ZAŊ 1

Yeesu haa Kel kə Waateŋ daana Pəɗakiŋ

1A mele bə gud ko daŋ, hulum bə minti yə məntu ‹Kel kə Waateŋ› a jəŋ wəra caw. Wə a sar Pepeŋa, wə haa Pepeŋ də kusru gadi faɗi. 2A mele bə gud koŋa, wə a jəŋ sar Pepeŋa ada. 3Pepeŋ jəŋ kar keɗe haa duuru, karman jəŋ anə məna bay tó ba. 4Kar keɗe fəlaŋ dədərgəŋ minti yə jəə la zugiŋ haa suru da. Dədərgə taŋ haa Pəɗaki də minti gaŋ gud kel wəra a kaa kəsarkaŋ. 5Pəɗakiŋ wele koŋ wəra da dər ko bə tilməŋ da, tilməŋ neke bə haara ku wəra bay wele koŋ ba.

6Pepeŋ gaŋ hulum kəman da, yə məntu minti Zaŋ. 7Wə bəŋ haa bə bi a ji bar kəkəy wəra cəərə Pəɗakiŋa kir minti, gud Kel kə waate kə toŋa, kaŋ keɗe kolə la bə de guudi. 8Wə də kusru, wə a paapa Pəɗakiŋ ba, səma joŋre nuutuŋ haa bə ji bar kəkəy wəra cəərə. 9Hulum bə minti yə məntu ‹Kel kə waateŋ› wə haa Pəɗaki də gəəzə-gəəziŋ. Wə bəŋ cəərə seŋkaŋa kir minti wə walə koŋ la wəra cəərə kaŋa keɗe. 10Wə a jəŋ wəra caw cəərə seŋkaŋa, jəŋ seŋkaŋ haa tó pa. Də teŋ keɗe, kaa gə cəərəŋ əsnu ba. 11Wə bəŋ ger kaa nuutuŋa, səma yə duunu irku du ba. 12Kaa kaayaŋ keɗe gə minti duunu irku du daana doŋ guuduŋ, wə əynəy kəkəy minti yə kolə la wəra karmə Pepeŋ. 13Yə koloŋ wəra karmə Pepeŋ haa paapa gud we kə kaa kəsarkaŋa ba, paapa gud bə minti kəmni jəŋ də caadə kumsiŋ bə gəm, gud ɗiki kə hulum kisirkiŋa bə gəm. Pepeŋ bəlaŋ minti yə jəə la karmə toŋ haa tó.

14‹Kel kə Waateŋ› koloŋ wəra hulum kisirki. Hulum toŋ a jəŋ aduubə də are, are asaŋ boblo nuutu də dər are. Boblo toŋ wə fulnu haa kasi Buru, gud minti wə haa kurmuyu tó ɗaaməna'iŋ faɗi. Pisi bə minti wə jəw sar kaŋaŋ də anə kel gə gəəzə-gəəziŋ, wə wəra bə ɗosə-ɗose duuru. 15Zaŋ jəŋ bar kəkəy warda cuuru da bə sewle minti: «Day cawa haa hulum bə minti ten a waataŋ cuuru minti: ‹Wə bə tuli yaŋ ador dən daŋ, səma wə dəŋan boblo, gud bə minti wə a jəŋ wəra caw ajew dən.›»

16Wə bə ɗosə-ɗose də gidiirə pisiŋ tə bə moŋ, wə bə kawa cəərə áŋa keɗe anə hoŋ na. 17Pepeŋ a ayaŋ *ku giliŋ a áŋ haa kasi *Moyisi da, səma pisi bə minti wə jəw sar kaŋa daana gəəziŋ bəŋ kasi Yeesu Kristu da. 18Hulum asaŋ Pep Abaŋ hõy ba anə hasi. Kurmuyu ɗaaməna'i bə minti Pepeŋ gadi faɗiŋ bə minti bə əsə-isi saksaki sar Buruŋ, vəɗnu wəra a áŋ haa tó.

