Kărdimata Le Apostolengă 13
13
O Barnaba thai o Saulo. Elima.
1Ande Khăngări andai Antioxia sas varesar prooročea thai sîkaitorea: O Barnaba, o Simono, phendino Niger, o Lučio andai Čirena, o Maneano, kai sas bareardo andekhthan le traditoresa le Irodosa, thai o Saulo.#Cap. 11.22-27; 14.26; 15.35. Rom. 16.21.
2Ta kana kandenas le Raiehkă thai postinas, o Sfînto Duxo phendea: „Thon Mangă rigate le Barnabas thai le Saulos anda e buti kai akhardem le.”#Cap. 9.15; 14.26; 22.21. Num. 8.14. Mat. 9.38. Rom. 1.1; 10.15. Gal. 1.15; 2.9. Efes. 3.7, 8. 1Tim. 2.7. 2Tim. 1.11. Evr. 5.4.
3Atunči, pala so postisarde thai rudisai le, thodine pehkă vast pa lende, thai mukle le te jeantar.#Cap. 6.6.
4O Barnaba thai o Saulo, tradine le Sfîntone Duxostar, uliste ande Selučia, thai oçal telearde le berosa ando Čipro.#Cap. 4.36.
5Arăsline ande Salamina, vestisardine o Divano le Devllehko ande le khăngărea le Iudeiengă. Sas le sar kanditorii le Ioanos.#Vers. 46. Cap. 12.25; 15.37.
6Pala so mardine sa e insula ji ando Pafos, arakhline khă drabarno, prooroko xoxamno, khă Iudeo, le anavesa Bar-Isus,#Cap. 8.9.
7kai sas le barăsa le Sergio Paulus, khă manuši godealo. Kadoa mai palal akhardea le Barnabas thai le Saulos, thai sîkadea lengă pehko kamimos te ašunel o Divano le Devllehko
8Ta o Elima, o drabarno, – kă kadea paruvel pe lehko anau – bešelas lengă xoleate, thai rodelas te del rigate le barăs katoa pateaimos.#Exod. 7.11. 2Tim. 3.8.
9Atunči o Saulo, kai mai bušol i Pavelo, avindoi pherdo Sfînto Duxo, dikhlindoi orta pe leste,
10thai phendea: „Manuši pherdo soa čiorimos thai soa jungalimos, šeau le bengăhko, dušmano orsave bezexangă, či mai atărdeos te bandearăs le droma orta le Raiehkă?#Mat. 13.38. Ioan 8.44. 1Ioan 3.8.
11Akana, dikta kă o vast le Raiehko nai tusa: avesa koŕo, thai či mai dikhăsa o kham ji ka khă čiro.” Andakhdata pelo pa leste buŕ thai tuneriko, thai rodelas le vastença varesar manuši, kaste nigrăn les vastestar.#Exod. 9.3. 1Sam. 5.6.
12Atunči o baro, kana dikhlea so kărdilea sas, pateaia, thai aši'lo mirime andoa sîkaimos le Raiehko.
O Pavelo ande Perga thai ande Antioxia Pisidiei.
13O Pavelo thai lehkă jene telearde le berosa anda o Pafos, thai găline ande Perga ande Pamfilia. O Ioano xuladi'lo lendar, thai amboldi'lo ando Ierusalimo.#Cap. 15.38.
14Andai Perga găline pe pehko drom angle, thai arăsline ande Antioxia andai Pisidia. Ando des le Savatohko, šute pe ande khăngări thai bešline tele.#Cap. 16.13; 17.2; 18.4.
15Pala o drabarimos la Krisako thai le Prooročengo, le bară la khăngăreakă tradine te phenen lengă: „Phralale, kana sî tume khă divano phendimahko andoa norodo, den duma.”#Vers. 27. Luka 4.16. Evr. 13.22.
16O Pavelo ušti'lo, kărdea khă sămno le vastesa, thai phendea: „Šavale Israieliçna thai tume kai daran le Devllestar, ašunen!#Vers. 26, 42, 43. Cap. 10.35; 12.17.
17O Dell kadale poporohko le Israelohko alosardea amară daden. Vazdea ande pativ le norodos kadales, ando čiro le bešlimahko ando čem le Ejiptohko, thai ankaladea les andoa Ejipto Pehkă vastesa le zuralesa.#Cap. 7.17. Exod. 1.1; 6.6; 13.14, 16. Deut. 7.6, 7. Ps. 105.23, 24.
