Malkus 15

Si Isa binoo pa mman Gubnul Pilatu

(Matiyu 27.1-2,11-14; Lukas 23.1-5; Yahiya 18.28-38)

1Pag kallat llaw, kuwan ga imam langkaw ka ga guru saraꞌ agama ka ga matatoa ni agama, sampay na mimon pagkahi da njawom baanan Sanhidrin, lay na isun bong pooy meꞌ da buwat si Isa. Pag lupus, lay na ya iningkotan meꞌ da, boꞌ na binoo pa mman Gubnul Pilatu.

2Takka ndooy, tilaw Gubnul Pilatu ni si Isa, “Bana kina kau sultan bangsa Yahudi?”

Tampung si Isa, “Meꞌ bay halling sambat nu na siꞌ.”

3Kuwan kaimaman langkaw baw siꞌ tu ndooy, kajinisan na sumbung ni jataꞌ si Isa bay pinōꞌ meꞌ da. 4Dari lay tinilaw si Isa meꞌ Gubnul Pilatu, yuk na, “Ongoy yaꞌ na luu tapahalling nu? Yaꞌ kina tasayu nu bong meꞌ noy eka sumbung njataꞌ nu?”

5Sugaꞌ yaꞌ na san bay nampung si Isa. Dari tud bay jayip gubnul niiya.

Si Isa binotangan hukuman kapatoy

(Matiyu 27.15-26; Lukas 23.13-25; Yahiya 19.16)

6Na jaman looy siꞌ, taun-taun, tuktuk luu paballangan Ngalingkaꞌ, ndang luu tabiat gubnul mapeneꞌ siga raayat na disu pilisu pinōꞌ meꞌ na. 7-11Na pag taabut si Isa hinukum, lay du bay mag-atag ka paballangan Ngalingkaꞌ. Maka ni waktu looy du, luu na baw baanan Yahudi bay pilay mogos gubnul nohoꞌ mōꞌ disu pilisu meꞌ ndang tabiat na.

Pag tilaw Gubnul Pilatu, “Pooy bong sultan bangsa Yahudi looy na pōꞌ ku?” Ilooy man na doman mōꞌ si Isa sabap tabistu na ngkon siga imam langkaw bay ma-ntan si Isa niiya, ni kadangkiꞌ da sadjaꞌ. Sugaꞌ bbuwatan siga imam langkaw baw siꞌ tu, amu-amu ngoyo-ngoyohan baanan jama ndooy nohoꞌ meneꞌ si Barabas pinōꞌ ni gubnul. Mingkan siꞌ, si Barabas ilay bay mapatoy jama sasang na naggaꞌ parinta Rom.

12Tilaw Gubnul na baw siꞌ tu, “Hati, batōy ku na baw ilooy ma awnan bi sultan bangsa Yahudi?”

13Pag tampung da, lay ngahowap, yuk da, “Lansangun na taꞌ tehang!”

14Tilaw Gubnul baw, “Ongoy, oy tu dusa na?”

Sugaꞌ amu-amu hinowapan meꞌ da pa haddo, yuk da, “Lansangun na taꞌ tehang!”

15Dari pagka Gubnul Pilatu doman nulut baanan jama ndooy mari yaꞌ hiluhalaꞌ, lay na pōꞌ na man jawom jīl si Barabas. Kuwan si Isa, lay na sohoꞌ na llagpiꞌ, boꞌ lay na pa-ntan na pa mman siga sundalu na nohoꞌ llansang taꞌ tehang.

Si Isa binuwat kalabbiyan meꞌ siga sundalu

(Matiyu 27.27-31; Yahiya 19.2-3)

16Pag-anu siꞌ, lay na si Isa binoo meꞌ siga sundalu looy pa jawom haman astanaꞌ gubnul. Takka ndooy, lay tinawag meꞌ da mimon pagkahi da sundalu nohoꞌ kumpo ndooy. 17Luu jaꞌ siꞌ sila kumpo, bbuwatan da lay mapatukan si Isa juba tawuk bahasa juba sultan. Maka lay gi sinangonan taꞌ kōk na bahasa karuna bay pabuwat da ka bahan itingan. 18Pag-anu, boꞌ da maghowapan bahasa ngalak iya, yuk da, “Kamura-murahan lanjut du umu nu Ampun Sultan bangsa Yahudi.” 19Pag-anu, lay lubak da kōk na ka pongan buway, boꞌ lay gi lluraan. Pag-anu, boꞌ da nangge ka tuut da bahasa numba iya. 20Paddus da bay buwat iya kalabbiyan, lay na urusan da juba tawuk looy, boꞌ lay pinapatuk meꞌ da balik bay ndang pamakoy na. Pag lupus, lay na ya boo da pōꞌ lān llansang na taꞌ tehang.

