uYoohani 11

Uvhufwe uvhwa Laazalo

1Kwáli umuntu wumo we izina lyakwe vhahatinji uLaazalo. ULaazalo áamile muvhinu. Umuntu uyo ahatendamaga mu lutala ulwa Besaniya pooka na vhanine avhalindu avha Maliiya nu Maalita. 2UMaliiya uyo, umunine uwa Laazalo we áamile muvhinu, we ámupasile uMwene uYeesu amafuta ge gakununshila mu vinama vwakwe nu kumusyumula ni nsisi zyakwe. 3Pe avhanine ivho vhahatuma intumi kwa Yeesu kumuvhuuzya kuuti, “We Mwene, unkundwa waaho uLaazalo muvhinu.” 4Lwe uYeesu ayiivwa intumi iyo, ahayanga ahati, “Uvhuvhinu uvhu te vhwa kumugoga uLaazalo, vhwa kulolesya uvhushindamu uvhwa Mulungu, inga avhantu vhanshindishe ine ne Mwana waakwe kutuushila uvhuvhinu uvhwo.” 5UYeesu ámukunzite nkaani uMaalita na vhanine vhaakwe uMaliiya nu Laazalo.

6Ileelo lwe uYeesu ayiivwa kuuti uLaazalo muvhinu, ahonjezya kutendama paala insiku zivhili. 7Pe lwe insiku zivhili izyo zyatuuha, uYeesu ahavhavhuuzya avhasundikwa vhaakwe ahati, “Tujendi havhili mu shigavho isha nsi isha Yudeeya.” 8Avhasundikwa vhaakwe vhahamuvhuziilizya vhahati, “We Musambiilizi, shiniishi vhweleele aVhayuuda vhamo vhanzaga kukuhoma na mavhwe kuuti ufwe kunuukwo. Ishi shooni she ukwanza kusogola havhili?” 9UYeesu ahavhaamula ahati, “Vhuli, umusanya wutali na masaala 12? Inga umuntu akujenda ahavhaliilizyo iho atangapunula, mwe pe uvhuzelu vhukumuhozezya, akuvilola ivintu vwonti. 10Ileelo umuntu we akujenda uvhusiku akupunula, mwe pe uvhuzelu uvhwa kumwavwa vhutakuvha.”

11Lwe uYeesu aamala kuyanga izyo, ahajendeelela kuvhavhuuzya avhasundikwa vhaakwe ahati, “Unkundwa wiitu uLaazalo akaasite, ileelo kwe nsogole kumudaamusya.” 12Pe avhasundikwa vhaakwe vhahamwamula vhahati, “We Mwene, inga akaasite tulo, kwe apone.” 13UYeesu ipa ahayangaga kuuti uLaazalo afuuye, ileelo avhasundikwa vhaakwe vhahasiivhaga kuuti akuyanga kuuti akaasite tulo.

14Pe uYeesu ahavhavhuuzya apazelu avhasundikwa vhaakwe ahati, “ULaazalo afuuye. 15Ileelo ine naseshela ku zyinyu, mwe pe ntaaliipo lwe uLaazalo akufwa, inga imwe muvhe nu lwitiho ulupiti kuli ine. Ishi tujendi ku kwakwe.” 16Pe umusundikwa wumo we izina lyakwe vhahatinji uToomasi, havhili we vhahamwitaga vhahatinji Ipasa, ahavhavhuuzya avhasundikwa avhamwavho ahati, “Niiswe tujendi inga tusogole tufwe pooka nawo.”

UYeesu ali na maha aga kuvhazyusya avhafwe

17Lwe uYeesu aafiha mu lutala ulwa Besaniya, ahaaga uLaazalo ali ni nsiku zine mu mbiipa. 18Ulutala ulwa Besaniya lwáli ikilomiita zitatu ishi kufuma mu nkaaya iya Yelusaleemu. 19AVhayuuda avhinji vhínzile mu Besaniya kuvhasuvhaalizya avha Maalita nu Maliiya kuzya vhufwe uvhwa munine waavho uLaazalo. 20Lwe avhantu vhamuvhuuzya uMaalita kuuti uYeesu ali mwi idala akwinza, ahafuma kunzi nu kusogola kumuposheela, ileelo uMaliiya ahasyala pahaaya. 21Lwe uMaalita ahomaana nu Yeesu, ahamuvhuuzya ahati, “We Mwene, inga waalipo ipa, umunine waane, nkandi atafuuye. 22Ileelo poosye ishi imanyile kuuti, shonti she ungamulaavha uMulungu, kwe aakupe.”

