متى 5
5
سِيذِيثْنغ عِيْسَى ذ وسڒْمذ نّس ذݣ وذْرَار
1وَامِي يࢲْرَا قَاع ڒْغَاشِي نِّي، يُوْڒِي غَار وذْرَار يقِّيم ؤُسِين-د غَارس يمحْضَارن نّس. 2ئِبْذَا يسڒْمَاذ-يثن ينَّا-ٱسن:
3"سَّعْذ نْسن إِ يِنِّي يدْجَان ذ ڒْمُسَاكِين ذݣ اَرُّوْح نْسن، أَقَا ڒْمُلْك وجنَّا إِ نِثْنِي.
4سَّعْذ نْسن إِ يِنِّي يتْرُوْن، أَقَا اَذ تْوَاشجّْعن.
5سَّعْذ نْسن إِ يِنِّي يدْجَان ذ دْرَاوش، أَقَا اَذ وَرْثن دُّنشْت.
6سَّعْذ نْسن إِ يِنِّي يدْجُوْزن يفُّوْذن غَار مِين يدْجَان نِيشَان، ڒَاحقَّاش نِثْنِي اَذ جَّاوْنن.
7سَّعْذ نْسن إِ يِنِّي يرحّْمن، أَقَا اَثن يرْحم أَربِّـي ؤُڒَا ذ نِثْنِي.
8سَّعْذ نْسن إِ يِنِّي غَار يدْجَا وُوْڒ ذ اَشمْڒَاڒ، أَقَا اَذ ࢲرن أَربِّـي.
9سَّعْذ نْسن إِ يِنِّي يصدْجْحن يوْذَان، أَقَا نِثْنِي اَثن سمَّان اَمشْنَاو ثَارْوَا ن أَربِّـي.
10سَّعْذ نْسن إِ يِنِّي يتْوَاعدَّابن خ سَّبَاب ن مِين يدْجَان نِيشَان، أَقَا ڒْمُلْك ن وجنَّا إِ نِثْنِي.
11سَّعْذ نْوم مڒَا تْزَوَارن-كنِّيو، عدّْبن-كنِّيو، نِغ نَّان ذَايْوم ڒْعِيب س يخَارِّيقن خ سَّبَاب ينُو. 12ضحْشث، فَرْحث. أَقَا غَارْوم يجّن ن لْأَجَار ذ اَمقّْرَان ذݣ وجنَّا ڒَاحقَّاش اَمنِّي إِي تْوَاعدّْبن لْأَنْبِيَا تُوْغَا يدْجَان قْبڒ نْوم.
ڒمْڒح ذ ثْفَاوْث
13ذ كنِّيو إِي يدْجَان ذ ڒمْڒح ثَصبْحَانْت ن ثْمُوْرْث. وَلَكِن مڒَا يرُوْح-اَس لْمَذَاق نّس، مَامش ذَاس غَا نݣّ اَذَاس ثِيذ نَارّ؟ أَتَاف وَار ثْصدْجَاح إِ وَالُو، غِير اَت نْضَرن غَار بَارَّا وَاهَا اَخَاس عفّْسن يِوْذَان. 14كنِّيو ذ ثْفَاوث ن دُّنشْت. ئِجّن ن ثنْدِينْت إِي يدْجَان خ وذْرَار وَار ثْزمَّر اَذ تقِّيم ثْنُوْفَّر. 15ئِوْذَان وَار سْرقِّين شَا ڒْقنْدِيڒ حمَا اَخَاس قڒْبن اَقْنُوْش؛ لَّا، تݣّن-ث خ ڒْمَرْفَع حمَا اَذَاسن يُوْش ثْفَاوث إِ مَارَّا ؤُݣ يدْجَان ذِي ثدَّارْث. 16أَمُّو، جّث ڒْقنْدِيڒ نْوم يشعّڒ إِ يِوْذَان حمَا اَذ ࢲرن ڒخْذَايم نْوم ثِصبْحَانِين اَذ حمْذن بَابَاثْوم يدْجَان ذݣ وجنَّا.
