مرقس 10
10
طَّلَاق عْلَاحْسَاب مامّش إِي ذَانغ يقّار سِيذِيثْنغ عِيْسَى
1ئِكَّر عِيْسَى يفّغ سّنِّي يرُوْح غَار جْوَايه ن يَهُوْذِيَا ذ وجمَّاض-ين ن يغْزَار ن لْأُرْدُن. مُوْنن-د خَاس ذِنِّي ڒْغَاشِي عَاوذ، يبْذَا يسڒْمَاذ-يثن اَمشْنَاو ڒبْدَا.
2قَارّْبن-د غَارس شَان يِوْذَان زِي ڒْحِزب ن يفَرِّيسِيْين حمَا اَث جَرّْبن نَّان-اَس: "مَا حَلَال اَذ يدْجف شَان ورْيَاز إِ ثمْغَارْث نّس؟"
3ينَّا-ٱسن عِيْسَى: "مِينْخف كنِّيو يوصَّا مُوْسَى؟"
4نَّان-اَس يفَرِّيسِيْين: "مُوْسَى يسْمح إِ ورْيَاز اَذ يَارِي ثَبْرَات ن وَادْجَاف اَذَاس ت يُوْش إِ ثمْغَارْث نّس اَذَاس يدْجف."
5ينَّا-ٱسن عِيْسَى: "مُوْسَى يُوْرَا ڒُوْصِيّث نِّي إِ كنِّيو مِينْزِي غَارْوم ؤُڒ يقْسح. 6وَلَكِن زݣ وَامِي ثبْذَا دُّنشْت أَربِّـي يخْڒق-د اَرْيَاز ذ ثمْغَارْث. 7س مَانَاينِّي اَرْيَاز اَذ يسْمح ذِي بَابَاس ذ يمَّاس اَذ يمُوْن اَك ثمْغَارْث نّس، 8أَذ ذوْڒن س ثْنَاين إِذْسن ذ يجّن. خ مَانَايَا وَار تِيڒِين شَا ذ ثْنَاين؛ لَّا، أَذ يڒِين ذ يجّن. 9إِذن، مِين يسْمُوْن أَربِّـي وَار ث يسْفَرّق شَا بْنَاذم."
10ذِي ثدَّارْث سّقْسَان-ث يمحْضَارن نّس عَاوذ خ مَانَاينِّي. 11ينَّا-ٱسن عِيْسَى: "مَارَّا ونِّي غَا يدْجْفن إِ ثمْغَارْث نّس يُوْوِي شَان يشْتن نّغْنِي، أَتَاف يزْنَا. 12ثَمْغَارْث مڒَا ثدْجف إِ ورْيَاز نّس ثُوْوِي شَان يجّن نّغْنِي، أَتَاف ثزْنَا."
سِيذِيثْنغ عِيْسَى يتْبَرك يحنْجِيرن يمزْيَانن
13ؤُوِين-د يِوْذَان شَان يحنْجِيرن ذ يمزْيَانن غَار عِيْسَى حمَا اَثن يحَاذَا، وَلَكِن عَارّْضن-اَسن يمحْضَارن نّس. 14يࢲْرَا عِيْسَى مَانَايَا، وَار ذَاس يعْجِيب بُو ڒْحَاڒ ينّا-اَسن: "جّم يحنْجِيرن يمزْيَانن اَغَارِي د اَسن وَار ذَاسن تْعَارَّاضم شَا ڒَاحقَّاش ڒْمُلْك ن أَربِّـي يتِيڒِي غَار يِنِّي إِي يدْجَان اَم يِيْنَا. 15أَقَا تسْڒَام ڒْحَقّ: لَابُد إِ بْنَاذم اَذ يَامن س ڒْمُلْك ن أَربِّـي مَامْش زَّايس يتَامن وحنْجِير اَمزْيَان. مڒَا لَّا، أَتَاف بْنَاذم نِّي عمَّارص اَذ يَاذف ذِي ڒْمُلْك ن أَربِّـي." 16ئِذرّع-اَسن عِيْسَى يݣَّا خَاسن يفَاسّن نّس يبَرك-يثن.
