uYoohani 8
8
Umwantanda we vhámulemile mu vhuvhembu
1Ileelo uYeesu aheepa pa Nyumba iMfinjile nu kusogola pi igamba ilya Mazayituuni.#8:1 Amazayituuni makwi aga mantonongwa amansi aga mafuta. 2Inzanshi lwe kwasha, uYeesu ahasogola havhili nu kwinjila pa Nyumba iMfinjile. Avhantu vhonti vhahasogola ku kwakwe, pe ahatendama nu kwanda kuvhasambiilizya. 3Lwe uYeesu akusambiilizya, avhasambiilizi avha ndajizyo izya Moose#8:3 Avhasambiilizi avha ndajizyo izya Moose: Vhaazya mu Ntantiho izya Mazwi aMajeni. na Vhafalisaayi vhahamuleeta umwantanda wumo we vhámulemile akuvhembuha, pe vhahamwimiilisya pahati iya vhantu. 4Vhahamuvhuuzya uYeesu vhahati, “We Musambiilizi, umwantanda uno alemwilwe akuvhembuha. 5UMoose kulandatana ni ndajizyo zyakwe, átulajiziizye kumugoga umwantanda inza uno kwi idala ilya kumuhoma na mavhwe.#8:5 aVhalaawi 20:10; iNkumbushizyo izya Ndajizyo 22:22-24 Vhuli, iwe ukuti vhuli?” 6Avheene vhámuvhuziliziizye uYeesu vhwevhulo, inga vhamuteje nu kulyaga idala ilya kumulonjeelela. Ileelo uYeesu ahiinama, ahanda kusimba pansi ni nyoovhe yaakwe. 7Lwe vhakujendeelela kumuvhuziilizya, uYeesu ahagoloha, ahavhaamula ahati, “Inga aliipo wumo pahati yiinyu we atahavhomba naalumo uvhutalamalandu, avhe wa kwanda kumuhoma ni ivhwe umwantanda uno.” 8Pe uYeesu ahiinama havhili ahajendeelela kusimba pansi.
9Lwe vhiivwa izyo, vhahanda kwepa wooka wooka, kufuma avhasongo kufishila avhajaaha. Pisinda, uYeesu ahasyala weeka nu mwantanda ula we áyimiliiye pilongolela lyakwe. 10Pe uYeesu ahimiilila nu kumuvhuziilizya umwantanda uyo ahati, “We maayi, vhali kwoshi avhantu vhe vhakulonjelelaga? Vhuli, ataliipo inga wooka we asyaye kuuti akulonjeelele?” 11Umwantanda uyo ahamwamula ahati, “We mwene, ataliipo naawumo.” Pe uYeesu ahamuvhuuzya ahati, “Niine ntakukulonga. Sogolaaga, kufuma ileelo, utahasheele havhili kuvhomba uvhutalamalandu.”#7:53-8:11 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali nu tunsi utu.
UYeesu vhuzelu ku vhantu avha mu nsi
12Pe uYeesu ahajendeelela kuyanga havhili ni mpuga yiila ahati, “Ine ne vhuzelu ku vhantu vhonti. Umuntu wonti we akundandata ine, te ahajende mu shiisi naalumo, ileelo aliivha nu vhuzelu vhwe vhulimulongolaga mu vhulanzi uvhwa shiima.” 13AVhafalisaayi vhahamuvhuuzya uYeesu vhahati, “Iwe ukuhomeshezya weneewe inongwa zyaho. Uvhuhomeshezi vhwaho te vhwa nalyoli.” 14UYeesu ahavhaamula ahati, “Poosye inga nkuhomeshezya neene inongwa zyane, zye nkuhomeshezya zya nalyoli, mwe pe imanyile kwe mfumile, havhili imanyile kwe nkusogola. Ileelo imwe mutamanyile kwe mfumile, poosye kwe nkusogola. 15Imwe mukundonga kulandatana na ziila zye mukuzilola, ileelo ine ntakumulonga umuntu. 16Ileelo poosye ine inga nkumulonga umuntu, nkumulonga ku vhwanalyoli, mwe pe ntakuvha neeka, nkuvha nu Taata we ansonteleziizye. 17Mu ndajizyo zyinyu izya Moose yisimviilwe kuuti, ‘Uvhuhomeshezi uvhwa vhantu vhavhili vhukwitishilwa kuuti vhwa nalyoli.’#8:17 iNkumbushizyo izya Ndajizyo 17:6; 19:15 18Kwi idala ili ine nkuyihomeshezya neene nu Taata we ansonteleziizye wu hoome waane.”
19Pe aVhafalisaayi vhahamuvhuziilizya uYeesu vhahati, “Vhuli, uTaata waaho ali kwoshi?” Uweene ahati, “Mutamanyile ine, poosye uTaata waane mutamumanyile. Inga mwaamanyile ine, nu Taata waane, nkandi mumumanyile.” 20UYeesu áyanzile zyonti izyo, lwe ali kusambiilizya pa Nyumba iMfinjile pe vhahasengulaga imbogooso iya mpiiya. Ileelo atáliipo umuntu we ámulemile, mwe pe ahavhaliilizyo haakwe háshiili kufiha.