شَّرِيعَا
17وَار تْفكَّرث شَا بلِّي ؤُسِيغ-د بَاش اَذ قْضِيغ خ شَّرِيعَا ن مُوْسَى نِغ خ مِين نَّان لأَنْبِيَا؛ لَّا، وَار د ؤُسِيغ شَا اَخَاسن قْضِيغ، ؤُسِيغ-د بَاش اَذ كمّْڒغ خ وَاوَاڒ نْسن. 18أَقَا تسْڒَام ڒْحَقّ: وَار يتكّس يجّن ن ڒْحَرْف نِغ ذ يجّن ن ثْنقِّيط زِي شَّرِيعَا اَڒ غَا يتْوَاكّس وجنَّا ذ ثْمُوْرْث أَڒ غَا يتْوَاكمّڒ كُڒْشِي. 19مَارَّا ؤُو غَا يحَرْفن يجّن ن ڒُوْصِيّث ذ ثَمزْيَانْت زِي شَّرِيعَا، سّنِّي اَذ يسڒْمذ إِ يِوْذَان خ مِين يتݣّ نتَّا، أَتَاف اَذ يِيڒِي ذ اَمزْيَان س وَاطَّاس ذِي ڒْمُلْك وجنَّا. وَلَكِن ونِّي غَا يطَاعن إِ شَّرِيعَا يݣَّا زَّايس، سّنِّي اَذ يسڒْمذ إِ يِوْذَان اَذ ݣّن اَم نتَّا، أَتَاف اَذ يِيڒِي ذ اَمقّْرَان س وَاطَّاس ذِي ڒْمُلْك وجنَّا. 20أَقَا قَّارغ-اَوم: مڒَا وَار ثتْطِيْعِيم شَا إِ مِين يقَّار أَربِّـي كْتَار زِي مِين تݣّن يمْسڒْمَاذن ن شَّرِيعَا ذ ڒْحِزب ن يفَرِّيسِيْين، أَتَاف عمَّارْص اَذ تَاذْفم ڒْمُلْك وجنَّا.
أَعصّب
21أَقَا ثسْڒِيم ذِي لْكِتَاب بلِّي يتْوَانَّا-يَاسن إِ ڒجْذُوْذ نْوم: وَار نقّ شَا، أَقَا مَارَّا ونِّي إِي غَا ينْغن حَدّ اَتَاف اَذ يتْوَاحْكم.#5.21 خْزَر ؤُفُوْغ (الخروج) 20:13. 22وَلَكِن نش قَّارغ-اَوم: مَارَّا ؤُو غَا يعَصْبن خ وُوْمَاس اَتَاف اَذ يتْوَاحْكم. ونِّي غَا يِينِين إِ وُوْمَاس: آي اَغْيُوْڒ، أَتَاف اَذ يتْوَاحْكم ذِي لْمَحْكَامَا ثَمقّْرَانْت. ذ ونِّي غَا يِينِين إِ وُوْمَاس: آي اَفْغُوْڒ، أَتَاف يسْذَاهدْج اَذ يرَاح غَار ثْمسِّي ن جَهنَّمَا.
23مڒَا ثْرُوْحذ اَذ تْقدّْمذ دْبِيحث إِ أَربِّـي أُوشَا ثْفكَّرذ يجّن ن وُوْمَاش يخيّق خَاش، 24اجّ دْبِيحث نِّي ذِنِّي غَار ڒْمذْبَح، رُوْح ذ اَمزْوَارُو اَذ تْصڒْحذ اَك وُوْمَاش. عَاذ إِي د غَا ثْذوْڒذ اَذ تْقدّْمذ دْبِيحث نّش إِ أَربِّـي.
25مڒَا يتْهم-يشك شَا حَدّ منْبَعْد ؤُوِين-اَش-د لْإِسْتِدْعَا حمَا اَكِذس ثْرَاحذ غَار لْمَحْكَامَا، عْذڒ اَكِذس ذغْيَا ذݣ وبْرِيذ بَاش وَار ش يسِيوِّيض شَا غَار ڒْقَاضِي، ڒْقَاضِي نِّي اَذ ئِأَمَر اَمْخَازْنِي، أَمْخَازْنِي نِّي اَش ينْضَر ذِي ڒحْبس. 26أَقَا تسْڒِيذ ڒْحَقّ: وَار سّنِّي د تفّْغذ شَا اَڒ غَا ثْخدْجْسذ صُولْدِي اَنݣَّارُو.
