Luke 11

Sa Mipanggob Si Luwaḻu

(Mat. 6:5-13; 7:7-11)

1Sin-aḻgawan ḵad, alluwaluwaḻu'ḵ Jesus atte osae lugar. Nagangput ḵad, ḵanan ni osa'tta disipuluna ḵan siya, “Apu, tuttuduwam ud diḵani ye alluwaḻu we isun ni nantututtudun John we Ambobonyag atta disipuluna.”

2Ḵanan Jesus ḵan dida, “Ḵaḵna inonyu we alluwaḻu.

“ ‘Amani,

madayawḵa oḵyane nasantuwane Apudyus.

Dumatong oḵyan ampangatam sina'd luta.

3Ittom ud maḵane ḵasapuḻanni si inaḻgaw.

4Ḵad pakawanom da basuḻni

te pinakawanni bos da naḵabasuḻ ḵan diḵani.

Ḵad adim iyunude masulisug ḵani.’ ”

5Ḵanan Jesus ḵan dida, “Nu inḵa'tte boḻoy ni buḻbuḻunnu si gawallabi ya ḵanam, ‘Ittanaḵ ud aḵ maḵan, 6te andi buḻbuḻunḵu we ḵaddatong ḵad ippun ipaḵanḵu ḵan siya!’ 7Ḵanana, ‘Adiyaḵpun bumangon te asngaaḵ, annan innumbog ḵani ya nidaḵig. Umadiḵ angitod!’ 8Annaya ibagaḵ ḵan diḵayu, taḵon ay nu ambuḻbuḻun ḵayu umadina angitod. Yaḵon gapu ta ipatutnu we anḵodaḵodaw, bumangon pagay ta ittona da ḵodawom.

9“Ḵad annaya ibagaḵ ḵan diḵayu, anḵodaḵodaw ḵayu oḵyan os ḵan Apudyus woḵ ittona ḵan diḵayu. Singsingtonyu oḵyan woḵ odasanyu ya iggaiggayu oḵyane anḵugḵug woḵ mabuḵtan onob ḵan diḵayu. 10Ngaimane anḵodaw ḵan Apudyus, maittan ya ngaimane ansingit, angdas. Ḵad ngaiman ose anḵugḵug, mabuḵtan onob ḵan siya. 11Awatna, diḵayu we an-ama, ittonyu ḵamman uḻog si abengyu nu anḵodaw aḵ ugadiw? 12Ḵad nu anḵodaw aḵ iplug, ittonyu ḵamman gayyaman? 13Pun diḵayu we ḵabasbassuḻan, igammuyu we angitod si ambaḻu'tta abengyu, maguḻaman aḵ Amayu'd langit adina itton Ispiritu Santu atta anḵodaw ḵan siya?” Sana mungimung ni tutttudun Jesus mipanggob atte luwaḻu.

Aḵ Jesus Ya Aḵ Beelzebul

(Mat. 12:22-30; Mrk. 3:20-27)

14Sin-aḻgawan ḵad, pinaḻyaw Jesus aḻane naḻpu'tte laḻaḵi. Sa aḻan gapun ni naumoḻan ni laḻaḵi. Lummawa ḵad aḻan naḵaginga woḵ nataag da tagu. 15Ḵanan da udum ḵan dida, “Aḵ Beelzebul we pangat da aḻan nangitod atte ḵabooḻanae amaḻyaw atta aḻan.” 16Da udum ḵad os, pionda padason aḵ Jesus, pun ḵindawdae ḵoona nakaskasdaawe maḻpu'd langit ta mapanoḵnoḵane aḵ Apudyus nangibuun ḵan siya.

17Yaḵon aḵ Jesus ḵad, iniiggammuna somsomoḵda woḵ ḵanana ḵan dida, “Nu awad umili'ḵ ampapatoy, madadail. Pun ḵaḵna bos maḵwa nu awad baḻyan aḵ ansusubog, mabuḵaḻda. 18Ḵaḵna bos aḵ Satan nu paḻyawona da asin-aḻanna, madadail ampangatana. Ngaipayu ḵamman ibagae aḵ Beelzebul nangitod atte ḵabooḻaḵe amaḻyaw atta aḻan? 19Nu ḵananyu we paḻyawoḵ da aḻan gapu si ḵabooḻan Beelzebul, ngai bos nangitod si ḵabooḻan da disipuluyu we amaḻyaw atta aḻan? Pun gapu ta sa ḵabooḻan Apudyus amaḻyawan da disipuluyu'tta aḻane daḵampun atte ḵabooḻan Satan, sana amanoḵnoḵe nankamali ḵayu si imbagayu mipanggob ḵan saḵon. 20Te sa ḵatuttuwaan, aḵ Apudyus nangitod atte ḵabooḻaḵe amaḻyaw atta aḻan ya sadi amanoḵnoḵe sinsadi gattoḵe awad ḵan diḵayu ampangatan Apudyus.

