uYoohani 10
10
Ishiholanyo isha mudiimi umwinza
1UYeesu ahajendeelela kuyanga na Vhafalisaayi vhaala ahati, “Nalyoli nkuvhavhuuzya kuuti, umuntu wonti we atakwinjiilila pa mulyango uwa ivhiji ilya ngʼonzi, ileelo akwinjiilila apanji, umuntu uyo mwivha, havhili mupumula vintu. 2Ileelo umuntu we akwinjiilila pa mulyango uwa ivhiji, uyo we mudiimi uwa ngʼonzi. 3Umuguulizi uwa ivhiji akumwigulila umulyango umudiimi uyo uwa ngʼonzi. Lwe umudiimi uyo akuzyita ingʼonzi, zyope zikwivwa izwi lyakwe. Lwe akuzifumwa panzi, akuyiita ingʼonzi yaakwe yooka yooka izina lyakwe.#10:3 AVhayuuda vhahazyitaga ingʼonzi amazina. 4Inga azifumwa ingʼonzi zyakwe zyonti panzi, akuzilongolela kwilongolela, zyope zikumulandata,#10:4 Mu maata aga Vhayuuda, avhadiimi vhahazilongolelaga ingʼonzi, zyope zihavhalandataga. mwe pe zilimanyile izwi lyakwe. 5Ingʼonzi zitangamulandata umuntu umujeni, zikumushimbila, mwe pe zitalimanyile izwi lyakwe.” 6UYeesu ávhavhuziizye aVhafalisaayi ishiholanyo ishi, ileelo avheene vhatámanyile zye ahavhavhuzyaga.
7Pe uYeesu ahayanga havhili ahati, “Nalyoli nkuvhavhuuzya kuuti, ine indi inza umulyango uwo, we ingʼonzi zikwinjiilila mwi ivhiji. 8Vhonti vhe vhándongoleeye, vhiivha, havhili vhapumula vintu, ileelo ingʼonzi zitávhatejeleziizye. 9Ine indi inza umulyango uwo. Umuntu wonti we akwinjila mwi ivhiji kutuushila ku kwane akupokwa, havhili akuvha musatushe kwinjila nu kufuma, kusogola kwi isole ilyinza. 10Umwivha akwinza ni nsiivho izya kwivha nu kugoga nu kunanganya. Ileelo ine ninzile, inga zivhe nu vhulanzi, havhili zivhe navhwo ku vhwinji.
11“Ine ne mudiimi umwinza. Umudiimi umwinza akuyifumwa kufwa kuzipoha ingʼonzi zyakwe. 12Umuntu we muvhomba mbombo, ni ngʼonzi te zyakwe, inga aalola impumpi zikwinza, akushimbila nu kuzileha ingʼonzi zyeka. Pe impumpi zikulema ingʼonzi zimo, ni zyamwavho zikusaata. 13Umuvhomba mbombo uyo akushimbila, mwe pe atakuzisaajila ingʼonzi izyo. 14Ine ne mudiimi umwinza. Ingʼonzi zyane nzimanyile ahinza, zyope zimanyile ine. 15Inza vwe uTaata amanyile ine, niine imumanyile uweene. Ine nkuyifumwa kufwa kuzipoha ingʼonzi zyane. 16Ine indi ni ngʼonzi izyamwavho zye naazimo mwi ivhiji ili, zyope nkwanzilwa inzileete umu. Ingʼonzi izyo, zyope kwe zilimanye izwi lyane. Kwi idala ilyo, kwe yivhe impuga yooka nu mudiimi wooka.
17“UTaata ankunzite, mwe pe nkuvhufumwa uvhulanzi vhwane, inga mbwaje havhili. 18Ataliipo umuntu we angamfwula uvhulanzi vhwane. Ine ne nkusaavhula kuvhufumwa uvhulanzi vhwane. Ine indi na maha aga kuvhufumwa uvhulanzi vhwane, havhili indi na maha aga kuvha ne mulanzi havhili. Nkuyanga vhwevhulo, mwe pe uTaata waane we andajiziizye kuvhomba vhwevhulo.” 19Lwe aVhayuuda vhiivwa amazwi igo, vhahasugaana insiivho. 20Avhinji mu Vhayuuda ivho vhahayanga vhahati, “Uno ali ni mpepo inkandamanu ye yimuvhiisile kuvha wu shipena. Kuli lilonka vhuli kumutejeelezya umuntu uno?” 21Ileelo vhamo vhahayanga vhahati, “Umuntu we ali ni mpepo inkandamanu atangayanga amazwi inza igo. Vhuli, impepo inkandamanu yingamuvhiiha untonko kuuti alolaje?”
