Spegan 9
9
Snseman Hrnasan Meniq dgiyaq Sinay
1Bobo mnlatac peeyah dxeral Micrayim ka seediq Israel, idas 1 tg2 knkawas ciida, rmengo Moseh meniq Sinay tadus brenux hiya ka Utux Tmninun: 2“Seediq Israel we asi ka moda smseman hrnasan meniq ali tnugesa mu. 3Yamu we asi namu ka pkelu ali 14 idas nii, peeyah wada priyax ribaq ka hido de, asi ka muyu kana kari pndakar ma gaya bneku moda namu smseman hrnasan.” 4Kiya de Moseh we posa kari seediq Israel ooda daha smseman hrnasan.
5Gbiyan ali 14 tgkingal idas ciida, moda smseman hrnasan tadus brenux Sinay hiya ka dheya. Kana kari Utux Tmninun tnugesa na Moseh we, wada moda muyu kana ka seediq Israel. 6Duma seediq mrutiq tmnelung seediq mnhuqil we asi ka ini oda smseman hrnasan. Ali ciida meyah berah Moseh ma Aharon ka dheya. 7Rmengo dheya ka dseediq kiya: “Ado mnhuqil nii wada nami mrutiq ka yami. So kiya de, ma namu hmetur kenan, ini srwai mtheyaq seediq Israel mege bbege Utux Tmninun ali nii ho?” 8Rmengo dheya ka Moseh: “Tara han, Sae mu mbahang, teta maanu ka tnugesa na yamu ka Utux Tmninun.”
9Rmengo Moseh ka Utux Tmninun: 10“Rngagi ka seediq Israel: Yamu ma lqlaqi laqi namu nexal, nasi duma seediq ado mnhuqil wada mrutiq ka dheya, uxe uri we mquri theya nganguc we, asi ka moda smseman hrnasan quri Utux Tmninun. 11Dheya we asi ka meniq ali 14 idas 2 keeman ciida moda smseman hrnasan. Mekan heyi wawa miric, pang ini psai tgeda ma, sama mngihur. 12Asi ka ini daha rngii betaq mgrebu ka ani maanu. Buuc wawa miric we iya bale gremi. Mpuyu kana gaya smseman hrnasan moda smmesung ka dheya. 13Kiya de, bgurah ma ini osa theya ma ini oda smseman hrnasan we, asi ka pkngalun peeyah ckceka seediq ka dheya. Ado dheya we ini bege snapuh daha Utux Tmninun ali ciida. Kiya de asi ka mapa qnquwan noda daha ka dheya. 14Nasi tnooda meniq yamu hiya ka seediq icil we, asi ka moda smseman hrnasan quri Utux Tmninun uri. Heya we mpuyu kana kari pndakar ma gaya bneku smseman hrnasan moda. Ani tnooda hiya ma seediq icil we asi ka mntena muyu kana gaya.”
Mubung Kobu Mrtaso ka Plabu
(Lnt 40:34-38)
15Pheyu kobu mrtaso ciida, niqan ka plabu meyah muubung kobu mrtaso, kiya ka kobu gaga psaun kulu pnsdhegan. Peeyah keeman betaq mgrebu, meniq nanak bobo kobu mrtaso, mntena so puniq ka hnyegan na. 16So kiya klaali, meyah mubung kobu mrtaso ka plabu, keeman we mntena so puniq hnyegan na ka plabu. 17So knuwan mkala baro peeyah kobu mrtaso ka plabu de, kiya ka ali kksaun daha seediq Israel. Msange inu ka plabu de, pkobu inu ka seediq Israel. 18Seediq Israel we muyu tnugesa Utux Tmninun ka dheya. Kiya we muyu tnugesa Utux Tmninun pkobu ka dheya uri. Msange knhenu qnbsyaqan ka plabu de, muyu so kiya pkobu meniq hiya ka dheya uri. 19Bsiyaq hari mnsange bobo kobu mrtaso ka plabu, seediq Israel we muyu tnugesa Utux Tmninun ini theruy ka dheya. 20Duma na we ini kpiya ali msange bobo kobu mrtaso ka plabu, muyu tnugesa Utux Tmninun meniq truma kobu ma, muyu tnugesa Utux Tmninun theruy ka dheya. 21Duma na plabu we meniq hiya peeyah keeman betaq mgrebu. Mgrebu de mkala baro da. Kiya de theruy ka dheya. Ani gbbiyan ma ani rabi keeman, nasi mkala baro ka plabu de, kiya ka theruy ka dheya. 22Ani mk2 ali, 1 idas, uxe uri we bsiyaq ali msange bobo kobu mrtaso ka plabu de, ini theruy meniq kobu ka seediq Israel. Kiya de nasi mkala baro ka plabu de, asi theruy ka dheya. 23Muyu tnugesa Utux Tmninun moda pkobu ka dheya. Kiya we muyu tnugesa Utux Tmninun theruy ka dheya uri. Muyu tnugesa Utux Tmninun ka dheya, nii we kari Utux Tmninun tnugesa na Moseh.
Currently Selected:
Spegan 9: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020