John 11

Sa Ummuliyan Lazarus

1Inninggaw laḻaḵi ye nasaḵite nangngadan aḵ Lazarus ad Bethany ye ilin da Mary ḵan Martha we sunudna. 2Aḵ Mary ḵad, siya nangisig atte bangbanglu we lana'tte suḵin Jesus woḵ pinunasana bos si buuḵna.#11:2 John 12:1-8. 3Gapu ḵad ta nasaḵit aḵ Lazarus, nangibuun da ansunud aḵ umoy angibaga ḵan Jesus ḵanane, “Apu, nasaḵit ay-ayatome buḻbuḻunnu.”

4Dingngoḻ ḵad Jesus ḵanana, “Sa sanate saḵit, daḵampun aḵ miḵatoy yaḵon ambanag si midayawan Apudyus ta sa Abeng Apudyus midayaw gapu'tte sanat.”

5Aḵ Jesus ḵad, ay-ayatona da ansusunude da Martha, Mary ya aḵ Lazarus. 6Pun dingngoḻna ḵade nasaḵit aḵ Lazarus, inninggaw aḵ duwan aḻgaw si ili ye inninggawana. 7Pun naḻaḵpus ḵad duwan aḻgaw, ḵanana'tta disipuluna, “Intaḵu mipauli'tte probinsiya'd Judea.”

8Ḵanan da disipuluna, “Mistulu, singsington da Judyu amatuwanda ḵan siḵa, ngaipaḵa bos umoy?”

9Ḵanan Jesus, “Daḵampun ḵamman aḵ nasawaḻan aḵ duwae oras sin-aḻgaw? Nu anaddaḻan tagu si aḻgaw, adipun misaballut te ampadda. 10Yaḵon nu labi anaddaḻanan ni tagu, misaballut te anggiḵbot.”

11Ginangputna ḵad imbaga da sana ḵanana, “Aḵ Lazarus we buḻbuḻun taḵu nasuyop yaḵon iyyaḵ bangonon.”

12Ḵanan da disipuluna, “Apu, nu nasuyop aḵ Lazarus, malin-awaan.” 13Sa pion Jesus ḵanan, natoy. Yaḵon ḵananpun da disipulu nu tuttuwae nasuyop.

14Pune sadi, ḵanan Jesus we nangipaḵaawat, “Natoy aḵ Lazarus 15ya gapu ḵan diḵayu allaylayadaḵ te naidaḵpun sidi ta amati ḵayu. Yaḵon intaḵu ḵan siya.”

16Ḵanan Thomas we ngannonda Ḵapil atta buḻunnae disipulu, “Intaḵu ta maḵaḵatoy taḵu ḵan Jesus.”

17Dummatongda ḵad ad Bethany, inigammun Jesus we opat aḻgaw naḻaḵpus si nilibonan Lazarus. 18Ad Bethany adani'd Jerusalem, sa bootna umoye taddaḻanon ni osa si adipun masin-orasan. 19Pun adu da Judyu we ummoy nalliwliwa ḵan da Mary ḵan Martha mipanggob si sunudda.

20Dingngoḻ ḵad Martha we annate umali'ḵ Jesus, lummawa woḵ ummoyna inabot. Yaḵon aḵ Mary, inninggaw atte boḻoyda. 21Ḵanan Martha ḵan Jesus, “Apu, nu inninggawḵa sina, adipun oḵyan sunudḵu natoy. 22Yaḵon taḵon ay sinsadi, igammuḵe itton Apudyus da ngaimane ḵodawom ḵan siya.”

23Ḵanan Jesus, “Umuli'ḵ sunudnu.”

24Ḵanan Martha, “Igammuḵe umuli'tte umuliyan da natoy si anungus ni aḻgaw.”

25Ḵanan Jesus, “Saḵon anagu ḵasin atta natoy ya angitod atte biyag aḵ inggana. Ḵad ngaimane amati ḵan saḵon, taḵon ay nu matoy, matagu'ḵ inggana. 26Ḵad ngaimane matagu ya amati ḵan saḵon, adipun paat matoy.#11:26 Sa pion ni matoy ḵanan atte annae verse, sa ḵatoy ni ispiritun ni tagu we misina'ḵ inggana ḵan Apudyus. Patiyom ḵamman anna?”

27Ḵanan Martha, “On Apu, amatiyaḵe siḵa Kristu we Abeng Apudyus we umali si annae lubung.”

28Imbagan ḵad Martha sana, nipauli'ḵ ḵuwada woḵ inayagana'ḵ sunudnae Mary, ḵananae nangiyagapaap, “Awad aḵ Mistulu we paayagna siḵa.” 29Dingngoḻna ḵad ay, natanaḵdog woḵ ummoy niyabot ḵan siya. 30Te aḵ Jesus ḵad, daampun miduum atte ili yaḵon sissiya si nangabotan Martha. 31Da Judyu we inninggaw ḵan Mary si boḻoye nalliwliwa ḵan siya, innilada ḵade natanaḵdog woḵ lummawa, tinun-udda te ḵanandapun nu umoy umibil si libon.

