LIKI 2

We də Yeesu

1Dər ko bə we kə Zaŋa, Sezar Ogustə, kumna bobloŋ, ayaŋ mini minti yə aŋkə kaa gə giidə seŋka də minti Rom waate samaŋ la keɗe. 2Aŋke tó bə ajew jəŋ ha'aŋ bə minti Kiriniyusi, kumna bə minti Sezar usnuŋ, a kumna bə Siiriŋa.

3Kəya kaŋ keɗe kooroŋ a jeere səməy, mindi mindi mo giidə kuli bə minti wə waŋ adaŋ. 4Bədoona Zosefi faŋ Nazareti da, giidə seŋka də Galileŋ da, bə koore Zude giidə vil kə *Davidiŋ də minti yə manta Betlehem. Wə kooroŋ ada gud bə minti wə a kaasaw də Davidi. 5Yə kooroŋ bə ɗe a jeere səməy də Mari, tər nuutu də balə-beleŋ, a də məənəŋ. 6Bə minti yə Betlehemaŋ, hi naata bə weŋ nəkaŋ. 7A waŋ kormoya bə ku gawnaŋ, a kulnu də dəməəmə, a gəənu giidə giŋa. Yə jəŋ bədoona gud bə minti yə fəlaŋ ko bə hi giidə kuli bə həəti kə kaa kə gəryiŋa ba.

Hulum bə digiŋ vəɗaŋ dər kaa kə ame kaamaŋa

8Giidə seŋka taŋa ada gəm, kaa kə ame kaamaŋ yaŋ bə ame kaamaŋ neeteŋa duugŋ giidə akaŋa. 9Kəya *hulum bə digi kə Barkaŋ vəɗaŋ diri, pəɗaki kə Barkaŋ wəlaŋ koŋ wəra ciiri. Kəya walka jiini ablaw. 10Səma hulum bə digiŋ wəətənəy minti: «Aŋ a ji walka ba, gud bə minti ten bəŋ a waataŋ kel pəsaŋ gə minti ji waale yaŋ ablaw tarmə kaŋa keɗe. 11Dayna, giidə vil kə *Davidiŋa, yə waanaŋ Hulum bə Seereŋ, haa Kristu Barkaŋ. 12Golə la kel gə minti gaŋ dərəŋ yaŋ cuuruŋ: aŋ fele beebe yaŋ bə kulə-kuli də dəməəmə lam giidə giŋa.»

13A ko toŋa faɗi, *kaa kə digi kə Pepeŋ ablaw təpaŋ də hulum bə digi naayaw toŋ, yə əsəŋ bə tokɗe Pepeŋa minti:

14«Tokɗeŋ jəə la kə Pep bə minti apəy naŋ;

kəkaɓiŋ jəə la cəərə seŋkaŋa,

cəərə kaa gə minti wə bələy.»

Kaa kə ame kaamaŋ koore Betlehem

15Bə minti *kaa gə digi kə Pepeŋ haraŋ tarmə pepeŋ na anəkay, kaa kə ame kaamaŋ əsəŋ bə waate aduubə də kumsi minti: «Áŋ koorə la Betlehem bə ɗe a gole karman bə minti jəŋ adaŋ, karman bə minti Barkaŋ waataŋ áŋ cuuruŋ.»

16Kəya yə kooroŋ cəlam, yə ɗeŋ a fele anə Mari də Zosefi, də beebe konceŋ bə gaa-ge giidə giŋa. 17Bə minti yə əsnuŋ, yə əsəŋ bə tope bəlam də kel gə minti hulum bə digi kə Pepeŋ a wəətənəy di cəərə beebeŋaŋ. 18Kaa gə minti əskəŋ kel kə kaa kə ame kaamaŋ keɗeŋ, yə ŋələŋ ablaw gud kel gə minti yə wəətənəy diŋ. 19Kə Mariŋ ha'aŋ, a doŋ kel teŋ keɗe ku tarməya, a bə ɗiki ciiri saksaki. 20Kaa kə ame kaamaŋ haraŋ bə ge gudula cəərə boblo kə Pepeŋa, bə tukɗu cəərə kel gə minti yə iskiniŋ daana yə əsnəy, damdi hulum bə digiŋ a wəətənəy diŋ ana.

Yə ɗe də Yeesu giidə Kuli kə Pepeŋ

21Bə minti hi bə azəgən nəkaŋ ha'aŋ hi bə jeme tantar beebe nəkaŋ. Kəya yə məlnu səmu minti Yeesu, damdi *hulum bə digi kə Pepeŋ a waataŋ wəra ajew də minti nuru kəm bay haw məənə duŋ ana.

22Bədoona, hi bə poore nəkaŋ wəra damdi *ku gili kə *Moyisiŋ a waataŋ ana, Zosefi də Mari kooroŋ Zeruzalem də beebeŋ bə ɗe a vəɗu a Barkaŋ, 23gud bə minti ku gili kə Barkaŋ a jeereŋ minti: «Beebe bə waa-we koŋkor bə ajew keɗeŋ, əyu la wəra a Pepeŋ bə jəw joŋre.» 24A ko toŋa kəya, yə jəŋ keereŋ damdi ku gili kə Barkaŋ a waataŋ ana: «də kulur ɓasi, jəə ba də karmə abaaku ɓasi#2.24 Lév. 12.8.»