23Pe uYeesu ahamwamula uMaalita ahati, “Umunine waaho kwe azyushe.” 24UMaalita ahamwamula uYeesu ahati, “We Mwene, imanyile kuuti, uMulungu lwe akuvhazyusya avhantu vhonti isiku ilya kumpeleela, woope alizyuha.” 25UYeesu ahamwamula uMaalita ahati, “Ine ne nkuzyusya, havhili ne nkupa uvhulanzi. Umuntu wonti we akuniitiha ine, poosye inga aafwa, aliivha mulanzi. 26Woope we mulanzi, havhili akuniitiha ine, te ahaafwe naalumo. Vhuli, ukuzyitiha izyo?” 27UMaalita ahamwamula uYeesu ahati, “Mwe muumwo Mwene, niitiha kuuti iwe we Chilisiti, uMwana wa Mulungu we ukwinza mu nsi umu kufuma kwa Mulungu.”

UYeesu akukuuta

28Lwe uMaalita ayanga izyo, ahasogola kumwita umunine waakwe uMaliiya, ahamuvhuuzya kukwilu ahati, “UMusambiilizi aliipo ipa, akukwita.” 29Lwe uMaliiya ayiivwa izyo, ahimiilila naluvhiilo nu kusogola kwa Yeesu. 30UYeesu áshiili kwinjila mu lutala ulwa Besaniya, áamile kumo kwe uMaalita ásogooye kumuposheela. 31Lwe avhantu vhaala vhe vhásogooye kumusuvhaalizya uMaliiya vhamulola akuvhuuha nu kufuma panzi, pe vhahanda kumulandata, mwe pe vhahasiivhaga kuuti uMaliiya asogola ku mbiipa kukuuta.

32Lwe uMaliiya aafiha pe uYeesu áamile, ahamulola, ahasugamila pa vinama vwakwe uku akukuuta, ahamuvhuuzya ahati, “We Mwene, inga uvhanje ipa, umunine waane, nkandi atafuuye.” 33Lwe uYeesu amulola uMaliiya akukuuta na vhantu vhe vhínzile nawo, vhoope vhakukuuta, ahaswimiililwa nkaani mu mwoyo waakwe. 34Pe uYeesu ahavhavhuziilizya ahati, “Mumusyiliiye kwoshi?” Vhahamwamula vhahati, “We Mwene, tujende tukulanje.” 35UYeesu ahakuuta. 36Pe aVhayuuda vhe vhínzile pa mpungo, vhahayanga vhahati, “Yeenya vwe uYeesu aamukunzite uLaazalo!” 37Ileelo vhamo vhahayanga vhahati, “Umuntu uno we ámuponiizye untonko, ishi pe shooni she atavhombaga shimo, inga uLaazalo atahaafwe?”

UYeesu akumuzyusya uLaazalo

38Lwe uYeesu ali she aswimiliilwe mu mwoyo waakwe, ahafiha pa mbiipa pe vhámusyiliiye uLaazalo. Imbiipa iyo yáamile lishembo lye vhágubishiiye ni ivhwe ipiti pa mulyango. 39UYeesu ahavhavhuuzya avhantu vhe vháliipo paala ahati, “Lyefwi ivhwe ilyo pa mulyango.” UMaalita we áamile munine wa we áfuuye ahamwamula uYeesu ahati, “We Mwene, kufiha ahavhaliilizyo iha ataliha kununka, mwe pe zyatuuha insiku zine kufuma pe twaamusyiliiye.” 40UYeesu ahamwamula uMaalita ahati, “Ine nkuvhuziizye kuuti inga ukwitiha, kwe uvhulole uvhushindamu uvhwa Mulungu vwe vhuli.”

41Pe avhantu vhe vháliipo paala, vhahalyefwa ivhwe liila lye lyáli pa mulyango. UYeesu aheenya ku mwanya, ahalaavha kwa Mulungu ahati, “We Taata, nkukusalifwa, mwe pe watejeelezya impuuto zyane. 42Imanyile kuuti, ukuntejelezyaga ahavhaliilizyo honti, ileelo nkuyanga izi kuzya ivhungaana ilya vhantu ivha, inga vhiitishe kuuti iwe we unsonteleziizye.”

