uYoohani 6
6
UYeesu akuvhaliisya avhantu 5,000
(uMataayi 14:13-21; uMaaliko 6:30-44; uLuuka 9:10-17)
1Lwe zyatuuha izyo, uYeesu ahalamba usumbi uwa Galilaaya we izina ilyamwavho vhakuti usumbi uwa Tibeeliya. 2Ivhungaana ipiti ilya vhantu lihamulandataga uYeesu, mwe pe vhahalolaga ivilolesyo vwe ahavhombaga ku vhavhinu. 3Pe uYeesu na vhasundikwa vhaakwe vhahazuvha pi igamba limo nu kutendama pooka. 4Ahavhaliilizyo iho, ishikulukuulu isha Vhayuuda isha Pasaaka shápalamiiye.
5Lwe uYeesu ali pi igamba, aheenya, ahalola ivhungaana ilya vhantu likwinza ku kwakwe. Pe ahamuvhuziilizya uFiilipo ahati, “Vhuli, tungaakala kwoshi ishaakulya isha kuvhaliisya avhantu vhonti ivha?” 6UYeesu ámuvhuziliziizye uFiilipo vhwevhulo kumulinga, mwe pe uweene ámanyile lye kwe avhombe. 7UFiilipo ahamwamula ahati, “Poosye inga tungati tukale ishaakulya, inga avhantu vhonti vhalye shinsi, poosye isha dinaali 200,#6:7 Idinaali 200: Idinaali yooka gáamile malipilo aga isiku lyoka kwa muvhomvi. Kuli izyo, idinaali 200 zyáli zya malipilo aga nsiku 200 kwa muvhomvi. shitangavhakwila avhantu ivha.” 8Pe uAndeleeya we áamile wooka mu vhasundikwa vhaala, havhili we áali munine nu Siimoni uPeeteli, ahamwamula uYeesu ahati, 9“We Mwene, aliipo umujaaha wumo ipa we ali na makaati gasaano aga shayiili nu tuswi utunsi tuvhili. Ileelo ishaakulya ishinsi ishi shingakwila inza vhuli impuga yonti ino?”
10Pe uYeesu ahavhalajizya avhasundikwa vhaakwe ahati, “Vhavhuuzyi avhantu vhatendame pansi.” Pe vháali ipo páali isole ilyinji. Pe avhantu vhonti vhahatendama pansi. Mu mpuga yiila, avhanaavuli vheeka vháali 5,000 ishi. 11Pe uYeesu ahanyatula amakaati igo, ahamusalifwa uMulungu. Ahamensulanya, ahaavhapa avhasundikwa vhaakwe, vhoope vhahavhagavhila avhantu vhonti vhe vháliipo paala. Ahavhomba sheshiila na ku tuswi tuula tuvhili. Avhantu vhonti vhahapeelwa inza vwe vhahanzaga. 12Lwe avhantu vhonti vhaalya vhiikuta, uYeesu ahavhavhuuzya avhasundikwa vhaakwe ahati, “Vhunganiishi ivwalila, vitahinze vinanjishe.” 13Pe vhahavhungaaniha ivwalila, vihiizula ivitundu 12. 14Lwe avhantu vhaala vhaalola ishilolesyo she uYeesu ávhomvile, vhahati, “Nalyoli umuntu uno mukuvhwi wa Mulungu, we twásuvhiiye kuuti akwinza mu nsi umu.”#6:14 iNkumbushizyo izya Ndajizyo 18:15-19 15UYeesu ahamanya kuuti avhantu ivho vhakwanza kumulema ku maha, inga vhamuvhiishe kuvha wu Mwene waavho. Pe uweene aheepa nu kusogola weeka pi igamba.