Zaŋ Batisi ji bar kəkəy wəra cəərə kusru

(Mat. 3.1-12; Mar. 1.2-8; Liki 3.15-17)

19, 20Kaanə Ziwifi gə Zeruzalem vaŋ sərdə *kaa kə keere Pepeŋ, də sərdə kaa gə minti a kaasaw də *Leviŋ sar Zaŋ da. Bə minti yə tuukuŋ suruŋ, yə ləənu ku minti: «Tam haa mindi mo?» Wə maltaŋ ku bə hərəy kel ba. Haa kənaŋ bəlam də kel gə minti wə tupnuy diŋ, wə wəətənəy wəra anə kaŋkaŋ minti: «Ten də kusrən, ten paapa Kristu, *Hulum bə minti Pepeŋ ŋəmnuŋ ba.» 21Kəya yə minti: «Tam haa mindi tə mo? Tam haa *Eli, *hulum bə minti jogtoŋ ku mini kə Pepeŋ mo?» Wə minti: «Ten paapa hulum toŋ ba.» Yə minti: «Tam haa hulum bə jogte ku mini kə Pepeŋ bə minti are bə məwaŋ mo?» Wə minti: «Paapa gəm». 22Yə minti: «Tam haa mindi toŋ tə mo? Are kir ɗe a hare kel a kaa gə minti vaŋ are daŋ gəm. Tam bə waate cəərə kusruma haa minti harmə mo?» 23Kəya wə minti: «Ten kəna hulum bə minti Ezay, hulum bə jogte ku mini kə Pepeŋ a waataŋ cuuru minti: ‹Kaŋ bə əski dordə hulum kəman bə naakte ku də səɓaki giidə fula minti aŋ ɗampə kəkəy kə Barkaŋ la wəra pisi ɗeker a nuunuŋ#1.23 Es. 40.3.›»

24Kaa gə minti yə a vəənəy sar Zaŋ daŋ, yə haa kaanə *Farisiyeŋ gəm. 25Kəya yə raawaŋ də le kuŋ minti: «Tam minti tam paapa Hulum bə minti Pepeŋ ŋəmnuŋ ba, tam paapa Eli bə gəm, tam paapa hulum bə jogte ku mini bə minti are bə məwaŋ bə gəm tə gəm, tam bə jəətəŋ batem a kaŋ haa səm mo?» 26Kəya wə minti: «Ten ha'aŋ, ten ji batem a kaŋ kəna də kan təwa, səma hulum kəman yaŋ aduubə dəŋa ada, wə paapa də dərəŋ ba. 27Wə bə tuli yaŋ ador dən da, səma ten ha'aŋ, ten paapa bə nakə-neke bə bidi saama də kalmasi nuutuŋ wəra ba.» 28Kel teŋ jəŋ keɗe haa giidə wəlasi də Betaniŋa, ku vor bə Zurdeŋa agal də minti cəwaŋ daage da adaŋ. Haa ko bə minti Zaŋ a jəətəŋ batem a kaŋ adaŋ gəm.

Yeesu Kormə taaməka kə Pepeŋ

29Ɗeŋ a deye dibiiniŋ kəyaŋ, Zaŋ asaŋ Yeesu bə ɗe da suru da caw. Wə əsəŋ bə waate minti: «Aŋ golə la, Kormə taaməka kə Pepeŋ bə minti humi baymele kə kaa gə cəərə seŋkaŋ wəraŋ day cawa. 30Haa hulum tó bə minti ten a waataŋ cuuru minti: ‹Wə bə tuli yaŋ ador dən daŋ, səma wə dəŋan boblo gud maa mo wə a jəŋ wəra caw ajew dən.› 31Wə a paapa wəra də dərən minti kəna hulum bə minti ten a wəətunu səmuŋ ba. Səma ten bəŋ a ji batem a kaŋ də kan haa minti kaanə *Israyel kolə la bə əsu wəra pisi.»

32Zaŋ topoŋ bəlam də kel gə minti a jəŋ sar Yeesu minti: «Ten asaŋ Tiirə Pepeŋ damdi abaaku ana bə sorke da apəy da, a bəŋ a ve cuuru. 33Ajew də kel teŋa gila keɗeŋ, wə a paapa wəra kəm də dərən minti kəna kaliyaw anəkay ba, səma Pep bə minti a gaanan da bə bi a jəəti batem də kan a kaŋ waatənan minti: ‹Tam bə ase Tiiru Cetcetaŋ yaŋ bə sorke da cəərə hulum da, a ve yaŋ cuuru, wə bə jəəti batem yaŋ a kaŋ dəərə gəm#1.33 Ji bə batem də Tiiru Cetcetaŋ haa minti Tiiru Cetcetaŋ kele cəərə huluma..› 34Ten də kusrən, ten asaŋ kel teŋ, gud teŋa ta, ten waate wəra anə kaŋkaŋ gəm minti wə kəna Kormə Pepeŋ.»

