John 10
10
Sa Mataḻgodane Antangḵon
1Pune sadi ḵanan Jesus we nangipani, “Ibagaḵ ḵan diḵayu ḵatuttuwaan, ngaimane adi lumnoḵ atte lewangan ni puḵuḵan da karnero yaḵon ḵumaḻab si osae maoy, sanat aḵḵawan ḵan tulisan. 2Yaḵon sa angoy si lewangan, siya gattoḵe antangḵon atta karnero. 3Buḵatan ni guwaḻda onob ni lewangan nu angoy antangḵon atta karnero. Dongngon da karnero gingana nu poḵawana da ngadanda ḵad ipuyutna dida'ḵ lasin. 4Illawana ḵad da karnerona, ummun-una ya mitun-udda ḵan siya te immatunanda gingana. 5Adidapun mitun-ud atte ḵaili yaḵon umawidda te adidapun immatunan gingana.” 6Sa annae pani, inug-uggud Jesus ḵan dida yaḵon adidapun maawatan piona ḵanan.
7Pun ḵanan os Jesus we nangipani, “Ibagaḵ ḵan diḵayu ḵatuttuwaan, saḵon lewangane ayon da karnero. 8Losan atta ummun-una nu saḵon, aḵḵawanda ḵan tulisanda. Yaḵon adimpun da karneroḵ tinuttuwa dida. 9Saḵon lewangan ḵad ngaimane angoy ḵan saḵon, matagu. Isuna karnero we maḵwae lumnoḵ ḵan lumawa ya umoy anggaḻab.
10“Umali aḵḵawan ta umoy an-aḵaw, pumatoy ḵan dumadail. Yaḵon ḵan saḵon, ummaliyaḵ ta ittaḵ da tagu si biyag aḵ inggana, sa biyage ippun angkurangana.”
11Ḵanan os Jesus, “Saḵon ambaḻu we antangḵon atta karnero. Sa ambaḻu we antangḵon ittona long-agna'ḵ matoy para'tta tangḵonna. 12Sa matangdanane antangḵon, nu awad ilana'ḵ atape asu aḵ angiduḵḵus atta karnero, tenana dida ya umawid te daḵampun aḵ siya gattoḵe antangḵon ya sinḵuwa'tta karnero. Ḵad sa atape asu, iduḵḵusna doḵmaan dida ya umasbuḵda. 13Umawid sadi ye tagu te abuse matangdanan ya adinapun biyangan da karnero. 14Saḵon ambaḻu we antangḵon atta karnero. Igammuḵ da karneroḵ ya igammuda bos saḵon. 15Igammun Amaḵ saḵon ḵad igammuḵ os aḵ Amaḵ. Ḵad naḵasaganaaḵe angitod atte long-agḵu'ḵ matoy gapu'tta karneroḵ. 16Awad da udume karneroḵe naippun atte annae puḵuḵan.#10:16 Sa pion Jesus ḵanan si udume karneroḵe naippun atte annae verse, da Gentil. Ḵasapuḻane ayagaḵ dida ta dongngonda gingaḵ. Ḵade sadi ambalinda'ḵ ossaane grupu ya ossaan antangḵon.
17“Gapu'tte sana ayaton Amaḵ saḵon te ittoḵ long-agḵu'ḵ matoy ta asiḵ os pauliyon. 18Naippun paat maḵaaḻa'tte biyagḵu yaḵon sipupusuwaḵe angitod. Anna ḵabooḻaḵe angitod atte biyagḵu ya anna bos ḵabooḻaḵe amauli. Sa imbilin Amaḵ, ḵasapuḻane ḵooḵ.”
19Imbagan ḵad ay Jesus anna, nanggogwa bos ḵasin da Judyu gapu'tte imbagana. 20Adu da ḵananda, “Naaḻanan ya naḻapang. Ngaipayu dongngon?”
21Yaḵon ḵanan da udum, “Daḵampun aḵ ḵaḵnat an-uugud ni maaḻanan. Lamog ḵamman ni aḻan diyaton da atan ni naḵuḻap?”
