Salsila siga Rasul 2

Katakka Rū Sutsiꞌ

1Na pag taabut llaw paballangan bangsa Yahudi inawnan Pentekos,#(2.1) Hatiyan Pentekos yana “ni kalimampūꞌ.” Paddus disu paballangan inawnan Ngalingkaꞌ, pag lay jaꞌ pingkaꞌ limampūꞌ ngallaw, pasunuꞌ na paballangan Pentekos. Maksud paballangan Pentekos, man bangsa Yahudi muwan pagsukuhan pa Tuhan ni bay kattoman takoleꞌ da ni huma da. mimon sukuꞌ si Isa lay kumpo taꞌ lumaꞌ. 2Sasang da ndooy ningkōꞌ, sarunduun du luu bahunus ngallub na duwai man taꞌ langit meꞌ halling baliyu landos sampay pannoꞌ na njawom lumaꞌ looy meꞌ bahunus looy. 3Maka luu bay tulun meꞌ dagbos api lansuk nampi njataꞌ da saliꞌ-saliꞌ. 4Pag-anu, ilooy ma inassob na sila sikamimon meꞌ Rū Sutsiꞌ. Maka man kawasa na, mitsala na ga sila ni jinisan pallun ma yaꞌ san bay pingkaꞌ kapandoyan da.

5Na ni waktu looy du siꞌ, meka Yahudi ma ngisbat Tuhan ndang luu na bay takka pa Jerusalem man kalahat-lahatan ni sikaliput junyaꞌ mmeꞌ ni paballangan Pentekos. 6Pag takale da haddo halling ga sukuꞌ si Isa pōꞌ man lumaꞌ looy, lay na sila bahuklud pilay. Takka ndooy, tud inu-inu sila sabap takale da na jinisan pallun ma pinakoy ni kalahat-lahatan man da bay lakka. 7Ni kajayip da, yuk da padisu-padisu, “Pooy lay la meꞌ da kapabuwat meꞌ looy? Siga jama naa bina labbasakayi jama man Jalil sadjaꞌ ntuu ni Israil. 8Ongoy baw taggahaꞌ pandoy na ga sila mitsala ni mimon pallun tabi mismu?”

9Na ga jama looy siꞌ ma bay bahuklud pilay, luu na ga kasohean man Paltiya, kasohean man Midiya ka kasohean man Elam. Maka luu gi kasohean man Mesopotamiya ka Yahudiya, man Kapadosiya ka Puntus, maka kasohean man Asiya. 10Kasohean sila man Pirijiya ka man Pampilya. Luu gi kasohean man Ejip ka Libiya ma tapit pa Sayrin. Boꞌ luu gi siga bisita lakka man Rom. 11Kasohean sila Yahudi maka kasohean bay mmeꞌ paasok ni agama Yahudi. Jama man nusa Krit luu du. Maka bangsa Arab pun, luu du ndooy. Dari yuk dangan pa dangan, “Ongoy tu la labbasakayi na kitabi kale sila mitsala ni siga pallun tabi mismu pasal pakaradjaan kainu-inu bay pabuwat Tuhan?” 12Dari tud bay jayip sila sampay papiha-piha na ga sila bong ongoy meꞌ looy. Yuk da padisu-padisu, “Oy doꞌ tu hatiyan na meꞌ tuu?” 13Sugaꞌ kasohean baw gam pin ngaludjum siga sukuꞌ si Isa, yuk da, “Ē, lango jaꞌ bina sila!”

Umanat si Pitel

14Pag takale ga si Pitel bitsala da, lay ya nangge ka ga pagkahi na rasul sikasapu-dambuwaꞌ boꞌ da pōꞌ pa baanan ga jama looy. Pag-anu, ilooy ma mitsala si Pitel pahaddo, yuk na, “Kaam, ga pagkahi ku Yahudi sampay na mimon ma luntuu ni Jerusalem, pakale doꞌ kam mari tahati bi bong oy bay katuwaꞌ ningkami. 15Bong kam mista lango kami, magsāꞌ kam. Bohoꞌ situ lisag siyam sayu batnaa. Soy ntuu lango subu alab lagi? 16Arapun ituu tu ma bay katuwaꞌ ningkami yana bay tunaꞌ Nabi Joel mattoꞌ binakbul na batnaa, ilooy ma yuk na,

17Yuk Tuhan, ‘Ni ahil jaman, patannaꞌ ku Rū ku njataꞌ bangsa sikamimon.

Kuwan siga anak bi, danda-lalla, masampay na siga umanat ma pinalahil meꞌ Rū ku ninsila.

Kuwan kalallahan bi ma anak-anak bahau, pinakitahan na siga pandapat.

Kuwan ga kalallahan bi pun ma toa na, luu du palahil Rū ku ninsila njawom siga upihan da.

