ಮತ್ತಾಯೆ 15
15
ಪರಿಸಾಯೆರ್‌ನ ಸಂಪ್ರದಾಯದ ಬೋಧನೆ
(ಮಾರ್ಕೆ 7:1-13)
1ಅಪಗ ಯೆರೂಸಲೇಮುಡ್ದು ಪರಿಸಾಯೆರ್‌ಲಾ, ಶಾಸ್ತ್ರಿಲುಲಾ ಯೇಸು ಕೈತಲ್‌ ಬತ್ತ್‌ದ್ 2“ನಿನ ಶಿಷ್ಯೆರ್ ಹಿರಿಯೆರೆಡ್ದ್ ಬೈದಿನ ಕಟ್ಟ್‌ಲೆದ ಸಂಪ್ರದಾಯೊನು ದಾಯೆಗ್ ಮೀರುವೆರ್? ಅಕುಲು ಕೈ ದೆಕ್ಕಂದೆ ತಿನಸ್ ದೆತ್ತೊನುವೆರ್ ಅತ್ತಾ.”
3-4ಯೇಸು ಉತ್ತರ ಕೊರ್ದು ಅಕ್ಲೆಡ, “ನಿಕುಲುಲಾ ಸಂಪ್ರದಾಯೊಗಾದ್ ದೇವೆರೆನ ಅಪ್ಪಣೆನ್ ದಾಯೆಗ್ ಮೀರುವರ್? ಎಂಚಂದ್ಂಡ, ‘ಅಪ್ಪೆನ್ಲಾ ಅಮ್ಮೆರೆನ್ಲಾ ಸನ್ಮಾನ ಮಲ್ಪುಲೆ, ಅಮ್ಮೆರೆನಾವಡ್ ಅಪ್ಪೆನಾವಡ್‌ ದೂಷಿಯುನಾಯಗ್ ಮರಣ ದಂಡನೆ ಆವೊಡು,’ ಪಂಡ್ದ್ ದೇವೆರ್ ಪನ್ತೆ. 5ಆಂಡ ನಿಕುಲು ಏರಾಂಡಲಾ ಅಮ್ಮೆರೆನಾವಡ್ ಅಪ್ಪೆನಾವಡ್‌ ತೂದು, ‘ಯಾನ್ ನಿಕ್ಲೆನ್ ತಾಂಕೆರೆಗಾದ್ ಕೊರೊಡಾಯಿನೆನ್ ದೇವೆರೆಗ್ ಕಾಣಿಕೆ ಪಂಡ್ದ್ ದೀತೆ,’ ಅಂದ್‌ದ್ ಪಂಡೆಡ 6‘ಆಯೆ ತನ ಅಪ್ಪೆನ್ಲಾ ಅಮ್ಮೆರೆನ್ಲಾ ಸನ್ಮಾನ ಮಲ್ಪುನ ಅಗತ್ಯ ಇಜ್ಜಿ,’ ಅಂದ್‌ದ್ ಪನ್ಪರ್. ಇಂಚ ನಿಕ್ಲೆನ ಸಂಪ್ರದಾಯೊಲೆಡ್ದ್ ದೇವೆರೆ ಅಪ್ಪಣೆನ್ ಅರ್ಥದಾಂತಿಲೆಕ್ಕ ಮಲ್ತ್‌ದರ್. 7ಕಪಟಿಲೇ, ನಿಕ್ಲೆ ಸಂಗತಿಡ್ ಯೆಶಾಯೆ ಸರಿಯಾದೇ ಪ್ರವಾದನೆ ಮಲ್ತ್‌ದೆ. ಆಯೆ ಬರೆತಿನಿ ದಾನೆಂದ್ಂಡ, 8‘ಈ ಜನೊಕುಲು ಪಾತೆರೊಡು ಎನನ್ ಸನ್ಮಾನ ಮಲ್ಪುವೆರ್, ಆಂಡ ಅಕ್ಲೆನ ಮನಸ್ ಎನಡ್ದ್ ದೂರ ಆದುಂಡು. 9ಅಕುಲು ನರಮಾನಿಲು ಮಲ್ತಿ ಸಂಪ್ರದಾಯೊನು ದೇವೆರೆನ ಅಪ್ಪಣೆ ಅಂದ್‌ದ್ ಕಲ್ಪಾವುನೆಡ್ದ್, ಎಂಕ್ ಭಕ್ತಿ ತೋಜಾವುನವು ಪೊಕ್ಕಡೆ.’”
