Panagnaan 18
18
Tallu bisita nammuhan si Ibrahim
1Na disu llaw, jaman si Ibrahim maglahat ndooy ni bihing siga poon kayu mehe ni tanaꞌ si Mamre, lay na baw ya tinammuhan meꞌ Tuhan pabalik. Meꞌ tuu silay salsila na: Sasang si Ibrahim pahali-hali ni behe lawang lumaꞌ luna na ga tangngaꞌ llaw, 2pag ndaꞌ na, luu na tallu lalla nangge lawak-lawak gi dangkitiꞌ. Pag-anu, magti ya sonse pa mman da, boꞌ na sujud ni awpan da. 3Yuk na ni ilooy disu, “Papuꞌ, bong siꞌ ku la kaasean nu meꞌ aku disu ata nu, pahās doꞌ kam man lumaꞌ kami. 4Pahali-hali na doꞌ kam ni poon kayu naa. Sohoꞌ ta doꞌ kam binoonan boheꞌ man ngosoan battis bi. 5Meꞌ aku disu ata bi, tud gāk ku luu kam ntuu. Bong anu, pakan ta doꞌ kam mari tohas anggawtaꞌ bi ni palanan bi.”
Pag tampung da siꞌ tu, “Sigi ba.”
6Pag-anu, ilooy ma magdeꞌ-dēꞌ du si Ibrahim paasok pa jawom lumaꞌ maka yuk na ni si Sara, “Deꞌ-dēꞌ ko Yoꞌ. Ngaddoꞌ ko taligu looy ma mahap banahan boꞌ nu buwat tinapay.”
7Pag-anu siꞌ, lay na baw sonse si Ibrahim pilay pa baanan sapiꞌ da meneꞌ disu sapiꞌ baddung gi ma lammok. Pag-anu, boꞌ lay sohoꞌ na sinumbaliꞌ ni tindog na nohoꞌ pinatahak deꞌ-dēꞌ. 8Tahak jaꞌ siꞌ mimon, lay na binotangan ga lalla looy siꞌ meꞌ si Ibrahim. Maka bay gi sila binotangan cheese ka gatas. Sasang ga bisita na mangan, luu na pin si Ibrahim nangge ni diyoꞌ poon kayu looy nunuan sila.
9Pag-anu siꞌ, tilaw bisita na, “Ninggai tu la man nda nu si Sara?”
Pag tampung si Ibrahim, “Lay ni jawom.”
10-11Na disu ni siga bisita looy siꞌ yana Tuhan. Pag-anu, yuk na ni si Ibrahim, “Ni taun tuu ma sinōng magkulang-labi ni buwan tuu, pabeleng du ku pitu. Pag pitu ku ina mintu pabalik, ndang anakan na sina si Sara lalla.”
Na si Ibrahim siꞌ tu ka si Sara ndang tud toa na sampay tupa na ga si Sara. Na si Sara siꞌ tu, ndang luu ni bukutan da pakale-kale ni bihing behe lawang. Dari pag takale na halling bisita da meꞌ looy, 12ilooy ma lay ya nattohan dī na batan njawom atay na, “Uy, tupa na bitu ku. Lla ku pun toa laslas na du. Pooy gi meꞌ ku hanak sampay ngissa ehe kagakan jama anakan?”
13Pag-anu, yuk Tuhan ni si Ibrahim, “Ongoy lay tatto si Sara saula-ula yaꞌ na ya hanak sukat meꞌ naa na katoahan na? 14Ongoy kanna bi, luu kina tunmanūn pa Tuhan? Baan ta kam banahan, pag beleng ku ina pitu ni taun tuu ma sinōng, ni buwan tuu du, ndang anakan na sina si Sara lalla.”
15Sugaꞌ si Sara baw siꞌ tu, ni katawu na, lay gi makilubaꞌ, yuk na, “Yaꞌ bilay ku siꞌ bay tatto.”
Sugaꞌ yuk Tuhan, “Ā, lai bilay siꞌ.”
Si Ibrahim makuhan jama intong ni Sodom timbang
16Pag lupus da mangan, ilooy ma lay na ga bisita looy sikatallu palanja song pa Sodom. Kuwan si Ibrahim siꞌ tu, lay gi ngahaboyan sila ngabut sampay takita da na Sodom ni katāhan.
