ಮತ್ತಾಯೆ 13
13
ಬೆನ್ನಿದಾಯನ ಉಪಕತೆ
(ಮಾರ್ಕೆ 4:1-9; ಲೂಕೆ 8:4-8)
1ಆ ದಿನೊಟು ಯೇಸು ಇಲ್ಲಡ್ದ್ ಪಿದಾಡ್ದ್ ಕಡಲ್ದ ಕರೆಟ್ ಕುಲ್ಲೊಂಡೆ. 2ಒಂಜಿ ಮಲ್ಲ ಜನೊಕುಲೆ ಗುಂಪು ಆಯನ ಕೈತಲ್‌ ಸೇರ್ದ್ ಬತ್ತಿನೆಡ್ದ್ ಆಯೆ ಓಡ ಮಿತ್ತಾರ್ದ್ ಕುಲ್ಲಿಯೆ. ಆ ಜನೊಕುಲು ಕರೆಟ್ ಉಂತುದಿತ್ತೆರ್. 3ಅಪಗ ಆಯೆ ಅಕ್ಲೆಗ್ ಉಪಕತೆತ್ತ ರೂಪೊಡು ಮಸ್ತ್ ಸಂಗತಿಲೆನ್ ಪಂಡೆ.
“ಕೇನ್ಲೆ, ಬಿತ್ತುನಾಯೆ ಬಿತ್ತಿಯೆರೆ ಪಿದಾಡಿಯೆ. 4ಆಯೆ ಬಿತ್ತ್‌ನಗ ಕೆಲವು ಬಿತ್ತುಲು ಸಾದಿದ ಬರಿಟ್ಟ್ ಬೂರ್‌ಂಡ್. ಪಕ್ಕಿಲು ಬತ್ತ್‌ದ್ ತಿಂದ್‌ದ್ ಬುಡಿಯ. 5ಕೆಲವು ಬಿತ್ತ್ ಮಣ್ಣ್‌ದಾಂತಿ ಪಾದೆದ ನೆಲೊಟ್ಟು ಬೂರ್‌ಂಡ್. ಮಣ್ಣ್ ತೆಲ್ಪು ಇತ್ತಿನೆಡ್ದ್ ಬೇಗ ಮುಂಗೆ ಬತ್ತ್ಂಡ್. 6ಆಂಡ ಸೂರ್ಯನ ದೊಂಬು ಅರ್ಲುನಗ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್ ಬಾಡ್ದ್ ನುಂಗುದು ಪೋಂಡು. 7ಬೊಕ್ಕ ಕೆಲವು ಬಿತ್ತ್ ಮುಳ್ಳುದ ಪುದೆಲ್‌ಡ್ ಬೂರ್‌ಂಡ್; ಮುಳ್ಳುಗಿಡೊಕ್ಲು ಬುಲೆದ್ ಅವೆನ್ ದೆಂಗಾಂಡ್. 8ನನ ಕೆಲವು ಬಿತ್ತ್ ಎಡ್ಡೆ ನೆಲತ ಮಿತ್ತ್ ಬೂರ್ದು ಕೆಲವು ನೂದೆದಾತ್, ಕೆಲವು ಅಜ್ಪದಾತ್, ಕೆಲವು ಮುಪ್ಪದಾತ್ ಫಲ ಕೊರಿಯ.”
9“ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಪಂಡೆ.
ಬೋಧನೆದೊಟ್ಟುಗು ಉಪಕತೆ
(ಮಾರ್ಕೆ 4:10-12; ಲೂಕೆ 8:9,10)
10ಐಡ್ದ್ ಬೊಕ್ಕ ಶಿಷ್ಯೆರ್ ಬತ್ತ್‌ದ್ ಆಯಡ, ದಾಯೆಗ್ ಉಪಕತೆತ್ತ ರೂಪೊಡು ಅಕ್ಲೆಡ ಪಾತೆರುವ ಅಂದ್‌ದ್ ಕೇಂಡೆರ್.
