LIKI 22

Hel də minti yə de Yeesu dəərəŋ

(Mat. 26.1-5, 14-16; Mar. 14.1-2, 10-11)

1Hi bə *kəɗwəy bə mappa bə bay siipəŋ gə minti səməy *Pakiŋ tuukuŋ wəra maŋ. 2Kəkamna kə *kaa kə keere Pepeŋ daana *kaa kə hate ku gili nuutuŋ əsəŋ bə golde hela bə awe Yeesu wəra, səma yə a bə ji walka kas kaa kə ablaw.

3Kəya *Sataŋ kəlaŋ giidə Zudasi bə minti səmu Iskariyotiŋa. Wə haa hulum bə gud *kaa gə gud Yeesu hor ciiri ɓasiŋ. 4Kəya wə kooroŋ a tepe ku də kəkamna kə kaa kə keere Pepeŋ, daana kəkamna də kaa gə gole cəərə *Kuli kə Pepeŋ. Wə ɗeŋ a wəətəy sam hel də minti tó bə əyəy Yeesu wəra dəərəŋ. 5Waale jiiniy ablaw daana yə təpaŋ kuy ada gəm minti té bə əyu soloy yaŋ. 6Zudasi doŋ haa, wə yaakaŋ máŋ bə mi haa minti tó fele dər tó pisi bə əyəy Yeesu wəraŋ a ko bə minti kaa kə ablaw paapa ada baŋ haa kotnə mo.

Ɗampe bə kəɗwəy gə Pakiŋ

(Mat. 26.17-19; Mar. 14.12-16)

7*Kəɗwəy gə minti yə hame mappa də bay siipəŋ daana yə awe karmə kaaraŋ gə *Pakiŋ diri gəm nəkaŋ wəra. 8Kəya Yeesu vaŋ anə Piyer də Zaŋ ajew na, wə wəətənəy minti: «Aŋ ɗee la a ɗampe kar gə ji kəɗwəy gə Pakiŋ a áŋ minti áŋ həməy la.» 9Kəya yə ləənu ku minti: «Tam bə balə-bele minti are ɗampam dəm la haa a ko muntu mo?» 10Wə wəətənəy minti: «Bə minti aŋ vaŋ ne giidə vil naŋ, aŋ ŋefe yaŋ də hulum bə hale hodi bə kana. Aŋ haw bəlam du la hãã giidə kuli bə minti wə kəlaŋ ne adaŋ, aŋ vaa la guudu ada gəm. 11Aŋ waatə bərdə kuli toŋ la minti: ‹Hulum bə hateŋ minti ba: giidə kuli bə minti tó hamə Pakiŋ la ada də *kaa gə gud toŋ haa muntu mo?› 12Kəya wə gaŋ dərəŋ yaŋ cəərə kuli bə hərsə-hərsi cəərə kumsu na apəy na, giidu wəra boblo anə vər. Kar wəra gə ɗampə-ɗampe ada keɗe, aŋ ɗampə kar kə hameŋ la ada.» 13Kəya yə kooroŋ, yə fəlaŋ kel haa damdi Yeesu a wəətənəy di warnaŋ ana. Kəya yə ɗampaŋ hame bə Pakiŋ ada faɗi.

Yeesu hame kəɗwəy gə Pakiŋ də kaa gə guuduŋ

(Mat. 26.26-29; Mar. 14.17-25; I Kor. 11.23-26)

14Bə minti cəwaŋ nəkaŋ wəraŋ, Yeesu əsəŋ bə hame də *kaa kə vaa-veŋ. 15Kəya wə wəətənəy minti: «Ten a də taynə hame *Pakiŋ dəərəŋ gəəzə-gəəzi ajew də bə minti ten leseŋ! 16Ten waataŋ, ten hame so bə Paki dəərəŋ pəda hasi hãã bə minti kel duŋ doo kuy la wəra kəm a *Kumna kə Pepeŋaŋ.» 17Wə haŋ kooso bə seŋ, kəya wə jəŋ suuse a Pepeŋ cuuru daana wə minti: «Aŋ doo karman bə seŋ la kəya, aŋ saw la aduubə də kumsəŋa. 18Ten waataŋ, bə hebkənaŋ, ten se kumuy bə atələələma hõy pəda hãã bə minti Pepeŋ bəə la kəm a hame kumna nuutuŋ.»

