MARKƏ 4

Ku kumti cəərə hulum bə reye kolɓoya

(Mat. 13.1-15; Liki 8.4-10)

1Yeesu ɗeŋ a isi bə hate kaŋa ku kan kəmtəŋa pa. Kəya kaŋ taaraŋ ablaw anə kirkir cuuru hãã wə koloŋ bə li giidə turti də minti də malə-mele dər kan naŋ bə ɗe a isi warna giidə na je'i. Kaa kə ablaw əsəŋ máŋ gil ku kan kəmtəŋa. 2Kəya wə əsəŋ bə hətəya də *ku kumti cəərə kela ablaw. Haa kəna kel gə minti wə wəətənəy di minti: 3«Aŋ jeɓrə la pisi: hulum kəman kəlaŋ wəra bə ɗe a reye kolɓoy giidə aka nuutuŋa. 4Bə minti wə bə rəyu caw, surduŋ vaŋ agəjaŋ də kəkəy na. Kaskoŋ vaŋ a ko toŋa kəyaŋ, yə təknu wəra kuya le'-le'i. 5Surduŋ ɗeŋ a ve a ko kəman bə minti pərki guudu adawra; seŋkaŋ cuuru anə ferra. Kəya kewkew duŋ vaŋ warda anə cəlamma faɗi. 6Səma, bə minti cəwaŋ ɗeŋ a fe apəya daaway rakiŋ, kewkew saawaŋ wəra faɗi, wə hẽŋeŋ wəra keskeleki gud bə minti kəsar du paapa gə vaa-ve adawra na anə hayaŋ ba. 7Surdu ɗeŋ a ve a ko bə kəjəma. Kəjəm ɗeŋ a ve kaydaŋ, yə huufunu wəra, wə fəlaŋ ko bə we pəda. 8Surduŋ vaŋ a ko bə cimə-cimiŋa, kəya wə dəyaŋ warda, wə suŋ, wə waŋ degeɓ-geɓi. Kolɓoy bə məna, kəəsu məna waŋ pisi hor-hor soope, hor-hor kənki, kəsi mo, bədoona ana.» 9Kəya Yeesu wəətənəy minti: «Hulum bə minti jəəne də kosoŋ kirka əskiŋ, wə əskə la pisi faɗi!»

10Bə minti Yeesu máŋ paapa də kaa kə ablaw suru pədaŋ, kaa gə minti bə ɗeete guuduŋ, də kaa gə guudu hor ciiri ɓasiŋ, əsəŋ bə law ku cəərə ku kumtiŋa. 11Wə hərnəy kel minti: «Aŋ teŋ ha'aŋ, kel gə waate sam *Kumna kə Pep gə minti a gə ŋoyə-ŋoyeŋ, wə vaɗnaŋ dəŋ wəra a nəənəŋ. Səma kaa kaayaŋ, yə wəətəy di haa də ku kumti 12kir minti: ‹Jəəne nuutu minti diri bə goleŋ, yə a ase ba; jəəne nuutu minti kusniy bə iskiŋ, yə a iskiy guudiŋ ba. Yə a jəə la bə iskiy guudiŋ, yə a sə a hare da sar Pepeŋ daŋ, wə a sə a əyəy vəəgi bə giiduŋ gəm#4.12 Es. 6.9-10.› » 13Kəya wə wəətənəy minti: «Aŋ əskəŋ gud ku kumti toŋ kay kənaŋ ba! Jəəne bədoona ana, aŋ bə əski gud ku kumti bə ablaw naanaanə pə mo?»