11ಐಕ್ ಆಯೆ ಅಕ್ಲೆಡ, “ಪರಲೋಕ ರಾಜ್ಯದ ಗುಟ್ಟುಲೆನ್ ತೆರಿಯೊನ್ನ ವರ ನಿಕ್ಲೆಗ್ ಕೊರ್ತುಂಡು; ಅಕ್ಲೆಗ್ ಕೊರ್ತ್‌ಜಿ. 12ದಾಯೆ ಪಂಡ ಇತ್ತಿನಾಯಗ್ ದೇವೆರ್ ಹೆಚ್ಚಾದ್ ಕೊರುವೆ, ಆಯಗ್ ನನಲಾ ಹೆಚ್ಚಾಪುಂಡು; ಇಜ್ಜಾಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು. 13ಯಾನ್ ಅಕ್ಲೆಡ ಉಪಕತೆತ್ತ ರೂಪೊಡು ಪಾತೆರಿಯೆರೆ ಕಾರಣ ದಾನೆಂದ್ಂಡ ಅಕ್ಲೆಗ್ ಕಣ್ಣ್ ಇತ್ತ್ಂಡಲಾ ತೂಪುಜೆರ್, ಕೆಬಿ ಇತ್ತ್ಂಡಲಾ ಕೇನುಜೆರ್ ಬೊಕ್ಕ ತೆರಿಯೊನುಜೆರ್. 14ಯೆಶಾಯೆ ಪಂಡಿನ ಪ್ರವಾದನೆ ಅಕ್ಲೆಡ್ದ್ ಪೂರ್ತಿ ಆಂಡ್; ಅವು ದಾನೆಂದ್ಂಡ,
ನಿಕುಲು ಕೆಬಿ ಇತ್ತ್‌ದ್ ಕೇಂಡಲಾ ತೆರಿಯೊನುಜರ್,
ಕಣ್ಣ್ ಇತ್ತ್‌ದ್ ತೂಯರ್ಡಲಾ ತೋಜುನೇ ಇಜ್ಜಿ.
15ದಾಯೆಗಂದ್ಂಡ ಈ ಜನೊಕುಲೆ ಉಡಲ್ ಕಲ್ಲಾತ್ತ್‌ಂಡ್, ಮೊಕ್ಲೆ ಕೆಬಿ ಮಂದ ಆತ್ಂಡ್, ಮೊಕುಲು ಕಣ್ಣ್ ಮುಚ್ಚೊಂದೆರ್. ತನ್ಕುಲು ಕಣ್ಣ್‌ಡ್ ತೂದು, ಕೆಬಿಟ್ ಕೇಂಡ್ದ್ ಉಡಲ್‌ಡ್ ತೆರಿದ್, ಅಕುಲು ಎನ ಕಡೆಕ್ಕ್ ತಿರ್ಗಂದೆ ಯಾನ್ ಅಕ್ಲೆನ್ ಗುಣ ಮಲ್ಪಂದೆ ಉಪ್ಪುಲೆಕ್ಕ ಮಲ್ತೊಂದೆರ್ ಪನ್ಪಿನವೇ.
16“ಆಂಡ ನಿಕ್ಲೆ ಕಣ್ಣ್ ತೋಜುಂಡು, ನಿಕ್ಲೆ ಕೆಬಿ ಕೇನುಂಡು; ಅಂಚಾಯಿನೆಡ್ದ್ ನಿಕುಲು ಭಾಗ್ಯವಂತೆರ್. 17ನಿಕ್ಲೆಗ್ ನಿಜಾದ್ ಪನ್ಪೆ. ನಿಕುಲು ತೂವೊಂದುಪ್ಪುನ ಕಾರ್ಯೊಲೆನ್ ಮಸ್ತ್ ಮಂದಿ ಪ್ರವಾದಿಲುಲಾ, ನೀತಿವಂತೆರ್‌ಲಾ ತೂವೊಡಂದ್ ಆಸೆ ಮಲ್ತ್ಂಡಲಾ ತೂಯಿಜೆರ್; ನಿಕುಲು ಕೇನೊಂದುಪ್ಪುನ ಸಂಗತಿನ್ ಅಕುಲು ಕೇನೊಡುಂದು ಆಸೆ ಮಲ್ತೆರ್ಡಲಾ ಕೇನಿಯೆರೆ ತಿಕ್ಕ್‌ದಿಜಿ.
