مرقس 11
11
سِيذِيثْنغ عِيْسَى يتَاذَاف خ وسْنُوْس غَار ثنْدِينْت ن لْقُدْس
1وَامِي قَارّْبن غَار ثنْدِينْت ن لْقُدْس، غَار يبِيلَاجن ن بَيْت فَاجِي ذ بَيْت عَنْيَا زَّاث إِ وذْرَار ن زِّيتُون، ئِكَّر عِيْسَى يسّكّ ثْنَاين زݣ يمحْضَارن نّس 2ينَّا-ٱسن: "رُوْحم غَار وبِيلَاج-ين إِي يدْجَان زَّاثْوم. خْمِي غَا ثَاوْضم ذِنِّي، أَذ تَافم يجّن ن وسْنُوْس يقّن عمَّارْص وَار خَاس ينْيِي ؤُڒَا ذ يجّن، فْسِيم-اَس اَوِيم-ث-يذ. 3مڒَا يسِّيوڒ-د غَارْوم شَان يِجّن ينَّا-ٱوم مَايمِّي تݣّم اَمُّو، ئِنِيم-اَس قَا يحْذَاج-يث سِيذِيثْنغ، وَلَكِن اَذَاوم ثِيذ يَرّْ ذَانِيتَا ذغْيَا."
4رُوْحن ؤُفِين يجّن ن وسْنُوْس ذِي زّنْقث يقّن غَار يِجّن ن ثوَّارْث، فسْين-اَس. 5نَّان-اَسن ڒبْعَاض زݣ يِنِّي يبدّن ذِنِّي: "مِين تݣّم؟ مَايمِّي ثْفسِّيم إِ وسْنُوْس-أَ؟" 6جَاوْبن-ثن عْلَاحْسَاب مَامّش ثن يوصَّا عِيْسَى، أُوشَا جِّين-ثن. 7ؤُوِين-ث-يذ غَار عِيْسَى ݣِّين خَاس يزدْجُوْبَا نْسن، نتَّا ينْيَا خَاس.
8أَطَّاس ن يِوْذَان سُّوْن-اَس اَبْرِيذ س يزدْجُوْبَا نْسن. ڒبْعَاض زَّايْسن قسّن زݣ يمَرْجعِيون ڒفْرُوْع ن ڒْشجُّوْر سُّوْن-اَس زَّايْسن اَبْرِيذ. 9يِنِّي يݣُّوْرن زَّاثس ذ يِنِّي إِي ث يذفَّارن قَّارن:
"لْحَمْدُو إِ أَربِّـي!
سَّعْذ ن وَانِيتَا إِي د يُوْسِين عْلَاحْسَاب يسم ن سِيذِي أَربِّـي.
10سَّعْذ ن ڒْمُلْك نِّي إِي د يتَاسن ن جدِّيثْنغ دَاود.
لْحَمْدُو إِ أَربِّـي يُوْعْڒَان."
11يُوْذف عِيْسَى غَار ثنْدِينْت ن لْقُدْس غَار ثمْزِيذَا ثَمقّْرَانْت ن أَيث-إِسْرَائِيل، ئِخْزَر مِين ذِنِّي مَارَّا. وَلَكِن تُوْغَا يعْذُو ڒْحَاڒ، ئِفّغ اَك ثنْعَاش ن يمحْضَارن نّس يرُوْح غَار بَيْت عَنْيَا.
ثَشجَّارْث ن ثَازَارْث إِي يُوْزْغن
12ثِيوشَّا نّس تفّْغن زِي بَيْت عَنْيَا، عِيْسَى يدْجُوْز. 13ئِࢲْرَا زِي ڒݣّْوَاج يجّن ن ثْشجَّارْث ن ثَازَارْث ذَايس ثِيفْرَاي، ئِقَارّب غَارس يرزُّو خ ثَازَارْث. وَامِي غَارس يُوْوض يُوْفَا ذَايس ثِيفْرَاي وَاهَا مِينْزِي عَاذ وَار د ثُوْوِيض شَا ڒْوقْث ن ثَازَارْث. 14ينَّا-ٱس: "شم زِي سَّا اَڒ ثْسَاونْت عمَّارْص وَار زَّايم يتتّ حَدّ." ئِمحْضَارن نّس سْڒَان-اَس إِ مِين ينَّا.
سِيذِيثْنغ عِيْسَى اَقَاث ذِي ثمْزِيذَا ثَمقّْرَانْت ن أَيث-إِسْرَائِيل
15صَافِي ؤُوْضن غَار ثنْدِينْت ن لْقُدْس. يُوْذف عِيْسَى غَار ثمْزِيذَا ثَمقْرَانْت يبْذَا يتَازّڒ خ يِنِّي يسَّاغن ذ يِنِّي يزْنُوْزَان ذِنِّي ذِي ثمْزِيذَا. ئِقْڒب-اَسن مِيسَّاث ن يِنِّي يتْصَرَّافن تْمنْيَاث ذ ڒكْرَاسَا ن يِنِّي يزْنُوْزَان يذْبِيرن. 16وَار يتِيجِّي ؤُڒَا ذ يجّن اَذ يكّ خ ثمْزِيذَا مڒَا غَارس سّڒْعَاث. 17ئِسڒْمَاذ-يثن ينَّا-ٱسن: "مَا يقَّار لْكِتَاب مَا لَّا بلِّي <ثَدَّارْث ينُو اَذ تِيڒِي ذ ثَدَّارْث ن ثْࢲَادْجِيث إِ مَارَّا ڒݣْنُوس>؟ وَلَكِن كنِّيو ثَارِّيم-تث ذ يفْرِي ن يخوَّانن." 18سْڒِين-اَس اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا، بْذَان تْفكَّرن مَامّش ث غَا نْغن. ݣّْوْذن زَّايس وَامِي مَاَّرا ڒْغَاشِي قِّيمن ذهّْشن س وسڒْمذ نّس. 19غَار ثْمدِّيث تفّْغن غَار بَارَّا ن ثنْدِينْت.