ಆಚಾರ ವಿಚಾರೊಲೆ ಬಗೆಟ್
(ಮಾರ್ಕೆ 7:14-23)
10ಐಡ್ದ್ ಬೊಕ್ಕ ಯೇಸು ಜನೊಕುಲೆ ಗುಂಪುನು ಕೈತಲ್‌ ಲೆತ್ತ್‌ದ್ ಅಕ್ಲೆಡ, “ಕೆಬಿ ಕೊರ್ದು ಕೇನ್ಲೆ, ಅರ್ಥ ಮಲ್ತೊನ್ಲೆ. 11ಬಾಯಿದ ಉಲಯಿ ಪೋಪಿನವು ನರಮಾನಿನ್ ಅಶುದ್ಧ ಮಲ್ಪುಜಿ; ಬಾಯಿದ ಉಲಯಿಡ್ದ್ ಪಿದಯಿ ಬರ್ಪಿನವೇ ನರಮಾನಿನ್ ಅಶುದ್ಧ ಮಲ್ಪುಂಡು,” ಅಂದ್‌ದ್ ಪಂಡೆ.
12ಅಪಗ ಶಿಷ್ಯೆರ್ ಬತ್ತ್‌ದ್ ಆಯಡ, “ಪರಿಸಾಯೆರ್ ಈ ಪಾತೆರೊನು ಕೇಂಡ್ದ್ ಬೇಜಾರ್ ಆತೆರ್ ಅಂದ್‌ದ್ ನಿಕ್ಕ್ ಗೊತ್ತಾಂಡ,” ಅಂದ್‌ದ್ ಕೇಂಡೆರ್.
13ಐಕ್ ಯೇಸು, “ಪರಲೋಕೊಡುಪ್ಪು ಎನ ಅಮ್ಮೆರ್‌ ನಡಂದೆ ಉಪ್ಪುನ ದೈಕ್ಲೆನ್ ಬೂರುಡ್ದೇ ಪೊರ್ತುದು ದಕ್ಕುವೆ. 14ಅಕ್ಲೆ ಪಾತೆರೊನು ಬುಡ್ಲೆ; ತನ್ಕುಲೇ ಕುರುಡೆರ್, ಬೊಕ್ಕೊರಿಯಗ್ ಸಾದಿ ತೂಪಾಯೆರೆ ಪೋಪೆರ್. ಕುರುಡೆ ಕುರುಡಗ್ ಸಾದಿ ತೂಪಾಯೆಡ ಅಕುಲು ಇರ್ವೆರ್‌ಲಾ ತೋಡುಡು ಬೂರುವೆರ್,” ಪಂಡೆ.
15ಅಪಗ ಪೇತ್ರೆ, “ಈ ಉಪಕತೆತ್ತ ಅರ್ಥೊನು ಎಂಕ್ಲೆಗ್ ಪನ್ಲ,” ಅಂದ್‌ದ್ ಕೇಂಡೆ.