ಬೆನ್ನಿದಾಯನ ಉಪಕತೆತ್ತ ಅರ್ಥ
(ಮಾರ್ಕೆ 4:13-20; ಲೂಕೆ 8:11-15)
18“ಬಿತ್ತುನಾಯನ ಉಪಕತೆತ್ತ ಅರ್ಥೊನು ಕೇನ್ಲೆ 19ಏರಾಂಡಲಾ ಪರಲೋಕ ರಾಜ್ಯದ ಪಾತೆರೊನು ಕೇಂಡ್ದ್ ತೆರಿಯೊನಂದೆ ಇತ್ತಿನಪಗ ಸೈತಾನೆ ಬತ್ತ್‌ದ್ ಆ ನರಮಾನಿನ ಉಡಲ್‌ಡ್ ಬಿತ್ತ್‌ದಿನೆನ್ ದೆತ್ತ್ ಪಾಡುವೆ; ಆ ನರಮಾನಿಯೇ ಸಾದಿದ ಬರಿಟ್ಟ್ ಬೂರ್ದಿತ್ತಿ ಬಿತ್ತ್ ಆದುಪ್ಪುವೆ. 20ಪಾದೆ ನೆಲತ್ತ ಮಿತ್ತ್ ಬೂರ್ದಿನ ಬಿತ್ತ್ ಪನ್ನಗ, ಒರಿ ಪಾತೆರೊನು ಕೇಂಡ್ದ್ ಅಪಗನೇ ಅವೆನ್ ಸಂತೋಷೊಡು ಸ್ವೀಕಾರ ಮಲ್ಪುವೆ; 21ತನ್ಕ್ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್ ಇಂಬೆ ಒಂತೆ ಕಾಲ ಮಾತ್ರ ಇತ್ತ್‌ದ್ ಆ ಪಾತೆರೊಡ್ದು ಆಯಗ್ ಕಷ್ಟ ಆವಡ್ ಭಂಗ ಆವಡ್ ಬತ್ತ್ಂಡ ಬೇಗ ದಂಟ್‌ದ್ ಬೂರುವೆ. ಇಂಬೆನೇ ಪಾದೆ ನೆಲಟ್ಟ್ ಬೂರ್ದಿತ್ತಿ ಬಿತ್ತ್ ಆದುಪ್ಪುವೆ. 22ಒರಿ ಪಾತೆರೊನು ಕೇಂಡಲಾ ಲೋಕದ ಚಿಂತೆ ಐಶ್ವರ್ಯೊಡ್ದು ಆಪಿನ ಮೋಸಲಾ ಈ ಪಾತೆರೊನು ದೆಂಗಾದ್ ಬುಡ್ಪಿನೆಡ್ದ್ ಫಲ ಕೊರಂದೆ ಉಪ್ಪುವೆ; ಇಂಬೆನೇ ಮುಳ್ಳುಗಿಡೊಕ್ಲೆಡ್ ಬಿತ್ತ್ ಬೂರಿ ನೆಲ ಆದುಪ್ಪುವೆ. 23ಒರಿ ಪಾತೆರೊನು ಕೇಂಡ್ದ್ ತೆರಿಯೊಂದು ಫಲವಂತೆ ಆದ್ ನೂದೆದಾತ್ ಆವಡ್, ಅಜ್ಪದಾತ್ ಆವಡ್, ಮುಪ್ಪದಾತ್ ಆವಡ್ ಫಲ ಕೊರ್ಪೆ; ಇಂಬೆನೇ ಎಡ್ಡೆ ನೆಲ ಆದುಲ್ಲೆ,” ಅಂದ್‌ದ್ ಪಂಡೆ.