Yeesu mante kaa gə guudu gə ajew

35A dibiini diŋaŋ, Zaŋ haraŋ ku vor bə Zurdeŋ na də sərdə *kaa gə guudu ɓasi. 36Bə minti wə ɗeŋ a ase Yeesu bə ɗe na anə caw kəya naŋ, wə əsəŋ bə waate faɗi minti: «Aŋ golə la, Kormə taaməka kə Pepeŋ day cawa.» 37Kaa gə gud Zaŋ ɓasiŋ əskəŋ kel teŋ bədoona kəyaŋ, yə kooroŋ gud Yeesu faɗi. 38Yeesu haraŋ duru adoro kəyaŋ, wə əsnəy zugi guudu da. Wə ləənəy kuy minti: «Aŋ golde haa maa mo?» Yə minti: «Rabi, tam bə əsə-isi haa ane mo?» (Rabiŋ haa minti «Hulum bə hateŋ»). 39Wə minti: «Aŋ bəəda, aŋ əsu yaŋ.» Kel teŋ jəŋ haa də cəwa də minti yə le kaaraŋ aker da dəərəŋ. Kəya yə kooroŋ guudu faɗi, yə asaŋ ko bə minti wə bə əsə-isi adaŋ, yə əsəŋ duuru a ko toŋa hãã bə minti cəwaŋ dəraŋ wəraŋ.

40Aduubə də kaa té ɓasi gə minti a bə jeɓre kel kə Zaŋa gə minti kooroŋ gud Yeesuŋ, kumundu ada məna, yə məntu Andere, wə haa seenə Simoŋ Piyer. 41A ko toŋa ada faɗi Andere kooroŋ bə ɗe a fele siinu Simoŋ, wə wəətunu minti: «Are fəlaŋ hulum bə minti yə məntu Mesiŋ da.» (Mesiŋ haa minti «Kristu, *Hulum bə minti Pepeŋ ŋəmnuŋ#1.41 Mesiŋ, sam toŋ haa də ku Hebere, Kristuŋ haa də ku Gereki gəm..») 42Kəya wə kooroŋ də Simoŋ sar Yeesu faɗi. Yeesu goloŋ Simoŋ, wə əsəŋ bə wəətu faɗi minti: «Tam haa Simoŋ, kormə Zaŋ. Yə bə mantam yaŋ máŋ minti Sefasi.» (Sefasiŋ haa minti Piyer, Piyer haa minti pərkiŋ.)

Yeesu mante anə Filipi də Nataniyel

43A dibiiniŋa kəyaŋ, Yeesu məlaŋ ɗiki du wəra minti tó koore Galile. Wə kooroŋ kəyaŋ, wə ŋəfaŋ də Filipi, wə wəətunu minti: «Tapə da guudən da.» 44(Filipi a jəŋ haa hulum bə giidə vil də Betsaydaŋ damdi anə Andere də Piyer ana gəm.) 45Filipi ɗeŋ a ŋefe də Nataniyel kəyaŋ, wə əsəŋ bə wəətu minti: «Hulum bə minti kel wəra gə jeerə-jeere cuuru giidə kefter bə *ku gili kə *Moyisiŋa daana kə *kaa kə jogte ku mini kə Pepeŋa, are fəlnu da. Haa Yeesu bə Nazaretiŋ, kormə Zosefiŋ.» 46Kəya Nataniyel wəətunu minti: «Nazareti! Karman pisi neke bə bi giidə da gəm mo?» Filipi minti: «Bəəda! Tam ase yaŋ nəmti!»

47Yeesu asaŋ Nataniyel bə ɗe da suru da kaydaŋ, wə əsəŋ bə waate cuuru faɗi minti: «Hulum bə Israyel bə gəəzə-gəəziŋ day caw səraŋ daŋ ta. Ŋete bə kel paapa giidu ba.» 48Kəya Nataniyel hərnu kel minti: «Ten jəŋ də dərəm haa naanaanə mo?» Yeesu minti: «Ajew də minti Filipi kəm bay mantam, ten a asnam je'i gud guma ɗaw.» 49Kəya Nataniyel minti: «Hulum bə hateŋ, tam kəna Kormə Pepeŋ, tam haa Kumna kə kaanə *Israyel.» 50Yeesu minti: «Tam doŋ haa guudəna gud minti ten waatənam minti ten asnam gud gumaŋ. Səma tam bə ase kel gə deŋe teŋ yaŋ kəm ablaw pə ɗaw.» 51Kəya wə wəətənəy ada pa minti: «Gəəzi, gəəzi, ten waataŋ, tarmə ko bə apəyaŋ aŋ əsu yaŋ wəra bə bəŋə-biŋi, aŋ ase *kaa kə digi kə Pepeŋ yaŋ bə li na apəy na sar Pepeŋ na daana bə sorke da adawra da sar *Kormə Hulúm da.»

Currently Selected:

ZAŊ 1: KERNT05

Highlight

Copy