18Ni masa looy ilay mintu, minsan siga ata ma pitsayaꞌ niyaku, danda-lalla, patannaꞌ ku na du Rū ku ninsila. Pag-anu, boꞌ da masampay siga umanat ma pinalahil meꞌ Rū ku ninsila.

19Bbos-bbos, mōꞌ du sina ku jinisan pakaradjaan kahaylan-haylan taꞌ langit sampay taꞌ gumi, yana lahaꞌ ka api sampay humbu kapa.

20Kuwan mataallaw ilay mintu, ngalindom na. Maka buwan pun, meꞌ dagbos lahaꞌ na sina. Pus meꞌ looy, ilooy ma takka na llaw ma yaꞌ luu sibuꞌ sabanding na, yana llaw Papuꞌ malahil ehe kabantugan na.

21Pag-anu, soysoy ina mintu nginganan Papuꞌ maku kasalamatan, mastiꞌ sinalamat jaꞌ sina sila.’ ”#(2.17-21) Kitab Nabi Joel 2.28-32.

22Na lupus jaꞌ siꞌ si Pitel bay maintoman sila palman looy siꞌ, yuk na, “Kaam, siga pagkahi ku bangsa Israil, pakalehun bi doꞌ bitsala ku. Paintoman ta doꞌ kam pasal si Isa, lalla looy man Nasaret ma bay pinapitu meꞌ Tuhan. Tuhan ilay bay mōꞌ buktiꞌ si Isa lakka man iya batan luu na pin ya nganggaosan iya buwat jinisan pabuwatan kahaylan-haylan ka sipat kawasa. Kaam pun ina, katoonan bi na du bana bitsala ku batan meka sipat kawasa bay pabuwat si Isa ni pag-awpan bi. 23Sugaꞌ san meꞌ looy, lay gi ya papatoy bi. Lay ya bay pa-ntan bi ni siga jama jahallis nohoꞌ nilansang taꞌ tehang. Kamasaꞌ, ilooy ilay siꞌ sikamimon ndang bay ginantaꞌ meꞌ Tuhan man maruhuꞌ-ruhuꞌ lagi man majatu garaꞌ na. 24Sugaꞌ san si Isa bay pinapatoy, lay na du ya pinakallum meꞌ Tuhan. Lay na ya pinaddusan man komkoman kapatoy batan ndang tunmanūn sina niiya ā meꞌ kapatoy.

25“Lagiꞌ na, ndang bay silay sinabbut meꞌ Nabi Daud njawom kitab bitsala Almasi, ilooy ma yuk na,

‘Katoonan ku luu na pin Tuhan ngunungan aku. Yaꞌ situ kuhi jadjuꞌ iman ku batan tattap ko ni bihing ku.

26Sangkon pannoꞌ atay ku leꞌ kagakan mudji kau. Minsan ku matoy, luu gi holat ku,

27batan katoonan ku yaꞌ du ku pabiya nu ni tahanan jama matoy. Yaꞌ du pabiya nu baran ku ngahaluꞌ njawom kubu, meꞌ aku sutsiꞌ ningkau.

28Lay na ku pakitahan nu lān pa jawom kaallum bahau. Dari sukup kagakan ku sabap luu na pin ko ni bihing ku.’ ”#(2.25-28) Kitab Jabul 16.8-11.

29Yuk si Pitel lagi, “Na siga danganakan ku, Nabi Daud ilay siꞌ bay mitsala, tarang-tarang na, yaꞌ ya bay ngawnan dī na, batan ndang katoonan tabi na du, pag patoy na, lay du ya bay kinubu, sampay yaꞌ na ya bay pōꞌ pabalik. Boꞌ masi gi luu kubu na ni lahat tabi.

30-31“Na maruhuꞌ ilay, sasang Nabi Daud masi magsultan ni Israil, lay ya njanjian meꞌ Tuhan binuwanan disu panubuꞌ ma magsultan saumu-umu. Boꞌ lay gi sinapahan meꞌ Tuhan. Dari, lay na du kinanna meꞌ Nabi Daud. Maka taabut na bay nuwat bitsala looy siꞌ, ilooy ma yuk na, ‘Yaꞌ du ku pabiya nu ni tahanan jama matoy,’ maka ‘Yaꞌ du ku pabiya nu ngahaluꞌ njawom kubu,’ ndang katoonan Nabi Daud saꞌ du tuwaꞌ pa dī na. Arapun, meꞌ iya disu nabi, bay jaꞌ ya mōꞌ tunaꞌ pasal kadarihan panubuꞌ na ma bay bāꞌ Tuhan magsultan saumu-umu. Dari, sabapan tunaꞌ looy, tahati tabi na hantak bitsala Nabi Daud pinakallum du Almasi pabalik. 32Na Almasi ilay siꞌ yana si Isa. Kon itu ku kabāꞌ meꞌ tuu batan kami mismu sikamimon ma luntuu bay kasakup lay na ya pinakallum meꞌ Tuhan. 33Boꞌ lay gi ya inangkat pa sulgaꞌ sampay lay na pinatingkōꞌ ni bihing Mmaꞌ na Tuhan huwin pa kawnan njawom kabantugan mehe. Boꞌ lay gi ya binuwanan kapatut matannaan siga sukuꞌ na Rū Sutsiꞌ meꞌ ndang bay njanjiꞌ meꞌ Mmaꞌ na. Dari ituu tu siꞌ ma bahau jaꞌ bay takita bi sampay takale bi ni baanan kami poonan man Rū Sutsiꞌ ma bay pinatannaꞌ ningkami.