18Čiro dă paše štarvardeši bărši, răbdisardea lengă o phirimos ande pustia.#Cap. 7.36. Exod. 16.35. Num. 14.33, 34. Ps. 95.9, 10.
19Thai, pala so xasardea efta popoare ando čem le Kanaanohko, dea le mandimos e phuw lendi, anda paše štaršella thai panvardeši bărši.#Deut. 7.1. Ios. 14.1, 2. Ps. 78.55.
20Pala kadala butea dea le krisînitorea, ji koa prooroko o Samuelo.#Kris. 2.16. 1Sam. 3.20.
21On mangline atunči khă thagar.Thai, čiro dă štarvardeši bărši, o Dell dea le Saulos, o šau le Šisehko, andai semençia le Beneaminosti;#1Sam. 8.5; 10.1.
22pala kodea dea les rigate, thai vazdea thagar le Davidos, pa sao phendea kadea: „Arakhlem le Davidos, o šeau le Iesehko, manuši pala o illo Muŕo, kai pherăla sa Mîŕă kamimata.”#Cap. 7.46. 1Sam. 13.14; 15.23, 26, 28; 16.1, 13. 2Sam. 2.4; 5.3. Ps. 89.20. Osea 13.11.
23Andai sămînça le Davidosti, o Dell, pala o šinaimos Pehko, vazdea andoa Israelo khă Skăpitorii, kai sî o Isus.#Cap. 2.30. 2Sam. 7.12. Ps. 132.11. Is. 11.1. Mat. 1.21. Luka 1.32, 69. Rom. 1.3; 11.28.
24Angla o avimos Lehko, o Ioano deasasduma poa boldimos le kăimahko ka soa norodo le Israelohko.#Mat. 3.1. Luka 3.3.
25Thai o Ioan, kana sas koa gor lehkă kărdimahko, phenelas: „Kon patean kă sîm me? Či sîm Kodoa; ta dikta kă pala mande avel Iekh, savehkă me na sîm vreniko te pîtrau le podimata lehkă pînŕăngă.”#Mat. 3.11. Marko 1.7. Luka 3.16. Ioan 1.20, 27.
26Phralale, šeave le neamohkă le Avraamohkă, thai kukola kai daran le Devllestar, tumengă sas tradino o Divano kadale skăpimahko.#Vers. 46. Cap. 3.26. Mat. 10.6. Luka 24.47.
27Kă le manuši andoa Ierusalimo thai le mai bară lengă či prinjeande le Isusos; thai anda kă došalde Les, pherdine le divanuri le prooročengă, kai drabaon ande sako Savato.#Vers. 14, 15. Cap. 3.17; 15.21; 26.22; 28.23. Luka 23.34; 24.20, 44. 1Kor. 2.8.
28Barem kă či arakhle ande Leste či khă doši mullimasti, sa on mangline le Pilatostar te mudarăll Les.#Cap. 3.13, 14. Mat. 27.22. Marko 15.13, 14. Luka 23.21, 22. Ioan 19.6, 15.
29Thai, pala so pherdine sa so sî ramome pa Leste, dine Les tele poa kašt, thai thode Les ande khă mormînto.#Mat. 27.59. Marko 15.46. Luka 23.53; 18.31; 24.44. Ioan 19.28, 30, 36, 37, 38.
30Ta o Dell juvindisardea Les andal mulle.#Cap. 2.24; 3.3, 15, 26; 5.30. Mat. 28.6.
31O sîkadi'lo, čiro dă mai but des kolengă kai ankăstesas Lesa andai Galilea ando Ierusalimo, thai save akana sî le dikhlitorea Lehkă angloa norodo.#Cap. 1.3, 8, 11; 2.32; 3.15; 5.32. Mat. 28.16. 1Kor. 15.5-7.
32Thai ame anas tumengă o ašundimos kadoa lašo kă o šinaimos kărdo amară daddengă,#Cap. 26.6. Gen. 3.15; 12.3; 22.18. Rom. 4.13. Gal. 3.16.
33o Dell pherdea les anda amende, le šeave lengă, juvindindoi le Isusos, pala sar sî ramome ando psalmo o duito: „Tu san Muŕo Šeau, adesea kărdem Tu.”#Ps. 2.7. Evr. 1.5; 5.5.
