Malkus 16

Si Isa pinakallum

(Matiyu 28.1-8; Lukas 24.1-12; Yahiya 20.1-10)

1Na paddus jaꞌ Llaw Pahali, kuwan si Mariyam man Magdala ka si Salome ka si Mariyam, yana nneꞌ si Yaꞌkub, lay malli uliꞌ hamut man da ngintu mayat si Isa. 2Dari siꞌ, pag taabut llaw Ahad, subu alab lagi, lay na sila pilay pa kubu. Lān da siꞌ pilay, 3bbuwatan da sitilaw-tilaw bong soy tasohoꞌ da ngaligiran batu mehe looy man bay nambo behe kubu looy. 4Takka ndooy, pag ndaꞌ da, batu mehe looy ndang lay na bay lligiran. 5Pag asok da pa jawom kubu looy, ngita na sila disu lalla anak-anak bahau jubahan poteꞌ ningkōꞌ huwin pa kawnan. Dari tud bay kinoblaꞌ sila.

6Sugaꞌ yuk lalla looy, “Daa kam ba kinoblaꞌ. Si Isa ilay, jama Nasaret looy ma piha bi, ma bay llansang taꞌ tehang, yaꞌ na luu ntuu. Lay na ya pinakallum. Ndaun bi na limpaꞌ man na bay pinabāk. 7Batnaa pilay na kam mahati ga mulit na awla na si Pitel. Baan bi sila pilay sa si Isa pa Jalil duhuꞌ man kaam. Ndooy sa kam sitammu meꞌ ndang bay halling na du ningkaam.”

8Dari siꞌ, magti ga danda looy pōꞌ sampay lay na sila sonse palakka man kubu looy. Mipig na ga sila maka tud haylan sila. Lān da siꞌ pilay, yaꞌ na san sila bay māꞌ ni soy maka soy na tandaꞌ ni katawu da.

Si Isa nammuhan si Mariyam man Magdala

(Matiyu 28.9-10; Yahiya 20.11-18)

9Na si Isa siꞌ tu bay llum balik, tuwaꞌ ni llaw Ahad subu alab lagi. Pag-anu, duhuꞌ bay tammuhan na yana si Mariyam man Magdala. Iya na silay bay pingkaꞌ luu seytan na pituꞌ bay llakkahan meꞌ si Isa. 10Pus si Mariyam siꞌ bay tinammuhan, lay na ya pilay pa mman siga mulit si Isa. Takka ndooy, ndaꞌ na, masi gi sila magkarukkaan sampay magtangisan na pin. Pag-anu siꞌ, lay na sila baan na lay ya tinammuhan meꞌ si Isa. 11Sugaꞌ san siꞌ sila lay na binaan llum na si Isa pabalik sampay lay na ga konoꞌ takita na, amu-amu sila yaꞌ kuhi pitsayaꞌ.

Si Isa nammuhan mulit na duwa

(Lukas 24.13-35)

12Pag-anu, llaw looy du siꞌ, lay na baw si Isa patammu ni mulit na duwa lān da song pa dile, sugaꞌ sarī bantuk na. 13San meꞌ looy, song hallom, lay du ya takila meꞌ da sampay lay na sila bbeleng nuntut ni siga pagkahi da mulit. Sugaꞌ masi du sila yaꞌ kuhi pitsayaꞌ.

Si Isa nammuhan ga mulit na

(Matiyu 28.16-20; Lukas 24.36-49; Yahiya 20.19-23)

14Yaꞌ hallom, si Isa na mismu bay patammu ni ga mulit na sikasapu-dambuwaꞌ sasang da mangan. Sampay lay gi sila sinahawi meꞌ na sabap ni katohas kōk da yaꞌ sila kuhi pitsayaꞌ ni siga pagkahi da ma bay ngita iya pus na bay pinakallum.

15Pag-anu, lay gi sila sinohoꞌ meꞌ si Isa, yuk na, “Lataan bi na junyaꞌ maka pasaplagun bi na umanat mahap pasal aku ni sikamimon manusiyaꞌ. 16Soysoy ina pitsayaꞌ niyaku sampay bay pinandi, malaingkan salamat na ya. Sugaꞌ soysoy ina yaꞌ pitsayaꞌ, kalabuan du sina hukuman Tuhan.

17“Na sagannap ma pitsayaꞌ niyaku, meka sina mintu sipat kawasa tapōꞌ da. Kapalakka na sina sila siga seytan man jawom baran jama makoy awon ku. Maka kabitsala gi sina sila ni jinisan pallun ma yaꞌ san bay pingkaꞌ kapandoyan da. 18Maka san ina mintu sila bay kapūt sō atawa pun lay kainum latsun, yaꞌ du sina sila kongoy-kongoy. Maka bong sila bay nappak ga baran jama sakihan, kaulian jaꞌ sina meꞌ da.”

Si Isa inangkat pa sulgaꞌ

(Lukas 24.50-53; Salsila siga Rasul 1.9-11)

19Paddus Papuꞌ Isa bay mitsala ninsila, ilooy ma lay na ya inangkat pa sulgaꞌ. Pag-anu, boꞌ na ningkōꞌ ni bihing Tuhan huwin pa kawnan. 20Dari kuwan siga mulit na siꞌ, lay na ngalataan kalahat-lahatan masaplag umanat mahap pasal Papuꞌ Isa. Man kawasa na njataꞌ da, meka na sipat kahaylan-haylan bay tapōꞌ da bilang buktiꞌ ni sikamimon tud bana du umanat da.

Currently Selected:

Malkus 16: sjm

Highlight

Copy