ದಡ್ಡ್ ಬಿತ್ತ್‌ದ ಉಪಕತೆ
24ಆಯೆ ಕುಡೊಂಜಿ ಉಪಕತೆನ್ ಅಕ್ಲೆಗ್ ಪಂಡೆ, “ಪರಲೋಕ ರಾಜ್ಯ ಪಂಡ, ತನ ಕಂಡೊಡು ಎಡ್ಡೆ ಬಿತ್ತ್‌ನ್ ಬಿತ್ತ್‌ದಿನ ಒರಿ ನರಮಾನಿಗ್ ಸಮ ಆದುಂಡು. 25ಆಂಡ ಜನೊಕುಲು ನಿದ್ರೆ ಮಲ್ಪು ಸಮಯೊಡು ಆಯನ ಪಗೆನಾಯೆ ಬತ್ತ್‌ದ್ ಗೋದಿದ ನಡುಟು ದಡ್ಡ್ ಬಿತ್ತ್ ಬಿತ್ತ್‌ದ್ ಪೋಪೆ. 26ಆ ಗೋದಿ ಬುಲೆದ್ ಕೊರಲ್ ಬುಡ್ನಗ ಐತೊಟ್ಟಿಗೆ ದಡ್ಡ್‌ಲಾ ಬುಲೆಂಡ್. 27ಅಪಗ ಬೇಲೆದಾಕುಲು ಯಜಮಾನನ ಕೈತಲ್‌ ಬತ್ತ್‌ದ್, ‘ಅಯ್ಯಾ, ಈ ನಿನ ಕಂಡೊಡು ಎಡ್ಡೆ ಬಿತ್ತ್ ಬಿತ್ತಿಯ ಅತ್ತಾ? ಐತ ನಡುಟು ದಡ್ಡ್ ಎಂಚ ಬತ್ತ್ಂಡ್?’ ಅಂದ್‌ದ್ ಕೇಂಡಿನಪಗ 28‘ಉಂದು ಪಗೆನಾಯೆ ಮಲ್ತಿನ ಬೇಲೆ,’ ಅಂದ್‌ದ್ ಪಂಡೆ. ಐಕ್ ಬೇಲೆದಾಕುಲು ಆಯಡ, ‘ಎಂಕುಲು ಆ ದಡ್ಡ್‌ನ್ ಅಜತ್‌ದ್ ದೆಪ್ಪೊಡಾ?’ ಅಂದ್‌ದ್ ಕೇಂಡಿನೆಕ್ಕ್ 29‘ಬೊಡ್ಚಿ ದಡ್ಡ್‌ನ್ ಅಜತ್‌ದ್ ದೆಪ್ಪುನಗ ಐತ ಒಟ್ಟುಡು ಗೋದಿನ್ಲಾ ದೆಪ್ಪರ್. 30ಸುಗ್ಗಿ ಕಾಲ ಮುಟ್ಟ ರಡ್ಡ್‌ಲಾ ಬುಲೆವೆರೆ ಬುಡ್ಲೆ; ಸುಗ್ಗಿಕಾಲೊಡು ಯಾನ್ ಕೊಯ್ಪಿನಾಕುಲೆಗ್ ದುಂಬತ್ತ ದಡ್ಡ್‌ಲೆನ್ ಅಜತ್ ದೆತ್ತ್‌ದ್ ಅವೆನ್ ಪೊತ್ತಾಯೆರೆ ಕಟ್ಟ ಕಟ್ಟ್‌ಲೆ ಬೊಕ್ಕ ಗೋದಿನ್ ಎನ ತುಪ್ಪೆಗ್ ದಿಂಜಾದ್ ದೀಲೆ,’ ಪಂಡ್ದ್ ಪನ್ಪೆ,” ಅಂದ್‌ದ್ ಪಂಡೆ.
