uYoohani 7
7
UYeesu na vhanine vhaakwe
1Lwe izyo zyatuuha, uYeesu ahanda kuzyunguula mu shigavho isha nsi isha Galilaaya. Atahanzaga kuzyunguula mu shigavho isha nsi isha Yudeeya, mwe pe avhalongozi avha Vhayuuda vhahanzaga kumugoga. 2Ahavhaliilizyo aha shikulukuulu isha Vhayuuda isha vwegwi,#7:2 Ishikulukuulu isha Vhayuuda isha vwegwi shikulukuulu she aVhayuuda vhahimbaga kuseshela iviyavho nu kulaavha imvula. Vhaazya aVhalaawi 23:33-36, 39-43; iNkumbushizyo izya Ndajizyo 16:13-16. hápalamiiye. 3Pe avhanine avha shanaavuli avha Yeesu vhahamuvhuuzya vhahati, “Uyeepe ipa, usogole mu Yudeeya, inga avhalandati vhaaho vhoope vhasogole vhazilole imbombo zye ukuvhomba. 4Inga umuntu akwanza kukumuha, atakuvhomba imbombo zyakwe kukwilu. Mwe pe ukuvhomba zyonti izi, uyilolesye apazelu ku vhantu vhonti avha mu nsi, inga vhakumanye.” 5Avhanine vhaakwe vháyanzile vhwevhulo, mwe pe vhoope vhatámwitisile uYeesu kuuti wu Chilisiti.
6Pe uYeesu ahavhaamula ahati, “Ahavhaliilizyo haane hashiili, ileelo imwe mungasogola ahavhaliilizyo honti. 7Nkuyanga vhwevhulo, mwe pe avhantu avha mu nsi umu vhatangavhaviitilwa imwe, nkandi vhakumviitilwa ine, mwe pe nkuvhavhuuzya kuuti, zye vhakuvhomba mbiivhi. 8Imwe sogolaaji ku Yelusaleemu ku shikulukuulu isho. Ine ntakusogola, mwe pe ahavhaliilizyo haane hashiili kufiha.” 9Lwe uYeesu ayanga izyo, ahasyala mu shigavho isha nsi isha Galilaaya.
10Ileelo lwe avhanine vhaakwe avhanaavuli ivho vhasogola ku Yelusaleemu ku shikulukuulu, uYeesu woope ahasogola ku Yelusaleemu, ileelo ishisita kuyilolesya apazelu. 11Lwe avhalongozi avha Vhayuuda vhali pa shikulukuulu, vhahanda kumulondola uYeesu. Vhahavhavhuziilizya avhantu kuuti, “Vhuli, ali kwoshi umuntu ula?” 12Avhantu avhinji kufuma mwi ivhungaana ilyo, vhahadalinkanaga inongwa izya Yeesu. Vhamo vhahatinji uYeesu muntu mwinza, ileelo avhamwavho vhahatinji muntu we akuvhahopenkanya avhantu. 13Ileelo atáliipo umuntu we ahamuyangaga uYeesu apazelu, mwe pe vhahavhogopaga avhalongozi avha Vhayuuda.
UYeesu akuvhasambiilizya avhantu pa Nyumba iMfinjile
14Lwe insiku izya shikulukuulu zyafiha pahati, uYeesu ahasogola, ahinjila pa Nyumba iMfinjile nu kwanda kuvhasambiilizya avhantu. 15Pe avhalongozi avha Vhayuuda vhahasukumila nu kwanda kuvhuzilizanya kuuti, “Vhuli, umuntu uno angaamanya vhuli zyonti izyo ishisita kusambiilila?” 16Pe uYeesu ahavhaamula ahati, “Insambiilizyo zye nkusambiilizya te zyane, zikufuma kwa Mulungu we ansonteleziizye kuli imwe. 17Umuntu wonti we akwanza kuvhomba zye uMulungu akasiime, akumanya kuuti insambiilizyo izi zifumile kwa Mulungu, havhili akumanya kuuti ntakuyanga ku maha gaane. 18Umuntu wonti we akuyanga ku maha gaakwe, akulondola uvhushindamu vhwakwe wuuyo. Ileelo we akulondola kuumupa uvhushindamu ula we amusonteleziizye, akuyanga uvhwanalyoli, atakuyanga izya ilenga.”
