لوقا 5
5
سِيذِيثْنغ عِيْسَى ئِتْڒَاغَا-د إِ يمحْضَارن نّس يمزْوُوْرَا
1ئِجّن ن نْهَار يبدّ عِيْسَى غَار ڒبْحَر ن ݣَنِيسَارَت، مْزَاحَامن خَاس ڒْغَاشِي بَاش اَذ سْڒن إِ وَاوَاڒ ن أَربِّـي. 2يُوْفَا ثْنَاين ن ثْغَرُّوْبَا بدّنْت خ طَّارْف ن ڒبْحَر. تُوْغَا هْوَان-د زَّايْسنْت يحدْجَاقن ن يسڒْمَان بَاش اَذ عذْڒن ثِرَاشِّيوِين نْسن. 3ئِنْيَا عِيْسَى ذݣ يِشْتن زِي ثْغَرُّوْبَا نِّي ثنِّي إِي يدْجَان ن سِمْعَان، ئِطَالب زَّايس اَذ يُوْيُوْر شْوَايْت خ ڒْبَرّ أُو نتَّا يقِّيم ذَايس يبْذَا يسڒْمَاذ ڒْغَاشِي زِي ثْغَرَّابُوْت نِّي.
4وَامِي يكمّڒ اَوَاڒ نِّي ينَّا-ٱس إِ سِمْعَان: "نْده ثَغَرَّابُوْت نّش غَار مَانِي ؤُدْجْغن وَامَان ضْڒق ثِرَاشِّيوِين حمَا اَذ تْحدْجْقذ يسڒْمَان."
5ينَّا-ٱس سِمْعَان: "آ لْمُعَلِّيم، نشِّين دْجِيڒث ثكْمَاڒ نْخدّم وَار د نْسِيڒِي ؤُڒَا ذ يجّن ن وسْڒم، وَلَكِن وَامِي ت ثنِّيذ شك اَذ ضڒْقغ ثِيرَاشِّيوِين." 6وَامِي ݣِّين اَمُّو سِيڒِين-د اَطَّاس ن يسڒْمَان، ثِرَاشِّيوِين نْسن عْڒَاين اَذ قَّرْصنْت. 7شيَّارن يمدُّوْكَاڒ نْسن ذِي ثْغَرَّابُوْت نِّي نّغْنِي حمَا اَذ د اَسن اَثن عَاوْنن. ؤُسِين-د عمَّرن ثْنَاين ن ثْغَرُّوْبَا نْسن اَڒ وَامِي عْڒَاين اَذ غرْقنْت.
8سِمْعَان بُطْرُس وَامِي يࢲْرا مَانَايَا يُوْسَا-د يوْضَا غَار يضَارن ن عِيْسَى ينَّا-ٱس: "آ سِيذِي، بعّذ خَافِي نش ذ لْعَاصِي." 9ئِذْهش نتَّا ذ يِنِّي اَكِذس مَارَّا ڒَاحقَّاش حدْجْقن-د اَطَّاس ن يسڒْمَان. 10عَاوذ يذْهش ؤُڒَا ذ يَعْقُوْب ذ يُوْحَنَّا ثَارْوَا ن زَبَادِي نِثْنِي ذ يمدُّوْكَاڒ ن سِمْعَان.
ينَّا-ٱس عِيْسَى إِ سِمْعَان: "وَار تݣّْوذ شَا، شك سَّا اَڒ ثْسَاونْت اَتَاف اَذ تْحدْجْقذ يوْذَان." 11وَامِي د ذوْڒن س ثْغَرُّوْبَا غَار ڒْبَرّ سمْحن ذِي مَارَّا مِين غَارْسن ذْفَارن عِيْسَى.
سِيذِيثْنغ عِيْسَى يسْݣنْفَا يجّن ذَايس جْذَام
12وَامِي عِيْسَى اَقَاث ذݣ يِجّن ن ثنْدِينْت، يُوْسَا-د يجّن ن ورْيَاز ذَايس جْذَام اَطَّاس. ئِࢲْرَا عِيْسَى يوْضَا-يَاس غَار يضَارن يتَّار-اَس ينَّا-ٱس: "آ سِيذِي، شك مڒَا ثخْسذ ثزمَّرذ اَذَايِي ثسِّيصْفِيذ."
13ئِقَارّب غَارس عِيْسَى يحَاذَا-ث س وفُوْس نّس ينَّا-ٱس: "وَاه نش خْسغ، شك قَا ثݣنْفِيذ!" صَافِي ذݣ ومْشَان يرُوْح-اَس جْذَام نِّي.