34Kă juvindisardea Les andal mulle, kadea kă či mai amboldela Pe ando ternimos, mothodea kana phendea: „Pheraua tumengă sa le pateaimasa le šinaimata le sfînturi, kai kărdem le Davidohkă.”#Is. 55.3.
35Anda kodea mai phenel i ande aver psalmo: „Či mekăsa ka o Sfînto Tiro te dikhăl o ternimos.”#Cap. 2.31. Ps. 16.10.
36Thai o Davido, pala so kandea kolengă anda lehko čiro, pala o plano le Devllehko, mullo, sas praxome paša pehkă dadda, thai dikhlea o ternimos.#Cap. 2.29. 1Thag. 2.10.
37Ta Kukoa kai juvindisardea Les o Dell, či dikhlea o ternimos.
38Ta te jeanen, phralale, kă ande Leste vestil pe tumengă o iertimos le bezexăngo;#Ier. 31.34. Dan. 9.24. Luka 24.47. 1Ioan 2.12.
39thai orkon pateal, sî ierto anda Leste sa le buteandar kai naštinas te aven iertime andai Lejea le Moisasti.#Is. 53.11. Rom. 3.28; 8.3. Evr. 7.19.
40Kadedar, len sama te na kărdeol pe tumengă so phenel pe andel prooročea;#Is. 29.14. Xab. 1.5.
41Dikhăn, kai na len sama, mirin tume thai xasaon; kă andel des tumară, sî te kărau khă buti, kai či pateana la čidălokh, kana phenala tumengă la varekon.”
Le našimata le Iudeiengă.
42Kana ankăste avri, le Neamuri rudisarde le te den lengă duma i o Savato kai avel sa pa kadala butea.
43Thai pala so pharadi'lo o tidimos, but anda le Iudeia thai anda le prozeliça le pateamne găline pala o Pavel thai o Barnaba, kai ašenas dă divano lença, thai thonas le te mangăn o xaro le Devllehko.#Cap. 11.23; 14.22. Tit 2.11. Evr. 12.15. 1Pet. 5.12.
44Ando Savato kai avilo, paše sai četatea tidea pe te ašunel o Divano le Devllehko.
45Le Iudeia, kana dikhline le noroaden, pherdi le xoleatar, denas duma amboldindoi le phendimata le Pavelohkă, thai prasanas les.#Cap. 18.6. 1Pet. 4.4. Iuda 10.
46Ta o Pavel thai o Barnaba phende lengă zorasa: „O Divano le Devllehko trăbulas mai anglal ašundo tumengă; ta anda kă tume či len les, thai korkoŕo krisînin tume nevrenikuri anda e čivava e vešniko, dikta kă amboldas ame karing le Neamuri.#Vers. 26. Cap. 3.26; 18.6; 28.28. Exod. 32.10. Deut. 32.21. Is. 55.5. Mat. 10.6; 21.43. Rom. 1.16; 10.19.
47Kă kadea mothodea amengă o Rai: „Thodem tu kaste aves e Lumina le Neamurendi, kaste nigrăs o skăpimos ji kal gora la phuweakă.”#Is. 42.6; 49.6. Luka 2.32.
48Le Neamuri bukurinas pe kana ašundine e buti kadea thai barearănas o Divano le Raiehko. Thai sa kukola kai sas alosarde te len e čivava e vešniko, pateaine.#Cap. 2.47.
49O Divano le Devllehko buteolas ande soa čem.
50Ta le Iudeia vazdine le juwlean kai pateanas mai bravalea thai le barăn la četateakă, kărdine ăkh našaimos poa Pavelo thai o Barnaba, thai našadine le anda pehkă phuwea.#2Tim. 3.11.
51O Pavel thai o Barnaba činosarde e poši pa pehkă pînŕă pa lende, thai telearde ande Ikonia,#Cap. 18.6. Mat. 10.14. Marko 6.11. Luka 9.5.
52ando čiro kai le jene sas pherde bukuria thai Sfînto Duxo.#Cap. 2.46. Mat. 5.12. Ioan 16.22.
Currently Selected:
Kărdimata Le Apostolengă 13: KALD2020
Highlight
Share
Copy
Want to have your highlights saved across all your devices? Sign up or sign in
Bible translated into Kalderash Romani by Luminita Cioaba 2020, from the Cornilescu version of the Romanian Bible. Rights are held by the British and Foreign Bible Society and the Interconfessional Bible Society of Romania.
