John 13

Sa Namaḻbaḻan Jesus Atta Suḵin Da Disipuluna

1Madam-an ḵad Gayagayan da Judyu we ngannonda Nallausan, iniiggammun Jesus we dummatong timpu we tenana lubung ya mipauli ḵan Amana. Gapu'tte ayatna'tta taguna si lubung, ay-ayatona dida inggana'ḵ anungus.

2Angan ḵad da Jesus si sadi ye labi, impaspasmoḵ Satan ḵan Judas Iscariot we abeng Simon we ituyuḵna'ḵ Jesus. 3Yaḵon inigammun Jesus we impuḻang Amana ḵan siya da losan ya inigammuna bose naḻpu ḵan Apudyus ḵad mipauli bos ḵan siya.

4Pun summiḵad aḵ Jesus woḵ ḵinaanna taḵḵop ni silupna. Naabus ḵad, innaḻana tuwalya woḵ nanḵainna. 5Pun imbuḵbuḵna danum si palanggan woḵ insaḻadnae amaḻbaḻ atta suḵin da disipuluna ya pinunasana si tuwalyae nanḵainna.

6Niduum ḵad ḵan Simon Peter, ḵanan Peter ḵan siya, “Apu, baḻbaḻam ḵamman da suḵiḵ?”

7Summongbat aḵ Jesus woḵ ḵanana, “Da annae ḵooḵ sinsadi adimpun maawatan yaḵon asim maawatan aḵ uni.”

8Ḵanan Peter, “Adim paat baḻbaḻan da suḵiḵ.”

Ḵanan os Jesus we summongbat, “Nu adiḵ baḻbaḻan da suḵim, adiḵapun midoga ḵan saḵon.”

9Ḵanan Simon Peter, “Nu ḵaḵnat Apu, daḵampun aḵ abus da suḵiḵ aḵ baḻbaḻam yaḵon idogam os da imaḵ ya sa uḻuḵ.”

10Ḵanan Jesus ḵan siya, “Sa tagu we nan-amos, adipun ḵasapuḻane ambaḻbaḻ te ampoḻḵas long-agna. Abus da suḵina'ḵ ḵasapuḻane mabaḻbaḻan. Ampoḻḵas ḵayu yaḵon daḵampun aḵ losan ḵayu.” 11Te iniiggammuna angituyuḵ ḵan siya. Sadi gapunae ḵanana, “Daḵampun aḵ losan ḵayu ampoḻḵas.”

12Inabusna ḵad binaḻbaḻan da suḵida, inniggana taḵḵop ni silupna woḵ nipauli si igawna. Ḵanana ḵan dida, “Igammuyu ḵamman ḵingwaḵ ḵan diḵayu? 13Ngannonyu saḵon Mistulu ya Apu ḵad tuttuwa sanate imbagayu. 14Pun nu saḵone Apuyu ḵan Mistuluyu namaḻbaḻ atta suḵiyu, ḵasapuḻane an-asibaḻbaḻ ḵayu. 15Ḵingwaḵ anna ta awad ampaniyanyu. Ta ḵoonyu oḵyan os da ḵingwaḵ ḵan diḵayu. 16Ibagaḵ ḵan diḵayu ḵatuttuwaan, naippun sammilu'ḵ nangatngatu nu sa apuna. Ḵad naippun mibuun aḵ nangatngatu nu sa nangibuun ḵan siya. 17Nu igammuyu da anna, pian ḵayu nu ḵoonyu dida.

18“Daḵampun aḵ ugudoḵe diḵayu losan te igammuḵ da piniliḵ. Yaḵon ḵasapuḻane mituttuwa Ugud Apudyus we ḵanana, ‘Sa ḵaubungḵu, siya angituyuḵ ḵan saḵon.’#13:18 Psalm 41:9. 19Ibagaḵ ḵan diḵayu sinsadi si daanna maḵwaan ta maḵwa ḵad, amati ḵayu we saḵon. 20Ibagaḵ ḵan diḵayu ḵatuttuwaan, ngaimane angawat atta ibuunḵu, saḵon awatona. Ḵad sa angawat ḵan saḵon, awatona bos nangibuun ḵan saḵon.”