19UYeesu ahajendeelela kuyanga kuuti, “Mumanyile kuuti uMoose ávhapiiye avhataata vhiinyu indajizyo zyakwe, inga muzilandate. Ileelo ataliipo umuntu pahati yiinyu we akulandata indajizyo izyo. Pe shooni she mukwanza kungoga?” 20Ivhungaana ilya vhantu lihamwamula lihati, “Iwe uli ni mpepo inkandamanu! Vhuli, wu naanu we akwanza kukugoga?” 21UYeesu ahavhaamula ahati, “Naavhomvile imbombo zimo isiku ilya Sabaato, ileelo imwe mwenti mwaagandusile.#7:21 UYeesu akuyanga, lwe akumuponia umuvhinu pi idiimi ilya Betisaayida isiku ilya Sabaato. Vhaazya uYoohani 5:1-15. 22Yeenya, uMoose ávhalajiziizye imwe kuvhatahiili#7:22 Kuvhatahiili: Vhaazya kutahiili mu Ntantiho izya Mazwi aMajeni. avhaana vhiinyu avhanaavuli. Ileelo te wu Moose we átalisile amaata aga kutahiili, vhe vhataata vhiinyu. Ishi imwe mukuvhatahiili avhaana vhiinyu avhanaavuli poosye isiku ilya Sabaato. 23Inga muli nu mute uwa kulandata indajizyo izya Moose kuvhatahiili avhaana vhiinyu avhanaavuli poosye isiku ilya Sabaato, pe shooni she mukumviitilwa ine lwe nkumuponia umuntu isiku ilya Sabaato? 24Mutamulongaje umuntu ku ziila zye zikuloleha kunzi, nkandi mumulongaje ku vhugolosu.”
Avhantu vhakuvhuzilizanya inga uYeesu wu Chilisiti
25Pe avhantu vhamo vhe vhahatendamaga mu nkaaya iya Yelusaleemu, vhahanda kuvhuzilizanya kuuti, “Vhuli, uno te wu Yeesu we avhalongozi vhakwanza kumugoga? 26Yeenya, ishi akuyanga apazelu, ileelo avheene vhatakuyanga naashimo! Vhuli, nalyoli avhapiti vhiitu vhamanyile kuuti uno we wu Chilisiti? 27Umuntu uno tumumanyile kwe afumile. Ileelo uChilisiti lwe akwinza, ataliipo umuntu we aliimanya kwe akufuma.”
28Lwe uYeesu akusambiilizya pa Nyumba iMfinjile, ahayanga kwi izwi ipiti ahati, “Nalyoli mumanyile ine, havhili mumanyile kwe mfumile. Ileelo ine ntinzile ku maha gaane, uMulungu we ansonteleziizye wa nalyoli, niimwe mutamumanyile. 29Ileelo ine imumanyile, mwe pe mfumile ku kwakwe, havhili uweene we ansonteleziizye kuli imwe.” 30Lwe avhantu ivho vhiivwa izyo, vhahalinga kumulema, ileelo atáliipo umuntu we ásheleeye kumulema, mwe pe ahavhaliilizyo haakwe háshiili kufiha. 31Ileelo avhantu avhinji mwi ivhungaana lye lyáli paala, vhahamwitiha uYeesu, vhahayangaga vhahatinji, “Inga uChilisiti ayinza, vhuli, alivhomba ivilolesyo ivwinji kuluusya vwe umuntu uno avhomvile?”
Vhakuvhasonteelezya avhasikaali kumulema uYeesu
32AVhafalisaayi vhahiivwa ivhungaana ilya vhantu vhakunongʼona izyo. Pe avheene na vhapiti avha vhapuuti vhahavhasonteelezya avhasikaali, inga vhamuleme uYeesu. 33Pe uYeesu ahavhavhuuzya avhantu ivho ahati, “Kwe mbe niimwe ahavhaliilizyo hansi vhweleele lwe nshiili kugaluha ku kwakwe we ansonteleziizye. 34Kwe mundondole, ileelo te mundole, havhili imwe mutanginza kwe nkusogola.”
35Pe avhalongozi avha Vhayuuda vhahapanzanya vhahati, “Vhuli, umuntu uno akwanza kusogola kwoshi kwe akuti iswe tutangamwaga? Vhuli, akwanza kusogola ku Vhayuuda vhe vhasaasite mu nkaaya izya vhe te Vhayuuda kuvhasambiilizya? 36Vhuli, akwanza atuvhuuzye ishooni ku mazwi gaakwe ge akuti, ‘Kwe mundondole, ileelo te mundole, havhili imwe mutanginza kwe nkusogola’?”
