LIKI 20

Mindi ayaŋ abay a Yeesu mo?

(Mat. 21.23-27; Mar. 11.27-33)

1Hõy məna bə minti Yeesu bə hate kaŋa giidə *Kuli kə Pepeŋa, daana bə waate *Kel pəsaŋ kəmarwaŋ kə Pepeŋaŋ, kəkamna kə *kaa kə keere Pepeŋ, də *kaa kə hate ku gili nuutuŋ, də kaa kəmtəŋ gə tiinə kaanə Ziwifiŋ bəŋ suru. 2Yə əsəŋ bə wəətu minti: «Kel gə minti tam jəy, aynam kəkəy diŋ haa mindi mo? Aynam abay bə jəŋ haa mindi mo?» 3Yeesu hərnəy kel minti: «Ten gəm, ten laŋ kuŋ kəm cəərə kela məna. Aŋ waatan la kəm: 4gaŋ Zaŋ da bə bi a ji batem haa mindi mo? Pepeŋ mo, kaa kəsarkaŋ mo?» 5Kəya yə əsəŋ bə ke awəya aduubə də kumsi minti: «Áŋ waataŋ ne kəna minti gəənu da haa Pepeŋ, wə bə waate áŋ haa minti áŋ doŋ guudu ba haa səm mo? 6Áŋ waataŋ ne kəna minti gəənu da haa kaa kəsarkaŋ, kaŋ keɗe awe áŋ wəra də pərki, gud bə minti yə gə ɗəkə-ɗiki minti Zaŋ haa *hulum bə jogte ku mini kə Pepeŋ.» 7Kəya yə hərnu kel minti: «Gəənu da a ji batem da haa mindi moŋ, paapa də dər are ba.» 8Tó hərnəy kel gəm minti: «Jəəne bədoona anaŋ, aynan abay bə ji kel teŋ haa mindi moŋ, ten waataŋ bə gəm.»

Ku kumtiŋ cəərə kaa kə joŋre gə keɗeŋa

(Mat. 21.33-46; Mar. 12.1-12)

9Kəya Yeesu əsəŋ bə waate *ku kumti teŋa kəya a kaŋ minti: «Hulum kəman kəɗaŋ aka də atələələma. Wə ayna a kaa minti yə golə cəərə la, tó bə əyəy we də kəbaŋ gəm, wə kooroŋ warna a gəryi bə laate warda ablaw. 10Ko bə teke we də kəbaŋ teŋ nəkaŋ kəyaŋ, bərdə akaŋ gaŋ hulum bə joŋre nuutuŋ sar kaa kə keɗeŋ na minti yə ayə agal kə toŋ da. Səma kaa teŋ duunu, yə lətnu wəra anə pasyak-pasyaki, yə sərmunu warna kəəsu wiiɗiw-wiiɗiw. 11Kəya wə gaŋ hulum bə ɓasi na pa. Toŋ kəya gəm, yə duunu, yə lətnu wəra pasyak-pasyaki, yə sərtunu anə peletpeleti, yə sərmunu warna kəəsu wiiɗiw-wiiɗiw. 12Wə haraŋ bə ge hulum bə soope na pa. Toŋ kəya gəm, yə dəgnu wəra, yə sərmunu warna.

13Kəya bərdə akaŋ əsəŋ bə waate kusru ta minti: ‹Ten jəə la máŋ haa naanaanə tə mo? Marya diŋ ten ge kormon bə minti giidən bəlu ablaw, yə humi kosoŋ yaŋ cəərə toŋa ɗawmay.› 14Kəya wə gəənu. Səma, bə minti kaa kə gole cəərə akaŋ əsnu bə ɗe da anəkay, yə əsəŋ bə waate aduubə də kumsi minti: ‹Caw daŋ haa pur bə minti bə ɗe a he akaŋ a gubliŋaŋ. Áŋ əwu la wəra, akaŋ bə yaakə la máŋ kir kasi áŋ!› 15Kəya yə duunu, yə kooroŋ warna duuru kerkə laɓiŋ na, yə əwnu wəra.