Sa Nangipaigammuwan Jesus Atte Angituyuḵ Ḵan Siya

(Mat. 26:20-25; Mrk. 14:17-21; Luk. 22:21-23)

21Inabus ḵad Jesus imbaga da anna, an-aalimuun woḵ panoḵnoḵana'tta disipuluna ḵanane, “Ibagaḵ ḵan diḵayu ḵatuttuwaan, osa ḵan diḵayu angituyuḵ ḵan saḵon.” 22Nan-asitollong da disipuluna te naippun igammuda nu ngai ḵan dida. 23Sa osa'tta disipulu we ay-ayatona, ansasaḻay si daḻnigna. 24Pun sininyasan Simon Peter ta imusona ḵan Jesus nu ngai ḵan dida inugudna.

25Pun nansaḻay sadi ye disipulu ḵan Jesus woḵ ḵanana, “Apu, ngai ḵan diḵani angituyuḵ ḵan siḵa?”

26Ḵanan Jesus, “Sa angittaḵ atte isawsawḵu we tinapay, siya.” Pun insawsawna ḵad innatodna ḵan Judas Iscariot we abeng Simon. 27Innaḻan ḵad ay Judas tinapay, nillumnoḵ aḵ Satan ḵan siya.

Pun ḵanan Jesus ḵan siya, “Angganasome angwa si piom ḵoon.” 28Naippun nangigammu'tta inggaw atte lamisaan nu ngaipana imbaga sadi ḵan siya. 29Gapu ta aḵ Judas nangdon si pilaḵda, ḵanampun da udum nu imbagan Jesus we umoy ngumina'tta masapuḻda si gayagaya baḵon nu angitod atte pilaḵ atta ḵapus. 30Innaḻan ḵad ay Judas tinapay, nampiwot. Labi sadi.

Sa Baru We Bilin

31Nalismud ḵad aḵ Judas, ḵanan Jesus, “Sinsadi midayaw Abeng Di Tagu ya mipagapu ḵan siya midayaw aḵ Apudyus. 32Ḵad nu midayaw aḵ Apudyus mipagapu ḵan siya, idayaw os Apudyus we mismu ya idayawnae dagus.

33“Aabengḵu, sin-aḵitan inggawaḵ ḵan diḵayu. Ḵad singtonyu saḵon ya sa imbagaḵ atta Judyu, sinsadi annae ibagaḵ ḵan diḵayu we sa annae ayaḵ, adiḵayupun maḵaali. 34Ittoḵ ḵan diḵayu baru we bilin. Ḵasapuḻane an-asiayat ḵayu we isun ni an-aayatḵu ḵan diḵayu. 35Siya angigammuwan da losane tagu we disipuluḵ diḵayu nu an-asiayat ḵayu.”

Sa Nangibag-an Jesus Si Amuḵlitan Peter Ḵan Siya

(Mat. 26:31-35; Mrk. 14:27-31; Luk. 22:31-34)

36Ḵanan Simon Peter ḵan siya, “Apu, dinu ayam?” Ḵanan Jesus we summongbat, “Sa ayaḵ, adipun maḵwae mitun-udḵa sinsadi yaḵon asiḵa umun-unud.”

37Ḵanan Peter ḵan siya, “Apu, ngaipa adi maḵwae mitun-udaḵ sinsadi? Ittoḵ long-agḵu'ḵ matoy gapu ḵan siḵa.”

38Ḵanan Jesus we summongbat, “Tuttuwa ḵammane ittom long-agnu'ḵ matoy gapu ḵan saḵon? Ibagaḵ ḵan siḵa ḵatuttuwaan, daampun anullaḵuḵ ḵawitan, amiḵluwom saḵon puḵlitan.”

Currently Selected:

John 13: kml

Highlight

Copy