أَزْنَا
27ثسْڒِيم ذِي لْكِتَاب بلِّي يتْوَانَّا ذݣ يِجّن ن زْمَان: وَار زنَّا شَا.#5.27 خْزَر ؤُفُوْغ (الخروج) 20:14. 28وَلَكِن نش قَّارغ-اَوم: مَارَّا ونِّي يخزَّرن غَار شَان ثمْغَارْث س وُوْڒ نّس، أَتَاف يتْوَاحْسَاب يزْنَا. 29مڒَا ثِيطّ نّش ثَفُوْسِيث تْسبَّاب-اَش ذِي شَان ڒفْضِيحث، قْڒع-يت زَعْمَا نْضَر-يت خَاك. حْسن إِ شك اَذ تخْسَرذ يجّن ن طَّارْف زِي دَّات نّش زِي مڒَا ثْمنْضَار دَّات نّش اَمن-ثكْمَاڒ ذِي جَهنَّمَا. 30مڒَا فُوْس نّش اَفُوْسِي يتْسبَّاب-اَش ذِي شَان ڒفْضِيحث، قسّ-يث زَعْمَا نْضَر-يث خَاك. حْسن إِ شك اَذ تخْسَرذ يجّن ن طَّارْف زِي دَّات نّش زِي مڒَا ثْرُوْح دَّات نّش اَمن-ثكْمَاڒ ذِي جَهنَّمَا.
أَدْجَاف
31أَقَا يتْوَانَّا ذݣ يِجّن ن زْمَان ذِي لْكِتَاب عَاوذ: ونِّي غَا يدْجْفن إِ ثمْغَارْث نّس، أَتَاف اَذَاس يُوْش ثَبْرَات نّس.#5.31 خْزَر أَفسَّار ن شَّرِيعَا ن مُوْسَى (التثنية) 24:1. 32وَلَكِن نش قَّارغ-اَوم: مَارَّا ونِّي غَا يدْجْفن إِ ثمْغَارْث نّس، نتَّاث وَار ثزْنِي شَا، أَتَاف يتَارَّا-ت ثزْنَا يعْنِي مڒَا ثْعَاوذ ڒمْڒَاش. ونِّي إِي غَا يمڒْشن اَك ثنِّي يدْجْفن، أَتَاف يزْنَا.
ثِجَادْجِيث
33أَقَا ثسْڒِيم ذِي لْكِتَاب عَاوذ بلِّي يتْوَانَّا إِ ڒجْذُوْذ نْوم: قَا وَار تْخَالَاف بُو ثْجَادْجِيث نّش، كمّڒ ثْجَادْجِيث نّش إِي ثجُّوْدْجذ زَّاث إِ سِيذِي أَربِّـي.#5.33 خْزَر لْعَدَد 30:2. 34وَلَكِن نش قَّارغ-اَوم: وَار تْجَادْجَام شَا عمَّارْص: وَاخَّا س وجنَّا ڒَاحقَّاش نتَّا ذ لْعَارْش ن أَربِّـي؛ 35ؤُڒَا س ثْمُوْرْث ڒَاحقَّاش خَاس يتْمَارْسن يضَارن نّس؛ وَاخَّا س ثنْدِينْت ن لْقُدْس ڒَاحقَّاش نتَّاث ذ ثَنْدِينْت ن وزدْجِيذ اَمقّْرَان. 36وَار تْجَادْجَا بُو س وزدْجِيف نّش، ڒَاحقَّاش وَار ثْزمَّرذ شَا اَذ تَارَّاذ شَان ن وزُوْطُّو ذ اَشمْڒَاڒ نِغ ذ اَبرْشَان. 37أَذ يِيڒِي وَاوَاڒ نْوم: وَاه نِغ لَّا. مَارَّا مِين غَا ثِينِيم ذ زّْيَادَا، أَتَاف اَࢲْور نّس زِي شِّيطَان.