أَرْيَاز إِݣ يدْجَان ذ تَّاجَر
17عِيْسَى وَامِي يݣُّوْر خ وبْرِيذ، يُوْسَا-د غَارس يجّن يتَازّڒ يوْضَا خ يفَادّن زَّاثس ينَّا-ٱس: "آ لْمُعَلِّم اَصبْحَان، مِين غَا ݣّغ حمَا اَغَارِي ثِيڒِي ثُوْذَارْث ن ڒبْدَا؟"
18ينَّا-ٱس عِيْسَى: "مَايمِّي ثقَّارذ قَا نش ذ اَصبْحَان؟ وَار يدْجِي حَدّ ذ اَصبْحَان إِلَّا أَربِّـي وَاحْذس. 19ثسّْنذ ڒُوْصِيَاث: وَار نقّ، وَار زنَّا، وَار تَاشَار، وَار شهّذ بُو ࢲُّوْر، وَار شمّث، وقَّر بَابَاش ذ يمَّاش."
20ينَّا-ٱس ورْيَاز نِّي: "آ لْمُعَلِّم، زݣ وَامِي إِي دْجِيغ نش ذ اَمزْيَان تْوقَّارغ قَاع مَانَايَا."
21ئِخْزَر غَارس عِيْسَى يُوْذف-اَس غَار وُوْڒ نّس ينَّا-ٱس: "قَا ثقِّيم-اَش يجّن ن ڒْحَاجث وَار ت ثݣِّيذ شَا." ينَّا-ٱس: "رُوْح زنْز مَارَّا مِين غَارك ذ اَݣْڒَا صدّق-يث خ ڒْمُسَاكِين اَغَارك يِيڒِي ڒْكنْز ذݣ وجنَّا، ڒخْدّنِّي اَرَاح-د شك ذْفَار-اَيِي-د." 22وَامِي يسْڒَا إ مَانَاينِّي يرُوْح يخيّق اَطَّاس ڒَاحقَّاش غَارس اَطَّاس ن وَاݣْڒَا.
23ئِخْزَر غَارْسن عِيْسَى ينَّا-ٱسن إ يْمحْضَارن نّس: "مشْحَاڒ يقْسح خَاسن خ تْوَاجَر اَذ اَذْفن ڒْمُلْك ن أَربِّـي." 24ذهْشن يمحْضَارن نّس خ وَاوَاڒ نِّي. ينَّا-ٱسن عِيْسَى عَاوذ: "آ ثَارْوَا ينُو، مشْحَاڒ يقْسح اَذ يَاذف بْنَاذم ڒْمُلْك ن أَربِّـي! 25أَقَا يسْهڒ اَذ يعْذُو يجّن ن وڒْغم زِي ثِيطّ ن ثْسيْنفْث قْبڒ مَا ٱذ يَاذف يجّن ن تَّاجَر ذِي ڒْمُلْك ن أَربِّـي!"
26ئِمحْضَارن تْعجّْبن اَطَّاس نَّان إِ وَايَاوْيَا: "خْيَار، أُوْݣ يزمَّرن اَذ ينْجم!؟"
27ئِخْزَر غَارْسن عِيْسَى ينَّا-ٱسن: "ئِوْذَان وَار زمَّرن شَا إِ مَانَايَا. وَلَكِن أَربِّـي وَاه، ئِزمَّر إِ كُڒْشِي."
28ئِنْدق-د بُطْرُس ينَّا-ٱس: "أَقَا نشِّين نسْمح ذِي كُڒْشِي نذْفَار-يش!"