A ɗiki nəətiŋaŋ, bərdə akaŋ bə ji kaa kə joŋreŋ naanaanə tə mo? 16Wə bə bi haa tó də kusru gadi faɗi, wə awe kaa teŋ yaŋ wəra, wə aye aka nuutuŋ máŋ kasi kaa gaalaŋa bə gole cəərə.» Bə minti kaŋ əskəŋ kel teŋ kəyaŋ, yə minti: «Teŋ kəya ji ba!» 17Kəya Yeesu gulnuy diri, wə wəətənəy minti: «Jeereŋ waataŋ haa ta kənaŋ minti harmə mo?

‹Pərki tó bə minti kaa kə hərsiŋ a gəənu warna ha'aŋ,

wə koloŋ pərki pisi bə deŋe kumsuŋ a hərsi bə kuliŋa haa tó ɗaw#20.17 Ps. 118.22.›

18Hulum awaŋ ne cəərə pərki toŋaŋ, wə hiti wəra. Pərkiŋ awaŋ ne cəərə hulumaŋ, wə nirɓu wəra.»

Werke bə lambaŋ a kumna bobloŋ

(Mat. 22.15-22; Mar. 12.13-17)

19Də ko toŋ ada faɗi, *kaa kə hate ku gili kə Pepeŋ, də kəkamna kə *kaa kə keere Pepeŋ əsəŋ minti té doo Yeesu la hebkəna faɗi, gud bə minti yə asaŋ wəra minti wə waataŋ *ku kumtiŋ haa cəərə té. Səma walka də kaŋ jiini bə daw. 20Yə əsəŋ bə ame Yeesu. Kəya yə vaŋ kaa kə agum bə ɗe suru. Kaa teŋ əsəŋ bə ji kusri damdi té kaa ɗekeri ana, yə əsəŋ bə kultu kela suru minti té law kəmpuru də kel gə kuŋ, té əyu la wəra kasi kumna bə minti Sezar a usnuŋ. 21Kəya yə ləənu ku minti: «Hulum bə hateŋ, are wəra gə asə-ase minti kel gə minti tam wəətəy daana gə minti tam hətəy, yə akəsa. Kaŋ gole dərəma kir kumsi gəga'i keɗe. Pepeŋ bele minti áŋ ɗee la haa naanaanə moŋ, tam hate anə ɗeker ciiri faɗi. 22Are bele lam kum: áŋ ayaŋ lambaŋ ne a kumna boblo Sezar, haa akəsa mo? Áŋ kirka aya mo, paapa mo?» 23Səma Yeesu əsnəy tiwki neeteŋ wəra. Wə wəətənəy minti: 24«Aŋ ayan soloy kooso-kooso da kəm. Cəərə hulum daana jeere toŋ haa adaŋ, kə mindi mo?» Té minti: «Kə Sezar.» 25Kəya wə wəətənəy minti: «Karman kə Sezar, aŋ həru la a Sezar. Karman kə Pepeŋ, aŋ həru la a Pepeŋ gəm.» 26Yə ɗempa a fele kəkəy bə gaw də kel tiinə kaŋa ba. Səma yə ŋələŋ gud kel gə minti wə bə hərəyaŋ. Kəya yə zeneŋ wəra seɗem.

Kaanə Saduseyeŋ le ku Yeesu cəərə hare də kaa kə mee-meŋa wəra dədərgəŋ

(Mat. 22.23-33; Mar. 12.18-27)

27Sərdə kaanə *Saduseyeŋ bəŋ sar Yeesu. Teŋ haa kaa gə minti waate minti kaa kə mee-meŋ hare wəra dədərgə adordə meŋa baŋ. Yə əsəŋ bə law ku minti: 28«Hulum bə hateŋ, *Moyisi jeereŋ giidə kefter nuutuŋa a are minti: hulum bə həlgə meŋ ne wəra bay we dəərəŋ, siinu harə la bə doora guudu muru kir minti wə waa beebe la bə ge kaasaw də siinu bə mee-meŋ#20.28 Deut.25.5. 29Golə laŋ, kəsaanə kumsiŋ a jəŋ seeɗa. Boblo diŋ doŋ həlgəŋ, wə meŋ wəra bay we dəərə. 30Bə cuuru doona guudu, 31bə cuuru bə ɓasiŋ jəŋ haa bədoona ana gəm. Kəya kəsaanə kumsi seeɗa'iŋ koltoŋ wəra dəərə keɗe, yə meeteŋ wəra bay we dəərə neŋneŋ keɗe gəm. 32Adoro, həlgəŋ meŋ wəra gəm. 33Bə minti kaa kə mee-meŋ haraŋ ne wəra dədərgə adordə meŋaŋ, a a jəŋ wəra mar kəsaanə kumsiŋ seeɗa keɗe tə gəm, a bə ɗe a ji mar mundu mo?»