UYeesu akujenda pa minzi pamwanya
(uMataayi 14:22-33; uMaaliko 6:45-52)
16Lwe haafiha hamazuuvha, avhasundikwa avha Yeesu vhahiiha kusogola kwa sumbi uwa Galilaaya. 17Vhahinjila mwi ivhooti, nu kwanda kulamba usumbi kusogola mu nkaaya iya Kapelanawuumu. Ahavhaliilizyo iho, kwámile ishiisi, uYeesu ápezile ashiili kufiha pe vháali. 18Pe lwe vhali mwa sumbi, gahafumila amavhilingwa amapiti, mwe pe inkungu impiti nkaani yihavugulaga. 19Lwe avhasundikwa avha Yeesu vhajenzya ivhooti ikilomiita 6 ishi, vhahamulola uYeesu akujenda pa minzi pamwanya, papiipi ni ivhooti lyavho, pe vhahoogopa nkaani. 20Pe uYeesu ahavhavhuuzya ahati, “Mutogopaje! Neene.” 21Pe avheene vhahanzaga kuuti uYeesu ayinjile mwi ivhooti lyavho. Ahavhaliilizyo hanaaho vhahaaga naluvhiilo vhaafiha kwi isyila kwe vhahasogolaga.
Avhantu vhakumulondola uYeesu
22Indaavhi yaakwe, ivhungaana ilya vhantu lye lyásyaye kwi isyila ilyamwavho ilya sumbi uwa Galilaaya, lihamanya kuuti liliipo ivhooti lyoka vhweleele paala. Havhili, lihamanya kuuti uYeesu atínjiiye mwi ivhooti pooka na vhasundikwa vhaakwe, avhasundikwa vhaakwe vhásogooye vheeka vhweleele. 23Pe avhantu avhamwavho vhahinza na mavhooti aganji kufuma mu nkaaya iya Tibeeliya, vhahafiha pe impuga iya vhantu vhahalyanga amakaati, lwe uMwene uYeesu amusalifwa uMulungu. 24Pe lwe ivhungaana ilya vhantu ivho lyamanya kuuti, uYeesu na vhasundikwa vhaakwe vhataliipo paala, vhahinjila mu mavhooti igo nu kusogola mu nkaaya iya Kapelanawuumu kumulondola uYeesu.
25Lwe avhantu ivho vhamwaga uYeesu kwi isyila ilya sumbi uwa Galilaaya, vhahamuvhuziilizya vhahati, “We Musambiilizi, uyinzile havhaliilizyo vhuli uku?” 26UYeesu ahavhaamula ahati, “Nalyoli nkuvhavhuuzya kuuti, te kuuti mukundondola, mwe pe mwaavhwenyi ivilolesyo vwe naavhomvile, nkandi, mwe pe naavhapiiye amakaati, mwalya nu kwikuta. 27Mutavhombaje imbombo ku nsiivho izya kushaaga ishaakulya she shikunanjiha, nkandi muvhombaje ku nsiivho izya shaakulya she shitakunanjiha, she shikuvhavhiiha kuvha nu vhulanzi uvhwa shiima. Ine ne Mwana wa Aadamu nkuuvhapa avhantu ishaakulya isho, mwe pe uTaata uMulungu ampiiye amaha aga kuvhomba izyo.”
28Pe avheene vhahamuvhuziilizya vhahati, “Vhuli, tuhonzye vhuli, inga tuvhombe imbombo zye uMulungu akwanza?” 29Woope uYeesu ahavhaamula ahati, “Imbombo ye uMulungu akwanza muvhombaje, ya kuniitiha ine, ne ansonteleziizye kuli imwe.” 30Vhahamuvhuziilizya vhahati, “Vhuli, kwe uvhombe shilolesyo vhuli, inga tulole nu kwitiha? Kwe uvhombe ishooni? 31Avhataata vhiitu vháliiye imana#6:31 Imana sháali shaakulya she uMulungu ahavhapanga aVhaisilayeeli, lwe vhali mu luugwa. Vhaazya Kufuma 16:31-34. lwe vhali mu luugwa, inza vwe yisimviilwe mu Vhusimbe uVhufinjile kuuti, ‘Ávhapiiye ishaakulya isha kufuma ku mwanya.’#6:31 uNehemiya 9:15; iZabuuli 78:24; 105:40” 32Pe uYeesu ahavhavhuuzya ahati, “Nalyoli nkuvhavhuuzya kuuti, te wu Moose we ávhapiiye avhataata vhiinyu ishaakulya kufuma ku mwanya, nkandi wu Taata waane we poosye ishi akuuvhapa imwe ishaakulya isha nalyoli kufuma ku mwanya. 33Nkuyanga vhwevhulo, mwe pe ishaakulya isha Mulungu, neene ne uMulungu ansonteleziizye kufuma ku mwanya, inga mbape uvhulanzi uvhwa shiima avhantu vhonti vhe vhali mu nsi umu.” 34Pe vhahamwamula vhahati, “We mwene, tukulaavha ujendeelele kuutupa ishaakulya inza isho insiku zyonti.”
