مرقس 9
9
1ينَّا-ٱسن عِيْسَى: "أَقَا تسْڒَام ڒْحَقّ: ڒبْعَاض زݣ يِنِّي يدْجَان ذَا اَكِذِي وَار تْمتِّين شَا اَڒ غَا ࢲرن ڒْمُلْك ن أَربِّـي يُوْسَا-د س جّْهذ."
سِيذْنَا مُوْسَى ذ سِيذْنَا إِلْيَاس تْمظْهَارن-د اَك سِيذِيثْنغ عِيْسَى
2ثعْذُو ستّييَّام، عِيْسَى يُوْوِي اَكِس بُطْرُس ذ يَعْقُوْب ذ يُوْحَنَّا يُوْوِي-ثن وَاحذْسن غَار يجّن ن وذْرَار يُوْعْڒَا. ذِنِّي زَّاث إِ ثِيطَّاوِين نْسن يذْوڒ اَم يِجّن ن نُّوْر. 3ئِذْوڒ وَارُّوْض نّس ذ اَشمْڒَاڒ يرقّ، وَار يزمَّر ؤُڒَا ذ يجّن خ ثْمُوْرْث اَذ يَرّ اَرُّوْض ذ اَشمْڒَاڒ اَم ونِّي. 4ئِمظْهَار-اَسن-د ذِنِّي نَّبِي إِلْيَاس ذ نَّبِي مُوْسَى. تْوَاڒَان-ثن سَّاوَاڒن اَك عِيْسَى.
5ئِنْدق-د بُطْرُس ينَّا-ٱس إِ عِيْسَى: "آ سِيذِي، ذ اَصبْحَان اَكِذش نقِّيم ذَانِيتَا. نشِّين أَ نݣّ ثْڒَاثَا ن يقِيضَان، ئِجّن إِ شك، ئِجّن إِ مُوْسَى، ئِجّن إِ إِلْيَاس." 6بُطْرُس تُوْغَا يفَجَا، وَار يُوْفِي شَا مِين غَا يِينِي، نِثْنِي ݣّْوْذن. 7يُوْسَا-د يجّن ن وسيْنُو#9.7 أَسيْنُو نتَّا ذ اَسݣْنُو. يهْوَا-د خَاسن. ثنْدق-د زَّايس يجّن ن ثْمِيجَّا ثنَّا-ٱسن: "قَا ذ وَانِيتَا ذ مِّي يعِيزّن، صنّْطث غَارس." 8وَامِي خْزَرن يمحْضَارن اَمُّو ذ وَامُّو، عْلَاغَفْلَا وَار اَكِذْسن ؤُفِين حَدّ إِلَّا عِيْسَى.
9وَامِي د هوَّان زݣ وذْرَار يوصَّا-ثن عِيْسَى ينَّا-ٱسن: "وَار تْعَاوَاذم إِ حَدّ مِين ثࢲْرِيم اَڒ د غَا يكَّر مِّيس ن بْنَاذم زِي ڒْموْث." 10جِّين اَوَاڒ نِّي جَارَاسن، سِّيوْڒن اَك وَايَاوْيَا نَّان: كِيفَاش، مِين يخس اَذ يِينِي اَذ د يكَّر زِي ڒْموْث؟
11سّقْسَان-ث يمحْضَارن نّس نَّان-اَس: "مَايمِّي يمْسڒْمَاذن ن شَّرِيعَا قَّارن يتْخصَّا نَّبِي إِلْيَاس اَذ د يَاس نتَّا ذ اَمزْوَارُو؟"
12ينَّا-ٱسن عِيْسَى: "ذ صَّح يتْخصَّا اَذ د يَاس إِلْيَاس ذ اَمزْوَارُو اَذ يعْذڒ كُڒْشِي. وَلَكِن مَايمِّي يقَّار لْكِتَاب بلِّي يتْخصَّا-يَاس إِ مِّيس ن بْنَاذم اَذ يتْوَاعدّب، أَث عِيفّن؟ 13أَذَاوم ينِيغ: أَقَا إِلْيَاس نِّي يُوْسَا-د، خذْمن ذَايس مِين خْسن مَامّش خَاس يُوْرَا ذِي لْكِتَاب."
