MATIYE 14

Me kə Zaŋ Batisi

(Mar. 6.14-29; Liki 9.7-9; 3.19-20)

1Də ko toŋ kəyaŋ, *Erodi kumna bə Galileŋ əskəŋ sam Yeesu bə waate ku kaŋa. 2Kəya wə waataŋ kaa kə joŋre nuutuŋ minti: «Hulum toŋ haa Zaŋ Batisi, wə haraŋ wəra dədərgə adordə meŋa. Wə fəlaŋ səɓaki bə jəəti miɗiŋ haa gud teŋa.» 3-4Erodi waataŋ kel teŋ haa gud minti wə a awaŋ Zaŋ Batisi wəra gud kel teŋa haa kənaŋ:

Erodi a doŋ Erodiyadi mar siinu Filipiŋ wəra guudu. Zaŋ wəətunu minti: «Kəkəy paapa cəərəma bə de mar seenem ba.» Kəya Erodi vaŋ kaa bə ɗe a de Zaŋ, yə ɗeŋ a gaw a daŋgaya bə əntə-ənti də gaalay faɗi. 5Erodi a goldoŋ kəkəy bə əwu wəra, səma walka də kaa kə ablaw juunu gud minti yə a bə aŋke Zaŋ Batisi haa minti wə *hulum bə jogte ku mini kə Pepeŋ. 6Ɗeŋ a deye hõy, hi bə kəɗwəy bə laate də Erodi bə weŋ nəkaŋ faɗi. Kəya tərnə Erodiyadiŋ əsəŋ bə hərgi tiinə kaa gə minti Erodi a məntənəy daŋ. Hərgi naataŋ doŋ dər Erodi, duru ɗeŋ wəra cəərə ser-ser-ser. 7Wə raawaŋ bə kele ku wəra a nəənə faɗi minti, karman bə minti a məntunu ne anə keɗeŋ, tó aya də yaŋ. 8Gud kel gə minti nərə a waatəna dəŋ, a wəətunu minti: «Ten bele haa minti gan cəərə Zaŋ Batisi la wəra anə ɗar lam giidə sufra.» 9Kəya laawe doŋ kumnaŋ faɗi. Səma gud kel gə minti wə a kəlaŋ ku wəra daana kas kaa gə minti wə a məntənəy daŋ, wə waataŋ kaa kə joŋre nuutuŋ minti yə ayə cəərə Zaŋ Batisi la a nəənə. 10Kəya wə gaŋ hulum bə ɗe a jəmu cuuru warda faɗi. 11Wə gəənu cuuru giidə sufra da, wə bəŋ a aya a tər, tá tər ɗeŋ a aya a nərə faɗi gəm. 12*Kaa gə gud Zaŋ Batisiŋ kooroŋ da bə bi a haw titi du bə ɗe a gaara giidə teɗkera. Kəya yə kooroŋ sar Yeesu bə ɗe a tupu bəlam də kel gə minti a jəŋ.

Yeesu aye hameŋ a kaa dəŋaŋ guɓ-guɓi wiiɗiw

(Mar. 6.30-44; Liki 9.10-17; Zaŋ 6.1-15)

13Bə minti Yeesu əskəŋ kel gə cəərə Zaŋ Batisi bədoona kəyaŋ, wə yaakaŋ ko bə minti wə a jəŋ adaŋ wəra, wə luŋ giidə turtiŋa bə koore warna bay cuuru . Səma bə minti kaa kə ablaw əskəŋ kel teŋ, yə vaŋ warda anə tul-tul-tul giidə vil da, yə həənu bəlam du də kampa. 14Bə minti Yeesu bə ve wəra giidə turtiŋaŋ, wə asaŋ kaŋ ablaw gilaŋ, caaca duunu guudi faɗi. Kəya wə seerteŋ kaa kə ɗemeŋ wəra. 15Bə minti cəwaŋ dəraŋ wəra anəkay, *kaa gə guuduŋ zeŋ suru da bə bi a wəətu minti: «Koŋ wəra ta'i kəna anə halaŋ bay cuuru daana koŋ kəlaŋ máŋ wəra gəm. Yaakə kaŋ la, yə koorə la giidə anə wəlasiŋ bə ɗe a gusti kar gə hame kuya.» 16Yeesu minti: «Yə a paapa gə minti yə ɗee la warna ba. Aŋ də kusrəŋ, aŋ əyəy hame la haa aŋ.» 17Yə wəətunu minti: «Mappa kasi are kəna wiiɗiw, də aska ada ɓasi.» 18Bədoona ana, wə minti: «Aŋ humun dən da.» 19Kəya wə waataŋ kaŋ minti: «Aŋ baarə la adawra cəərə kaɗəkawa.» Kəya wə humuŋ mappa wiiɗiwaŋ də aska ɓasaŋ kəəsu, wə haŋ duru apəya, wə jəŋ suuse ciiri, adoro wə ɓarsaŋ dər mappaŋ, wə ayna a kaa gə guuduŋ minti yə ɓarsa la wəra a kaa kə ablaw. 20Mindi mindi mo hamaŋ wəra a tay du. Kaa gə guuduŋ ləwaŋ cəərə mappa də ɗoklə-ɗokle də minti yaakaŋ, yə ɗostoŋ kəlam dəərə hor cuuru ɓasi. 21Kaa gə minti a hamaŋ mappaŋ, kaŋkar təwa karman bə guɓ-guɓi wiiɗiw, yaakə kəram la wəra də kəmar koncoŋ bay aŋke.