29ينَّا-ٱسن عِيْسَى: "أَقَا تسْڒَام ڒْحَقّ: مَارَّا ونِّي يسمْحن ذِي ثدَّارْث نّس نِغ ذِي أَيْثْمَاس نِغ ذِي سُوْيْثْمَاس نِغ ذِي يمَّاس نِغ ذِي بَابَاس نِغ ذِي ثَارْوَا نّس نِغ ذݣ يمَرْجعِيون نّس خ سَّبَاب ينُو نش أُو عْلَاحْسَاب لْإِنْجِيل، 30أَتَاف اَغَارس ثِيڒِي مِيَّا ن ثْسقَّار زِي ثُوْذْرِين ذ أَيثْمَاس ذ سُوْيْثْمَاس ذ يمَّاس ذ ثَارْوَا نّس ذ يمَرْجعِيون نّس. أَغَارس يِيڒِي وعدّب ذي زْمَان-أَ، وَلَكِن ذِي زْمَان إِي د غَا يَاسن اَغَارس ثِيڒِي ثُوْذَارْث ن ڒبْدَا. 31أَطَّاس إِي يدْجَان ذ يمزْوُوْرَا اَذ ذوْڒن ذ ينݣُّوْرَا؛ يِنِّي يدْجَان ذ ينݣُّوْرَا اَذ ذوْڒن ذ يمزْوُوْرَا."
سِيذِيثْنغ عِيْسَى يسَّاوَاڒ عَاوذ خ ڒْموْث نّس
32أَقَاثن خ وبْرِيذ تْݣَعَّاذن غَار ثنْدِينْت ن لْقُدْس، عِيْسَى اَقَاث زَّاث. ئِمحْضَارن نّس ذهْشن، يِنِّي ث يذْفَارن ݣّْوْذن. ئِرُوْح يُوْوِي ثنْعَاش نِّي ن يمحْضَارن نّس ثْوَاڒَا نّغْنِي وَاحذْسن، ئِبْذَا يسَّاوَاڒ اَكِذْسن خ مِين ذَاس غَا يوقْعن ينَّا: 33"أَقَا نتْݣَعَّاذ غَار لْقُدْس مَانِي غَا يتْوَاخْذع مِّيس ن بْنَاذم إِ اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا. أَخَاس حكْمن س ڒْموْث، أَث سلّْمن إِ يِنِّي وَار يدْجِين شَا زِي أَيث-إِسْرَائِيل. 34أَخَاس ضحْشن، أَخَاس سُّوْسْفن، أَث ؤُوْثن س وسْغُوْن، أَث نْغن. نْهَار وِيس ثڒْتِيَّام اَذ د يكَّر زِي ڒْموْث."
طَّلب ن ثَارْوَا ن زَبَادِي
35يَعْقُوْب ذ يُوْحَنَّا يدْجَان ذ ثَارْوَا ن زَبَادِي قَارّْبن غَار عِيْسَى نَّان-اَس: "آ لْمُعَلِّم، نْرزُّو اَذَانغ ثْذبَّرذ مِين غَا نتَّار زَّايك."
36ينَّا-ٱسن عِيْسَى: "مِين ثْرزُّوم اَذَاوم ذبَّرغ؟"
37نَّان-اَس: "اجّ-اَنغ أَ نقِّيم ذِي لْعَظَمَا نّش يجّن خ وفُوْسِي يجّن خ وࢲڒْمَاض نّش."
38ينَّا-ٱسن عِيْسَى: "كنِّيو وَار ثسِّينم شَا مِين ثتَّارم. مَا ثْزمَّرم اَذ تسْوم زِي ڒْكَاس نِّي إِي زِي غَا سْوغ نش؟ نِغ اَذ تْغضْسم ذِي ڒَعْذَاب نِّي إِي ذِي غَا غضْسغ نش؟"
39نَّان-اَس: "وَاه، نْزمّر-اَس!"
ينَّا-ٱسن عِيْسَى: "وَاه، أَتَاف اَذ تسْوم زِي ڒْكَاس نِّي إي زِّي غَا سْوغ نش، أَذ تْغضْسم ذِي ڒَعْذَاب نِّي إِي ذِي غَا غضْسغ نش. 40وَلَكِن اَغِيمِي خ وفُوْسِي ينُو نِغ خ وࢲڒْمَاض ينُو وَار يدْجِي بُو ذ نش إِي ث غَا يُوْشن، أَذ يمُّوْش إِ يِنِّي ؤُمِي يتْوَاسّوْجذ."