سِيذِيثْنغ عِيْسَى يسْݣنْفَا يجّن ن وحنْجِير ذَايس جْنُوْن
14 عِيْسَى ذ يِنِّي اَكِذس ذوْڒن-د غَار يمحْضَارن ؤُفِين ذِنِّي ڒْغَاشِي ذ اَمقّْرَان مُوْنن-د خَاسن. ؤُفِين عَاوذ شَان يمْسڒْمَاذن ن شَّرِيعَا تْمنْغَان اَك يمحْضَارن نِّي. 15وَامِي ࢲْرِين عِيْسَى، مَارَّا ڒْغَاشِي نِّي ذهْشن ؤُزّْڒن غَارس اَخَاس سدْجْمن.
16ينَّا-ٱسن عِيْسَى: "مِينْخف تْمنْغَام؟"
17ئِنْدق-د يِجّن زِي ڒْغَاشِي نِّي ينَّا-ٱس: "آ لْمُعَلِّم، أَقَا ؤُوِيغ-اَش-د مِّي ذَايس جّنّ ذ اَزيْنُوْن. 18مَانِي ما يطّف-يث يغطَّاڒ-يث غَار ثْمُوْرْث، ئِسُوْفُوْغ-د نتَّا كُوْفُّو زݣ وقمُّوْم نّس يتْغࢲَّاࢲ ثِغْمَاس نّس يذوّڒ وَار يتنْهزِّي. تَّارغ زݣ يمحْضَارن نّش اَزَّايس سُوْفْغن جّنّ نِّي وَلَكِن نِثْنِي وَار ذَاس زمَّرن شَا."
19يَارَّا خَاسن عِيْسَى ينَّا-ٱسن: "آ يوْذَان ن ڒْوقْث-أَ إِي ذِي وَار يدْجِي بُو لْإِيمَان! مشْحَاڒ إِي كِذْوم غَا قِّيمغ أُو مشْحَاڒ ذَاوم غَا صْبَرغ؟ أَوِيم-اَيِي-ث-يد إِ نش." 20ؤُوِين-ث-يد غَار عِيْسَى، جّنّ نِّي يَالَّاه يࢲْرَا عِيْسَى يسرْجِيجِي اَحنْجِير نِّي يوْضَا غَار ثْمُورْث، ئِترْجِيجِي يتكّ-اَس-د كُوْفُّو زݣ وقمُّوْم.
21ينَّا-ٱس عِيْسَى إِ بَابَاس ن وحنْجِير نِّي: "مشْحَاڒ زݣ وَامِي إِي ذَايس مَانَايَا؟"
ينَّا-ٱس: "زݣ وَامِي يدْجَا ذ اَمزْيَان. 22أَطَّاس ن ثْوَاڒَاثِين ينطَّر-يث ذِي ثْمسِّي نِغ ذݣ وَامَان بَاش اَث ينغ. شك مڒَا ثْزمَّرذ، عَاون-اَنغ رْحم-اَنغ."
23ينَّا-ٱس عِيْسَى: "مَايمِّي إِي غَا ثِينِيذ مڒَا زمَّرغ؟ إِيوَا ونِّي يُوْمْنن يزمَّر إِ كُڒْشِي."
24ڒخْدّنِّي يسِّيوڒ س جّْهذ بَابَاس ن وحنْجِير نِّي ينَّا-ٱس: "نش ؤُمْنغ! عَاون لْإِيمَان ينُو ذ وقْلِيل."#9.24 لْجُمْلَا-يَا س تَّرْجَمَا حَرْفِيَا "عَاون شّكّ ينُو." تَّرْجَمَا نّس ثقْسح س ثْمَازِيغْث. ئِتْخصَّا أَ نْفكَّر مْلِيح ذِي ڒْمَعْنَا نّس حمَا أَ نفْهم نِيشَان مِين يخس اَذ يِينِي بَابَاس ن وحَرْمُوش-أَ.
