Panagnaan 17

Pagsulutan Tuhan ka si Ibram

1-2Pag taabut siyampuꞌ-siyam taun umu si Ibram, lay na baw ya tinammuhan meꞌ Papuꞌ pabalik. Yuk Papuꞌ niiya, “Aku na situ Tuhan Sangat Kawasa. Batnaa mōꞌ doꞌ ku pagsulutan ni antaraꞌ kau ka aku. Mmeꞌ jaꞌ ko ni kahandak ku maka buwat jaꞌ ko kaintongan, boꞌ nu buwanan ku panubuꞌ paeka banahan.”

3Pag takale si Ibram palman looy, lay ya sujud. Pag-anu yuk Tuhan niiya, 4“Ni pagsulutan ta ma pōꞌ ku batnaa, kau na sina mintu poonan jinisan kabangsa-bangsahan. 5Sangkon awon nu si Ibram halin ku na pa si Ibrahim, hati na, ‘mmaꞌ jama sakiyan,’ batan bbos-bbos ina pabuwat ta na ko poonan jinisan kabangsa-bangsahan. 6Kau ina mintu meꞌ karuha poon anggul kalap buwaꞌ na, batan tud meka sina mintu panubuꞌ dean ku kau. Ga panubuꞌ nu ina mintu dari siga bangsa balkanan. Maka luu du sina mintu siga sultan pōꞌ man panubuꞌ nu. 7Pagsulutan ku itu ka kau sampay na ga panubuꞌ nu pangkat-mamangkat yaꞌ na situ baluba ku saumu. Aku na Tuhan nu saumu sampay na ga panubuꞌ nu. 8Batnaa tu, masi gi ko jama sampi ntuu ni Kanan, sugaꞌ bbos-bbos lahat tuu labbasakayi dean ku na kau sampay na ga panubuꞌ nu. Kaam na sina mintu dapu saumu. Maka aku du sina mintu Tuhan ma mangatas ningkaam.”

9-10Maka yuk Tuhan ni si Ibrahim, “Ni pagsulutan ta, labba man kau sampay na ga panubuꞌ nu pangkat mamangkat, subay bean bi mimon njawom pagsulutan ta. Disu sukuꞌ bi, labba man kau sampay na mimon panubuꞌ nu subay inislam sagannap kalallahan. 11Dari inaa na sina sipat mmeꞌ na kam ni pagsulutan tabi. 12-13Labba man batnaa, pangkat mamangkat, sagannap lalla ma bahau pinamaddihan njawman bi subay islamun bi taabut wawuꞌ ngallaw umu da. Sampay ga ata bi ma bay pinamaddihan ni lumaꞌ bi ka ga ata ma bay binalli ni poan subay du inislam. Meꞌ looy ilay, luu na sipat ni baran bi tandaꞌ lay na kam tabeꞌ ni pagsulutan tuu ma yaꞌ tabaluba saumu. 14Bong luu lalla ni baanan bi yaꞌ bay inislam, subay ya pinōꞌ man jawman bi sabap yaꞌ ya kuhi mogbogan pagsulutan ta.”

Tuhan ngahalin awon si Saray pa si Sara, hati na, Putliꞌ

15Maka yuk Tuhan lagi man si Ibrahim, “Kuwan nda nu, daa na awnan nu si Saray. Labba man batnaa, awon na si Sara na. 16Supaatan ku sa ya supaya kam anakan na lalla. Maka pabuwat ku si Sara bboꞌ jinisan bangsa. Boꞌ luu gi sina mintu siga sultan pōꞌ man siga panubuꞌ na.”

17Pag takale meꞌ si Ibrahim meꞌ looy, magti ya sujud pabalik. Sugaꞌ lay gi du baw ya kapatatto batan njawom atay na, “Pooy gi doꞌ tu meꞌ ku hanak? Dahatus taun na bitu umu ku! Damikiyan, si Sara pun, siyampūꞌ taun na umu na.”

18Pag-anu siꞌ, yuk si Ibrahim pa Tuhan, “Papuꞌ, san ko ba yaꞌ na muwanan kami ka si Sara anak. Ndang-ndang luu na du anak ku si Ismail. Pooy bong iya na supaatan nu?”

19“Ohoꞌ ba,” yuk Tuhan, “sugaꞌ meꞌ halling ku na siꞌ, luu du sina mintu anak bi ka si Sara. Pag pōꞌ na, awnan nu si Isahak. Iya na sina mintu sampay na ga panubuꞌ na ma pasunuꞌ ngantanan pagsulutan ta ma yaꞌ tabaluba saumu. 20Sugaꞌ daa na ko susa pasal si Ismail. Lay du silay siꞌ takale ku bay paku nu pasal iya. Mastiꞌ supaatan ku du sina ya. Buwanan ku sa ya panubuꞌ paeka. Anak na ina mintu, luu sapu-duwa lalla dari datuꞌ labbasakayi. Maka sila ina mintu yana poonan disu bangsa tanyag. 21Sugaꞌ bong baw ni bay pagsulutan ta siꞌ, basta subay labuꞌ pa anak nu si Isahak. Yaꞌ na du sina hallom, pinamaddihan na du ya meꞌ si Sara, magkulang-labi ni buwan tuu ni taun tuu ma sinōng.” 22Lupus jaꞌ siꞌ Tuhan bay magpalman ni si Ibrahim, lay na pabeleng pa jataꞌ.

23-27Na ni llaw looy du siꞌ, lay du asip si Ibrahim bay palman Tuhan niiya. Lay na islam na si Ismail ka ga mimon kalallahan ni lumaꞌ na. Maka lay na du patabeꞌ na ga ata na ma ndang bay pinamaddihan ndooy sampay na sagannap ma bay binalli ni poan. Si Ibrahim pun lay na du inislam.

Na jaman si Ibrahim bay inislam, mag-umu na ya siyampuꞌ-siyam taun. Kuwan anak na si Ismail, sapu-tallun taun na umu na.

Currently Selected:

Panagnaan 17: sjm

Highlight

Copy