UYeesu akuyanga izya kufwa kwakwe
21Pe uYeesu ahavhavhuuzya havhili aVhafalisaayi vhaala ahati, “Ine nkwepa. Yeenya, inga neepa imwe kwe mundondole, ileelo kwe mufwe mu vhutalamalandu vhwinyu. Imwe mutanginza kwe nkusogola.” 22Pe avheene vhahanda kuvhuzilizanya kuuti, “Shooni she akuyanga akuti, tutangamulandata kwe akusogola? Vhuli, akusogola kuyigoga?” 23UYeesu ahajendeelela kuvhavhuuzya kuuti, “Imwe mwe vha mu nsi umu, ileelo ine ne wa ku mwanya. Imwe mwe vha mu nsi ino, ileelo ine te ne wa mu nsi ino. 24Ye nongwa navhavhuuzya kuuti, kwe mufwe mu vhutalamalandu vhwinyu. Ishi inga mutakwitiha kuuti ine ne neene, kwe mufwe mu vhutalamalandu vhwinyu.”
25Pe vhahamuvhuziilizya uYeesu vhahati, “Tuvhuuzye, iwe we naanu?” UYeesu ahavhaamula ahati, “Kufuma ku vhwandilo naavhavhuziizye kuuti ine ne naanu. 26Indi nazyo inyinji izya kuyanga ku zyinyu ni zya kuvhalonga imwe, ileelo ntakuvhomba vhwevhulo. Ine nkuvhavhuuzya avhantu vhonti zye nkwivwa kufuma kwa Taata waane. Uweene we ansonteleziizye, havhili akuyanga izya nalyoli.” 27Avheene vhatámanyile kuuti uYeesu ahayangaga navho izya Taata uwa ku mwanya. 28Pe uYeesu ahavhavhuuzya ahati, “Lwe mwafishila kunzuvwa pa shihovhenkanyo ne Mwana wa Aadamu, pe muliimanya kuuti ine ne uMulungu ansonteleziizye. Havhili muliimanya kuuti zyonti zye nkuvhomba, ntakuvhomba ku maha gaane, ileelo nkuziyanga zyeziila zye uTaata ansambiliziizye. 29UMulungu we ansonteleziizye ali pooka niine. Atandesiile neeka, mwe pe ahavhaliilizyo honti nkuvhomba zye zikumuhondezya.” 30Lwe uYeesu ayanga izyo, avhantu avhinji vhahamwitiha.
UMulungu akuvhavhiiha avhantu kuvha vhasatushe
31Pe uYeesu ahavhavhuuzya aVhayuuda vhe vhámwitisile ahati, “Inga mukugalandata amazwi gaane ge nkuvhasambiilizya, pe nalyoli kwe muvhe mwe vhasundikwa vhaane. 32Havhili kwe muvhumanye uvhwanalyoli. Kwi idala ilya vhwanalyoli uvhwo, uMulungu kwe avhavhiishe kuvha mwe vhasatushe.”
33Avheene vhahamuvhuuzya vhahati, “Iswe swe vha luho ulwa Aabulahamu.#8:33 UAabulahamu: Vhaazya mu Ntantiho izya Mazwi aMajeni. Umuntu nuumo atahatuvhiiha naalumo kuvha swe vhazya. Shooni she ukuti iswe kwe tuvhe swe vhasatushe?” 34UYeesu ahavhaamula ahati, “Nalyoli nkuvhavhuuzya kuuti, umuntu wonti we akujendeelela kuvhomba uvhutalamalandu, akuvha muzya uwa vhutalamalandu.#8:34 aVhaluumi 6:12-23 35Umuzya atakutendama mu nyumba iya mwene waakwe insiku zyonti, nkandi umwana wa mwene we akutendama insiku zyonti. 36Ishi inga ine ne Mwana wa Mulungu navhavhiiha kuvha mwe vhasatushe ku vhutalamalandu vhwinyu, te muvhe mwe vhazya havhili, nkandi nalyoli kwe muvhe mwe vhasatushe. 37Imanyile kuuti imwe mwe vha mu luho ulwa Aabulahamu, ileelo mukulondola idala ilya kungoga, mwe pe mukuhaana kuzyitiha zye nkuvhasambiilizya. 38Ine nkuvhavhuuzya zye nkuzilola kufuma kwa Taata waane, niimwe mukuzivhomba zye utaata wiinyu akuvhasambiilizya.”