25وَامِي يُوْفَا عِيْسَى ڒْغَاشِي ذغْيَا مُوْنن-د خَاس، ئِسْبدّ جّنّ نِّي اَعفَّان ينَّا-ٱس: "آ جّنّ اَزينُوْن آ جّنّ اَذهْشُوْر، تَمَرغ شك فّغ زَّايس وَار ذَايس تَاذَاف شَا عمَّارس عَاوذ!" 26ئِسْنكَّر ثْغُوْيّث جّنّ نِّي يسرْجِيجِي اَحنْجِير نِّي اَطَّاس ڒخْدّنِّي يفّغ زَّايس. أَحنْجِير نِّي يذْوڒ اَخْمِي يمُّوْث، نَّان اَطَّاس ن يِوْذَان اَقَا يمُّوْث صَافِي. 27وَلَكِن عِيْسَى يطّف-يث زݣ وفُوْس نّس يسْبدّ-يث يكَّر.
28يُوْذف عِيْسَى غَار ثدَّارْث، سّقْسَان-ث يمحْضَارن نّس وَاحْذس نَّان-اَس: "مَايمِّي زَعْمَا نشِّين تُوْغَا وَار نْزمَّر اَث نْسُوْفغ؟"
29يَارَّا خَاسن ينَّا-ٱسن: "نُّوْع ن جّن-أَ اَث نْسُوْفغ غِير س ثْࢲَادْجِيث."
30رُوْحن كِّين سّنِّي خ ثْمُوْرْث ن لْجَلِيل. عِيْسَى وَار يخس حَدّ اَذ يسّن اَقَاثن ذِنِّي 31مِينْزِي يرزُّو اَذ يسڒْمَاذ إِ يمحْضَارن نّس. ينَّا-ٱسن: "مِّيس ن بْنَاذم اَذ يتْوَاسلّم غَار يفَاسّن ن يِوْذَان. أَث نْغن، نْهَار وِيس ثڒْتِيَّام منْبَعْد إِ ڒْموْث نّس اَذ د يكَّر." 32وَلَكِن نِثْنِي وَار فْهِيمن شَا إِ وَاوَاڒ نِّي، ݣّْوْذن اَث سّقْسَان خ مِين ذَاسن ينَّا.
مَانْون إِݣ يدْجَان ذ اَمقّْرَان؟
33ؤُسِينْد غَار وبِيلَاج ن كَفرْنَاحُوْم. أَقَاثن ذِي ثدَّارْث يسّقْسَا يمحْضَارن نّس ينَّا-ٱسن: "مِينْخف تْمنْغَام ذݣ وبْرِيذ؟" 34وَار خَاس اَرِّين شَا سذْحَان مِينْزِي تْمنْغَان خ وبْرِيذ اَك وَايَاوْيَا ؤُݣ يدْجَان ذ اَمقّْرَان زَّايْسن.
35ئِقِّيم، ئِڒَاغَا-د خ ثنْعَاش نِّي ن يمحْضَارن نّس ينَّا-ٱسن: "ونِّي يرزُّوْن اَذ يذْوڒ ذ اَمزْوَارُو جَارَاوم يتْخصَّا-يَاس اَذ يِيڒِي ذ اَنݣَّارُو يعْنِي ذ اَخدَّام ن مَارَّا." 36ئِسْقَارّب-د غَارس يج وحنْجِير ذ اَمزْيَان، ئِسْبدّ-يث ذِي ڒْوسْط نْسن يذرّع-اَس ينَّا-ٱسن: 37"ونِّي غَا يقبْڒن شَان وحنْجِير اَم وَانِيتَا عْلَاحْسَاب يسم ينُو، أَخْمِي ذ نش إِݣ يقْبڒ. ونِّي ذَايِي غَا يقبْڒن، مَاشِي ذ نش إِݣ يقْبڒ؛ لَّا، يقْبڒ ونِّي ذَايِي د يسّكّن."