Sa Adimpun Da Judyu Amatiyan Ḵan Jesus
22Ageled ḵad, sadi timpu we Gayagayan da Judyu we ngannonda Midatunan ni Templo ad Jerusalem. 23Aḵ Jesus ḵad anadtaddaḻan si Sawang Solomon atte templo. 24Pun inaligummun da papangat da Judyu woḵ ḵananda, “Atoman os ay angisilisilibam ḵan siḵa? Ibabaggam ḵan diḵani nu siḵa Kristu.”
25Ḵanan Jesus, “Ginangputḵu imbaga ḵan diḵayu yaḵon adiḵayupun amati. Da ḵewaaḻe ḵooḵ atte ḵaḻabbongan Amaḵ, dida anaḵdoḻ nu ngaiyaḵ. 26Yaḵon adiḵayupun amati te adiḵayupun nidoga'tta karneroḵ. 27Te da karneroḵ dongngonda gingaḵ. Ḵad igammuḵ dida ya tun-udonda saḵon. 28Ittoḵ ḵan dida biyag aḵ inggana ta adidapun misina ḵan Apudyus aḵ inggana ya naippun paat maḵapuḻos ḵan dida ḵan saḵon. 29Aḵ Amaḵ we nangitod ḵan dida ḵan saḵon, siya ḵangatuwan atta losan. Pun naippun ḵallamog maḵapuḻos ḵan dida ḵan Amaḵ. 30Saḵon ya aḵ Amaḵ, ossaan ḵani.”
31Pune sadi, nangaḻa ḵasin da Judyu'ḵ batu ta batuwonda'ḵ Jesus inggana'ḵ matoy. 32Yaḵon ḵanan Jesus, “Impailaḵ da adu we ambaḻu ḵan diḵayu we impaḵwan Amaḵ. Ngai'tta anna gapunae batuwonaḵ?”
33Ḵanan da Judyu we summongbat, “Daḵampun atta ambaḻu we ḵingwam amatuwanni ḵan siḵa nu adi sa nangiyisuwam si long-agnu ḵan Apudyus te taguḵae abus ya nambalinom long-agnu'ḵ Apudyus.”
34Ḵanan Jesus, “Daḵampun ḵamman aḵ sa nigili si lintogyu, ‘Imbagaḵe Apudyus ḵayu?’#10:34 Psalm 82:6. 35Nu ngannon Apudyus dida'ḵ Apudyus, ngai naḻpuwan ni Ugud Apudyus we ippun ambaliwana'ḵ inggana? 36Ngaipayu ḵanan ḵan saḵone intotoḵḵon ni Ama ya imbuunna si annae lubung, ‘Nan-ugud ḵayu'ḵ lawweng ḵan Apudyus,’ te sa imbagaḵ, ‘Saḵon Abeng Apudyus’? 37Nu adiḵ ḵoon da ḵewaaḻ Amaḵ, adiyu saḵon patiyon. 38Yaḵon nu ḵooḵ dida, taḵon ay nu adiyu saḵon patiyon, patiyonyu oḵyan da ḵooḵ ta igammuwonyu ya maawatanyu we sa Ama awad ḵan saḵon ya awadaḵ os ḵan siya.”
39Pun pinadasda ḵasin doḵmaan aḵ Jesus yaḵon adidapun te nallibas ḵan dida. 40Pune sadi, dummoḻmang ḵasin aḵ Jesus atte tawwang Jordan si lugar we nambonyagan John atte awe woḵ inninggaw sina. 41Adu da tagu we umoy ḵan siya. Ḵananda, “Naippun ḵingwan John aḵ nakaskasdaawe sinyal yaḵon tuttuwa da losane imbagana si mipanggob ḵan siya.” 42Pun adu da namati ḵan Jesus sidi.
Currently Selected:
John 10: kml
Highlight
Share
Copy
Want to have your highlights saved across all your devices? Sign up or sign in
© 2019 Translators Association of the Philippines (TAP), All rights reserved.