39Avheene vhahamwamula uYeesu vhahati, “Iswe utaata wiitu wu Aabulahamu.” UYeesu ahavhaamula ahati, “Inga nalyoli mwe vhaana vha Aabulahamu, nkandi mukuvhomba zye uAabulahamu ahavhombaga. 40Ileelo ishi mukulondola idala ilya kungoga, pooka nu kuuti navhavhuuzya uvhwanalyoli vhwe návhwivuuye kufuma kwa Mulungu. UAabulahamu atávhomvile inza vwe imwe mukwanza kumbombela. 41Imbombo zye mukuvhomba zikufuma kwa taata wiinyu uwunji.” AVhayuuda ivho vhahamwamula uYeesu vhahati, “Iswe tutapafwilwe kufumiilana nu vhulugusu, uMulungu weeka we wu Taata wiitu.” 42UYeesu ahavhavhuuzya ahati, “Inga uMulungu wu Taata wiinyu, nkandi munkunzite. Ine ntinzile ku maha gaane, uMulungu we ansonteleziizye. 43Shooni she mutakuzimanyinsanya zye nkuyanga? Mutakuzimanyinsanya, mwe pe mutakwitiha zye nkuvhasambiilizya. 44Imwe utaata wiinyu wu Mukwalanzi. Havhili mukwanza kuvhomba zye utaata wiinyu uyo akwanza. USeetano mugozi kufuma hali, havhili atakwanza kuvhulandata uvhwanalyoli, mwe pe uvhwanalyoli vhutali mu mwoyo waakwe. Uweene kuluma ilenga, we mwata waakwe, mwe pe uweene ali ni ilenga, havhili wu taata uwa vhe vhakuluma ilenga vhonti. 45Ileelo, mwe pe nkuvhavhuuzya izya nalyoli, mutakuniitiha.
46“Ishi pahati yiinyu wu naanu we angahomeshezya kuuti ine ne mutalamalandu? Inga nkuvhavhuuzya izya nalyoli, pe shooni she mutakuniitiha? 47Umuntu uwa Mulungu, akulandata amazwi aga Mulungu. Imwe mutakulandata zye uMulungu akuyanga, mwe pe te mwe vhantu vhaakwe.”
UYeesu mupiti kuluusya uAabulahamu
48AVhayuuda vhaala vhahamuvhuziilizya uYeesu vhahati, “Vhuli, tutakuyanga uvhwanalyoli lwe tukuti iwe we Musamaliya nu kuuti uli ni mpepo inkandamanu?” 49UYeesu ahavhaamula ahati, “Ine ntali ni mpepo inkandamanu. Ine nkumushindiha uTaata waane, ileelo imwe mutakunshindiha ine. 50Ntakwanza kuuti imwe munshindishe. UMulungu we akwanza kunshindiha, havhili uweene we Mulonzi uwa Nalyoli. 51Nalyoli kuvhavhuuzya kuuti, umuntu wonti we akuzilandata zye nkusambiilizya, te ahaafwe naalumo.”
52Pe aVhayuuda vhaala vhahamuvhuuzya uYeesu vhahati, “Ishi twamanya kuuti iwe uli ni mpepo inkandamanu! UAabulahamu na vhakuvhwi vhahafwa, ileelo iwe ukuti, ‘Umuntu wonti we akulandata zye nkusambiilizya, te ahaafwe naalumo.’ 53Vhuli, iwe ukuyivhiiha kuuti we mupiti kuluusya utaata wiitu uAabulahamu? Uweene ahafwa. Avhakuvhwi vhoope vhahafwa. Vhuli, iwe ukuyivhiiha kuuti we naanu?” 54UYeesu ahavhaamula ahati, “Inga nkuyishindiha neene neeka, uvhushindamu vhwane vhutali ni mbombo naayimo. Ileelo uTaata waane we imwe mukuti wu Mulungu wiinyu, we akunshindiha. 55Niishi vhweleele, mushiili mutamumanyile uMulungu, ileelo ine imumanyile. Inga nkuti ntamumanyile uMulungu, pe nkuvha ni ilenga inza imwe. Ileelo ine imumanyile uMulungu havhili nkuzilandata zye akuyanga. 56Utaata wiitu uAabulahamu ásesheeye nkaani, lwe aamanya kuuti kwe ninze. Áamile fwe andola, ahaseshela nkaani.”
57Pe aVhayuuda vhaala vhahamuvhuziilizya uYeesu vhahati, “Iwe ushiili kufisya poosye amaaha 50, pe wámuvhwenyi inza vhuli uAabulahamu?” 58UYeesu ahavhaamula ahati, “Nalyoli nkuvhavhuuzya kuuti, lwe uAabulahamu ashiili kupaapwa, ine indiipo.#8:58 Ine indiipo: Ipa uYeesu áyitasile izina ilya Mulungu inza vwe yisimviilwe mwi ikalaata ilya Kufuma 3:14.” 59Lwe aVhayuuda vhiivwa izyo, vhahasevha amavhwe inga vhamuhome nu kumugoga, ileelo uYeesu ahazyihama nu kufuma pa Nyumba iMfinjile.
Currently Selected:
uYoohani 8: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