17Pag-anu siꞌ, honaꞌ-honaꞌ Tuhan, “Subay situ yaꞌ na limbuhan ku si Ibrahim ilooy ma song pabuwat ku. 18Ndang-ndang iya du sina mintu poonan disu bangsa mehe kawasa na ma tanyag bbos-bbos. Maka iya na sina mintu poonan man mimon kabangsa-bangsahan sinupaatan. 19Iya itu jama bay peneꞌ ku supaya iya na noan ga anak-mpu na mmeꞌ ni kahandak ku ka buwat mahap sampay nanggehan kaintongan. Na bong ina mintu ngasip du siga anak-mpu na ni kahandak ku, mastiꞌ tinuman jaꞌ sina mimon ma bay janjiꞌ ku niiya.”
20Dari siꞌ, lay na si Ibrahim binaan leꞌ Tuhan garaꞌ na ngahansu Sodom ka Gomora, yuk na, “Yaꞌ na taambat sumbung pasal kajahatan ga jama ndooy ni Sodom ka Gomora. Biddaꞌ na jahallis da ni siga daira looy. 21Song pilay na situ ku masā bong mawjud du jinisan sumbung ma bay takale ku.”
22Pus Tuhan mitsala, lay na lakka ga soheꞌ na ilooy siꞌ ma duwa pilay pa Sodom. Kuwan iya, lay na doꞌ patamban man si Ibrahim.
23Dari siꞌ, lay pasōng si Ibrahim pa mman na nilaw, yuk na, “Papuꞌ, bong ko mintu ngahansu siga daira looy, lapay nu du kilay ga jama intong pag taabut nu mapatoy ga jama maat ndooy? 24Pooy bong luu ni siga daira looy limampūꞌ jama intong? Masi du kilay hansu nu labbasakayi? Yaꞌ kina luu timbang nu ni siga jama ndooy kalnaꞌ limampūꞌ jama ma intong? 25Satā-tā bihing langit, tā lagi ko man naa. Mastiꞌ yaꞌ ko mapatoy jama intong pinatabeꞌ ni jama jahallis, saꞌ ba? Meꞌ kau hukum intong ni labbasakayi taꞌ babaw junyaꞌ, mastiꞌ tuwaꞌ jaꞌ mimon hukuman nu.”
26Yuk Tuhan, “Bong siꞌ bay luu limampūꞌ eka jama intong ndooy ni Sodom, malaingkan yaꞌ du hansu ku daira looy kalnaꞌ sila.”
27Pag-anu, yuk si Ibrahim na baw, “Papuꞌ, ampunun sa ku. Tawakkahan ku na pin mitsala ningkau. Pasensiya na doꞌ ko niyaku san ku meꞌ sapantun momok tanaꞌ jaꞌ atawa abu ma yaꞌ san pataꞌ pinaruli meꞌ nu. 28Pooy bong mintu luu mpatpuꞌ-lima jama intong ndooy? Masi du kilay hansu nu bong sat lima lisu du bay kulang man limampūꞌ?”
Pag tampung Tuhan, “Bong siꞌ bay luu mpatpuꞌ-lima eka jama intong ndooy, malaingkan yaꞌ du hansu ku daira looy.”
29Pag-anu, yuk si Ibrahim na baw, “Pooy bong mintu mpatpūꞌ?”
Pag tampung na, “Yaꞌ du ba ku ngahansu bong siꞌ bay luu mpatpūꞌ jama intong.”
30Yuk si Ibrahim, “Papuꞌ, daa doꞌ ku kalasuhan nu san ku amu-amu mitsala balik. Pooy bong siꞌ bay luu tallumpūꞌ?”
Yuk Tuhan, “Niyaꞌ du ba bong siꞌ bay luu jaꞌ tallumpūꞌ jama intong.”
31Yuk si Ibrahim, “Papuꞌ, ampunun doꞌ ku minsan ku amu-amu nawakka mitsala ningkau. Pooy bong bay luu duwampūꞌ eka jama intong ndooy?”
Yuk Tuhan, “San duwampūꞌ du, yaꞌ du ku ngahansu daira looy.”
32Yuk si Ibrahim na baw, “Papuꞌ, daa doꞌ ko la lasu. Sakayi sa ku mitsala. Pooy bong mintu bay luu sapū jama intong ndooy?”
Pag tampung na, “Yaꞌ du ku ba ngahansu bong siꞌ luu jaꞌ san lasa sapū.”
33Na paddus Tuhan bay magbitsala ka si Ibrahim, lay na ya lakka mandooy. Kuwan si Ibrahim, lay na moleꞌ.
Currently Selected:
Panagnaan 18: sjm
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
