थरप्या तका का काम 11
11
पतरस को यरूसलेम में पाछो आणो
1आकई यहूदियाँ में थरप्या तका चेला अन विस्वास्याँ ओ हुण्यो के, परमेसर का बचनाँ ने ज्यो लोग यहूदी ने हे, वाँकाणी भी मान लिदा हे। 2जद्याँ पतरस यरूसलेम पूग्यो, तो जो भी लोग-बाग खतना किदा तका हा, वाँकाणी वींका पे दोस लगायो। 3वे केबा लागा के, “थूँ यहूदी ने हा वाँके घरे ग्यो अन वाँके हाते खादो-पीदो भी हे।” 4तद्याँ पतरस वाँने ज्या बात हाँचई में व्यी ही, वाँ बताबा लागो। 5जद्याँ मूँ यापा नगर में परातना कररियो हो तद्याँ एक दरसावो देक्यो। वींमें देक्यो के, एक मोटा चादरा जस्यान आकासऊँ कुई चीज धरती पे उतररी ही अन अस्यान लागरियो हो के, वींका च्यारई खुणा पकड़न कुई वींने उतार रियो हे। पछे वा चीज मारा नके आगी। 6वींमें हारई तरे का जीव-जनावर हा, ज्यामें धरती का किड़ा-मकोड़ा अन आकास का उड़बावाळा जनावर हा। 7पछे मने एक अवाज हुणई, जो मने केरी ही, पतरस उठ अन आने मारन खा। 8पण में क्यो, “परबू मूँ अस्यो ने कर सकूँ हूँ, काँके में कदी भी हुगली अन असुद चिजाँ कोयने खादी।” 9तो आकासऊँ दूजी दाण पाच्छी अवाज अई अन क्यो, “जो भी चिजाँ ने परमेसर सुद क्यो हे, वींने खराब ने हमज।” 10तीन दाण अस्यानीस व्यो अन वीं चिजाँ पाच्छी आकास में उठा लिदी गी। 11वणीस दाण जटे मूँ रूक्यो तको हो, वीं घर में तीन जणा आया, ज्याँने मारा वाते केसरियाऊँ खन्दाया ग्या हा। 12परमेसर की आत्मा मने बना भेंमऊँ वाँके लारे जाबा के वाते क्यो। ईं छेई भई भी मारी लारे आया अन माँकाणी वीं मनक के घरे ग्या। 13वीं मनक माँने बतायो के, एक हरग-दुत ने आपणाँ घर में ऊबो तको देक्यो हो। जो केरियो हो के, “थूँ किंनेई यापा नगर में खन्दान समोन जिंको नाम पतरस भी हे, वींने अटे बलईदे।” 14वो थने बचन हुणाई, जींऊँ थूँ अन थारो परवार बंचायो जाई। 15जद्याँ में बचन हुणाबो सरू किदो, तो पुवितर आत्मा वाँका पे उतरग्यो, जस्यान सरू में आपाँ पे उतरियो हो। 16#थर 1:5पछे मने परबू को क्यो तको ओ बचन आद आग्यो, “यहुन्नो तो पाणीऊँ बतिस्मो देतो हो, पण थाँने पुवितर आत्माऊँ बतिस्मो दिदो जाई।” 17तो अस्यान परमेसर वाँ लोगाँ ने भी वोईस वरदान दिदो हो, जो परमेसर आपाँने परबू ईसू मसी पे विस्वास करबाऊँ दिदो, तो पछे मूँ वाँको विरोद करबावाळो कूण हूँ?
18विस्वास्याँ जद्याँ ओ हुण्यो, तो वे छाना-माना वेग्या अन परमेसर की मेमा करता तका केबा लागा, “आ हव बात हे, परमेसर जो यहूदी ने वाँने भी पापऊँ मन बदलबा को अन नुवो जीवन पाबा को मोको दिदो हे।”
अन्ताक्या में विस्वास्याँ की मण्डली
19 #
थर 8:1–4
जो लोग-बाग इस्तीपनुस की टेम में व्या हतावऊँ बखरग्या हा। वीं फिनिक, साइपरस अन अन्ताक्या में पराग्या अन वे यहूदी मनकाँ नेईस हव हमच्यार हुणाता हा। 20सायरस अन कुरेन का थोड़ाक विस्वासी लोग अन्ताक्या में आया अन ज्यो यहूदी ने हा, वाँ लोगाँ ने परबू का हव हमच्यार हुणाबा लागा। 21परबू की सगती वाँके लारे ही। ईं वाते नरई लोगाँ ईसू पे भरोसो करन परबू का आड़ी आग्या।
22ईं बात को पतो जद्याँ यरूसलेम की मण्डली ने पड़्यो, तो वाँकाणी बरनबास ने अन्ताक्या खन्दायो। 23जद्याँ बरनबास अन्ताक्या पूगो, तो लोगाँ पे परमेसर की करपा देकन वो घणो राजी व्यो अन वणी हारई लोगाँ ने धिजो बन्दान परबू में बण्या तका रेवा वाते क्यो। 24बरनबास एक हव मनक हो, जो पुवितर आत्मा अन विस्वासऊँ भरयो तको हो। अस्यान परबू की लारे ओर नरई लोग-बाग भेळा वेग्या।
25तद्याँ वो साउल ने होदबा के वाते तरसूस परोग्यो। 26पछे बरनबास वींने अन्ताक्या में लायो अन वीं मण्डली का लोगाँ में भेळा वेता हा अन नरई लोगाँ का समू ने हिकाता हा। अन्ताक्या मेंईस पेली दाण चेला “मसीही” केवाया।
27अन अणाईस दनाँ में यरूसलेमऊँ थोड़ाक परमेसर का आड़ीऊँ बोलबावाळा अन्ताक्या में आया। 28#थर 21:10वाँका मूँ अगबुस नाम को एक परमेसर का आड़ीऊँ बोलबावाळो ऊबो वेन परमेसर की आत्माऊँ आ आगली बतई के, आकी दनियाँ में काळ पड़बा वाळो हे, जो कलोदियुस की टेम में पड़्यो। 29तद्याँ चेला धारियो के, जणीऊँ जतरोक भी बण सके, वो यहूदियाँ में रेबावाळा भई-बन्दा के वाते खन्दाई। 30तो पछे वाँकाणी अस्यान ईंस किदो, यरूसलेम का विस्वास्याँ का बुड़ा-ठाड़ा के नके बरनबास अन साउल की लारे खन्दायो।
Currently Selected:
थरप्या तका का काम 11: एम टी आर
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