16ಐಕ್ ಯೇಸು, “ನಿಕ್ಲೆಗ್ ನನಲಾ ಬುದ್ಧಿ ಇಜ್ಜಾ? 17ಬಾಯಿದ ಉಲಯಿ ಪೋಯಿನವು ಬಂಜಿದ ಉಲಯಿ ಸೇರ್ದ್ ಪಿದಯಿ ಪೋಪುಂಡು ಅಂದ್‌ದ್ ನಿಕ್ಲೆಗ್ ತೆರಿಯಂದಾ? 18ಆಂಡ ಬಾಯಿಡ್ದ್ ಪಿದಾಡುನವು ಉಡಲ್‌ಡ್ದ್ ಬರ್ಪುಂಡು; ಅವ್ವೇ ನರಮಾನಿನ್ ಅಶುದ್ಧ ಮಲ್ಪುಂಡು. 19ದಾಯೆಗಂದ್ಂಡ ಉಡಲ್‌ದ ಉಲಯಿಡ್ದ್ ಬೊಡ್ಚಾಂದಿ ಆಲೋಚನೆ, ಮಾನ್ಯ ಕೆರ್ಪಿನವು, ವ್ಯಭಿಚಾರ, ಸೂಳೆಗಾರಿಕೆ, ಕಂಡೊನುನವು, ಸುಳ್ಳು ಸಾಕ್ಷಿ, ದೂಷಣೆ ಪಿದಾಡ್ದ್ ಬರ್ಪುಂಡು. 20ನರಮಾನಿನ್ ಅಶುದ್ಧ ಮಲ್ಪುನವು ಉಂದೇ. ಆಂಡ ಕೈ ದೆಕ್ಕೊನಂದೆ ವಣಸ್ ಮಲ್ಪುನವು ನರಮಾನಿನ್ ಅಶುದ್ಧ ಮಲ್ಪುಜಿ,” ಪಂಡೆ.
ಕಾನಾನ್ಯದ ಪೊಂಜೊವು
(ಮಾರ್ಕೆ 7:24-30)
21ಬೊಕ್ಕ ಯೇಸು ಅಲ್ತ್‌ಡ್ದ್ ಪಿದಾಡ್ದ್ ತೂರ್ ಸೀದೋನ್ ಪಟ್ಟಣದ ಪ್ರಾಂತೊಲೆಗ್ ಪೋಯೆ. 22ಆ ಸೀಮೆಡ್ದ್ ಕನಾನ್ಯೆರೆಡ್ ಒರ್ತಿ ಪಿದಾಡ್ದ್ ಬತ್ತ್‌ದ್, “ಕರ್ತವಾ, ದಾವೀದ್ ಮಗಾ, ಎಂಕ್ ಕನಿಕರ ತೋಜಾಲ. ಎನ ಮಗಲೆಗ್ ದೆವ್ವದ ಉಪದ್ರ ಉಂಡು,” ಅಂದ್‌ದ್ ಬುಲ್ತಲ್.
23ಆಂಡ ಆಯೆ ಆಲೆಗ್ ದಾಲಾ ಉತ್ತರ ಕೊರ್ಜೆ. ಅಪಗ ಆಯನ ಶಿಷ್ಯೆರ್ ಬತ್ತ್‌ದ್, “ಆಲ್ ಎಂಕುಲೆ ಪಿರವುಡು ಬುಲ್ತೊಂದು ಬರೊಂದುಲ್ಲಲ್; ಆಲೆನ್ ಕಡಪುಡ್ದು ಬುಡ್ಲ,” ಅಂದ್‌ದ್ ಆಯಡ ನಟ್ಟೊಂಡೆರ್.
24ಐಕ್ ಆಯೆ, “ತಪ್ಪಾವೊಂದಿ ಕುರಿಕುಲೆ ಲೆಕ್ಕ ಉಪ್ಪುನ ಇಸ್ರಾಯೇಲ್ ಸಂತಾನದಾಕುಲೆನ ಕೈತಲ್‌ ಅತ್ತಂದೆ ಬೇತೆ ಏರೆ ಕೈತಲ್‌ಲಾ ಯಾನ್ ಕಡಪುಡ್ದಿನಾಯೆ ಅತ್ತ್,” ಪಂಡೆ.
25ಅಪಗ ಆಲ್ ಬತ್ತ್‌ದ್ ಆಯಗ್ ಅಡ್ಡಬೂರ್ದು, “ಕರ್ತವಾ, ಎಂಕ್ ಸಹಾಯ ಮಲ್ಪೊಡು,” ಪಂಡಲ್.