Si Isa llansang taꞌ tehang

(Matiyu 27.32-44; Lukas 23.26-43; Yahiya 19.17-27)

21Na lān si Isa siꞌ binoo meꞌ siga sundalu pōꞌ man daira, sitammu na baw sila ka disu lalla man Sayrin inawnan si Saymon lakka man kabuntuꞌ-buntuan Yahudiya. Pag-anu siꞌ, lay ya pinaggos meꞌ siga sundalu nohoꞌ ningan si Isa manangkit tehang na. (Saymon looy ilay yana mmaꞌ ga si Aleksandel ka si Rupus.) 22Man da bay moo si Isa, pa taꞌ buntuꞌ inawnan Golgota, hatiyan na, Lugar Baung Kōk. 23Takka ndooy, lay na baw si Isa sinongan tubaꞌ anggul bay llamuran uliꞌ inawnan mira man ngulangan paddi. Sugaꞌ yaꞌ ya bay ngaddoꞌ. 24Pag-anu, ilooy ma lay na ya llansang taꞌ tehang. Kuwan pakayan na, lay na pinagsarī-sarī meꞌ siga sundalu, boꞌ pinagkimbuan meꞌ da bong mamooy sukuꞌ ni dangan.

25Na si Isa siꞌ bay llansang taꞌ tehang ga lisag siyam subu. 26Pa jataꞌ man takōk na luu papan bay llansang. Ni papan looy luu suwat man mahati bong oy palkalaꞌ njataꞌ na. Batsahan na, “Ituu itu Sultan bangsa Yahudi.”

27Na sarī man si Isa, luu gi duwa mundu bay du llansang taꞌ tehang ndooy, disu huwin pa kawnan man si Isa, kuwan ilooy disu, huwin pa kayli. 28Dari sabap meꞌ looy, lay na binakbul bay tunaꞌ njawom kitab pasal Almasi, ilooy ma yuk na, “Initung ya tabeꞌ ni sagannap ma ngalangga saraꞌ.”#(15.28) Kitab Nabi Isaya 53.12

29Jama baw siꞌ tu, luu-luu pingkaꞌ, bbuwatan da eleng-eleng sambayan da ngaludjum iya, yuk da, “Baꞌ-bāꞌ nu, talangkat nu langga mehe, boꞌ patangge nu du bbalik njawom tallu ngallaw du! 30Bong mattan takaya nu meꞌ looy, tabangun teꞌ dī nu. Duwai na ko man taꞌ tehang naa.”

31Damikiyan, ga imam langkaw pun sampay ga guru saraꞌ agama, lay du bay buwat si Isa kalabbiyan, yuk da padisu-padisu, “Bay baw ya katabang jama, pagka dī na, niyaꞌ san tatabang na. 32Bong siꞌ ina mattan iya Almasi, Sultan bangsa Israil, subay siꞌ duwai na ya man taꞌ tehang naa mari takita tabi kawasa na, boꞌ tabi pitsayaꞌ niiya.” Kuwan ga mundu looy baw siꞌ tu ma bay du llansang haboy ka si Isa, lay du mmeꞌ-mmeꞌ ngaludjum iya.

Kapatoy si Isa

(Matiyu 27.45-56; Lukas 23.44-49; Yahiya 19.28-30)

33Na pag tangngaꞌ llaw, ngalindom na ni sikaliput lahat ngabut sampay lisag tallu kohap. 34Taabut lisag tallu, ilooy ma ngingan na si Isa pahaddo, yuk na, “Eli, Eli, lama sabaktani?” Hatiyan na siꞌ, “Tuhan ku, Tuhan ku, ongoy ku lay mbanan nu?”