ದಾಸೆಮಿದ ಉಪಕತೆ
(ಮಾರ್ಕೆ 4:30-32; ಲೂಕೆ 13:18,19)
31ಆಯೆ ಬೊಕ್ಕೊಂಜಿ ಉಪಕತೆನ್ ಅಕ್ಲೆಗ್ ಪಂಡೆ; ಅವು ದಾನೆಂದ್ಂಡ, “ಪರಲೋಕ ರಾಜ್ಯ ದಾಸೆಮಿ ಬಿತ್ತ್‌ಗ್ ಸಮ ಆದುಂಡು. ಒರಿ ನರಮಾನಿ ಅವೆನ್ ದೆತ್ತೊಂದು ಪೋದು ತನ ಕಂಡೊಡು ಬಿತ್ತಿಯೆ. 32ಅವು ಮಾತ ಬಿತ್ತ್‌ಲೆಡ್ದ್‌ಲಾ ಎಲ್ಯದವು ಆದಿತ್ತ್‌ಂಡಲಾ ಬುಲೆಯಿ ಬೊಕ್ಕ ಕಾಯಿಕಜಿಪುಲೆಡ್ದ್ ಮಲ್ಲೆ ಆದ್ ಮರ ಆಪುಂಡು. ಬಾನೊಡು ರಾಪಿ ಪಕ್ಕಿಲು ಬತ್ತ್‌ದ್ ಐತ ಗೆಲ್ಲ್‌ಲೆಡ್ ಗೂಡು ಕಟ್ಟ್‌ದ್ ವಾಸ ಮಲ್ಪುವ.”
ಪುಳಿಬಂದದ ಉಪಕತೆ
(ಲೂಕೆ 13:20,21)
33ಆಯೆ ಕುಡೊಂಜಿ ಉಪಕತೆನ್ ಅಕ್ಲೆಗ್ ಪಂಡೆ; ಅವು ದಾನೆಂದ್ಂಡ, “ಪರಲೋಕ ರಾಜ್ಯ ಪುಳಿ ಬಂದೊಗು ಸಮ ಆದುಂಡು. ಅವೆನ್ ಒಂಜಿ ಪೊಂಜೊವು ದೆತ್ತೊಂದು ಮೂಜಿ ಸೇರ್ ಹಿಟ್ಟ್‌ನ್ ಕಲತ್ ದೀಯಿನಪಗ ಆ ಹಿಟ್ಟ್ ಮಾತಲಾ ಪುಳಿ ಆಂಡ್.”
ಮದೆಟ್ ಇತ್ತಿನೆನ್ ಉಪಕತೆಟ್ ಪನ್ಪಿನವು
(ಮಾರ್ಕೆ 4:33,34)
34ಯೇಸು ಈ ಪಾತೆರೊಲೆನ್ ಮಾತ ಜನೊಕುಲೆ ಗುಂಪುಗು ಉಪಕತೆತ್ತ ರೂಪೊಡು ಪಂಡೆ; ನಿಜಾದ್‌ಲಾ ಉಪಕತೆದಾಂತೆ ಒಂಜೆನ್ಲಾ ಪಂಡಿಜೆ. 35ಇಂಚ,
“ಯಾನ್ ಬಾಯಿ ಜತ್ತ್‌ದ್ ಉಪಕತೆತ್ತ ರೂಪೊಡು ಬೋಧನೆ ಮಲ್ಪುವೆ;
ಲೋಕಾದಿಡ್ದ್ ಮದೆ ಆದಿತ್ತಿನೆನ್ ಪಿದಾಯಿ ಪಾಡುವೆ,”
ಅಂದ್ಂಡ ಒರಿ ಪ್ರವಾದಿಡ್ದ್ ಪಂಡಿ ಪಾತೆರ ನಡತ್ಂಡ್.
