy we asi ka meyah qmeepah qpahun kobu mrtaso. 25Betaq 50 knkawas de asi ka malix peeyah qnpahan daha ka dheya, uxe mpqeepah da. 26Wano mdayo psbeyax mtswai daha meepah kobu mrtaso truma hiya ka dheya. Uxe mqeepah ka dheya di. Quri so qqpahun seediq Lewiy we, puyu so nii moda dheya ka isu.”
Currently Selected:
Spegan 8: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020