43Lwe uYeesu ayanga izyo, ahavhilishila kwi izwi ipiti ahati, “We Laazalo, fuma kunzi!” 44Pe ahafuma mu mbiipa ivinama ni nyoovhe zyakwe vhazizinzile na menda aga kusyilila. Havhili, áamile nu mwenda we vhámupinyile ku minso. Pe uYeesu ahavhavhuuzya avhantu ivho ahati, “Musatuli amenda igo nu kumuleha kuuti asogolaje.”

Avhalongozi avha Vhayuuda vhakupanzanya kumugoga uYeesu

(uMataayi 26:1-5; uMaaliko 14:1-2; uLuuka 22:1-2)

45Lwe aVhayuuda avhinji vhe vhínzile kumusuvhaalizya uMaliiya vhazilola zye uYeesu avhomba, vhahamwitiha. 46Ileelo vhamo vhahasogola ku Vhafalisaayi nu kuvhavhuuzya zye uYeesu ávhomvile. 47Pe avhapiti avha vhapuuti na Vhafalisaayi vhahavhungaana pa lukuvhato lwe vhahatinji iSaniheediliini,#11:47 ISaniheediliini: Vhaazya ulukuvhato mu Ntantiho izya Mazwi aMajeni. vhahavhuzilizanya vhuuvho vheeka vhahati, “Vhuli, tuvhombe ishooni? Yeenya, umuntu uno akuvhomba ivilolesyo ivwinji. 48Inga twamuleha vhweleele kuuti avhombaje ivilolesyo ivwo, avhantu vhonti kwe vhamwitishe. Pe aVhaluumi kwe vhinze kunanganya iNyumba iMfinjile ni nsi yiitu.”

49Pe wumo mu vhapiti ivho we izina lyakwe vhahatinji uKayaafa, we umwaha uwo áamile mupuuti umupiti,#11:49 Umupuuti umupiti: Vhaazya avhapuuti mu Ntantiho izya Mazwi aMajeni. ahayanga ahati, “Imwe mutamanyile naashimo! 50Vhuli, mutamanyile kuuti hinza kuli imwe kuuti umuntu wooka afwe kuzya vhantu vhonti, kuluusya kuuti insi yonti yilovhe?” 51UKayaafa atáyanzile izyo ku lukasamo lwakwe. Ileelo, mwe pe áali mupuuti umupiti umwaha uwo, akuvile kuuti uYeesu kwe afwe kuzya Vhayuuda. 52Havhili uYeesu te kuuti afwe kuzya Vhayuuda vheeka vhweleele, nkandi na kuzya kuuti avhavhungaanishe avhaana vha Mulungu vhe vhasaasite, inga vhavhe pooka.

53Pe kufuma isiku ilyo, avhalongozi avha Vhayuuda vhahanda kulondola idala ilya kumugoga uYeesu. 54Kuli izyo, uYeesu ahaleha kujenda apazelu mu shigavho isha nsi isha Yudeeya, pe aheepa nu kusogola papiipi nu luugwa, mu nkaaya iya Eefulayimu. Ahatendama ukwo pooka na vhasundikwa vhaakwe. 55Ishikulukuulu isha Vhayuuda isha Pasaaka shápalamiiye. Pe avhantu avhinji vhaheepa mu nkaaya zyavho kusogola mu Yelusaleemu, inga vhayizelufwe.#11:55 Vhayizelufwe: UMulungu ávhalajiziizye avhantu vhaakwe kuyizelufwa lwe ahavhaliilizyo aha shikulukuulu isha Pasaaka hashiili kufiha, inga vhavhe vhazelu ishisita ahabada honti pilongolela lyakwe. Vhaazya iMbaazyo 9:10; 2 iMbombo izya Havhaliilizyo 30:17-19. 56Pe avhalongozi avha Vhayuuda vhahajendeelela kumulondola uYeesu. Lwe vhavhungaana pa Nyumba iMfinjile, vhahanda kuvhuzilizanya vhuuvho vheeka kuuti, “Imwe mukulola vhuli? Umuntu uno kwe ayinze ku shikulukuulu, pamo te ayinze?” 57Pe avhapiti avha vhapuuti na Vhafalisaayi vhahalajizya kuuti umuntu wonti inga aamanya kwe uYeesu ali, asogole avhavhuuzye, inga vhamuleme.

Currently Selected:

uYoohani 11: nih

Highlight

Copy