John 14

Sa Daḻane Umoy Ḵan Apudyus We Ama

1Ḵanan Jesus atta disipuluna, “Adi ḵayu ambimbinsaw, amati ḵayu ḵan Apudyus ya amati ḵayu bos ḵan saḵon. 2Aduadu maigawan atte boḻoy Amaḵ. Ḵad iyyaḵ isagana da inggawanyu. Ḵad nu daḵampun aḵ tuttuwa, ibagaḵ ḵamman ḵan diḵayu we iyyaḵ angisagana'ḵ inggawanyu? 3Ḵad nu iyyaḵ isagana inggawanyu, mipauliyaḵ ḵasin ta aḻaḵ diḵayu ta sa igawḵu siya bos inggawanyu. 4Ḵad igammuwonyu daḻane umoy si ayaḵ.”

5Ḵanan Thomas, “Apu, naippun igammuni nu dinu ayam. Ḵad ngai inonni ye angigammu'tte daḻan?”

6Ḵanan Jesus, “Saḵon daḻan, ḵatuttuwaan ḵan biyag. Naippun maḵaoy ḵan Amaḵ nu adi angoy ḵan saḵon. 7Nu inigammuyu saḵon, inigammuyu oḵyan os aḵ Amaḵ. Inggana sinsadi, igammuyu'ḵ Amaḵ ya innilayu bos.”

8Ḵanan Philip, “Apu, ipailam ud ḵan diḵani'ḵ Amam ta mat-op ḵani.”

9Ḵanan Jesus, “Nabayage inninggawaḵ ḵan diḵayu ḵad daannupun os ay igammuwon saḵon, Philip? Ngaimane nangila ḵan saḵon, innilada bos aḵ Amaḵ. Ḵad ngaipam ḵanane ipailam ud ḵan diḵani'ḵ Amam? 10Adimpun ḵamman patiyone awadaḵ ḵan Amaḵ ya awad aḵ Amaḵ ḵan saḵon? Sa imbagaḵ ḵan diḵayu, daḵampun aḵ ugudoḵ si ḵuwaḵe ḵaḻabbongan yaḵon sa Ama we iinggaw ḵan saḵon, ḵoona da ḵewaaḻna. 11Pun patiyonyu we awadaḵ ḵan Amaḵ ya awad aḵ Amaḵ ḵan saḵon. Nu adiyupun patiyon imbagaḵ, patiyonyu oḵyan gapu'tta ḵingwaḵe nakaskasdaaw.

12“Ibagaḵ ḵan diḵayu ḵatuttuwaan, ngaimane amati ḵan saḵon, ḵoona bos da ḵingwaḵ. Ḵad daḵdaḵoḻ da ḵoona nu da ḵingwaḵ te iyyaḵ ḵan Amaḵ. 13Ḵad ngaimane ḵodawonyu mipagapu'tte ḵaḻabbongaḵ,#14:13 Sa ibagana ḵad atte Greek, ngaimane ḵodawonyu gapu si ngadanḵu. Duwa saḻupatin ni anna: Ngaimane ḵodawonyu we angipresenta baḵon nu ngaimane ḵodawonyu gapu'tte taḻgodyu si ḵaḻabbongaḵ. ḵooḵ ta midayaw Ama mipagapu'tte Abeng. 14Nu ḵodawonyu da ngaimane mipagapu'tte ḵaḻabbongaḵ, ḵooḵ.”

Sa Inkarin Jesus We Ibuunna

15Pinagatupan Jesus woḵ ḵanana'tta disipuluna, “Nu ayatonyu saḵon, tuttuwaonyu da bilinḵu. 16Ḵad ḵodawoḵ ḵan Amaḵ ta angibuun aḵ Bumadang ḵan diḵayu. Siya Ispiritu Santu we inggaw ḵan diḵayu'ḵ inggana. 17Siya Ispiritu Santu we angituttudu ḵan diḵayu si ḵatuttuwaan mipanggob ḵan Apudyus. Da tagu we adipun amati ḵan saḵon, adidapun awaton te adidapun igammu ya immatunan. Yaḵon ḵan diḵayu, igammuyu te awad ḵan diḵayu ya iinggaw ḵan diḵayu.

18“Adiḵpun diḵayu tenane isun di ulila te mipauliyaḵ ḵan diḵayu. 19Sin-aḵitan ya da tagu we adipun amati naippun ogon ilanda ḵan saḵon yaḵon diḵayu asiyu ilan saḵon. Te mataguwaḵ ḵasin ya matagu ḵayu bos. 20Sa sadi ye aḻgaw, igammuwonyu we awadaḵ ḵan Amaḵ ya awad ḵayu ḵan saḵon ya awadaḵ ḵan diḵayu. 21Ngaimane amopotpot ḵan anuttuwa'tta bilinḵu, siya angayat ḵan saḵon. Ḵad sa angayat ḵan saḵon, ayaton Amaḵ ya ayatoḵ os ya ipaigammuḵ ḵan siya mipanggob ḵan saḵon.”

22Ḵanan Judas we daḵampun ḵan Judas Iscariot, “Apu, ngaipa abus ḵani'ḵ angipaigammuwam si mipanggob ḵan siḵa ya adimpun atta tagu'tte lubung?”

23Ḵanan Jesus we summongbat, “Sa angayat ḵan saḵon tuttuwaona ugudḵu ya ayaton Amaḵ. Ḵad saḵon ya aḵ Amaḵ umali ḵani ya iinggaw ḵani ḵan siya. 24Sa adipun angayat ḵan saḵon, adinapun tuttuwaon ugudḵu. Ḵad sa ugudḵu we dongngonyu, daḵampun aḵ naḻpu ḵan saḵon yaḵon naḻpu ḵan Amaḵ we nangibuun ḵan saḵon.

25“Imbagaḵ da sana si sissiyaaḵ ḵan diḵayu. 26Yaḵon sa bumadange ibuun Amaḵ, siya Ispiritu Santu we angiyugud ḵan saḵon. Ituttuduna ḵan diḵayu da losan ya paiḵagasmoḵna ḵan diḵayu da losane imbagaḵ.

27“Tenaḵ ḵan diḵayu lin-awa ya sa lin-awaḵ ittoḵ ḵan diḵayu. Daḵampun aḵ isun ni an-aatod da tagu we adipun amati an-aatodḵu ḵan diḵayu. Ḵad adi ḵayu maal-alimuunan ya maḵimut. 28Dingngoḻyu imbagaḵe iyyaḵon ya mipauliyaḵ ḵan diḵayu. Ḵad nu ayatonyu saḵon, allaylayad ḵayu oḵyan te iyyaḵ ḵan Amaḵ we nangatngatu nu saḵon. 29Sinsadi imbagaḵ da anna si daanda maḵwaan ta maḵwada ḵad, amati ḵayu.

30“Adipun ogon andu maḵaug-uggudaḵ ḵan diḵayu te annate umali'ḵ Satan we pangat da adipun amati ḵan saḵon. Naippun ḵabooḻana ḵan saḵon, 31yaḵon ḵooḵ da imbilin Amaḵ ḵan saḵon ta igammuwon da tagu we ay-ayatoḵ aḵ Amaḵ. Awwayyu, intaḵun.”

Currently Selected:

John 14: kml

Highlight

Copy