أَسْفْهم ن ثْشجَّارْث ن ثَازَارْث نِّي إِي يُوْزْغن
20غَار صْبَاح زِيش وَامِي ݣُّوْرن خ وبْرِيذ ࢲْرِين ثَشجَّارْث نِّي ن ثَازَارْث ثُوْزغ س يࢲوْرَان نّس. 21ئِفكَّر ذَايس بُطْرُس ينَّا-ٱس إِ عِيْسَى: "خْزَر آ لْمُعَلِّم، ثَشجَّارْث نِّي ن ثَازَارْث إِي ثخْزِيذ اَقَا ثُوْزغ!"
22ئِنْدق-د عِيْسَى ينَّا-ٱسن: "أَمْنم زِي أَربِّـي! 23أَقَا تسْڒَام ڒْحَقّ: مڒَا شَان يجّن ينَّا-ٱس إِ وذْرَار-أَ: نقْڒع-د شك سَّانِيتَا ثْمنْضَارذ ذِي ڒبْحَر أُو ذݣ وُوْڒ نّس وَار ذَايس بُو شّكّ يُوْمن اَذ يوْقع مَانَاينِّي، أَتَاف مَانَاينِّي اَذ يِيڒِي. 24خ مَانَايَا اَذَاوم ينِيغ: قَاع مِين غَا ثتَّارم إِ أَربِّـي ذِي ثْࢲَادْجِيث نْوم، أَمْنم بلِّي اَذ تِيڒِي اَغَارْوم د ثَاوض اَتَاف اَغَارْوم د تِيڒِي. 25كنِّيو خْمِي غَا ثْبدّم اَذ تࢲَّادْجم، مڒَا غَارْوم شَا ن لْعَدَاوَا اَك شَان يِجّن سمْحم-اَس حمَا بَابَاثْوم يدْجَان ذݣ وجنَّا اَذَاوم يغْفَر دّْنُوْب نْوم. 26{مڒَا وَار ثْسمْحم شَا إِ يِوْذَان، بَابَاثْوم يدْجَان ذݣ وجنَّا وَار ذَاوم يغفَّر شَا دّْنُوْب نْوم.}"
سُّلْطَا ن سِيذِيثْنغ عِيْسَى
27صَافِي ذوْڒن غَار لْقُدْس. عِيْسَى يݣُّوْر ذِي ثمْزِيذَا ثَمقْرَانْت، ؤُسِين-د غَارس اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا ذ يمقّْرَانن ن أَيث-إِسْرَائِيل. 28كَّرن نَّان-اَس: "شك مَانِيس ذَاش د ثكَّا سُّلْطَا نِّي إِي زِي تݣّذ ثِمسْڒَايِين-أَ؟ وِي ذَاش يُوْشِين سُّلْطَا نِّي إِي زِي ثنْت تݣّذ؟"
29ئِجَاوب-يثن عِيْسَى ينَّا-ٱسن: "ؤُڒَا ذ نش اَكنِّيو سّقْسِيغ خ يِجّن ن ثْمسْڒَايْث. مڒَا ثْجَاوْبم-اَيِي-د خَاس، أَتَاف اَذَاوم ينِيغ زِي مَانِيس ذَايِي د ثكَّا سُّلْطَا-يَا إِي زِي تݣّغ ثِمسْڒَايِين-أَ." 30ينَّا-ٱسن عِيْسَى: "يَحْيَى، مَان سُّلْطَا إِي زِي يطهَّار س وَامَان، مَا زِي أَربِّـي مَا زݣ يِوْذَان؟ جَاوْبم-اَيِي-د."
31سِّيوْڒن جَارَاسن نَّان: "مڒَا ننَّا-اَس سُّلْطَا نِّي قَا ثكَّا-د زِي أَربِّـي، أَتَاف اَذَانغ يِينِي عِيْسَى مَايمِّي وَار زَّايس ثُوْمِينم؟ 32وَلَكِن مڒَا ننَّا-ٱس سُّلْطَا نِّي قَا ثكَّا-د زݣ يِوْذَان؟؟؟"
ݣّْوْذن نِثْنِي زِي شَّعْب اَذ ينِين اَمنِّي مِينْزِي قَاع تْوَاڒَان بلِّي يَحْيَى نتَّا ذ نَّبِي. 33أُوشَا نَّان-اَس إِ عِيْسَى: "نشِّين وَار نسِّين شَا."
ئِنْدق-د عِيْسَى ينَّا-ٱسن: "إِيوَا ؤُڒَا ذ نش وَار ذَاوم قَّارغ شَا مَانِيس ذَايِي د تكَّا سُّلْطَا-يَا إِي زِي تݣّغ ثِمسْڒَايِين-أَ."
Currently Selected:
مرقس 11: ريف
Highlight
Share
Copy
Want to have your highlights saved across all your devices? Sign up or sign in