34Yeesu hərnəy kel minti: «Kaa gə minti zugi cəərə seŋkaŋa kənaŋ tope kumsi. 35Səma, kaa gə minti Pepeŋ əŋkənəy minti teŋ neke bə hare wəra dədərgə adordə meŋaŋ, daana gə minti ji zugi dər ko bə minti bə bi daŋ, tope bə kəram mo, tope bə kaŋkar mo, pa pəda. 36Yə me pəda, yə kole yaŋ wəra gəga'i bə *kaa kə digi kə Pepeŋ ana. Yə karmə Pepeŋ, gud bə minti yə haraŋ wəra dədərgə. 37Cəərə kel də hare bə dədərgəŋa adordə meŋaŋ, koo Moyisi waataŋ ciiri bə minti wə waataŋ sam karmə kəbaŋ naɓi gə do'ə-do'eŋ. Gud maa mo wə waataŋ ada minti Pepeŋ haa Pep kə *Abraham, Pep kə *Izakiŋ, Pep kə *Zakopiŋ#20.37 Ex. 3.6. Kaa té soope'i laki kənaŋ a meŋ warda ajew də minti Pepeŋ bə waataŋ kel a Moyisiŋ.. 38Jəəne minti Pepeŋ haa Pep kə hulum kəman ŋaanaanə moŋ, ge dər minti hulum toŋ yaŋ dədərgə, gud bə minti Pepeŋ paapa Pep kə kaa kə mee-meŋ ba, kaŋ keɗe dədərgə duru.» 39Sərdə *kaa kə hate ku gili kə Pepeŋ əsəŋ bə waate Yeesu minti: «Hulum bə hateŋ, tam waataŋ akəsa.» 40Adordə teŋa, yə jəŋ walka bə law ku cəərə kel gaalaŋa.

Hulum bə minti Pepeŋ ŋəmnuŋ, haa mindi mo?

(Mat. 22.41-45; Mar. 12.35-37)

41Kəya Yeesu wəətənəy minti: «Kaŋ waate minti Kristu, *Hulum bə minti Pepeŋ ŋəmnu, bi a kaasaw də kumna *Davidi haa naanaanə mo? 42Gud maa mo Davidi də kusru waataŋ wəra giidə kefter bə Gudul nuutuŋa minti: ‹Pep Barkaŋ waataŋ Barkaŋ katən minti: əsə la cin a kaasən kemera 43hãã bə minti ten kolə kaa kə acukur nəmti la wəra kəm kar gə minti tam təytəy wəra kuuri#20.43 Ps. 110.1.› 44Jəəne bədoona ana minti Davidi məntu minti ‹Barkaŋ›, wə bə ji naanaanə kaasaw du təwa faɗi mo?»

Yeesu minti kaŋ amə kusri la pisi ku kaa gə hate ku giliŋa

(Mar. 12.37-40)

45Yeesu waataŋ *kaa gə guuduŋ tiinə kaa gə minti bə jiɓru kuŋa wəra keɗe minti: 46«Aŋ amə kusrəŋ la pisi, aŋ a ji damdi *kaa kə hate ku gili kə Pepeŋ ana ba. Yə tere haa jamba də sam də hagə-hageŋ, yə golde haa minti kaŋ mirkə té la wəra pasyak-pasyaki a ko bə anə alumaŋa. Bə minti yə giidə *kuli bə toose kə kaanə Ziwifiŋaŋ, yə golde haa ko bə əsti bə minti té ji yaŋ wəra kəkər lakiŋ. A ko bə anə kəɗwəyaŋ, yə golde haa anə ko bə əsti kə kaa kəmtəŋ gəm. 47Kaa teŋ tope kar kə kəram gə bay, səma yə əsəŋ ne bə tooseŋ, yə toose anə taa-taa-taa minti té kaa pəsaŋ ŋaanaanə mo. Pepeŋ bə ɗe a jəy daŋgay di yaŋ ablaw dəŋaŋ kə kaa kaayaŋ gud kel teŋa kəya.» – 20 21

Currently Selected:

LIKI 20: KERNT05

Highlight

Copy