35UYeesu ahavhaamula ahati, “Ine ne ne shaakulya she shikuuvhapa avhantu uvhulanzi. Umuntu wonti we akwinza ku kwane nu kuniitiha, inzala ni shinyooto te vihamulume naalumo. 36Ileelo ine nkuvhavhuuzya kuuti, pooka nu kuuti mumbwenyi, muli she mutakuniitiha. 37Avhantu vhonti vhe uTaata waane akumpa, vhakwinza ku kwane nu kuniitiha. Havhili ine ntakumuhaana umuntu we akwinza ku kwane. 38Nkuyanga isho, mwe pe ine ninzile kufuma ku mwanya, inga mbombaje ulukasamo ulwa Taata waane we ansonteleziizye. Ntinzile kuvhomba zye nkansiime neene. 39Ulukasamo ulwa Taata waane we ansonteleziizye, lwa kuuti ntahamuteezye inga wooka mu vhaala vhe ampiiye, havhili lwa kuuti nkinze imbazyusye vhonti vhavhe vhapuuma isiku ilya vhusililishilo. 40Kwe kuuti ulukasamo ulwa Taata waane lwa kuuti umuntu wonti we amanyile kuuti ine ne Mwana wa Mulungu nu kuniitiha, avhe nu vhulanzi uvhwa shiima. Niine ndimuzyusya isiku ilya vhusililishilo.”
41Pe aVhayuuda vhahanda kukwinkwina, mwe pe uYeesu átili, “Ine ne shaakulya she uMulungu ashileesite kufuma ku mwanya.” 42Vhahavhuzilizanya vhuuvho vheeka vhahati, “Vhuli, umuntu uno te wu Yeesu, umwana wa Yoosefu we tuvhamanyile na vhapaafi vhaakwe vhonti? Ishi angayanga inza vhuli kuuti, afumile ku mwanya?” 43UYeesu ahavhaamula ahati, “Leshi kukwinkwinana. 44Ataliipo umuntu we anginza ku kwane, inga uTaata waane we ansonteleziizye atamulongooye. Niine ndimuzyusya isiku ilya vhusililishilo. 45Yeenya, uVhusimbe uVhufinjile uvhwa vhakuvhwi vhukuti, ‘UMulungu alivhasambiilizya avhantu vhonti.’#6:45 uYisaayi 54:13 Pe umuntu wonti we akutejeelezya nu kusambiilila kufuma kwa Taata waane, we akwinza ku kwane. 46Ataliipo umuntu we amuvhwenyi uTaata uMulungu, nkandi ine neeka ne muvhwenyi, mwe pe mfumile ku kwakwe.”
Ishaakulya she shikuleeta uvhulanzi uvhwa shiima
47“Nalyoli nkuvhavhuuzya kuuti, umuntu we akuniitiha ine, ali nu vhulanzi uvhwa shiima. 48Ine ne shaakulya she shikuuvhapa avhantu uvhulanzi. 49Pooka nu kuuti avhataata vhiinyu vháliiye imana lwe vhali mu luugwa, ileelo vháfuuye. 50Ileelo ipa shiliipo ishaakulya she shikufuma kwa Mulungu. Inga umuntu aalya ishaakulya isho, te ahaafwe naalumo. 51Ine ne shaakulya she shifumile ku mwanya, she shikuuvhapa avhantu uvhulanzi. Umuntu wonti we akulya ishaakulya ishi akuvha nu vhulanzi uvhwa shiima. Ishaakulya ishi muvhili waane we kwe mbufumwe ku vhantu vhonti, inga vhavhe nu vhulanzi uvhwa shiima.”
