uLuuka 17
17
Insambiilizyo izya vhunanzi nu kuswilana
(uMataayi 18:6-7, 21-22; uMaaliko 9:42)
1UYeesu ahavhavhuuzya avhasundikwa vhaakwe ahati, “Indingo zye zikupelela avhantu kuvhomba uvhutalamalandu ziliipo insiku zyonti. Ileelo asheela umuntu we akuzileeta indingo izyo! 2Yaamile kwashi umuntu uyo kupinyiilwa ulwala mu nsingo yaakwe, nu kusumbilwa mwa sumbi, kuluusya amayimba ge galimwaga, mwe pe amupelela wumo mu vhansi ivha kuvhomba uvhutalamalandu! 3Ishi, muvhe minso, inga mutavhombaje isho!
“Inga uwamwinyu akunanjila, umusohaje, inga atonta, umuswilaje. 4Poosye inga akunanjila ulwinji#17:4 Ulwinji: IShiyunaani shikuti mala 7. Kuyanga isho, kwe kuuti ulwinji. kwi isiku lyoka, nu kugaluha kuli iwe ulwinji kuuti, ‘Natonta,’ iwe umuswilaje.”
Amaha aga lwitiho
5Pe avhatumwa vhaala vhahamuvhuuzya uMwene uYeesu vhahati, “Tukulaavha utwonjezye ulwitiho!” 6Woope ahavhaamula ahati, “Inga mwaamile nu lwitiho ulunsi inza imbeyu iya haladaali ye nyinsi kuluusya imbeyu zyonti, mungalivhuuzya ituvhu ili kuuti, ‘Kumpuuha uvhale uyivhwale mwa sumbi,’ lyope lingavhashindiha!”
Ulushindiho mu mbombo
7“Tuti, wumo muli imwe ali nu muzya uwa kulima, poosye uwa kudiima ingʼombe. Vhuli, wu naanu we angamuvhuuzya umuzya uyo lwe aafuma kuvhomba imbombo kuuti, ‘Nzaaga luvhiilo, tendaama ulye ishaakulya’? 8Naawumo! Nkandi nalyoli angati, ‘Nsenganizanya ishaakulya, havhili umbombele kufishila lwe naamala kulya nu kumwela. Lwe naamala, pe niiwe ulye nu kumwela.’ 9Vhuli, angamusalifwa umuzya uyo, mwe pe avhomba zye amulajiziizye? Haa! 10Vwe zili na kuli imwe, lwe mwamala kuvhomba zyonti zye uMulungu avhalajiziizye, pe mutinji, ‘Iswe swe vhazya swe tutahondeeye kutusalifwa, twavhomba zye tukwanzilwa kuvhomba.’”
UYeesu akuvhazelufwa avha mambombo 10
11Lwe uYeesu akusogola ku Yelusaleemu, ahatuuha idala lye lyátuusile mu nshinji iya shigavho isha nsi isha Samaliya ni sha Galilaaya. 12Lwe akwinjila mu lutala lumo, ahahomaana na vhantu 10 avha mambombo. Avhantu ivho vhahimiilila apatali nawo,#17:12 aVhalaawi 13:45-46 13vhahamuvhilishila kwi izwi vhahati, “We Mwene Yeesu, utufwile uvhwila!” 14Lwe uYeesu avhalola, ahavhavhuuzya ahati, “Sogooli muyilolesye ku vhapuuti.#17:14 Muyilolesye ku vhapuuti: Kufumiilana ni ndajizyo izya Moose, avhapuuti vhe vhahahomeshezyaga kuuti umuntu azelufile amambombo. Vhaazya aVhalaawi 14:1-32. ” Lwe vhali mwi idala vhakusogola, vhahazelupa.
15Wooka muli vhuuvho, lwe aalola kuuti azelupa, ahagaluha kwa Yeesu, uku akumutiima uMulungu kwi izwi ipiti. 16Lwe aafiha, ahagwa ishikupama pilongolela pa vinama ivwa Yeesu nu kumusalifwa. Umuntu uyo, áamile Musamaliya.#17:16 UMusamaliya: AVhayuuda vhahavhasufwaga nkaani aVhasamaliya, mwe pe aVhasamaliya vhápafwilwe kufumiilana na vhantanda aVhayuuda na vhanaavuli vhe te Vhayuuda. Izi zyávhombesile ahavhaliilizyo he aVhayuuda vhágomwilwe nu kuvhatwala ku Babeeli kuvha vhazya. Avhantanda vhe vhatágomwilwe vhahapwanwa na vhanaavuli vhe te Vhayuuda. Havhili aVhasamaliya vhahamupuutaga uMulungu kwi idala lye lyásangiine nu kuvhapuuta avhalungu vhaavho. Kuli izyo, avhantu kufuma mu nsi zivhili izyo vhatahivwanaga. 17UYeesu ahavhuziilizya ahati, “Vhatazelufile avhantu vhonti 10? Avhamwavho 9 vhali kwoshi? 18Ataliipo we agalusile kumusalifwa uMulungu, nkandi we te Muyuuda uno?” 19Pe uYeesu ahamuvhuuzya ahati, “Yimiliila, sogolaaga, waapona, mwe pe waniitiha!”
