Luke 10

Sa Nangibuunan Jesus Atta Pitumpuḻu Ya Duwae Disipuluna

1Nagangput ḵad, pinilin Jesus da pitumpuḻu ya duwa'tta udume disipuluna. Sinindodwana dida imbuun ta umoyda umuna antuttudu'tta ili ye ayana. 2Ḵanan Jesus we nangipani, “Amoamod da maani yaḵon aḵit da an-ani. Pun iluwaḻuyu ḵan Apudyus we sinḵuwa'tta maani ta angibuun aḵ amoamod aḵ umoy an-ani.” 3Pun ḵanana, “Inḵayu! Sosomḵonyu anna. Ibuunḵu diḵayu'tta lawweng ya ampaḵimute tagu ḵad isuyun karnero we umoy atte lugar we igaw da tanane asu. 4Adi ḵayu angawit aḵ pilaḵ, baḵaḻ ḵan ansuḵatanyu'ḵ sandal. Ḵad adi ḵayu maḵaug-uggud atta abotonyu te mataḵtaḵ ḵayu.

5“Lumnoḵ ḵayu ḵad atte boḻoy, sa umunae ibagayu, ‘Itton oḵyan Apudyus lin-awa ḵan diḵayu.’ 6Ḵad nu pion diḵayu mangiliyon si boḻoyda, aḵ Apudyus angitod si lin-awa ḵan dida. Yaḵon nu umadida mangiliyon diḵayu, adimpun Apudyus itton ḵan dida lin-awa. 7Nu awad ammangili ḵan diḵayu, inggaw ḵayu si boḻoyda inggana'ḵ tenanyu sadi ye ili. Adi ḵayu an-attuattun. Ḵanonyu ḵan inumonyu da ilusnuda te labbongnae matangdanan da anḵewaaḻ.

8“Nu dumatong ḵayu'tte ngaimane ili ya mangiliyonda diḵayu, ḵanonyu da ilusnuda. 9Ḵaanonyu da saḵit ya iwaḻagawagyu'tta tagu we gattoḵe sinsadi awad ḵan diḵayu ampangatan Apudyus. 10Nu dumatong ḵayu'tte ngaimane ili ya adidapun diḵayu mangiliyon, inḵayu'tte paway ya ḵananyu we angibaga'tta tagu, 11‘Taḵon ay gabun ni iliyu we anna'tta dapanni, ipaḻpagni ta angigammuwanyu we diḵayu asi ḵigad si madusaanyu. Yaḵon aaddi ye igammuwonyu we sinsadi gattoḵe awad oḵyan ḵan diḵayu ampangatan Apudyus.’ 12Annaya ibagaḵ ḵan diḵayu, nu dumatong anguwisan Apudyus atta losane tagu, nadagdagson dusayu si annae ili nu sa dusan da iSodom.”#10:12 Sa awe da tagu'd Sodom amod da ḵingwadae lawweng pun ḵawagase dinadail Apudyus sanate siyudad atte apuy. Nu piom basaon mipanggob ad Sodom, maḵwae maila si Genesis atta chapter 18-19.

Sa Anguwisan Apudyus Atta Tagu

(Mat. 11:20-24)

13Ḵanan Jesus atta losane tagu, “Ḵaddagu ḵayu we iChorazin ya diḵayu we iBethsaida! Te nu ḵingwaḵ ad Tyre ḵan Sidon#10:13 Da iTyre ḵan iSidon atte awe, sa ugalida nandindinamage dida ḵaḻawengan. Sa ḵanan da profeta'tte mipanggob si dusada maḵwae mabasa'tte Isaiah 23:1-18, Ezekiel 26-28:19, Amos 1:9-10. da nakaskasdaawe ḵingwaḵ atta iliyu, tummuḵduda oḵyane ansilup atta saḵu ya dapuḻanda da uḻuda ta ipailadae imbabawida da basuḻda ya iyyagaydae nangwa. Diḵayu ḵad, taḵon ay nu innilayu, adiḵayupun nambabawi'tta basuḻyu. 14Nu dumatong anguwisan Apudyus atta losane tagu, nadagdagson andudusana ḵan diḵayu nu da iTyre ḵan iSidon. 15Diḵayu ḵade iCapernaum, sosomḵonyu ḵad aine midayaw ḵayu'd langit? Naid! Sa maḵwa, aaddi ye miballu ḵayu'd Hades we igaw da natoye madusaanyu!”

16Ḵanan Jesus we nangiyanungus atta disipuluna, “Ngaimane andongoḻ ḵan diḵayu, saḵon dingngoḻna. Ḵad sa angidiyan ḵan diḵayu, saḵon idiyanna. Ḵad sa angidiyan ḵan saḵon, idiyanna bos nangibuun ḵan saḵon.”

Sa Nipauliyan Da Pitumpuḻu Ya Duwa

17Sin-aḻgawan ḵad, nipauli da pitumpuḻu ya duwae imbuun Jesus. Ḵanandae allaylayad, “Apu, taḵon ay da aḻan tinuttuwada si pinaḻyawni dida mipagapu si ngadannu!”

18Ḵanan Jesus, “Innilaḵ aḵ Satan we naottage naḻpu'd langite isun di ḵilat. 19Innatodḵu ḵan diḵayu ḵabooḻan ta oḻgonyu'ḵ Satan. Taḵon ay ngai ḵoonae amadas si ḵabooḻana, adiḵayupun paat madiwdiwat. On, taḵon ay gusdanyu da uḻog ya da gayyaman! 20Taḵon ay os nu lamogyu paḻyawon da aḻan, daḵampun aḵ siya gapunae allaylayad ḵayu. Sa gapunae allaylayad ḵayu oḵyan, nigili da ngadanyu'd langit.”