ಎಡ್ಡೆ ಬಿತ್ತ್ ಬೊಕ್ಕ ದಡ್ಡ್‌ದ ಉಪಕತೆ
36ಅಪಗ ಯೇಸು ಜನೊಕುಲೆನ್ ಬುಡ್ದು ಇಲ್ಲಗ್ ಪೋಯಿ ಬೊಕ್ಕ ಆಯನ ಶಿಷ್ಯೆರ್ ಬತ್ತ್‌ದ್, “ಕಂಡದ ದಡ್ಡ್‌ದ ಉಪಕತೆತ್ತ ಅರ್ಥೊನು ಎಂಕ್ಲೆಗ್ ಪನ್ಲ,” ಪಂಡೆರ್.
37ಐಕ್ ಆಯೆ, “ಎಡ್ಡೆ ಬಿತ್ತ್‌ನ್ ಬಿತ್ತುನಾಯೆ ಪಂಡ ನರಮಾನಿ ಮಗೆ. 38ಕಂಡ ಪಂಡ ಈ ಲೋಕ; ಎಡ್ಡೆ ಬಿತ್ತ್ ಪಂಡ ಪರಲೋಕ ರಾಜ್ಯದ ಬಾಲೆಲು; ದಡ್ಡ್ ಪಂಡ ಸೈತಾನನ ಬಾಲೆಲು; 39ಅವೆನ್ ಬಿತ್ತುನ ಪಗೆನಾಯೆ ಪಂಡ ಸೈತಾನೆ; ಸುಗ್ಗಿ ಕಾಲ ಪಂಡ ಯುಗತ ಅಂತ್ಯ; ಕೊಯ್ಪಿನಾಕುಲು ಪಂಡ ದೂತೆರ್. 40ಇಂಚ ಉಪ್ಪುನಗ ಎಂಚ ದಡ್ಡ್‌ನ್ ಅಜತ್ ದೆತ್ತ್‌ದ್ ಪೊತ್ತಾದ್ ಬುಡ್ಪೆರಾ, ಅಂಚೆನೇ ಯುಗತ ಅಂತ್ಯೊಡ್ಲಾ ನಡಪುಂಡು. 41ನರಮಾನಿ ಮಗೆ ತನ ದೂತೆರೆನ್ ಕಡಪುಡ್ವೆ, ಅಕುಲು ಆಯನ ರಾಜ್ಯದ ಉಲಯಿಡ್ದ್ ಮಾತ ಪಾಪೊಗು ಕಾರಣ ಆದಿತ್ತಿನಾಕುಲೆನ್ಲಾ ಅನ್ಯಾಯ ಮಲ್ಪುನಾಕುಲೆನ್ಲಾ ಒಟ್ಟು ಸೇರಾದ್ 42ತೂತ ಗುಂಡಿಗ್ ಪಾಡ್ವೆರ್. ಅಲ್ಪ ಅಕುಲು ಅರಬಾಯಿಲಾ, ಕಟಕಟ ಕೂಲಿ ಕಡೆಯೊಂದುಲಾ ಉಪ್ಪುವೆರ್. 43ಅಪಗ ನೀತಿವಂತೆರ್ ತನ್ಕುಲೆ ಅಮ್ಮೆರೆ ರಾಜ್ಯೊಡು ಸೂರ್ಯದಲೆಕ್ಕ ಮಿಂಚುವೆರ್. ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್ ಪಂಡೆ.
ಗುಟ್ಟುಡಿತ್ತಿ ನಿದಿ
44“ಪರಲೋಕ ರಾಜ್ಯ ಕಂಡೊಡು ಕೌಂತು ದೀತಿ ದ್ರವ್ಯೊಲೆಗ್ ಸಮ ಆದುಂಡು. ಒರಿ ಅವೆನ್ ನಾಡ್ ಪತ್ತ್‌ದ್ ಮುಚ್ಚಿ ದೀದ್ ಸಂತೋಷೊಡು ತನ ಬದ್‌ಕ್‌ನ್ ಮಾತ ಮಾರ್ದ್ ಆ ಕಂಡೊನು ದೆತ್ತೊಂಡೆ.