Yeesu ke gud ku kumti bə cəərə hulum bə reye kolɓoy wəra

(Mat. 13.18-23; Liki 8.11-15)

14«Karman bə minti hulum bə rəyuŋ, haa Kel kə Pepeŋ. 15Sərdə duruŋ vaŋ agəjaŋ də kəkəya. Agəjaŋ də kəkəy haa kaa gə minti əski Kel kə Pepeŋ, səma *Sataŋ tuli anə cəlam a humuy kel té gə minti a vaŋ ku tərməyiŋ wəra. 16Sərdə duruŋ vaŋ a ko bə minti koŋ adawra guudu pərkiŋ. Ko bə minti koŋ adawra guudu pərkiŋ, haa kaa gə minti əski kel kə Pepeŋ, kəya yə doy də waale faɗiŋ. 17Səma, yə paapa gə vaa-ve kəsar a kel teŋa ba tə bə moŋ, yə kole ɗiki di anə cəlamma faɗi. Bədoona ana ta, bə minti gəəli tuluŋ ne ciiriŋ, ɗalba yə ɗəlaŋ ne bə ləsəya gud kel kə Pepeŋaŋ, yə yaake kəkəy bə minti yə cuuruŋ hebkən-hebkəna faɗi. 18Sərdə duruŋ vaŋ a ko bə kəjəma. Ko bə kəjəm haa kaa gə minti əski kel kə Pepeŋ, 19səma ɗiki də kel gə minti bə ji siri cəərə seŋkaŋaŋ huyuy ablaw, yə bə ji haa tiniini də kusri a kəkəy bə golde hurmaŋaŋ, daana yə bə saane kar gaalaŋa ablaw pa. Gud teŋa ta, kar teŋ huufi kel kə Pepeŋ wəra, de neeteŋ si ajewa pəda gəm. 20Surdu vaŋ a ko bə cimə-cimiŋa. Ko bə cimə-cimiŋ, haa kaa gə minti əski kel kə Pepeŋ, yə doy ku tərməyi faɗi. Ɗe neeteŋ ɗe ajewa pisi damdi kolɓoy bə minti dəyaŋ wəra, kəəsu məna we hor-hor soope, hor-hor kənki, kəsi mo, bədoona ana'iŋ.»

Ku kumti cəərə lampaŋa

(Mat. 5.15; 10.26; Liki 6.38; 8.16-18; 11.33)

21Yeesu wəətənəy pa minti: «Hulum kəman haŋ lampa də do'ə-do'e da neŋ, haa paapa bə bi a guɓi karman wəra cəərə, kumundu ba bə malə warna gud kəɓər na ba. Wə bi a mala wəra haa apəya a ko bə maltaŋa ɗaw. 22Gud maa mo, kel gə minti kaŋ wəətəy dəgaaya-dəgaayaŋ, kaŋ iskiy yaŋ wəra keɗe. Kel gə metə-meteŋ, guudi ge yaŋ wəra anə pəɗaki keɗe gəm. 23Hulum bə minti jəəne də kosoŋ kirka əskiŋ, wə əskə la pisi faɗi!»

24Wə wəətənəy pa minti: «Kel gə minti aŋ bə iskiyaŋ, aŋ ɗəkə la kəm pisi ciiri. Karman bə minti aŋ ŋaɓte kar a kaŋ duuruŋ, Pepeŋ ŋaɓtaŋ nəətiŋ yaŋ duuru gəm, wə vam baalaŋ ada ve pə ɗaw. 25Gud maa mo hulum bə minti əskəŋ kel neŋ, wə fele yaŋ ada ablaw pa. Səma hulum bə minti ɗempa a iski kel baŋ, nuutu weseki gə minti wə a iskiniy, yə ɓəlku du wəra ada ɓalke pa.»

Ku kumti cəərə deye bə kaasawa bay ciiri

26Yeesu wəətənəy pa minti: «*Kumna kə Pepeŋ bə ŋarə-ŋere haa də hulum bə minti jo'oŋ kaasaw giidə aka nuutuŋa ana. 27Bə minti wə a kinaŋ, kumundu wə je'i dədərgəŋ, duugŋ ɗalba ɗaaway, kaasaw teŋ haa bə deye na daana bə si na. Kel teŋ ji haa naanaanə moŋ, haŋ suru ba. 28Seŋkaŋ deye kaasaw warda haa tá də kusrə: ajew anə faɗi haa təəsu di, adoro yə ve ciiri, kəya yə de diri bə ɗe a ne wəra anə kaŋkaŋ. 29Bə minti yə nəkaŋ ne wəra kirka ceme ŋaanaanə moŋ, hulum tuli haa də tərtiŋ faɗi, gud maa mo ko bə ceme diŋ nəkaŋ da ne warda.»