Sa Anggappiyaan Jesus

(Mat. 11:25-27; 13:16-17)

21Sa nangibag-ana'tte sadi, pinalayad ni Ispiritu Santu aḵ Jesus woḵ ḵananae nalluwaḻu, “Ama, ipangatam da losan sina'd luta ya ad langit. Anggappiyaaḵ ḵan siḵa te adimpun impaigammu ḵatuttuwaan atta nalalaing ḵan naadaḻane tagu, siya nangipaigammuwam da napakumbaba ya da antaḻgode isudan abeng. On, ḵingwam ḵaḵna te siya piom.”

22Pun ḵanan Jesus atta tagu, “Innatod Amaḵ we Apudyus ḵan saḵon da losane ḵabooḻan ḵan ḵinalaing. Iniiggammuna saḵone Abengna ya naippun udum aḵ nangigammu ḵan saḵon. Ḵaḵna bos aḵ Amaḵ. Naippun angigammu ḵan siya, abusaḵ ya da ngaimane tagu we pioḵe angipaigammuwan.”

23Pune sadi, nansagung atta disipuluna ta tuttuduwana didae abus. Ḵanana, “Diḵayu ḵad, pian ḵayu te lamogyu ilan da ḵooḵ. 24Te annaya ibagaḵ ḵan diḵayu, taḵon ay nu adu da profeta ḵan da ari atte awe ye pionda ilan da innilayu, adidapun innila dida. Taḵon ay os nu pionda dongngon da dingngoḻyu, adidapun dingngoḻ dida.”

Sa Ḵumadagu We ISamaria

25Inninggaw osa ḵan didae nalainge mistulun ni lintoge tummaḵdog woḵ ḵananae namadas ḵan Jesus, “Mistulu, ngai ambaḻu we ḵooḵ ta ittanaḵ ḵan Apudyus atte biyag aḵ inggana?”

26Ḵanan Jesus, “Ngai binasam si nigili ye Lintog Apudyus? Ngai piona ḵanan?”

27Ḵanana, “Nigili'tte Ugud Apudyus, ‘Ḵasapuḻane ayatom aḵ Apu we Apudyusnu atte amine pusum ya amine ḵalidodwam ya amine ḵinosdoḻnu ya amine somsomoḵnu.’#10:27 Deuteronomy 6:5; Hosea 6:6. Nigili bose, ‘Ḵasapuḻane ayatom da asintatagume isun ni an-aayatnu si long-agnu.’ ”#10:27 Leviticus 19:18.

28Ḵanan Jesus, “Ustu insongbatnu! Ḵoom da ḵaḵna woḵ mataguḵa'ḵ inggana.”

29Yaḵon piona panoḵnoḵane siya ḵad naun-unan. Pun ḵasinna bos ḵanane nan-imus ḵan Jesus, “Ngai asintataguḵ we ayatoḵ nu?”

30Ḵanan Jesus we summongbat, “Inninggaw tagu we naḻpu'd Jerusalem we an-osog ad Jericho. Nanadtaddaḻan ḵad, sinnob da tulisan woḵ innaḻada da losane ḵuḵuwana, indogada bos da silupna. Ḵad pinang-opang-oḵda inggana'ḵ matoyan woḵ tenanda. 31Pune sadi, inninggaw padi ye an-osog. Innilana ḵad laḻaḵi ye matoyan, nilipatna. 32Unipun, inninggaw os ganaḵ Levi,#10:32 Da ganaḵ Levi, bummadangda'tta papadi'tta ḵewaaḻda si templo. taḵon ay nu innilana bos sadi ye matoyane laḻaḵi, nilipatna. 33Unipun, dummatong os iSamaria woḵ innilana ḵad ay sadi ye matoyan, ḵinadaguwana.#10:33 Da iSamaria ya da Judyu, nansassangada. Pun sa ugalida ya sa nakakaskasdaawe ḵadagun ni sadi ye iSamaria'tta somsomoḵ da Judyu. 34Pun ummadani woḵ agasana da sugatna si lanae olives ḵan bayas woḵ binadaḻna. Pun insaḵayna si ḵabayuna woḵ inniyoyna'tte dadawwosane maabangan ta ayyuwanana. 35Mabigat ḵad, innatodna duwae palata si simboḻoy woḵ ḵanana, ‘Ayyuwanam ḵappos annae tagu. Mipauliyaḵ ḵad, bayadaḵ nu potog.’ ”

36Pun ḵanan Jesus, “Atte ḵasomsomḵam, ngai'tta sadi ye tuḻu tuttuwae asintatagun ni napang-oḵ?”

37Ḵanana, “Sa ḵummadagu ḵan siya.”

Ḵanan Jesus, “Inḵan ya ḵoom os ḵaḵna.”

Sa Namisitaan Jesus Ḵan Da Martha Ḵan Mary

38Pinagatupan Jesus ya da disipulunae nanaddaḻan inggana'ḵ dummatongda'tte ili. Inninggaw sidi'ḵ Martha we inayagana dida'ḵ ḵuwada. 39Inninggaw os aḵ Mary ye sunudnae tummuḵdu si adanin Jesus ta dongngona tuttuduna. 40Yaḵon aḵ Martha, nambinsaw atta adu we isaganana. Pun ummoy ḵan Jesus woḵ ḵanana, “Apu, naippun ḵamman ḵanana ḵan siḵa nu tenanaḵ ḵan sunudḵu we ansagana? Ibagam ḵappos ta badanganaḵ!”

41Ḵanan Apu, “Martha, Martha, adu bos ay da ambinsawam. 42Taḵon ay nu ḵatti, os-ossaan ḵasasappuḻan. Siya annate pinilin Mary, sa ḵapatogane ippun paat maḵaaḻa.”

Currently Selected:

Luke 10: kml

Highlight

Copy