21“Aḵ Satan ḵad, mipani si tagu we maasngaan. Nu adu aggomna ya guwaḻdaana boḻoyna, naippun lamog angaḵaw atta ḵuḵuwana. 22Yaḵon nu dumatong naḵosḵosdoḻ nu siya, maḵapatoy ya oḻgona ta aḻana da aggomnae antaḻgodana ya da ḵuḵuwana. Ḵad iwaḻasna'tta buḻunna.

23“Ngaimane adipun tumimpuyug ḵan saḵon, sumullagi ḵan saḵon ya ngaimane adipun bumadange anagup atta tagu we amati ḵan saḵon, amo buḵaḻona da tagu we umali ḵan saḵon.”

Sa Nipauliyan Ni Aḻan

(Mat. 12:43-45)

24Pinagatupan Jesus we nangipani woḵ ḵanana, “Mapaḻyaw ḵad aḻane naḻpu'tte tagu, umoy sadi ye aḻan anggaḵagaḵay si bumbummaaw ta angngit aḵ inggawana. Ḵad nu adipun maḵaodas, ḵanana si somsomoḵna, ‘Mipauliyaḵ si tagu we isun ni boḻoye naḻpuwaḵ.’ 25Dumatong ḵad aḻan, odasana sadi ye tagu we napaḻyawanae ippun ogon sinsadi aḻan ḵan siyae isun ni boḻoye ampoḻḵas ḵan nauḻnus. 26Ḵad umoyna ayagan da pitu we aḻane daldallu lawwengda nu siya ta miḵamboḻoyda. Ḵad amo ḵaddagu sadi ye tagu nu sa damu.”

Sa Tuttuwae Layad

27Nagangput ḵade imbagana, inninggaw bubai ye nidoga'tta ummamdane tagu woḵ ḵananae nampoḵaw, “Pian nangiyanaḵ ya nanagibi ḵan siḵa!”

28Dingngoḻ ḵad Jesus ḵanana, “Amo pian da angogomgom atta dingngoḻdae Ugud Apudyus!”

Sa Ḵindawda Ḵan Jesus

(Mat. 12:38-42)

29Ummaduadu ḵad da tagu we nadagup ḵan Jesus ḵanana ḵan dida, “Diḵayu we tagu sinsana, lawwelawweng ḵayu. Ḵodaḵodawonyu we ḵooḵ da nakaskasdaawe sinyal ta amanoḵnoḵe aḵ Apudyus nangibuun ḵan saḵon. Naid! Adiḵpun ḵoon. Sa abuse mipaila, isun ni naḵwa ḵan Profeta Jonah. 30Te sa naḵwa ḵan Profeta Jonah,#11:30 Aḵ Jonah we profeta si awe, imbuun Apudyus daḵodaḵoḻe ugadiw ta luḵmusona'ḵ Jonah. Pun inninggaw si buwang ni ugadiw aḵ tuḻun aḻgaw ya tuḻun labi. Pune sadi impaoy Apudyus ugadiw atte igid ni danum woḵ impaipugsuna'ḵ Jonah si taḻantag. Jonah 1:17; 2:10. sadi sinyale nangipaila'tta iNineveh we siya imbuun Apudyus. Ḵad sa maḵwa bos ḵan saḵone Abeng Di Tagu, siya sinyal atta tagu sinsana.

31“Ḵad sa sadi ye Queen ad Sheba atte awe ye naḻpu'tte adaddayuwane ili'd daya, maḵataḵdog atta tagu sinsana si aḻgawe anguwisan Apudyus atta losane tagu. Sa gunayna amanoḵnoḵe dusaon oḵyan Apudyus diḵayu. Te taḵon ay adaddayuwan naḻpuwana, ummali sina'd Israel ta dongngona da ugud Ari Solomon we allaing. Taḵon ay nu annaaḵ sinsadi ye nangatngatu nu aḵ Solomon, adiyupun os dongngon ya tuttuwaon da ugudḵu.#11:31 1 Kings 10:1-13; 2 Chronicles 9:1-12. 32Da iNineveh bos, maḵataḵdogda'tta tagu sinsana'tte sadi ye aḻgawe anguwisan Apudyus atta tagu. Sa ambabawiyan da tagu'd Nineveh amanoḵnoḵe dusaon Apudyus diḵayu. Te dida ḵad, imbabawida da basuḻda ya iyyagaydae nangwa si dingngoḻda iwwaḻagawag Profeta Jonah ḵan dida. Yaḵon diḵayu ḵad, taḵon ay nu annaaḵ sinsadi ye nangatngatu nu aḵ Profeta Jonah, adiyupun tuttuwaon da tuttuduḵ.”#11:32 Jonah 3:1-10.

Sa Mipanggob Atte Silaw Ni Long-ag

(Mat. 5:15; 6:22-23)

33Ḵanana bos, “Naippun tagu'ḵ tonggana silaw ya iggana si matalingdan baḵon nu laḵḵobana'tte aḵḵubaw. Daḵampun aḵ ḵaḵnat, iggana si sasap-aḻan ni silaw ta ilan da lumnoḵ. 34Sa ata silaw ni long-ag. Pun nu ambaḻu antotollong da atam, ampadda losan long-agnu. Yaḵon nu lawweng antotollong da atam, anggiḵbot losan long-agnu. 35Ummam ta sa silaw ḵan siḵa adi gumiḵbot. 36Te nu ampadda long-agnu we lumangḻang we ustuustu ya ippun paat giḵbot ḵan siḵa, pumadda losane long-agnu si ḵatuttuwaan Apudyus we iissuna silawe ampaddapadda.”