52Pe aVhayuuda vhahanda kudalinkana vhuuvho vheeka, nu kuvhuzilizanya kuuti, “Umuntu uno angaatupa umuvhili waakwe inza vhuli kuuti tulye?” 53Ileelo uYeesu ahavhavhuuzya ahati, “Nalyoli nkuvhavhuuzya kuuti, inga mutaalya umuvhili waane, nu kumwela amavhanda gaane ine ne Mwana wa Aadamu, te muvhe nu vhulanzi. 54Umuntu wonti we akulya umuvhili waane nu kumwela amavhanda gaane ali nu vhulanzi uvhwa shiima, niine ndimuzyusya isiku ilya vhusililishilo. 55Yeenya, umuvhili waane she shaakulya isha nalyoli, na mavhanda gaane she shakumwela isha nalyoli. 56Umuntu wonti we akulya umuvhili waane, nu kumwela amavhanda gaane, akujendeelela kuvha muhati yaane, niine nkujendeelela kuvha muhati yaakwe.
57“Inza vwe uTaata we ansonteleziizye ine mulanzi, niine nkuvhwaga uvhulanzi kufuma ku kwakwe. Vhwevhulo, umuntu wonti we akundya ine, akuvhwaga uvhulanzi kufuma ku kwane. 58Ine ne shaakulya she shifumile kwa Mulungu. Ishaakulya she shitaholiine na shiila she vhahalyanga avhataata vhiitu. Avheene vháliiye nu kufwa. Ileelo umuntu wonti we akulya ishaakulya ishi, kwe avhe nu vhulanzi uvhwa shiima.”
59UYeesu áyanzile amazwi igo, lwe akusambiilizya mwi isinagoogi,#6:59 Isinagoogi: Vhaazya mu Ntantiho izya Mazwi aMajeni. mu nkaaya iya Kapelanawuumu.
Avhasundikwa avhinji vhakumuleha uYeesu
60Lwe vhiivwa akuyanga izyo, avhinji mu vhasundikwa vhaakwe, vhahapanzanya vhahati, “Insambiilizyo izi ngomu nkaani! Vhuli, wu naanu we angazyitiha?” 61Lwe uYeesu aamanya kuuti avhasundikwa vhaakwe vhakukwinkwina ku ziila zye áyanzile, ahavhavhuziilizya ahati, “Vhuli, amazwi iga gavhapunuzya? 62Ishi yiliivha vhuli, inga mukundola ine ne Mwana wa Aadamu, nkuzuvha kusogola ku mwanya kwe náamile ku vhwandilo? 63UMupepo uwa Mulungu we akuuvhapa avhantu uvhulanzi uvhwa shiima. Amaha aga muntu gatangaavwa naashimo kuleeta uvhulanzi uvhwa shiima. Amazwi ge navhavhuuzya gakuvhavhiiha imwe kuuti muvhe nu Mupepo uwa Mulungu, nu kuuti muvhe nu vhulanzi uvhwa shiima. 64Ileelo vhaliipo vhamo pahati yiinyu vhe vhakuhaana kuniitiha.” UYeesu áyanzile vhwevhulo, mwe pe ámanyile kufuma ku vhwandilo, kuuti vhe vha naanu vhe vhakuhaana kumwitiha, nu kuuti wu naanu we alimwaniila. 65Pe ahajendeelela kuyanga kuuti, “Ino ye nongwa nkuvhavhuuzya kuuti, ataliipo umuntu we anginza ku kwane inga uTaata waane atamulongooye.”
66Kufuma ahavhaliilizyo iho, avhinji mu vhasundikwa vhaakwe vhahagaluha mwisinda, vhahaleha kumulandata. 67Pe uYeesu ahavhavhuziilizya vhaala 12 ahati, “Vhuli, niimwe mukwanza kundeha?” 68USiimoni uPeeteli ahamwamula ahati, “We Mwene, vhuli, wu naanu uwamwavho we tungasogola ku kwakwe? Iwe uli na mazwi ge gakuutupa uvhulanzi uvhwa shiima. 69Iswe tukwitiha, havhili tumanyile kuuti iwe we we Mufinjile we uMulungu áfinzile kumuleeta!” 70Pe uYeesu ahavhavhuuzya ahati, “Návhasavhuuye imwe 12 kuuti muvhe mwe vhasundikwa vhaane, ileelo wooka pahati yiinyu akulongolwa nu Mukwalanzi.” 71Ipa uYeesu ahamuyangaga uYuuda, umwana wa Siimoni we ahafumaga mu nkaaya iya Kaalyoti. Uno we pisinda ámwaniliiye uYeesu, pooka nu kuuti áamile wooka mu vhasundikwa vhaala 12.
Currently Selected:
uYoohani 6: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