25A ko toŋa gəm, hulum kəman yaŋ Zeruzalema ada, səmu minti Simeyon. Wə haa hulum ɗekeri, wə bə iski gud Pepeŋa, Tiiru Cetcetaŋ duuru. Wə a bə mi Hulum bə Seere kə kaanə *Israyela. 26Tiiru Cetcetaŋ a vəɗnu kel wəra minti wə me bay ase Kristu Barkaŋ ba, haa *Hulum bə minti Pepeŋ ŋəmnuŋ. 27Kəya Tiiru Cetcetaŋ bəŋ duuru giidə *Kuli kə Pepeŋa. Bə minti kamnə Yeesuŋ vaŋ duuru aləwa bə ɗe a ji damdi ku giliŋ a waataŋ anaŋ, 28Simeyon həənu kəəsu, wə jəŋ suuse a Pepeŋ minti:

29«Barkaŋ, kel gə minti tam a waatənan dən doŋ kuy ne wəra

hebkəna ta.

Yaakə hulum bə joŋre nəmtiŋ la bə me kəkaaɓa,

30gud bə minti ten asaŋ seere nəmtiŋ ne wəra də dərən,

31haa hulum bə minti tam əynu wəra a gidiirə kaŋ keɗeŋ.

32Wə haa pəɗaki bə minti ge dər kaa gə minti paapa gə

Ziwifi baŋ cəərəma.

Gud pəɗaki toŋa, kaanə Israyel, kaa nəmtiŋ, fele aŋkeŋ yaŋ.»

33Bə minti kamnə Yeesuŋ əskəŋ kel gə minti Simeyon bə wəətiya cəərə beebeŋaŋ, yə ŋələŋ ablaw. 34A ko toŋa kəya Simeyon gəənəy pisiŋ ciiri daana wə waataŋ Mari nər Yeesu minti: «Pepeŋ ŋəmaŋ pur ha'aŋ bə bese kaanə Israyel wəra ablaw, daana bə seere sirdi wəra hiw gəm. Wə ji yaŋ karman bə ge dər kaa, bə ce awəy cuuru minti té bəlu ba. 35Bədoona ana, ɗiki bə ku tarmə kaa ablaw veɗe yaŋ wəra kəkər. Niitiŋ, lasiŋ jəməy ku tərməyi yaŋ wəra damdi yə ŋeŋ hulum də macəlam ana.»

36, 37A ko toŋa kəya, *həlgə də jogte ku mini kə Pepeŋ yaŋ ada gəm, sam minti Ana. A tərnə Fanuwel, a a kaasaw də Asera. A wəra də həwə-həwi; laate də hor-hor azəgən cuuru waaɗe. A terewka də, a laataŋ də gedraŋ seeɗa. Adordə me də gedraŋa, a əsəŋ dibirgini. A taakaŋ Kuli kə Pepeŋ ba; duugŋ də daaway keɗe, a bə ji joŋre a nuunu bə kaw awalna, bə toose daana a bə *je hõy bay hame gəm. 38Kəya, a bəŋ dər ko bə minti Simeyon bə waate kela a kamnə Yeesuŋ. A əsəŋ bə ji suuse a Pepeŋ, bə waate sam beebeŋa wəra a kaa gə minti bə mi minti Pepeŋ bə bidi Zeruzalem yaŋ wəra.

Kamnə Yeesuŋ hare duuru Nazareti

39Bə minti kamnə Yeesuŋ təwaŋ joŋre neeteŋ wəra damdi ku gili kə Barkaŋ a waataŋ anaŋ, yə haraŋ duuru giidə kuli neete bə Nazareti də minti giidə seŋka də Galileŋaŋ. 40Pur bə si, bə kole də səɓaki, bə ɗosə-ɗose də hel daana pisi kə Pepeŋ cuuru.

Yeesu ɗeŋ giidə Kuli kə Pepeŋa laate du hor cuuru ɓasi

41A leŋa keɗeŋ, kamnə Yeesuŋ koorte a jəəti *kəɗwəy gə Pakiŋ Zeruzalem na. 42Bə minti laate də Yeesu təpaŋ hor cuuru ɓasiŋ, yə kooroŋ duuru gud to'osi də kəɗwəya.

43Bə minti kəɗwəy təwaŋ wəraŋ, kamnə Yeesuŋ haŋ kəkəy bə hare akera. Yeesu yaakaŋ warda Zeruzalem da, səma kəmnu asaŋ minti wə yaakaŋ warda ba. 44Yə a ɗəkəŋ neeteŋ haa minti Yeesu yaŋ də kaa gə minti bə gəryi də téŋ gəm. Yə jaŋ bə ɗe məna ajew də bə minti yə əsəŋ bə guldu adəwaldə kusul diŋa də kaa gə minti də diriŋ. 45Kəya yə fəlnu ba, yə haraŋ Zeruzalem a guldu. 46A hi bə soopeŋa, yə fəlnu giidə *Kuli kə Pepeŋa bə əsə-isi cin aduubə də *kaa kə hate kə kaanə Ziwifiŋa. Wə bə jiɓriy kuya, bə lay kuya gəm. 47Kaa gə minti bə usku ku keɗeŋ ŋələŋ ablaw gud ase nuutuŋa daana gud harte bə kel nuutuŋa gəm.

48Bə minti kəmnuŋ əsnuŋ, yə ŋələŋ ablaw. Nuru wəətunu minti: «Kormonti, tam jəŋ are bədoona ana səm mo? Are də bəram, are bə goldoma də laawe ablaw.» 49Wə hərnəy kel minti: «Aŋ goldon bədoona səm mo? Aŋ a paapa gə asə-ase minti ten kir isi giidə kuli kə Barəna bə mo?» 50Səma yə əskəŋ gud kel gə minti wə wəətənəy diŋ ba.

51A ko toŋa kəya, Yeesu kooroŋ guudi Nazareti; wə bə doy kuya saksaki. Nuru doŋ kel teŋ keɗe ku tarməya. 52Ne kə Yeesu bə zeede apəya, wə bə si gəm. Wə bə de dər Pepeŋa, daana dər kaŋa gəm. – 2 3

Currently Selected:

LIKI 2: KERNT05

Highlight

Copy