19Adoro wə haŋ mappaŋ kəəsu, wə jəŋ suuse a Pepeŋ cəərə jəə kəya, wə ɗoklona dərə, wə əynəy di. Wə wəətənəy minti: «Kəya haa kusrən [bə minti ten əyu guudəŋaŋ. Aŋ jəətə kel teŋ la kəya bə ɗəkti cəərəŋ cəərəna.» 20Bədoona ana adordə hameŋaŋ, wə əynəy kopi bə seŋ gəm bə waate minti: «Karman bə giidə kopi toŋ kəya ge dər haa cəərə *jaa təmarwa də minti Pepeŋ bə doora yaŋ dəərəŋ də kor dən bə minti ge yaŋ wəra guudəŋaŋ.]

21Səma, hulum bə minti bə ji akolokiŋa wəra cəərənaŋ bə hame dəərən kəna. 22*Kormə Hulúm me yaŋ palpal wəra damdi Pepeŋ a bəlaŋ ana. Səma gəəli ablaw kə hulum bə minti jəŋ akolokiŋ cuuruŋ!» 23Kəya yə əsəŋ bə le ku kumsi minti: «Hulum bə ji teŋ aduubə də té haa mindi mo?»

Mindi bobloŋ mo?

(Mat. 18.1; 20.25-28; 19.28; Mar. 9.34; 10.42-45)

24*Kaa gə gud Yeesuŋ əsəŋ bə ce awəya ablaw aduubə də kumsi minti mindi bobloŋ aduubə də té mo? 25Yeesu wəətənəy minti: «Kəkamna gə seŋkaŋ ji daŋgay də kaa gə minti yə ciiriŋ. Kaa kə dəməəməŋ bele minti yə mantə té la kaa pəsaŋ. 26Aŋ teŋ a paapa kir ji bədoona ba. Hulum bə minti bele minti tó jəə la ku boblo aduubə dəŋa, wə kolə kusru la wəra akas beebe konce ana. Hulum bə minti waate sam kaŋ, wə jəə la haa hulum bə minti ji joŋreŋ a nəənəŋ ɗaw. 27Hulum bobloŋ ha'aŋ mindi tə mo? Haa hulum bə minti bə hame soŋa mo, bə minti bə ji joŋreŋa mo? Haa hulum bə minti bə hame soŋa bə mo? Golə la ten də kusrən, ten aduubə dəŋa akas hulum bə joŋre nəəti ana.

28Nəətiŋ, aŋ haa kaa gə minti əsəŋ ŋəŋ dəərən saksaki dər lasi ninaŋ. 29Damdi Barən aynan *Kumnaŋ anaŋ, ten ayaŋ dəŋ bədoona gəm. 30Bədoona ana, aŋ hame yaŋ, aŋ se yaŋ dəərən a Kumna nina, daana aŋ əsti yaŋ a gəjaaŋaw kə kəkamnaŋa bə jeme kəətiŋa cəərə tanta də kaanə *Israyel hor cəərə ɓasiŋa.»

Yeesu waate Piyer minti wə malte ku yaŋ cəərə tó

(Mat. 26.33-34; Mar. 14.29-30)

31Yeesu minti: «Simoŋ, Simoŋ, Sataŋ mantaŋ səɓaki bə gəgələm damdi yə gəgəli kaasaw wəraŋ ana. 32Səma ten toosoŋ cəərəma minti de nəmtiŋ a kerpe wəra ba. Tam, bə minti tam haraŋ də neŋ, ayə səɓaki la a kəsaanam.» 33Piyer hərnu kel minti: «Barkaŋ, ten wəra bə ɗampə-ɗampe bə ɗe guuduma a daŋgay daana bə me wəra.» 34Yeesu hərnu kel minti: «Ten waatam Piyer, ajew də bə minti goglokiŋ hõõde daynaŋ, tam malte kum yaŋ cəərəna kampa soope minti tam asnan ba.»