41عشْرَا نِّي ن يمحْضَارن وَامِي سْڒِين خ مِين رزُّوْن يَعْقُوب ذ يُوْحَنَّا وَار ذَاسن يعْجِيب شَا ڒْحَاڒ. 42ئِڒَاغَا-يَاسن-د عِيْسَى مَارَّا إِذْسن ينَّا-ٱسن: "قَا ثسّْنم اَرُّوْيَاس ن ڒݣْنُوْس حكّْمن خ شُّعُوْب نْسن، يِنِّي يمقّْرَانن زَّايْسن تْزيَّارن خَاسن. 43وَلَكِن مَانَاينِّي يتْخصَّا وَار يتِيڒِي شَا جَارَاوم؛ لَّا، ونِّي يرزُّوْن اَذ يذْوڒ ذ اَمقّْرَان جَارَاوم يتْخصَّا-يَاس اَذ يِيڒِي ذ اَخدَّام نْوم. 44ونِّي يرزُّوْن اَذ يذْوڒ ذ اَمزْوَارُو جَارَاوم يتْخصَّا-يَاس اَذ يِيڒِي ذ يسْمغ ن مَارَّا. 45مِّيس ن بْنَاذم ؤُڒَا ذ نتَّا وَار د يُوْسِي شَا حمَا اَخَاس خذْمن يِوْذَان؛ لَّا، نتَّا يُوْسَا-د حمَا اَخَاسن يخْذم، أَخَاسن يصدّق ثُوذَارْث نّس حمَا اَذ يسنْجم اَطَّاس زَّايْسن."
سِيذِيثْنغ عِيْسَى يسْݣنْفَا بَرْتِيمُوْس ونِّي يدْجَان ذ اَضَرْغَاڒ
46ؤُوْضن غَار ثنْدِينْت ن اَرِيحَا. منْبَعْد يفّغ عِيْسَى زِي أَرِيحَا اَك يمحْضَارن نّس ذ وَاطَّاس ن ڒْغَاشِي. ؤُفِين ذِنِّي يجّن ن وضَرْغَاڒ يقِّيم طَّارْف ن وبْرِيذ يتتَّار، قَّارن-اَس بَرْتِيمُوْس مِّيس ن تِمُوْس. 47ئِتسْڒَا بلِّي عِيْسَى نَاصِرِي إي يعدُّوْن سّنِّي يبْذَا يسْنكَّر ثْغُوْيّث يقَّار: "آ عِيْسَى آ مِّيس ن اَيث-دَاود، رحْم-اَيِي!" 48زيَّارن خَاس اَطَّاس ن يِوْذَان قَّارن-اَس سْقَار. نتَّا يُوْݣِي، ئِقِّيم يسْنكَّر ثْغُوْيّث عَاذ س جّْهذ يقَّار: "آ مِّيس ن أَيث-دَاود، رحْم-اَيِي!"
49ئِبدّ عِيْسَى ينَّا-اَسن: "ڒَاغَام-د خَاس."
ڒَاغَان-د خ وضَرْغَاڒ نِّي نَّان-اَس: "فَرح شك كَّر، أَقَا يتْڒَاغَا-د خَاك عِيْسَى." 50ئِكّس اَزدْجَاب نّس ينْضَر-يث، ئِنخْضف ذغْيَا يبدّ خ يضَارن نّس يُوْسَا-د غَار عِيْسَى.
51ينَّا-ٱس عِيْسَى: "مِين ثخْسذ اَذَاش ݣّغ؟"
ينَّا-ٱس وضَرْغَاڒ نِّي: "آ سِيذِي، قَا نش خْسغ اَذ تْوَاڒِيغ."
52ئِنْدق-د عِيْسَى ينَّا-ٱس: "رُوْح، قَا لإِيمَان نّش يسْݣنْفَا-شك!" ڒخْدّنِّي يبْذَا يتْوَاڒَا يذْفَار عِيْسَى ذݣ وبْرِيذ.
Currently Selected:
مرقس 10: ريف
Highlight
Share
Copy
Want to have your highlights saved across all your devices? Sign up or sign in