AVhayuuda vhakumuhaana uYeesu
22Pe ahavhaliilizyo aha shikulukuulu isha Vhayuuda isha kukumbuha kuyizigula iNyumba iMfinjile ku Yelusaleemu, hahafiha. Ahavhaliilizyo iho háamile ha lupepu. 23UYeesu ahazyunguulaga pa Nyumba iMfinjile mwi idala lye vhahatinji Idala iLyilishe ilya Solomooni. 24Pe aVhayuuda vhamo vhahamuzyunguula uYeesu, vhahamuvhuziilizya vhahati, “Vhuli, kwe ututamwe mu mooyo giitu kufishila lii? Inga nalyoli iwe we Chilisiti, tuvhuuzye apazelu.” 25Ileelo uYeesu ahavhaamula ahati, “Ine mbavhuziizye kuuti ne naanu, ileelo imwe mukuhaana kuniitiha. Imbombo zye nkuvhomba ku maha aga Taata waane zye zikunkomeshezya kuuti ine ne naanu. 26Ileelo imwe mukuhaana kuniitiha, mwe pe te mwe vha mu mpuga iya ngʼonzi zyane. 27Ingʼonzi zyane zilimanyile izwi lyane. Niine nzimanyile, zyope zikundandata. 28Ine nkuuzipa uvhulanzi uvhwa shiima, te zihateeje naalumo. Havhili ataliipo umuntu we angazifwula ku maha kufuma mu nyoovhe zyane. 29UTaata waane we ampiiye izyo, mupiti kuluusya vhonti. Ishi ataliipo umuntu we angazifwula mu nyoovhe zyakwe. 30Ine nu Taata waane tuli pooka.”
31Pe aVhayuuda vhamo lwe vhiivwa izyo, vhahanda kusevha amavhwe havhili, inga vhamuhome nu kumugoga uYeesu. 32Ileelo uYeesu ahavhavhuuzya ahati, “Navhalolesya imbombo inyinji inyinza ku maha aga Taata waane. Vhuli, mbombo vhuli zye zikuvhavhiiha imwe kuuti munkome na mavhwe?” 33AVhayuuda vhahamwamula vhahati, “Tutakwanza kukuhoma na mavhwe, mwe pe uvhomvile imbombo inyinza, nkandi, mwe pe ukumusaamula uMulungu. Tukuyanga vhwevhulo, mwe pe iwe ukuyanga kuuti we Mulungu she we muntu vhweleele inza avhantu avhanji!”
34UYeesu ahavhaamula ahati, “Vhuli, yitasimviilwe mu makalaata giinyu aga ndajizyo kuuti uMulungu átili, ‘Imwe mwe vhalungu’?#10:34 iZabuuli 82:6 35Yisimviilwe mu Vhusimbe uVhufinjile kuuti avhantu vhe vhaposheleeye izwi ilya Mulungu, uMulungu ávhayanzile átili avhantu ivho vhalungu. Niiswe tumanyile kuuti zye zisimviilwe mu Vhusimbe uVhufinjile zya nalyoli insiku zyonti. 36Vhuli, shooni she mukuti ine nkumusaamula uMulungu lwe nkuti, ‘Ine ne Mwana wa Mulungu’? UTaata we ansavhuuye nu kunsonteelezya mu nsi. 37Inga ntakuvhomba imbombo izya Taata waane, pe mutanitihaje. 38Ileelo inga nkuzivhomba imbombo zye uTaata waane akuzivhomba, poosye inga mutakwitiha zye nkuyanga, ishi mujendeelele kuzyitiha imbombo izyo. Kwi idala ilyo, pe kwe mumanye kuuti uTaata waane ali muhati yaane, niine indi muhati yaakwe.” 39Lwe aVhayuuda vhamo vhiivwa izyo, vhahanzaga kumulema havhili, ileelo uYeesu ahapulumuha mu nyoovhe zyavho.
40Pe uYeesu ahasogola havhili kwi isyila ilya ijenje uYoolodaani, ahafiha pe uYoohani ahozyaga avhantu ku vhwandilo, ahatendama kwekuula. 41Lwe uYeesu ashiili ali kwekuula, avhantu avhinji vhahamwinzila nu kuyanga kuuti, “UYoohani atávhomvile ishilolesyo naashimo, ileelo inongwa zyonti zye ahaziyangaga izya muntu uno zya nalyoli.” 42Pe ukwo avhantu avhinji vhahamwitiha uYeesu.
Currently Selected:
uYoohani 10: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