Yeesu ge kosnə kaa gə guuduŋ

35Kəya Yeesu ləənəy kuy pa minti: «Bə minti ten vaanaŋ bay soloy, bay mandəhaŋ kaasəŋaŋ, daana bay kalmasiŋ, karman kerpeneŋ mo?» Yə hərnu kel minti: «Karman kerpeŋ ba.» 36Wə wəətənəy minti: «Səma, bə hebkənaŋ, hulum bə minti soloy nuutu jəŋ neŋ, wə humu la kəəsu, hulum bə minti mandəhaŋ nuutu jəŋ neŋ, wə humu la kəəsu, hulum bə minti macəlam nuutu jəŋ ne paapaŋ, wə gusə dəməəmə nuutu la wəra, wə gusə macəlam la. 37Ten waataŋ: doŋ kir minti jeeré bə minti yə a jiirunu wəra giidə kefter kə Pepeŋa cəərənaŋ doo kuy la wəra. Kel teŋ waate minti: ‹Yə əŋkunu adəwaldə kaa kə bayməlaŋa›. Bədoona ana, kel gə minti a jeereŋ wəra gud kel dənaŋ bə de kuya wəra keɗe.» 38Kəya *kaa gə guuduŋ wəətunu minti: «Barkaŋ, macəlam kəya ɓasi.» Wə hərnəy kel minti: «Nəkaŋ ne!»

Yeesu bə toose cəərə pərki bə Oliviyeŋa

(Mat. 26.36-41; Mar. 14.32-38)

39Kəya Yeesu kəlaŋ wəra, wə kooroŋ cəərə *pərki bə Oliviyeŋ damdi wə ɗeete saksakiŋ ana, daana *kaa gə guuduŋ həənu bəlam du. 40Bə minti wə tuukuŋ wəra cəərə pərkiŋaŋ, wə wəətənəy minti: «Aŋ toosə la kir minti aŋ əsə la ŋəŋ tiinə ke bə kuŋa.» 41Kəya wə zeŋ warna siri na məɗa, wə vaŋ də guguuru bə toose. 42Wə əsəŋ bə toose minti: «Aba, tam bəlaŋ neŋ, zenə kopi bə lasi toŋ la wəra sarəna. Səma kel teŋ jəə la paapa damdi giidən bəlaŋ ana ba, yə jəə la damdi giidim bəlaŋ ana.» [ 43Kəya *hulum bə digi kə Pepeŋ bəŋ apəy da, wə vəɗaŋ duru bə əyu səɓaki. 44A ko toŋa kəya, tarmə Yeesu cəmaŋ wəra ablaw. Wə haraŋ bə toose də səɓaki pisi toosa pa. Həɓi du koloŋ wəra akas kora ana bə tuuti adawra.]

45Adordə tooseŋa, wə faŋ apəya, wə haraŋ sar kaa gə guudu soope'iŋ, wə ɗeŋ a fələy wəra a kina kas geye bə laaweŋ. 46Wə wəətənəy minti: «Aŋ awe kin səm mo? Aŋ pətə la apəya, aŋ toosə la kir minti aŋ əsə la ŋəŋ tiinə ke bə kuŋa.»

Kaa gə acukur də Yeesu

(Mat. 26.47-55; Mar. 14.43-49)

47Ku Yeesu bay awe adawra cekiŋ, ɗe a goleŋa, kaa kə ablaw tuluŋ, Zudasi tiini da ajew da. Wə haa *hulum bə gud kaayaŋ hor ciiri ɓasi gə gud Yeesuŋ. Kəya wə zeŋ sar Yeesu da bə bi a suɓu gəbyu bə mirku. 48Səma Yeesu wəətunu minti: «Zudasi, tam ji akolokiŋ cəərə *Kormə Hulúma haa də soɓe bə kuŋ bə pə mo!» 49Bə minti kaa gə minti ɓəkəŋ cəərə Yeesu wəra cẽŋ asaŋ minti kel golde bə jiŋ, yə əsəŋ bə law ku minti: «Barkaŋ, are ŋitiy la nuutu də macəlam naareŋ mo?» 50Kəya hulum guudi məna ŋeŋ kosnə kafkam kemer kə *kumna boblo bə keere Pepeŋ warna halaŋ. 51Səma Yeesu minti: «Nəkaŋ ne! Yaakə kel teŋ la!» Wə məlaŋ kəəsu kosnə hulum toŋa, kəya kusnu wəraŋ wəra faɗi.

52Kəya Yeesu waataŋ anə kəkamna də *kaa kə keere Pepeŋ, kəkamna də kaa kə gole *Kuli kə Pepeŋ, daana kaa kəmtəŋ gə tiinə kaa gə minti a bəŋ a daw, minti: «Aŋ gene da də macəlam, də gədəwa bə bi a don ha'aŋ, aŋ ɗiki haa minti ten hulum bə feke agum a kaŋ mo? 53Ten a jaataŋ jaate dəərəŋ giidə tiilim də Kuli kə Pepeŋa, aŋ doonon ba. Səma cəwa taŋ wəra dayna haa nəəti daana kə səɓaki kə nər tilməŋ.»

