لوقا 16
16
ڒْمَعْنَا ن ؤُوقَّاف إِي ذِي ثدْجَا ڒفْطَانث
1عِيْسَى ينَّا-ٱسن عَاوذ إِ يمحْضَارن نّس: "ئِجّن ن سِّيّد ذ تَجَّر غَارس اَوقَّاف. ؤُشِين-اَس ڒخْبَار خ ؤُوقَّاف نّس يضيّع-اَس اَطَّاس ن تْمنْيَاث. 2ئِكَّر سِّيّد نِّي يڒَاغَا-د خَاس ينَّا-ٱس: مِين خَاك تسْڒِيغ؟ ؤُش-اَيِي-د ڒحْسَاب يدْجَان جَارَانغ. زِي نْهَارَا اَڒ ثْسَاونْت وَار تْغِيمِيذ شَا اَذ تِيڒِيذ ذ اَوقَّاف ينُو. 3ينَّا ؤُوقَّاف ذِي نّفْس نّس: مِين غَا ݣّغ؟ ڒخُّو بَاب ن شِي اَذَايِي يكّس لْوَكَالَا. نش وَار ذَايِي بُو جّْهذ اَذ نقْشغ، أَذ سذْحِيغ اَذ تَّارغ. 4أُوشَا ينَّا: سّْنغ مِين غَا ݣّغ. مڒَا يكّس-اَيِي لْوَكَالَا، أَتَاف اَزَّايِي رحّْبن يِوْذَان غَار ثُوْذْرِين نْسن. 5ڒخْدّنِّي يڒَاغَا-د إِ كُڒ يجّن ؤُمِي يتَارْس بَاب ن شِي. ينَّا-ٱس إِ ومزْوَارُو: مشْحَاڒ ذَاش يتَارْس بَاب ن شِي ينُو؟
6يَارَّا خَاس ينَّا-ٱس: مِيَّا ن ثْبَرْمِيڒِين ن زّشْت.
ينَّا-ٱس ؤُوقَّاف نِّي: يْسِي-د لِيسْطَا نّش قِّيم ذغْيَا، اَرِي ذَايس غِير خمْسِين!
7عَاوذ ينَّا-ٱس إِ ونّغْنِي: ئِي شك، مشْحَاڒ ذَاش يتَارْس؟
يَارَّا خَاس ينَّا-ٱس: مِيَّا ن يقنْدَارن ن يِيرْذَان.
ينَّا-ٱس ؤُوقَّاف نِّي: يْسِي-د لِيسْطَا نّش، أَرِي ذَايس غِير ثْمَانِين!
8بَاب ن شِّي يشكَّر اَوقَّاف نّس ذِي يدْجَا لْحِيلَا خ ڒفْطَانث نّس.
شُوْف، ثَارْوَا ن زْمَان-أَ ذَايْسن ڒفْطَانث جَارَاسن كْتَار زِي ثَارْوَا ن نُّوْر. 9نش اَذَاوم ينِيغ: ݣّم يمدُّوْكَاڒ زِي ڒوْسخ ن دُّنشْت-أَ. أَتَاف خْمِي غَا يتْوَاقْضَا اَذ تْوَاقبْڒم ذِي ثُوذْرِين ن ڒبْدَا.
10ونِّي ذِي يدْجَا ڒَامَان خ ذْرُوْس، ذَايس ڒَامَان خ وَاطَّاس. ونِّي وَار ذِي يدْجِي ڒَامَان خ ذْرُوْس، وَار ذَايس بُو ڒَامَان خ وَاطَّاس. 11مڒَا وَار ذَايْوم بُو ڒَامَان خ ڒوْسخ ن دُّنشْت-أَ، وِي ذَايْوم غَا يݣّن ڒَامَان خ وَاݣْڒَا ن صَّح؟ 12مڒَا وَار ذَايْوم بُو ڒَامَان خ مِين وَار يدْجِين نْوم، وِي ذَايْوم غَا يُوْشن مِن يدْجَان نْوم؟
13وَار يزمَّر اَذ يِيڒِي شَان يِجّن ذ اَخدَّام غَار ثْنَاين ن سِيَاذِس. مَايمِّي؟ إِمَا يجّن اَث يعِيفّ، ئِجّن اَث يخس. نِغ يجّن اَذَايس يطّف، ئِجّن اَث يحݣَّار. أَذ تْخذْمم إ أَربِّـي نِغ اَذ تْخذْمم إِ ڒوْسخ ن دُّنشْت-أَ، وَار يدْجِي بُو س ثْنَاين."
شَّرِيعَا وَار تْبدِّيڒ
14ڒْحِزب ن يفَرِّيسِيْين نِثْنِي زݣ يِنِّي يتخْسن تْمنْيَاث، وَامِي سْڒِين إِ مَارَّا مَانَايَا ضحْشن خَاس. 15ينَّا-ٱسن عِيْسَى: "كنِّيو ذ يِنِّي إِي يرزُّوْن اَذ ؤُشن ڒْحَقّ خ يِيخف نْسن زَّاث إِ يِوْذَان، وَلَكِن أَربِّـي يسّن مِين غَارْوم ذݣ وُوْڒَاون نْوم. مِين يتَارَّان بْنَاذم غَارس لْقِيمَا، أَتَاف مَانَاينِّي ذ اَعفَّان اَطَّاس غَار أَربِّـي.