38ينَّا-ٱس يُوْحَنَّا: "آ لْمُعَلِّم، قَا نࢲْرَا يجّن يسُوْفُوْغ جْنُوْن عْلَاحْسَاب يسم نّش. نشِّين نرْزُو اَث نسْبدّ وَامِي وَار يدْجِي شَا ذ اَمحْضَار اَكِذْنغ."
39ينَّا-ٱس عِيْسَى: "وَار ث سْبدَّام شَا. وَار يزمَّر شَان يجّن اَذ يݣّ لْمُعْجِيزَا عْلَاحْسَاب يسم ينُو ڒخْدّنِّي ذغْيَا اَخَافِي يِينِي اَوَاڒ ذ اَعفَّان. 40ونِّي وَار يدْجِين شَا ضد نّغ، اَقَاث اَكِذْنغ. 41اَقَا تسْڒَام ڒْحَقّ: ونِّي ذَاوم غَا يُوْشن ڒْكَاس ن وَامَان ڒَاحقَّاش تذْفَارم لْمَسِيح اَتَاف اَذ يَاوِي لْأَجَر نّس وَار ث يتْضيِّيع شَا."
لإِيمَان ذ ڒْمُعْصِيّث
42ونِّي إِي غَا يَاوِين يجّن زݣ يمزْيَانن-أَ إِي زَّايِي يتَامْنن غار ڒْمُعْصِيّث، حْسن إِ نـتَّا اَذَاس شدّن يجّن ن وزْرُو ن ثْسِيرْث س وسْغُوْن غَار يِيرِي نّس، أَث نْضَرن ذِي ڒبْحَر. 43شك فُوس نّش مڒَا يتْسبَّاب-اَش ذِي شَان ڒفْضِيحث، قسّ-يث زَعْمَا. حْسن إِ شك اَذ تَاذْفذ جّنّث س يِجّن ن وفُوْس زِي مڒَا قِّيمن غَارك ثْنَاين ن يفَاسّن اَذ تْمنْضَارذ ذِي جَهنَّمَا غَار ثْمسِّي إِي وَار يخسِّين شَا عمَّارْص. 44{قَا ذِنِّي يكشَّاون وَار تْمتِّين شَا، ثِمسِّي وَار ثْخسِّي شَا.} 45مڒَا ضَار نّش يتْسبَّاب-اَش ذِي شَان ڒفْضِيحث، قسّ-يث زَعْمَا. حْسن إِ شك اَذ تَاذْفذ جّنّث س يِجّن ن وضَار زِي مڒَا قِّيمن غَارك ثْنَاين ن يضَارن اَذ تْمنْضَارذ ذِي جَهنَّمَا. 46{قَا ذِنِّي يكشَّاون وَار تْمتِّين شَا، ثِمسِّي وَار ثْخسِّي شَا.} 47مڒَا ثِيطّ نّش تْسبَّاب-اَش ذِي شَان ڒفْضِيحث، قْڒع-يت زَعْمَا. حْسن إِ شك اَذ تَاذْفذ جّنّث س يِجّن ن ثِيطّ زِي مڒَا قِّيمنْت غَارك ثْنَاين ثِيطَّاوِين اَذ تْمنْضَارذ ذِي جَهنَّمَا. 48قَا ذِنِّي يكشَّاون وَار تْمتِّين شَا، ثِمسِّي وَار ثْخسِّي شَا. 49مِينْزِي مَارَّا يوْذَان اَذ تْوَامدْجْحن س ثْمسِّي. 50ڒمْڒح ثْصدْجَاح، وَلَكِن مڒَا يرُوْح-اَس لْمَذَاق نّس، مَامْش ذَاس غَا نݣّ اَذَاس ثِيذ نَرّ؟ أَغَارْوم ثِيڒِي ڒمْڒح ذِي نّفْس نْوم، ئِڒِيم ذِي ڒهْنَا اَك وَايَاوْيَا."
Currently Selected:
مرقس 9: ريف
Highlight
Share
Copy
Want to have your highlights saved across all your devices? Sign up or sign in