26ಐಕ್ ಆಯೆ, “ಜೋಕುಲು ತಿನ್ಪಿನ ರೊಟ್ಟಿನ್ ದೆತ್ತೊಂದು ನಾಯಿಲೆಗ್ ಪಾಡುನವು ಸರಿ ಅತ್ತ್,” ಅಂದ್‌ದ್ ಉತ್ತರ ಕೊರಿಯೆ.
27ಐಕ್ ಆಲ್, “ಅಂದ್ ಕರ್ತವಾ, ಈ ಪಾತೆರ ನಿಜನೆ; ಆಂಡ ನಾಯಿಲು ತನ್ಕುಲೆ ಯಜಮಾನನ ಮೇಜಿಡ್ದ್ ಬೂರ್ದಿನ ರೊಟ್ಟಿದ ತುಂಡುಲೆನ್ ತಿನ್ಪತ್ತಾ,” ಪಂಡಲ್.
28ಅಪಗ ಯೇಸು ಆಲೆಡ, “ಅಮ್ಮ, ನಿನ ನಂಬಿಕೆ ಮಲ್ಲವು ಆದುಂಡು ನಿನ ಮನಸ್‌ಡ್ ಇತ್ತಿಲೆಕ್ಕನೆ ಆವಡ್,” ಪಂಡ್ದ್ ಉತ್ತರ ಕೊರಿಯೆ. ಅವ್ವೇ ಗಳಿಗೆಡ್ ಆಲೆನ ಮಗಲ್ ಗುಣ ಆಯಲ್.
ಜನೊಕುಲೆಗ್ ಗುಣ ಮಲ್ತಿನವು
29ಯೇಸು ಅಲ್ತ್‌ಡ್ದ್ ಪಿದಾಡ್ದ್ ಗಲಿಲಾಯ ಕಡಲ್ದ ಕೈತಲ್‌ ಬತ್ತ್‌ದ್ ಗುಡ್ಡೆದ ಮಿತ್ತ್ ಮಿತ್ತಾರ್ದ್ ಅಲ್ಪ ಕುಲ್ಲಿಯೆ. 30ಅಪಗ ಜನೊಕುಲು ಗುಂಪುಗುಂಪಾದ್ ತನ್ಕುಲು ಲೆತ್ತೊಂದು ಬತ್ತಿತ್ತಿ ಕುಂಟೆರೆನ್, ಕುರುಡೆರೆನ್, ಪೊಟ್ಟೆರೆನ್, ಚೊಂಟ್ಟೆರೆನ್ ಇಂಚಿನ ಮಸ್ತ್ ಜನೊಕುಲೆನ್ ಲೆತ್ತೊಂದು ಬತ್ತ್‌ದ್ ಅಕ್ಲೆನ್ ಆಯ ಕಾರ ಮುದೆಲ್‌ಡ್ ಬುಡಿಯೆರ್; ಆಯೆ ಅಕ್ಲೆನ್ ಗುಣ ಮಲ್ತೆ. 31ಪೊಟ್ಟೆರ್ ಪಾತೆರಿಯೆರ್, ಚೊಂಟ್ಟೆರ್ ಸರ್ತ ಆಯೆರ್, ಕುಂಟೆರ್ ನಡತೆರ್, ಕುರುಡೆರೆಗ್ ಕಣ್ಣ್ ತೋಜ್ಂಡ್, ಜನೊಕುಲು ತೂದು ಅಚ್ಚಿರ ಪಡೆದ್, ಇಸ್ರಾಯೇಲ್ಯೆರೆ ದೇವೆರೆನ್ ಪುಗರಿಯೆರ್.