14ئِوصَّا-ث ينَّا-ٱس: "وَار تْخبَّر حَدّ." ينَّا-ٱس: "رُوْح غَار ڒفْقِي سظْهَار-اَس يخف نّش. اݣّ صّذْقث نِّي إِي زِي يوصَّا مُوْسَى حمَا اَغَارْسن ثِيڒِي شْهَاذث خ مين يوقْعن."
15وَلَكِن سّنِّي يبْذَا يتنْتَاشَر خَاس ڒخْبَار كْتَار عَاذ. ؤُسِين-د غَارس اَطَّاس ن ڒْغَاشِي حمَا اَذَاس سْڒن حمَا اَذ ݣنْفَان زِي ڒهْڒَاشَاث نْسن. 16نتَّا تُوْغَا يتْرَاح غَار يمُوْشَان إِݣ يخْڒَان حمَا اَذ يࢲَّادْج ذِنِّي.
سِيذِيثْنغ عِيْسَى يسْݣنْفَا يجّن ن ونشْرُوْف
17ئِجّن ن نْهَار تُوْغَا عِيْسَى يسڒْمَاذ يوْذَان. قِّيمن ذِنِّي جَارَاسن ڒبْعَاض زِي ڒْحِزب ن يفَرِّسِيْين ذ يمْسڒْمَاذن ن شَّرِيعَا، ؤُسِين-د زِي مَارَّا ڒدْشُوْرَاث ن لْجَلِيل ذ يَهُوْذِيَا ذ لْقُدْس. جّْهذ ن سِيذِي أَربِّـي اَقَاث اَك عِيْسَى بَاش اَذ يسْݣنْفَا يمهْڒَاش. 18ؤُسِين-د شَان يِوْذَان يْسِين يجّن ن ورْيَاز يزّڒ ذِي ثَاسُّوْث نّس مُّوْثن-اَس يضَارن. رزُّوْن مَامّش غَا ݣّن اَث سِيذْفن اَث سرْسن زَّاثس. 19وَامِي ؤُفِين وَار زمَّرن اَث سِيذْفن مِينْزِي ذِنِّي اَطَّاس ن ڒْغَاشِي، ݣَعّْذن زَّايْس غَار ثْزقَّا قڒْعن يجّن ن ومْشَان ذِي سّْقف سهْوَان-ث-يد خ ثَاسُّوْث نّس غَار ڒْوسْط زَّاث إِ يضَارن ن عِيْسَى.
20نتَّا وَامِي يࢲْرَا لْإِيمَان نْسن ينَّا-ٱس إِ ونشْرُوف نِّي: "آي اَرْيَاز، تْوَاغْفَرنْت-اَش ڒْمُعْصِيَاث نّش."
21بْذَان يمْسڒْمَاذن ن شَّرِيعَا ذ ڒْحِزب ن يفَرِّسِيْين تْفكَّرن نَّان ذݣ وُوْڒَاون نْسن: "مِين يعْنَا وَانِيتَا يتَارَّا يخف نّس ذ أَربِّـي؟ ڒْمُعْصِيَاث وَار ثنْت يغْفَر شَا إِلَّا أَربِّـي وَاحْذس!"
22عِيْسَى يسّن مِين نْوَان ينَّا-ٱسن: "مَايْمِي تْفكَّرم اَمُّو كنِّيو ذِي ڒَعْقُوْڒَاث نْوم؟ 23مِين يسهْڒن اَطَّاس اَذَاس ينِيغ إِ ونشْرُوْف-أَ، مَا ٱذَاس ينِيغ: تْوَاغْفَرنْت-اَش ڒْمُعْصِيَاث نّش؟ نِغ مَا ٱذَاس يينِيغ: كَّر شك ؤُيُوْر؟ 24نش خْسغ اَذ تسّْنم مِّيس ن بْنَاذم غَارس سُّلْطَا خ ثْمُوْرْث حمَا اَذ يغْفَر ڒْمُعْصِيَاث." أُوْشَا ينَّا-ٱس عِيْسَى إِ ونشْرُوْف نِّي: "أَذَاش ينِيغ، بدّ خ يضَارن نّش يْسِي ثَاسُّوْث نّش رُوْح اَذ تْروّْحذ غَار ثدَّارْث نّش!" 25ڒخْدّنِّي يكَّر ونشْرُوْف نِّي زَّاثْسن ييْسِي مِين تُوْغَا خف يزّڒ، يروّح يحمّذ أَربِّـي.
26مَارَّا ذهْشن ذِي مَانَايَا حمّْذن أَربِّـي، ݣّْوْذن اَطَّاس نَّان: "نْهَارَا نࢲْرَا ثِمسْڒَايِين سذْهَاشنْت اَطَّاس!"