32Dummatong ḵad aḵ Mary si igaw Jesus, nanalluḵu si sinagungna woḵ ḵanana, “Apu, nu inninggawḵa sina, adipun oḵyan sunudḵu natoy.”

33Innilan ḵad Jesus we umibiibil aḵ Mary ya da Judyu we nibuḻun ḵan siya, amo nasuḻsuḻdung, 34woḵ ḵanana, “Dinu nangilibonanyu?”

Ḵananda, “Apu, awwaynu ta inḵa ilan.”

35Ummibil aḵ Jesus. 36Pun ḵanan da Judyu, “Ilanyu ḵad, ay-ayatona pagay aḵ Lazarus.”

37Yaḵon ḵanan da udum, “Daḵampun ḵamman aḵ siya naniyat atta atan ni naḵuḻap ḵad ngaipana adi ḵinaan saḵit Lazarus ta adi oḵyan natoy?”

38Pun nasuḻsuḻdung os aḵ Jesus woḵ ummoy si libone liyange batu onobna. 39Ḵanan Jesus, “Ḵaanonyu sanate batu.”

Ḵanan Martha we sunud Lazarus, “Apu! Ambuyuḵ te ḵapat aḻgawnae nilibon.”

40Ḵanan Jesus, “Adiḵpun ḵamman imbagae nu amatiḵa, ilam madayawan Apudyus?” 41Pune sadi, ḵinaanda batu. Ḵanan Jesus we nantangad, “Ama, anggappiyaaḵ ḵan siḵa te dingngoḻnu saḵon. 42Inigammuḵe pasige dongngom saḵon yaḵon ibagaḵ sana mipagapu'tta annae tagu we ataḵtaḵdog ta amatidae siḵa nangibuun ḵan saḵon.”

43Inabusna ḵad imbaga anna, indangsoḻna ḵanane nampoḵaw, “Lazarus, tumoḵwaḻḵa!” 44Pun tummoḵwaḻ aḵ Lazarus we nabadabadan da imana ya da suḵina si sinnun ya nabusdung uḻuna si sinnun. Ḵanan Jesus, “Uḵasanyu badabadna ta anaddaḻan.”

Sa Inondae Angongat Ḵan Jesus

(Mat. 26:1-5; Mrk. 14:1-2; Luk. 22:1-2)

45Pun adu'tta Judyu da naḵaoy ḵan da Mary, innilada ḵad ḵingwan Jesus, namatida ḵan siya. 46Yaḵon da udum, ummoyda'tta Pharisee woḵ imbagada ḵingwan Jesus.

47Pun da papangat da papadi ya da Pharisee, impaayagda da ḵuḵunsisaḻ#11:47 Sa de Greek, da ḵuḵunsisaḻ ngannonda Sanhedrin. Sana isun ni korti ye andaḵdaḵngan da papangat da papadi, da papangat da Judyu ya da mimistulun ni lintog ta dida anḵuwis. woḵ ḵananda, “Ngai ḵoon taḵu? Te adu da ḵingwan ni annae tagu we nakaskasdaawe sinyal. 48Te nu ipayam taḵu ya ḵooḵoona, losan da tagu amati ḵan siya. Ḵad umali da iRome we angipangat ḵan ditaḵu ya dadailonda templo ya sa ili taḵu.”

49Yaḵon sa osa ḵan didae aḵ Caiaphas we ḵangatuwane padi'tte sadi ye tawon, ḵanana'tta udum, “Naippun pulus igammuyu. 50Adiyupun os ay maawatane unnoyna oḵyan ossaan aḵ matoy para'tta tagu ta adi da losane umili matoy?” 51Adinapun imbaga sana si ḵasomsomḵana yaḵon gapu ta siya ḵangatuwane padi'tte sadi ye tawon, impadtunae ḵasapuḻane matoy aḵ Jesus ta matagu da losane ḵailiyanae Judyu. 52Ḵad daḵampun aḵ abus da ḵailiyana yaḵon andaḵdaḵngona da abeng Apudyus we naas-asipaḻaḵ atta nansabasabali ye ili ta da losane abeng Apudyus Judyu man ḵan Gentil an-ossaanda. 53Pun inggan ni sadi ye aḻgaw, namplanu da papangat da Judyu nu ngai inondae angongat ḵan Jesus.

54Pun adipun ogon aḵ Jesus umoy ampaila'tte maḻamaḻang atta Judyu yaḵon ummoy atte ili'd Ephraim we adani si bumbummaaw. Naḵaigaw sidi atta disipuluna.

55Madam-an ḵad de Gayagayan da Judyu we ngannonda Nallausan, summang-at da adu we tagu'd Jerusalem we naḻpu'tta probinsiya ta umoyda papoḻḵason da long-agda si daan misaḻad gayagaya. 56Singsingngitda'ḵ Jesus woḵ ḵanan da ataḵtaḵdog atte paway ni templo we nan-asiimus, “Ngai ḵasomsomḵanyu? Adipun ḵamman umali maḵagayagaya'ḵ Jesus?” 57Imbilin da papangat da papadi ya da Pharisee ye nu ngai angigammu si igaw Jesus ipaigammuda oḵyan ḵan dida ta padoḵmada.

Currently Selected:

John 11: kml

Highlight

Copy