Piyer malte ku minti tó asaŋ Yeesu ba

(Mat. 26.57-58, 69-75; Mar. 14.53-54, 66-72; Zaŋ 18.17, 25-27)

54Kəya yə doŋ Yeesu, yə kooroŋ duuru, yə ɗeŋ a kəlu giidə kuli kə *kumna boblo bə keere Pepeŋa. Kəya Piyer adoro da anə tooto caw bə ɗe da gud Yeesu da. 55Kaŋ a kuŋ cəwa tiilima, kəya yə əsəŋ keɗe bə hoola, Piyer bə hoole siri ada gəm. 56Həlgə də joŋreŋ əsnu bə əsə-isi ku cəwaŋa. A gulnu ɗeket-keti, a minti: «Hulum toŋ ha'aŋ, wə a jəŋ duuru gəm.» 57Səma Piyer maltaŋ ku wəra minti: «Həlgəŋ, ten əsnu ba.» 58Əsəŋ adoro sawəwa hulum baalaŋ əsnu. Wə wəətunu minti: «Tam gəm, tam haa hulum bə gud kaa teŋ!» Səma Piyer haraŋ kel minti: «Ten paapa hulum neete ba.» 59Əsəŋ wəra pisi sawəwa, hulum baalaŋ pa əsəŋ bə dogte kela də səɓaki minti: «Hulum toŋ ha'aŋ a jəŋ duuru gəəzi, gud bə minti wə haa hulum bə Galile gəm.» 60Səma Piyer haraŋ kel minti: «Ten ɗempa a ase gud kel gə minti tam wəətəy ba.» A ko bə minti Piyer kəm bə waate kelaŋ, goglokiŋ hõõdoŋ faɗi. 61Kəya Barkaŋ haraŋ duru cəərə Piyera, wə gulnu. A ko toŋa cəərə Piyer haraŋ bə ɗiki kel gə minti Barkaŋ a wəətunu du wəra ajewaŋ minti: «Ajew də bə minti goglokiŋ hõõde daynaŋ, tam malte kum yaŋ wəra cəərəna kampa soope.» 62Kəya wə kəlaŋ warna taakaw na bə hage na ablaw.

Yə sarte Yeesu daana yə lətu

(Mat. 26.67-68; Mar. 14.65)

63Kaa gə minti bə ame cəərə Yeesuŋ əsəŋ bə awte hina cuuru, daana bə lətu. 64Yə kulnu duru wəra, yə əsəŋ bə law ku minti: «Tam hulum bə ase kar tə kəm, laanam haa mindi mo, waatə la!» 65Daana yə sərtunu də kel gaalaŋ-gaalaŋ pa.

Yeesu tiinə kaa kəmtəŋ gə jeme kəəti kə kaanə Ziwifiŋa

(Mat. 26.59, 63-65; Mar. 14.55, 61-64)

66Bə minti koŋ wəlaŋ wəraŋ, kaa kəmtəŋ gə tiinə kaŋ, kəkamna kə *kaa kə keere Pepeŋ daana *kaa kə hate ku gili nuutuŋ təpaŋ ciiri. Yə bəŋ də Yeesu tiiniy da. 67Yə əsəŋ bə law ku minti: «Tam haa *Hulum bə minti Pepeŋ ŋəmnuŋ mo? Waatə are la!» Səma wə hərnəy kel minti: «Ten waataŋ la nuutu kəna, aŋ de guudəna ba. 68Ten laŋ kuŋ la nuutu cəərə kela kəna, aŋ haran kel ba. 69Səma a mele bə guudiŋa hebkənaŋ hãã ajew na kannaŋ, *Kormə Hulúm isi yaŋ a kasi kemer kə Pep Bar Səɓakiŋa.» 70Kaŋ keɗe əsəŋ bə waate minti: «Tam haa Kormə Pepeŋ tə bə mo?» Wə hərnəy kel minti: «Aŋ də kusrəŋ, aŋ wəətənəy minti ten haa tó.» 71Yə haraŋ bə waate pa minti: «Are paapa də taynə bar kəkəy pəda, gud bə minti are əskəŋ kel gə kuŋ wəra də kosnə are!»

Currently Selected:

LIKI 22: KERNT05

Highlight

Copy