Kwinza ukwa vhumwene uvhwa Mulungu
(uMataayi 24:23-28, 37-41)
20Isiku limo, aVhafalisaayi vhahamuvhuziilizya uYeesu vhahati, “Uvhumwene uvhwa Mulungu vhuliyinza lii?” UYeesu ahavhaamula ahati, “Uvhumwene uvhwa Mulungu vhutakwinza ni vilolesyo vwe vikuloleha na minso. 21Avhantu te vhahati, ‘Yeenya, vhuli ipa!’ Poosye kuuti, ‘Vhuli paala!’ Yeenyi, uvhumwene uvhwa Mulungu wuli pahati yiinyu.”
22Pe uYeesu ahavhavhuuzya avhasundikwa vhaakwe ahati, “Ziliyinza insiku zye mulinyonywa kuvha niine ne Mwana wa Aadamu poosye kwi isiku inga lyoka, ileelo te muhandole. 23Avhantu vhalivhavhuzyaga vhalitinji, ‘Yeenyi ali paala!’ Poosye kuuti, ‘Uno ipa!’ Ileelo mutahavhiitishe poosye kuvhalandata. 24Navhavhuuzya izyo, mwe pe kwinza kwane ne Mwana wa Aadamu, pi isiku ilya vhusililishilo, kuliivha kwa kwitushizya inza ulumesyo ulwa mvula intalala vwe lukuhozya imbazu zyonti kumwanya. 25Lwe suuti izyo zishiili kufumila, ine ne Mwana wa Aadamu, ku lukasamo ulwa Mulungu nkwanzilwa kuyimba ku nyinji nu kuhaanwa na vhantu avha havhaliilizyo iha.
26“Inza vwe zyámile insiku izya Noowa, vwe ziliivha ahavhaliilizyo aha kugaluha ine ne Mwana wa Aadamu. 27Insiku izya Noowa, avhantu vhahalyanga nu kumwela, vhahimalaga nu kwimalwa, kufishila isiku liila lye uNoowa áyinjiiye mu mbogooso. Pe imvula impiti yihatoonya, yihavhalovwa avhantu vhonti.
28“Havhili insiku izya Looti, zyámile vhwevhulo. Avhantu vhahalyanga nu kumwela, vhahakalaga nu kukazya, vhahavhwalaga nu kuzenga. 29Ileelo isiku liila lwe uLooti ayeepa mu nkaaya iya Sodooma, umwoto ni mbaluuti kufuma ku mwanya vihiiha inza imvula, vihavhalovwa avhantu vhonti. 30Vwe ziliivha isiku liila, lye ne Mwana wa Aadamu ndiloleha apazelu.
31“Isiku ilyo, umuntu we ali pamwanya pa nyumba, atahiishe nu kwinjila mu nyumba, inga anyatule ivintu vwakwe vwe vili muumwo, nkandi ayiishe nu kushimbila. Woope we ali ku magunda, atahagalushe mwisinda kunyatula ishintu shonti. 32Mukumbushe zye zyámwazile umushi wa Looti.#17:32 Umushi wa Looti ágalunkiine kuvha hagamba aha ivheeya, mwe pe ásufwizye indajizyo izya Mulungu. Ahasungwa kugaluha mu Sodooma, inkaaya ye uMulungu átili kwe ayilovwe. Vhaazya uVhwandilo 19:26. 33Umuntu wonti we akwanza kuvhupoha uvhulanzi vhwakwe, alivhulovwa. Ileelo umuntu wonti we akuvhulovwa, alivhupoha.
34“Nkuvhavhuuzya kuuti, isiku ilyo avhantu vhavhili vhaliivha vhakaasite ishitala shooka, ileelo wumo alinyatulwa, uwamwavho alisyala. 35Havhili avhantanda vhavhili vhaliivha vhakusya pooka, ileelo wumo alinyatulwa, uwamwavho alisyala. 36Isiku ilyo, avhanaavuli vhavhili vhaliivha kuvhomba imbombo ku magunda, wooka alinyatulwa, wumo alisyala.#17:36 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 36. Zyope iBiibiliya zimo izya manda iga zikuhaleha ahansi iha ishisita kusimba.”
37Avhasundikwa vhahamuvhuziilizya vhahati, “We Mwene, izyo zilivhombeha kwoshi?” Ahavhaamula ku miivhi ahati, “Pe pali ishihanu she shifuuye, pe amavhimba gakuvhungaana.”
Currently Selected:
uLuuka 17: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