34-35“Na buktiꞌ ni hāl meꞌ Almasi bay inangkat pa sulgaꞌ, luu du silay bay sinuwatan meꞌ Nabi Daud, ilooy ma yuk na,

‘Halling Tuhan ni Papuꞌ ku, “Ningkōꞌ na ko ni bihing ku huwin pa kawnan, boꞌ nnaꞌ ku mimon banta nu ni diyoꞌ pāt battis nu.” ’#(2.34-35) Kitab Jabul 110.1.

Dari tumatandaꞌ na Nabi Daud yaꞌ bay mitsala dī na batan Papuꞌ na yana si Isa Almasi, bay inangkat pa sulgaꞌ, saꞌ ga iya.

36“Sangkon,” yuk si Pitel, “subay katoonan bi na sampay mimon pagkahi tabi bangsa Israil, inawnan si Isa ma bay lansang bi taꞌ tehang, iya na silay bay pineneꞌ meꞌ Tuhan binuwat Papuꞌ tabi ka Tukang Nalamat tabi.”

37Pag lay jaꞌ takale siga jama ndooy bay bitsala si Pitel, lassa sobak na ga atay da ni kasasso da. Dari yuk da ni si Pitel ka ga pagkahi na rasul, “Siga mbuwaꞌ danganakan, oy tu la pataꞌ subay pabuwat kami supaya kami inampun meꞌ Tuhan?”

38Pag tampung si Pitel, “Subay kam nawbat saliꞌ-saliꞌ, boꞌ bi nohoꞌ pinandi ni awon si Isa Almasi. Meꞌ looy ilay, puwas na mimon dusa bi pa Tuhan boꞌ bi buwanan na ladjikiꞌ, yana Rū Sutsiꞌ. 39Batan ndang inaa sina bay janjiꞌ Tuhan ningkaam mag-anak-mpu, sampay ni mimon manusiyaꞌ matā-matapit. Awnan ku ilay siꞌ yana sikamimon ma bay lliyun meꞌ Papuꞌ tabi Tuhan pa jawom okoman na.”

40Na sarī man ilooy siꞌ, meka gi bitsala si Pitel man na noan sila kabanahan. Sigi-sigi ya nganjunjung ninsila, yuk na, “Bean bi na bay halling ku siꞌ mari kam salamat man mulkaꞌ ma labuꞌ bbos-bbos ni siga jama maat ni angkat-angkatan batnaa.”

41Dari meka na jama bay pitsayaꞌ ni umanat si Pitel sampay lay na du sila nohoꞌ pinandi. Eka jama bay pasampun ni baanan sukuꞌ si Isa bay llaw looy, kulang-labi tallu libu. 42Maka labba man llaw looy, sigi-sigi na sila pōꞌ pakale ni tōꞌ siga rasul si Isa. Dambuwaꞌ atay na sila maka daran na sila kumpo-kumpo mangan sampay maku duwaa.

Sagannap ma mmeꞌ ni si Isa sikaaseꞌ-kaaseꞌ

43Na ni waktu looy siꞌ, meka na pabuwatan kahaylan-haylan ka sipat kawasa Tuhan bay pinōꞌ meꞌ siga rasul. Dari mimon jama ndooy ni Jerusalem tud inu-inu ninsila. 44Kuwan sagannap ma pitsayaꞌ ni si Isa, tud lungbid sila. Bong luu altaꞌ da atawa balanjaꞌ da, saliꞌ-saliꞌ na sila mahampitan soysoy sila kabus. 45Kasohean lay gi maballihan tanaꞌ da ka altaꞌ da bong pin tahampitan da jaꞌ pagkahi da ma tiksaꞌ. 46Llaw-llaw kumpo sila numba ni langga mehe. Ni kahilas atay da, gāk sila sipahampit-pahampit kinakan da maka tigiꞌ sila siharung-harung mangan ni siga lumaꞌ da. 47Wā sila mudji Tuhan sampay kamahapan na mimon jama ni Jerusalem ni arat da. Dari llaw pa dangallaw, pasampun boꞌ pasampun na pin eka jama ma sinalamat meꞌ Tuhan.

Currently Selected:

Salsila siga Rasul 2: sjm

Highlight

Copy