خْسث ڒْعَذْيَان نْوم
38أَقَا ثسْڒِيم ذِي لْكِتَاب مِين يتْوَانَّان ذݣ يِجّن ن زْمَان: ونِّي غَا يكّْسن ثِيطّ إِ شَان يِجّن، أَتَاف اَذَاس كّْسن ثِيطّ. ونِّي غَا يكّْسن ثِغْمسْت إِ شَان يِجّن، أَتَاف اَذَاس كّْسن ثِغْمسْت.#5.38 خْزَر ؤُفُوْغ (الخروج) 21:24، لْكِتَاب ن أَيث-لَاوِي 24:20، ذ أَفسَّار ن شَّرِيعَا ن مُوْسَى (التثنية) 19:21. 39وَلَكِن نش قَّارغ-اَوم: وَار تْعَارَّاضم شَا إِ ونِّي يدْجَان ذ اَعفَّان. ونِّي ش غَا يسقّْڒن غَار وغمْبُوْب جِّهث ثَفُوْسِيث ذوَّاڒ-اَس جِّهث نّغْنِي. 40ونِّي يخْسن اَش يَاوِي غَار شْرَاع حمَا اَذَاش يَاوِي ثَقْمِيجَات، ؤُش-اَس ؤُڒَا ذ اَزدْجَاب نّش. 41مڒَا شَان يِجّن زِي ڒْمخْزن يݣَّا خَاك بزّز اَذ تيْسِيذ ڒحْمڒ يجّن ن كِيلُوْمِت، يْسِي-ث شك ثْنَاين كِيلُوْمِت. 42ونِّي ذَاش غَا يتَّارن شَان ثْمسْڒَايْث، ؤُش-اَس-ت. ونِّي د غَا يَاسن غَارك يرزُّو اَذ يرْضڒ وَار ث تَارَّا شَا يخْوَا.
43أَقَا ثسْڒِيم ذِي لْكِتَاب مِين يتْوَانَّان ذݣ يِجّن ن زْمَان: أَذ تخْسذ اَجَّار نّش، أَذ تْعِيفّذ ڒَعْذُو نّش.#5.43 خْزَر لْكِتَاب ن أَيث-لَاوِي 19:18. 44وَلَكِن قَّارغ-اَوم نش: خْسث ڒْعَذْيَان نْوم، تَّارث إِ أَربِّـي خ يِنِّي كنِّيو يتْعدَّابن، 45حمَا اَذ تِيڒِيم ذ ثَارْوَا ن بَابَاثْوم إِي يدْجَان ذݣ وجنَّا. ڒَاحقَّاش يتْسُوْمُّوْر-د ثْفُوْشْت خ يِنِّي يصبْحَانن ذ يِنِّي يعفَّانن. ئِتِيشّ اَنْࢲَار إِ يِنِّي يتݣّن ڒْخِير ذ يِنِّي يتݣّن شَّرّْ. 46مڒَا كنِّيو تخْسم غِير يِنِّي إِي كنِّيو يتخْسن، مَان لْأَجَار إِي غَارْوم كنِّيو؟ مَا وَار يدْجِي اَمنِّي إِي تݣّن ؤُڒَا ذ يعشَّارن؟#5.46 ئِعشَّارن نِثْنِي ذ يسْرَائِيلِيْين خدّْمن اَك لْمخْزن ن اَرُّوْمَانُوْس جمّْعن ڒَعْشُور. ئِسْرَائِيلِيْين نّغْنِي قَّارن يعشَّارن عْلَاحْسَاب مِين تݣّن عصَّان اَطَّاس. عَاوذ اَزْين اَمقّْرَان ن يعشَّارن اَرنِّين شِي حَاجَا حمَا اَثنْت يْسِين إِ يِيخف نْسن. 47مڒَا تْسدْجَامم غِير خ يمدُّوْكَاڒ نْوم، إِيوَا مِين تݣّم ذ زّْيَادَا؟ أَقَا ؤُڒَا ذ ڒْكُفَّار تݣّن مَانَايَا! 48إِڒِيث نِيشَان قَاع، أَمشْنَاو مَامش يدْجَا بَابَاثْوم ذݣ وجنَّا.
Currently Selected:
متى 5: ريف
Highlight
Share
Copy
Want to have your highlights saved across all your devices? Sign up or sign in