35Kuwan kasohean jama ma nangge-nangge ndooy, magsāꞌ meꞌ da kale. Sangkon yuk da, “Pakale doꞌ kam ba. Ngalinganan Nabi Eliyas na bilay ya!”

36Pag-anu, magti lay sonse disu ninsila ngaddoꞌ sammek boꞌ iningkotan ni tōng kayu-kayu. Pag-anu, boꞌ tinalloban ni jawom tubaꞌ anggul bahal boꞌ inangkat pa behe si Isa pinasassop. Yuk jama looy, “Agad tabi doꞌ. Ndaꞌ tabi teꞌ bong tulun du Nabi Eliyas maduwai iya.”

37Pag-anu siꞌ, ilooy ma killahap na baw si Isa pahaddo sampay lay na makkat. 38Waktu looy du siꞌ, kuwan kultina kapa ndooy ni langga mehe, sarunduun du salik duwa man jataꞌ pa diyoꞌ.#(15.38) Kultina looy ilay man ngagpangan bilik ni kaduwa ni langga mehe ma ginalla Bilik Pinakasutsiꞌ, yana bilik man Tuhan patannaꞌ. Na isu-isu panghuluꞌ imam dari paasok pilay, boꞌ sakayi du njawom dantaun. Dari pag lay jaꞌ salik duwa kultina looy man kawasa Tuhan, ilooy na sipat bukaꞌ na lawang man manusiyaꞌ patapit pa Tuhan sumilan-sumilan karomanan da. Kon meꞌ looy sabapan lahaꞌ si Isa bay tumpa man muwasan dusa da.

39Na kuwan kapitan sundalu, luu na pin ndooy nangge ni awpan si Isa. Pag takita na hantang si Isa bay makkat, yuk na, “Tud bana du la lalla tuu Anak Tuhan.”

40Ndooy siꞌ, luu gi baanan karandahan maiman man katāhan. Tabeꞌ ninsila yana ga si Mariyam man Magdala, si Salome, ka si Mariyam, yana nneꞌ si Joses ka si Yaꞌkub ma inawnan Siyali. 41Siga karandahan looy ilay siꞌ, ndang biyasa magpa-mmeꞌ ni si Isa sampay daran gi nulung iya bay jaman na ndooy ni Jalil. Sarī man sila, meka gi ndooy karandahan ma bay du magpa-mmeꞌ ni si Isa pa Jerusalem.

Si Isa kinubu

(Matiyu 27.57-61; Lukas 23.50-56; Yahiya 19.38-40)

42Na llaw man si Isa siꞌ bay llansang, magsabtan ka llaw man bangsa Yahudi manyap para Llaw Pahali. Pag sumaddop llaw, yaꞌ na sila dari buwat njawom dambahangi-dangallaw. 43Dari padpad luu gi waktu, luu disu lalla man Aramatiya inawnan si Yusup lay nawakkahan dī na pilay pa mman Gubnul Pilatu muhunan mayat si Isa kinubu. Si Yusup ilay siꞌ, iya disu paki ni baanan Sanhidrin. Pinagmaltabatan ya banahan meꞌ pagkahi na bangsa Yahudi. Maka ndang ngagad ya ni pamarinta Tuhan pinatangge.

44Na kuwan Gubnul Pilatu siꞌ tu, tud bay jayip ni puhung si Yusup batan kanna na yaꞌ gi bay matoy si Isa. Dari lay linganan na kapitan sundalu na man na pakiyaka bong mawjud du lay na matoy si Isa. 45Pag lay jaꞌ ya kabaan meꞌ kapitan looy tud mawjud du, ilooy ma lay na tugutan na si Yusup ngaddoꞌ mayat si Isa.

46Dari siꞌ, bbuwatan si Yusup, lay malli kuku poteꞌ sampay lay na paduwai na mayat si Isa boꞌ tinungkus. Pag-anu, boꞌ na tinampat ni kubu ma bay pinabuwat ni battisan pampang. Pag-lupus, lay na baw sohoꞌ na lligiran batu mehe man bay nambo behe kubu looy. 47Kuwan si Mariyam man Magdala ka si Mariyam yana nneꞌ si Joses, lay du mmeꞌ pilay ngindanan tampat man na bay kinubu.

Currently Selected:

Malkus 15: sjm

Highlight

Copy