UYeesu akuyanga izya Mupepo uMufinjile
37Isiku ilya vhusililishilo ilya shikulukuulu isha vwegwi, lyáli lisiku ipiti nkaani. Pe uYeesu ahimiilila pa Nyumba iMfinjile, ahayanga kwi izwi ipiti ahati, “Umuntu wonti we ali ni shinyooto, ayinze ku kwane amwele.#7:37 Umuntu wonti we ali ni shinyooto, ayinze ku kwane amwele: Isiku ilya shikulukuulu isha vwegwi, aVhayuuda vhahamulaavhaga uMulungu imvula, nu kukumbuha kuuti uMulungu ávhapiiye avhataata vhaavho aminzi mu luugwa. Vhaazya Kufuma 17:1-7; iMbaazyo 20:1-11. UYeesu akuhomeelezya kuuti uweene shiduda isha minzi aga nalyoli. 38Umuntu we akuniitiha ine, aliivha inza vwe vhukuyanga uVhusimbe uVhufinjile kuuti, ‘Aliivha ni shiduda isha minzi aminji muhati yaakwe.’#7:38 uYisaayi 44:3; 55:1; 58:11” 39UYeesu ahayangaga inongwa izya Mupepo uMufinjile we pisinda, avhiitisi vhonti avha Yeesu vhámuposheleeye. Ahavhaliilizyo iho, uMulungu ápezile ashiili kuvhatumila uMupepo uMufinjile, mwe pe uMulungu ápezile ashiili kulolesya apazelu uvhushindamu uvhwa Yeesu.
Avhantu vhakusugaana kuzya Yeesu
40Avhantu vhamo mwi ivhungaana liila lwe vhiivwa amazwi igo, vhahanda kuyanga kuuti, “Nalyoli umuntu uno we mukuvhwi we tukumuguliilila kufuma kwa Mulungu.” 41Vhamo vhahati, “Umuntu uno wu Chilisiti.” Ileelo avhamwavho vhahati, “Ndaali, uChilisiti atangaafuma mu shigavho isha nsi isha Galilaaya. 42Vhuli, uVhusimbe uVhufinjile vhutakuyanga kuuti, uChilisiti akufuma mu luho ulwa mwene Daavhudi?#7:42 UDaavhudi: Vhaazya mu Ntantiho izya Mazwi aMajeni. Havhili kuuti alipaapwa mu Betelehemu, inkaaya ye woope umwene uDaavhudi ápafwilwe?” 43Pe avhantu vhahasugaana kuzya Yeesu. 44Vhamo vhahanzaga kumulema, ileelo atáliipo umuntu we álinzile kumulema.
Avhalongozi avha Vhayuuda vhatakumwitiha uYeesu
45Pe avhasikaali vhahagaluha ku vhapiti avha vhapuuti na Vhafalisaayi vhaala, ishisita kumulema uYeesu. Lwe vhagaluha, avhalongozi ivho vhahavhavhuziilizya vhahati, “Shooni she mutamulema uYeesu nu kumuleeta ipa?” 46Avhasikaali ivho vhahavhaamula vhahati, “Ataliipo umuntu uwunji we akuyanga inza vwe uweene akuyanga.” 47AVhafalisaayi vhahavhavhuziilizya vhahati, “Vhuli, niimwe avhahopenkanya? 48Vhuli, aliipo umupiti wumo, poosye uMufalisaayi we amwitisile uYeesu? 49Ivhungaana ilya vhantu vhe vhamwitisile uYeesu vhatazimanyile indajizyo izya Moose. Avhantu ivho vhatifiilwe.”
50Pe uNikodeemo, we áali wooka mu vhalongozi avha Vhafalisaayi, we ahavhaliilizyo aha kwisinda ásogooye kwa Yeesu uvhusiku, ahavhavhuziilizya avhamwavho ahati, 51“Vhuli, indajizyo izya Moose zikutwitishila kumulonga umuntu inga tutamutejeleziizye suuti, nu kumanya zye akuvhomba?” 52Avheene vhahamwamula uNikodeemo vhahati, “Vhuli, niiwe ufumile mu Galilaaya? Sogoola uvhaazye havhili ahinza uVhusimbe uVhufinjile, pe niiwe kuuti umanye kuuti ataliipo umukuvhwi we angaafuma mu Galilaaya.” 53Pe avhantu vhonti vhahavhwela mu nkaaya zyavho.
Currently Selected:
uYoohani 7: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