ಮುತ್ತುದ ಉಪಕತೆ
45“ಬೊಕ್ಕ ಪರಲೋಕ ರಾಜ್ಯ ಎಡ್ಡೆಂತಿನ ಮುತ್ತುಲೆನ್ ನಾಡುನ ಒರಿ ವ್ಯಾಪಾರಿಗ್ ಸಮ ಆದುಂಡು. 46ಆಯೆ ಬಾರಿ ಬಿಲೆತ ಒಂಜಿ ಮುತ್ತುನು ತೂದು ತನ ಬದ್‌ಕ್‌ನ್ ಮಾತ ಮಾರ್ದ್ ಬತ್ತ್‌ದ್ ಅವೆನ್ ದೆತ್ತೊಂಡೆ.
ಬಲೆಟ್ ತಿಕ್ಕೊಂಡಿ ಮೀನ್‌ಲೆ ಉಪಕತೆ
47“ಬೊಕ್ಕ ಪರಲೋಕ ರಾಜ್ಯ ಒಂಜಿ ಬಲೆಕ್ ಸಮ ಆದುಂಡು. ಅವೆನ್ ಕಡಲ್ಡ್ ಪಾಡ್ದ್ ಮಾತ ಜಾತಿದ ಮೀನ್‌ಲೆನ್ ಪತ್ತಿಯೆರ್. 48ಬಲೆ ದಿಂಜಿದ್ ಪೋನಗ ಮೀನ್ ಪತ್ತುನಾಕುಲು ಆ ದಿಂಜಿದಿನ ಬಲೆನ್ ಮಿತ್ತ್ ಒಯಿತ್‌ದ್, ಐಟ್ಟ್ ಬೂರ್ದಿತ್ತಿನ ಎಡ್ಡೆ ಮೀನ್‌ಲೆನ್ ಪುಡಾಯಿಗ್ ಪಾಡ್ವೆರ್, ಹಾಳ್ ಇತ್ತಿನೆನ್ ದಕ್ಕ್‌ದ್ ಬುಡ್ಪೆರ್. 49ಅಂಚೆನೇ ಯುಗತ ಅಂತ್ಯೊಡ್ಲಾ ಆಪುಂಡು. ದೂತೆರ್ ಬತ್ತ್‌ದ್ ನೀತಿವಂತೆರೆಡ್ದ್ ಪಡಿಕೆಂತಿನಾಕುಲೆನ್ ಬೇತೆ ಮಲ್ತ್‌ದ್ 50ಅಕ್ಲೆನ್ ತೂತ ಗುಂಡಿಡ್ ಪಾಡ್ವೆರ್ ಅಲ್ಪ ಅರಬಾಯಿಲಾ ಕಟಕಟ ಕೂಲಿ ಕಡೆಯುನವುಲಾ ಉಪ್ಪುಂಡು.
51“ಈ ಮಾತ ಪಾತೆರೊಲೆ ಅರ್ಥ ನಿಕ್ಲೆಗ್ ತೆರಿಂಡಾ?” ಅಂದ್‌ದ್ ಕೇನ್ನಗ ಅಕುಲು, “ತೆರಿಂಡ್,” ಪಂಡೆರ್.