16شَّرِيعَا ن مُوْسَى ذ وسڒْمذ ن لْأَنْبِيَا تُوْغَا دْجَان اَڒ وَامِي د يُوْسَا يَحْيَى. زِي ڒْوقْث ن يَحْيَى سّنِّي اَڒ ثْسَاونْت يبْذَا يتْوَابشَّار ڒْمُلْك ن أَربِّـي، كُڒ يجّن يتمْذحَّاس حمَا اَذَايس يَاذف. 17إِنَّمَا، ئِسْهڒ اَذ يتْوَاكّس وجنَّا ذ ثْمُوْرْث قْبڒ إِي غَا تتْوَاكّس يجّن ن ثْنقِّيط زِي شَّرِيعَا.
18مَارَّا ونِّي غَا يدْجْفن إِ ثمْغَارْث نّس يُوْوِي شَان يِشْتن نّغْنِي، أَتَاف يزْنَا. مَارَّا ونِّي إِي غَا يمڒْشن اَك ثنِّي يدْجْفن، أَتَاف يزْنَا."
تَّاجَر ذ ڒْمسْكِين ونِّي ؤُمِي قَّارن لِعَازَر
19"شُوْف، تُوْغَا يجّن ذ تَّاجَر، نتَّا يتَارض اَرُّوْض يغْڒَان كُڒ نْهَار يتْعِيش ذݣ يِجّن ن نِّعْمث يزهُّو. 20ذِنِّي عَاوذ يجّن نّغْنِي نتَّا ذ ڒْمسْكِين وَاهَا قَّارن-اَس لِعَازَر، ذَايس اَطَّاس ن ثْحبَّا نتَّا يتْمنْضَار غَار ثوَّارْث ن تَّاجَر نِّي. 21ئِتْمنَّا اَذ يشّ مِين يوطَّان زِي مِيسَّا ن تَّاجَر نِّي. اَرْنِين-اَس ؤُڒَا ذ يقْزِينن تَاسن-د ڒسّْحن-اَس ثِحبَّا نّس.
22صَافِي يمُّوْث ڒْمسْكِين نِّي، يْسِينْت-ث لْمَلَائِكَاث سرْسنْت-ث خ وفُوْذ ن بْرَاهِيم. عَاوذ يمُّوْث تَّاجَر نِّي يْسِين-ث نضْڒن-ث. 23ئِسِيڒِي تَّاجَر ثِيطَّاوِين نّس يتْعدَّاب ذِي لْجَحِيم، ئِࢲْرَا بْرَاهِيم ذ لِعَازَر اَكِذس اَقَاثن ذِي ڒݣّْوَاج. 24ئِڒَاغَا-يَاس ينَّا-ٱس: آ بَابَا بْرَاهِيم رحْم-اَيِي، سكّ-د لِعَازَر حمَا اَذ يسُوْفّ يجّن ن ثِيشّط ن وضَاض ن وفُوْس نّس ذݣ وَامَان بَاش اَزَّايس سمْضغ يڒس ينُو مِينْزِي نش تْعدَّابغ ذِي ثْمسِّي-يَا.
25ينَّا-ٱس بْرَاهِيم: عْقڒ آ مِّي ينُو، شك ثيْسِيذ ڒْحَقّ نّش زِي ڒْخِير ذِي ثُوْذَارْث نّش، لِعَازَر يعِيش مْعَادّب. ڒخُّو نتَّا اَقَاث ذَا مْلِيح، شك اَقَّاش ذِي ڒَعْدَاب. 26أُو عَاوذ ذِنِّي يجّن ن ڒَادْجغ يُوْدْجغ جَارَانغ. ئِجّن سَّانِيتَا مڒَا يخس اَغَارْوم د يعْذُو وَار يزمَّر شَا. ئِجّن سّنِّي مڒَا يخس اَغَارْنغ د يعْذُو وَار يزمَّر شَا.
27ينَّا-ٱس تَّاجَر نِّي: آ بَابَا بْرَاهِيم، خ مَانَايَا تتَّارغ زَّايك اَذ تسّكّذ لِعَازَر غَار ثدَّارْث ن بَابَا. 28غَارِي خمْسَا ن أَيْثْمَا خْسغ اَثن يعْڒم حمَا ؤُڒَا ذ نِثْنِي وَار تْعدِّيبن شَا ذݣ ومْشَان-أَ.
29ينَّا-ٱس بْرَاهِيم: لَّا، أَيثْمَاش غَارْسن مُوْسَى ذ لْأَنْبِيَا نّغْنِي يتْخصَّا اَذَاسن صنّْطن.
30ينَّا-ٱس تَّاجَر نِّي: آ بَابَا بْرَاهِيم! مڒَا يرُوْح غَارْسن شَان يِجّن زݣ يِنِّي يمُّوْثن، أَتَاف اَذ تُوْبن.
31ينَّا-ٱس بْرَاهِيم: لَّا، مڒَا نِثْنِي وَار تسْڒِين شَا إِ مُوْسَى ذ لْأَنْبِيَا، وَاخَّا يكَّر-د شَان يِجّن زِي ڒْموْث اَتَاف وَار ثن يسْنقْنِيع شَا."
Currently Selected:
لوقا 16: ريف
Highlight
Share
Copy
Want to have your highlights saved across all your devices? Sign up or sign in