Ku kumti cəərə dər kəbaŋ koncoŋ fenna'iŋa

(Mat. 13.31-35; Liki 13.18-19)

30Yeesu wəətənəy pa minti: «Áŋ ŋarə *Kumna kə Pepeŋ la haa də maa toŋ mo? Ana áŋ haa la kəna *ku kumti muntu mo bə gaw guudu wəra duuruŋ? 31Wə bə ŋarə-ŋere haa bə dər kəbaŋ gə minti yə məntəy minti ‹mutardəŋ› ana. Bə minti yə bə tupuyaŋ, yə haa kəncəŋ fenna gə daŋə-deŋe kumsi gə giidə seŋkaŋ keɗe. 32Səma, bə minti yə koloŋ ne wəra gə jo'ə-jo'eŋ, yə deye warda, yə kole wəra kəbaŋ kəmtəŋ gə daŋə-deŋe kumsi kaayaŋ kosnə kəsaw. Yə jarge kəəsi wəra kəmtəŋ hãã bə minti kaskoŋ bi a tope kuli kəəsi a gəsaatərna diŋa.»

33Kəya wə hətnəy kel kə Pepeŋ də sar ku kumti toŋ ablaw də aŋar də karman bə minti yə neke yaŋ bə uskuŋ. 34Wə wəətənəy kel haa də ku kumti saksaki. Səma bə minti wə jəəne wəra bay cuuru də *kaa gə guuduŋ, wə hare bə kaw guudu wəra keɗe a niini.

Yeesu he ku kaŋkaw kəmtəŋ wəra bay ji

(Mat. 8.18, 23-27; Liki 8.22-25)

35Də cəwa də dəəgŋ də hi bə məna toŋ, Yeesu waataŋ *kaa gə guuduŋ minti té cakɗə la warna cəərə kan kəmtəŋ na agal naytaŋ na. 36Kəya yə yaakaŋ kaa kə ablaw, kaa gə guuduŋ həənu də turti də minti wə a giidəŋ faɗi, kətartaw gaalaŋ yaŋ ada ajaŋ du gəm. 37Ɗe a goleŋa, kaŋkaw kəmtəŋ haŋ da ne, yə əsəŋ bə ji, bə ji, bə ji. Kan gə minti teke da kas kaŋkaw əsəŋ bə acce kəsnə turtiŋa ləyləy hãã a golde bə dere. 38Tó Yeesu a kina dəgnə turtiŋ na anəkay, cuuru də ɗaklə-ɗakle a karman bə ceŋə-ceŋe. Kəya kaa gə guuduŋ kooroŋ da bə bi a gunu wəra, yə əsəŋ bə naakte kuya a nuunu minti: «Hulum bə hateŋ, áŋ nuutu bə bese wəra, haŋ sarəma baŋ naanaanə mo?» 39Yeesu gunuŋ wəra kəyaŋ, wə jəmaŋ təbay a kaŋkaw, wə waataŋ kan faɗi minti: «Aŋ zenə la, aŋ əsə la ɗeketi!» Kəya kaŋkaw yaakaŋ jiŋ, koŋ doŋ ɗeket-keti faɗi gəm. 40Kəya wə waataŋ kaa gə guuduŋ minti: «Aŋ jəŋ walka taŋ naanaanə bədoona mo? Aŋ kəm paapa gə doo-de ba!» 41Səma té də kusri paapa bə ɗoote ba kas walkaŋ, yə əsəŋ bə le ku kumsi minti: «Hulum toŋ haa gidiirə hulum muntu pə mo minti koo kaŋkaw, koo kan kəmtəŋ humi kosoŋ cuuru mo?»

Currently Selected:

MARKƏ 4: KERNT05

Highlight

Copy