52ಅಪಗ ಆಯೆ ಅಕ್ಲೆಡ, “ಇಂಚ ಉಪ್ಪುನಗ ಪರಲೋಕ ರಾಜ್ಯದ ಸಂಗತಿಡ್ ಉಪದೇಶ ಪಡೆಯೊಂದಿನ ಪ್ರತಿಯೊರಿ ಶಾಸ್ತ್ರಿಲಾ ಇಲ್ಲದ ಯಜಮಾನಗ್ ಸಮ ಆದುಲ್ಲೆ. ಆಯೆ ತನ ಗೋದಾಮುಡ್ದು ಪೊಸ ದ್ರವ್ಯೊಲೆನ್ಲಾ ಐತ ಒಟ್ಟುಗು ಪರತ್ತ್‌ದೆನ್ಲಾ ಪಿದಯಿ ಕನವೊಂದುಪ್ಪುವೆ,” ಅಂದ್‌ದ್ ಪಂಡೆ.
ನಜರೇತ್‌ಡ್ ಯೇಸುನ ತಿರಸ್ಕಾರ
(ಮಾರ್ಕೆ 6:1-6; ಲೂಕೆ 4:16-30)
53ಯೇಸು ಈ ಉಪಕತೆಲೆನ್ ಪಂಡ್ದ್ ಅಲ್ತ್‌ಡ್ದ್ ಪಿದಾಡ್ದ್ ಪೋಯೆ. 54ಐಡ್ದ್ ಬೊಕ್ಕ ಆಯೆ ತನ ಊರುಗು ಬತ್ತ್‌ದ್ ಅಲ್ಪ ಉಪ್ಪುನ ಸಭಾಮಂದಿರೊಡು ಜನೊಕುಲೆಗ್ ಬೋಧನೆ ಮಲ್ತೊಂದಿತ್ತೆ. ಅಕುಲು ಕೇಂಡ್ದ್ ಅಚ್ಚಿರ ಆದ್, “ಇಂಬ್ಯಗ್ ಈ ಬುದ್ಧಿಲಾ ಈ ಮಲ್ಲಕಾರ್ಯೊಲೆನ್ಲಾ ಮಲ್ಪೆರೆ ಒಲ್ತುಡ್ದು ಬುದ್ಧಿ ಬತ್ತ್‌ದುಪ್ಪು? 55ಇಂಬೆ ಆ ಮರತ ಬೇಲೆದಾಯನ ಮಗೆ ಅತ್ತಾ? ಇಂಬೆನ ಅಪ್ಪೆ ಮರಿಯ ಅತ್ತಾ? ಯಾಕೋಬು, ಯೋಸೇಫು, ಸೀಮೋನೆ, ಯೂದೆ ಇಂಬೆನ ಮೆಗ್ಯಾಡ್ಲು ಅತ್ತಾ. 56ಇಂಬೆನ ಮೆಗ್ದಿಯಾಡ್ಲು ಮಾತ ನಮೊಟ್ಟುಗು ಉಲ್ಲೆರತ್ತಾ. ಅಂಚಾಂಡ ಇಂಚಿನ ಬುದ್ಧಿ ಇಂಬ್ಯಗ್ ಒಲ್ತುಡ್ದು ಬತ್ತ್‌ದುಪ್ಪು?” ಅಂದ್‌ದ್ ಪಾತೆರೊಂದು ಆಯನ ಸಂಗತಿಡ್ ಬೇಜಾರ್ ಆಯೆರ್. 57ಆಂಡ ಯೇಸು ಅಕ್ಲೆಡ, “ಪ್ರವಾದಿಗ್ ಮಾತ ಕಡೆಟ್ಲಾ ಮರ್ಯಾದಿ ಉಂಡು; ಆಂಡ ಸ್ವಂತ ಊರುಡ್ಲಾ, ಸ್ವಂತ ಇಲ್ಲಡ್ಲಾ ಮರ್ಯಾದಿ ಇಜ್ಜಿ,” ಪಂಡೆ. 58ಅಕ್ಲೆನ ಅಪನಂಬಿಕೆಡ್ದ್ ಆಯೆ ಅಲ್ಪ ಮಸ್ತ್ ಕಾರ್ನಿಕೊಲೆನ್ ಮಲ್ತ್‌ಜೆ.
Currently Selected:
ಮತ್ತಾಯೆ 13: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