Yeesu ɗe cəərə kana

(Mar. 6.45-52; Zaŋ 6.16-21)

22Adordə kel teŋa kəyaŋ, Yeesu waataŋ *kaa gə guuduŋ minti yə harə la bə li giidə turtiŋa bə cakɗe warna ajew də tó na faɗ-faɗi agal naaya də kan kəmtəŋ na. Tó yaake bə meere kaŋa akera faɗ-faɗi gəm. 23Bə minti wə meereŋ kaŋ wəra meeraŋ, wə kooroŋ bə ɗe a toose cəərə kormə pərki kəman. Koŋ ziɓiŋ wəra ha'aŋ, wə a ko toŋ da bay cuuru. 24Də ko toŋ kəyaŋ, turtiŋ haŋ guudə warna tooto aduubə də kan kəmtəŋ na. Kaŋkaw bə ji da diri da anəkay, kəya yə əsəŋ bə layta. 25Ɗeŋ a deye siswiɗiŋ, Yeesu kooroŋ siri na bə ɗə də kəmpuru cəərə kan kəmtəŋa. 26Bə minti yə əsnu kay bə ɗe cəərə kanaŋ, walkaŋ jəmnəy faɗi. Yə əsəŋ bə naakte kuya də ɗiki minti karman vəɗaŋ ne wəra dər té. 27Səma wə wəətənəy da anə ceɓi faɗi minti: «Aŋ doo kusrəŋ la kay, aŋ a ji walka pəda, kəna ten.» 28Kəya Piyer wəətunu minti: «Barkaŋ, jəəne haa tam gəəziŋ, ayan kəkəy la minti ten ɗe na səram na də kamparən cəərə kan na gəm.» 29Yeesu wəətunu minti: «Bəəda!» Kəya Piyer luŋ warda giidə turtiŋ da faɗi, wə kooroŋ sar Yeesu bə ɗe na cəərə kan na də kampa. 30Səma bə minti wə asaŋ kaŋkaw bə ji də səɓaki kəyaŋ, walka juunu, wə əsəŋ bə səŋɗi dər kana faɗi, wə naakaŋ ku koloŋ minti: «Barkaŋ! Seeren la wəra!» 31Yeesu məɗaŋ kəəsu faɗi, wə ləgaŋ kasi Piyer, wə wəətunu minti: «Tam caŋ awəy haa səm mo? De nəmtiŋ bə kerpə-kerpe.» 32Bə minti yə luŋ giidə turtiŋa də kumsi ɓasi keɗeŋ, kaŋkaw doŋ faɗi gəm. 33Kaa gə minti giidə turtiŋa adaŋ vaŋ də gigiiri tiinə Yeesu faɗi, yə wəətunu minti: «Tam haa Kormə Pepeŋ gəəzi.»

Yeesu seere kaa gə giidə seŋka də Genezaretiŋ

(Mar. 6.53-56)

34Yə cakɗaŋ kan kəmtəŋ warna cakɗaŋ kəyaŋ, yə tuukuŋ warna agal də seŋka də Genezaretiŋ na. 35Kaa kə giidə seŋka taŋ asaŋ minti kəna Yeesu kəya, yə vaŋ kaa bə ɓiki giidə seŋkaŋa wəra keɗe bə humti kaa kə ɗemeŋ da suru da. 36Yə əsəŋ bə jəw kamkama minti wə yəəkəy la bə ɗoote ku dəməəmə nuutu də tanə-tene bəjər-bəjərəŋa təwa faɗi. Kəya kaa gə minti a ɗootənaŋ keɗe seereŋ wəra.

Currently Selected:

MATIYE 14: KERNT05

Highlight

Copy