ನಾಲ್ ಸಾರ ಜನೊಕುಲೆಗ್ ವಣಸ್
(ಮಾರ್ಕೆ 8:1-10)
32ಅಪಗ ಯೇಸು ತನ ಶಿಷ್ಯೆರೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಡ, “ಈ ಜನೊಕುಲೆನ್ ತೂದು ಕನಿಕರ ಆಪುಂಡು. ಅಕುಲು ಎನ ಕೈತಲ್‌ ಬತ್ತ್‌ದ್ ಇತ್ತೆ ಮೂಜಿ ದಿನ ಆಪುಂಡು. ಅಕ್ಲೆಗ್ ವಣಸ್‌ಗ್ ದಾಲಾ ಇಜ್ಜಿ. ಅಕ್ಲೆನ್ ಉಪವಾಸೊಡು ಕಡಪುಡ್ದು ಬುಡಿಯೆರೆ ಎಂಕ್ ಮನಸಿಜ್ಜಿ, ಸಾದಿಡ್ ಬರೆಲ್ದ್ ಪೋವೆರ್,” ಅಂದ್‌ದ್ ಪನ್ನಗ 33ಶಿಷ್ಯೆರ್, “ಈತ್ ಜನೊಕುಲೆಗ್ ಪಟ್ಟಿಯೆರೆ ಬೋಡಾಯಿನಾತ್ ರೊಟ್ಟಿಲೆನ್ ಈ ಕಾಡ್‌ಡ್ ಎಂಕ್ಲೆಗ್ ಒಲ್ತುಡ್ದು ಬರು?” ಪಂಡೆರ್. 34ಯೇಸು ಅಕ್ಲೆಡ, “ನಿಕ್ಲೆಡ ಏತ್ ರೊಟ್ಟಿಲು ಉಂಡು,” ಪಂಡ್ದ್ ಕೇಂಡಿನೆಕ್ಕ್ ಅಕುಲು, “ಏಳ್ ರೊಟ್ಟಿ ಬೊಕ್ಕ ಕೆಲವು ಎಲ್ಯ ಮೀನ್ ಉಂಡು,” ಪಂಡೆರ್.
35ಅಪಗ ಯೇಸು ಜನೊಕುಲೆ ಗುಂಪುಗು ನೆಲತ್ತ ಮಿತ್ತ್ ಕುಲ್ಲೆರೆ ಅಪ್ಪಣೆ ಕೊರಿಯೆ. 36ಆ ಏಳ್ ರೊಟ್ಟಿನ್ಲಾ ಮೀನ್‌ಲೆನ್ಲಾ ದೆತ್ತೊಂದು ದೇವೆರೆನ್ ಸುಗಿತ್‌ದ್ ರೊಟ್ಟಿನ್ ಪೊಲ್ತುದು ಶಿಷ್ಯೆರೆ ಕೈಕ್ ಕೊರಿಯೆ. ಶಿಷ್ಯೆರ್ ಗುಂಪುದಾಕುಲೆಗ್ ಪಟ್ಟ್‌ದ್ ಕೊರಿಯೆರ್. 37ಮಾತೆರ್ಲಾ ವಣಸ್ ಮಲ್ತ್‌ದ್ ಬಂಜಾರ ಆಯೆರ್. ಒರಿದಿನ ತುಂಡುಲೆನ್ ಒಟ್ಟು ಮಲ್ಪುನಗ ಏಳ್ ಪುಡಯಿ ದಿಂಜಿಂಡ್. 38ವಣಸ್ ಮಲ್ತಿನಾಕುಲು ಪೊಂಜೊವುಲು ಜೋಕುಲು ಅತ್ತಂದೆ ನಾಲ್ ಸಾರ ಅಂಜೊವುಲು ಇತ್ತೆರ್.
39ಬೊಕ್ಕ ಆಯೆ ಆ ಜನೊಕುಲೆನ್ ಕಡಪುಡ್ದು ಕೊರ್ದು ಓಡೊನು ಮಿತ್ತಾರ್ದ್ ಮಗದಾನ ಸೀಮೆಗ್ ಬತ್ತೆ.
Currently Selected:
ಮತ್ತಾಯೆ 15: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