سِيذِيثْنغ عِيْسَى يتْڒَاغَا-د إِ لَاوِي
27منْبَعد يرُوْح عِيْسَى يُوْفَا يجّن يجمّع ضَّرِيبَا قَّارن-اَس لَاوِي، ئِقِّيم ذݣ ومْشَان مَانِي جمّْعن ضَّرِيبَا. ينَّا-ٱس عِيْسَى: "ذْفَار-اَيِي-د." 28أُوْشَا يكَّر لَاوِي يسْمح ذِي مَارَّا يذْفَار-يث. 29يݣَّا-ٱس لَاوِي يجّن ن زَرّْدث ذ ثَمقّْرَانْت ذِي ثدَّارْث نّس. حْضَارن اَكِذْسن اَطَّاس ن يعشَّارن ذ ينّغْنِي إِي قِّيمن اَكِذْسن اَذ شّن.
30شثْشَان زَّايس ڒْحِزب ن يفَرِّسِيْين ذ يمْسڒْمَاذن ن شَّرِيعَا نَّان-اَسن إِ يمحْضَارن نّس: "مَايمِّي تتّم ثْسسّم اَك يعشَّارن#5.30 مِين عنَّان يعشَّارن؟ نِثْنِي زِي أَيث-إِسْرَائِيل خدّْمن اَك لْمخْزن ن اَرُّوْمَانُوْس جمّْعن ضَّرِيبَا زݣ أَيثْمَاثْسن. ئِسْرَائِيلِيْين نّضْنِي قَّارن بلِّي يعشَّارن عصَّان اَطَّاس. عَاوذ اَزْين اَمقّْرَان ن يعشَّارن اَرنِّين شِي حَجَا حمَا اَثنْت كْسِين إِ يِيخف نْسن. ذ يِنِّي يعصَّان؟"
31يَارَّا خَاسن عِيْسَى ينَّا-ٱسن: "ئِوْذَان يصحَّان وَار تحْذِيجِين بُو وضْبِيب، أَضْبِيب تحْذَاجَان-ث يمهْڒَاش." 32ينَّا-ٱسن: "نش وَار د ؤُسِيغ شَا اَذ ڒَاغِيغ إِ يِنِّي يدْجَان نِيشَان حمَا اَذ تُوْبن، ؤُسِيغ-د غَار يِنِّي يعصَّان."
33نَّان-اَس: "مَايمِّي يمحْضَارن ن يَحْيَى ذ يمحْضَارن ن ڒْحِزب ن يفَرِّسِيْين تْࢲُوْمَّان تْࢲَادْجَان اَطَّاس، ئِمحْضَارن نّش تتّن سسّن وَاهَا؟"
34ينَّا-ٱسن عِيْسَى: "كنِّيو مَا تجّم ئِمدُّوْكَاڒ ن مُوْڒَاي اَذ ࢲُوْمّن ذِي ڒْفَارْح نّس؟" 35ينَّا-ٱسن: "لَّا، وَلَكِن عَاذ اَذ د اَسن وُوْسَان اَذ يميْسِي مُوْڒَاي زِي ڒْوسْط نْسن، ڒخْدّنِّي اَذ ࢲُوْمّن ذݣ وُوْسَان نِّي."
36ئِسِّيوڒ عَاوذ اَكِذْسن س ڒْمَعْنَا-يَا: "وَار يدْجِي حَدّ يتقْسَّاس-د ثَرقِّيعْث زݣ وَارُّوْض ن جْذِيذ حمَا س ثْرقِّيعْث نِّي اَزَّايس يرقّع اَرُّوْض ذ ڒْبَاڒِي. مَايمِّي؟ أَرُّوْض ذ جْذِيذ اَذ يقِّيم يتْشرَّاݣ وَاهَا، ونِّي ن ڒْبَاڒِي وَار خَاس د تِيس ثْرقِّيعْث نِّي ن جْذِيذ. 37ؤُڒَا ذ اَمَان ن وضِيڒ ذ جْذِيذ وَار خدْجْقن شَا ذݣ يِيڒْمَاون يقْذِيمن، حمَا وَار دُّوْقُّوْزن وَار تْزدْجِيعن شَا وَامَان ن وضِيڒ اَذ ضيّْعن يِيڒْمَاون نِّي. 38وَلَكِن اَمَان ن وضِيڒ ذ جْذِيذ خدْجْقن ذݣ يِيڒْمَاون ذ جْذِيذ. 39مڒَا يسْوَا شَان يجّن اَمَان وضِيڒ يقْذِيمن، أَتَاف وَار يتخْس شَا يِنِّي ذ جْذِيذ مِينْزِي يقَّار قَا يِنِّي يقْذِيمن ذ يصبْحَانن."
Currently Selected:
لوقا 5: ريف
Highlight
Share
Copy
Want to have your highlights saved across all your devices? Sign up or sign in