Da Pharisee Ya Da Mimistulun Ni Lintog

(Mat. 23:1-36; Mrk. 12:38-40)

37Nagangput ḵad aḵ Jesus we nantuttudu, inayagan ni Pharisee ta umoy angan. Pun ummoy aḵ Jesus aḵ ḵuwada woḵ naḵatuḵdu ḵan dida. 38Sa Pharisee ḵad, nataag atte innilanae adipun aḵ Jesus nambuḻu asiyot angan.#11:38 Adipun aḵ Jesus angan nu ḵaissaw imana. Siya lasune nataag Pharisee ye adimpun Jesus ḵingwa da ustu we ugalidae ambuḻu te sinomsomoḵdae sadi ḵasapuḻan ta awaton Apudyus dida. Iniiggammun Jesus we sa ambuḻu adinapun baliwan ḵasomsomḵan Apudyus. 39Pun ḵanan Jesus ḵan siya, “Ḵaddagu ḵayu, diḵayu we Pharisee. Ḵapappaila ḵayu! Iissuyu tagu we ḵiwasanae abus labaw ni tasa ya sa palatu! Yaḵon ad daḻom atta somsomoḵyu, amod ḵamommodyu ḵan lawwelawweng ḵayu. 40Nadong-og ḵayu! Adiyupun ḵamman igammu we ḵingwan Apudyus daḻom ḵan lasin ni long-agyu? 41Sa unaonyu ḵoon, papoḻḵasonyu da somsomoḵyu ya allaay ḵayu'tta ḵapus. Te nu ḵoonyu ḵaḵna, pumoḻḵas losane ḵinatataguyu.

42“Ḵaddagu ḵayu we Pharisee! Te ittonyu ḵasimpuḻun ni apityu ḵan Apudyus, taḵon ay da muḻae amapiya'tta tipoy. Yaḵon adiyupun tuttuwaon ḵapatogane biline ituttudun ni lintog, isun da angwaanyu'tta ummun-un atta asintataguyu ya ayatonyu'ḵ Apudyus. Ḵasapuḻane ḵoonyu da anna ḵad adiyu bos maliwatan da udum.

43“Ḵaddagu ḵayu we Pharisee! Te ampili ḵayu'tta ḵabaḻuwane tutuḵduwan atta sinagoga ya pionyu bose mapatgan atta ampakumusta ḵan diḵayu'tta andaḵdaḵngan da adu we tagu. 44Ḵad ḵaddagu ḵayu bos te isuyu da libone mitataḻu! Gusgusdan da tagu we naippun igammuda.”

45Sa osa'tta nalainge mistulun ni lintog ḵanana ḵan Jesus, “Mistulu, sa ḵaḵnate imbagam, midoga ḵani mibabbain!”

46Ḵanan Jesus, “Sa ibagaḵ os ḵan diḵayu we nalainge mimistulun ni lintog, ḵaddagu ḵayu te ipabuḵudyu'tta tagu andagsone mabuḵud yaḵon adiyupun pione bumadang ḵan dida taḵon ay aḵit! 47Ḵaddagu ḵayu te ḵingwayu da libon da profeta we gingngat da danaḵḵoḻyu. 48Siya angipailae umunud ḵayu pagay atta ḵingwada. Te dida da nanggongat ya diḵayu nangwa'tta libonda. 49Sadi angipaila'tte ḵinalaing Apudyus we ḵanana, ‘Ibuunḵu da profetaḵ ya da apostol ḵan dida ya gongatonda da udum ḵad ampaḵaḻamonda bos da udum.’ 50Pun da tagu ḵad sinsana, madusada gapu'tta nagongatan da losane profeta inggan ni lapun ni lubung. 51On, da losane profeta, misaḻad atte nangongatanda ḵan Abel inggana'tte nangongatanda ḵan Zechariah we gingngatda'tte nambootan ni altar ḵan templo. Annaya ibagaḵ ḵan diḵayu, diḵayu we tagu si sanae lunap, midoga ḵayu si biyang ya sa dusan da sadi ye ginnumngat.#11:51 Sa mipanggob ḵan Abel si nangongatan Cain we mismu we sunudna. Genesis 4:8 ya sa mipanggob ḵan Zachariah we nagongat 2 Chronicles 24:20-22.

52“Ḵaddagu ḵayu bose nalainge mimistulun ni lintog te tutuppodonyu da inon ni anaguwan Apudyus! Te iyadiyu da tagu we tumuttuwa oḵyan!”

53Nagangput ḵad da sadi ye imbagana, lummawa'ḵ Jesus. Inggan ni sadi, sinullagin da mimistulun ni lintog ya da Pharisee. Pun amod da inimusda ḵan siya, 54te pionda siḵapan ta awad ambatayandae angidaḻum ḵan siya.

Currently Selected:

Luke 11: kml

Highlight

Copy