uLuuka 18
18
Kumulaavha uMulungu ishisita kulita
1UYeesu ahavhavhuuzya avhasundikwa vhaakwe ishiholanyo kuvhasambiilizya kuuti, vhakwanzilwa vhamulaavhaje uMulungu insiku zyonti, ishisita kuvunziha amooyo. 2Ahavhavhuuzya ahati, “Kwáli umulonzi mu nkaaya yimo. Umulonzi uyo atahamunyilaga uMulungu, havhili atahavhasajilaga avhantu. 3Mu nkaaya iyo, mwáli umwantanda wumo umuziishe. Umwantanda uyo, ahasogolaga ulwinji ku kwakwe kumulaavha kuuti, ‘Nkulaavha undonzezye inongwa yaane, inga umulugu waane atahanyatule ivintu vwane.’
4“Insiku inyinji zihatuuha, umulonzi uyo ahajendelelaga kuhaana kumwavwa umuziishe uyo. Pe ku vhusililishilo, ahayisivhiilila mu mwoyo waakwe ahati, ‘Pooka nu kuuti ntakumunyila uMulungu, poosye kuvhasaajila avhantu, 5ileelo, mwe pe umuziishe uno akujendeelela kuntamwa nkaani, kwe ndonzye inongwa yaakwe, inga atahajendeelele ku ndisya!’”
6Pe uMwene uYeesu ahati, “Musambiilile kwa mulonzi umuvhiivhi uyo, vwe ásivhiliiye kuvhomba! 7Ishi, uMulungu atangavhavhombela zye zikwanzilwa avhasaavhulwa vhaakwe vhe vhakumulaavha uvhusiku nu musanya? Angahaavha kuvhaavwa? 8Nkuvhavhuuzya kuuti, uMulungu kwe avhavhombele naluvhiilo zye zikwanzilwa kuvhavhombela. Ishi ne Mwana wa Aadamu lwe nkugaluha mu nsi, ndivhaaga avhantu vhe vhakuniitiha?”
Ishiholanyo isha Mufalisaayi nu musonchezya musonko
9Pe uYeesu ahavhavhuuzya ku shiholanyo avhantu vhe vhahayilolaga kuuti vhagolosu nu kuvhasuufwa avhamwavho vhonti, ahati, 10“Avhantu vhavhili vhásogooye kupuuta pa Nyumba iMfinjile, wumo áamile Mufalisaayi, uwamwavho áamile musonchezya musonko.
11“UMufalisaayi uyo ahimiilila kulaavha. Ahalaavha mu mwoyo waakwe, ahati, ‘We Mulungu, nkukusalifwa, mwe pe ine ntali inza avhantu avhanji, avhapumula vintu na vhatalamalandu na vhavhembu, poosye inza umusonchezya musonko uno! 12Ine nkuyiima kulya luvhili ku mulungu wooka, kuzya kulaavha. Havhili, nkukufumwizya impuutile ishigavho shooka pa vigavho 10 mu vintu vwane vwonti.’
13“Ileelo umusonchezya musonko ula áyimiliiye ukutali, atálinjiziizye poosye kwenya ku mwanya, ahayihomaga-homaga pa shifuvha shaakwe kuyiisya, ahatinji, ‘We Mulungu, umfwile uvhwila, ine ne mutalamalandu!’” 14Pe uYeesu ahati, “Nkuvhavhuuzya kuuti, umusonchezya musonko ávhweleeye kuhaaya, avhaziliilwe kuuti mugolosu. Ileelo uMufalisaayi ula, haa! Navhavhuuzya vhwevhulo, mwe pe umuntu wonti we akuyizuvwa, uMulungu alimwisya. Ileelo umuntu we akuyiisya, uMulungu alimuzuvwa.”
UYeesu akuvhaloota avhaana avhansi
(uMataayi 19:13-15; uMaaliko 10:13-16)
15Isiku limo, avhantu vhámuleteeye uYeesu avhaana avhacheeche, inga avhavhiishile inyoovhe kuvhaloota. Ileelo avhasundikwa vhaakwe lwe vhaalola isho, vhahavhapilila vhe vhávhaleesite avhaana ivho. 16Ileelo uYeesu ahavhiita avhaana kuuti vhasogole ku kwakwe, ahati, “Vhaleshi avhaana ivho vhinze kuli ine, mutavhadindaje ndaali, mwe pe uvhumwene uvhwa Mulungu vhwa vhantu vhe vhali inza avhaana ivho. 17Nalyoli nkuvhavhuuzya kuuti, umuntu wonti we atakumusuuvhila uMulungu inza umwana vwe akumusuuvhila utaata waakwe, te ahinjile naalumo mu vhumwene uvhwa Mulungu.#18:17 Lumo kwe kuuti, Umuntu wonti we atakwitiha kulongolwa nu Mulungu inza umwana waakwe akwitiha kulongolwa na vhapaafi vhaakwe, atanginjila inga hansi mu vhumwene uvhwa Mulungu.”
Udumbwe we akwanza uvhulanzi
(uMataayi 19:16-30; uMaaliko 10:17-31)
18Umupiti wumo ahamuvhuziilizya uYeesu, ahati, “We Musambiilizi umwinza, imbombe ishooni, inga nkaposheele uvhulanzi uvhwa shiima?” 19UYeesu ahamwamula ahati, “Shooni she ukumbuuzya kuuti ne mwinza? Ataliipo we mwinza, nkandi we Mulungu weeka! 20Uzimanyile indajizyo izya Mulungu zye zikuti, ‘Utavhembuhaje, utagogaje, utiivhaje, utafumwaje uvhwahoome uvhwa ilenga, umushindihaje utaata waaho nu maayi waaho.’#18:20 Kufuma 20:12-16; iNkumbushizyo izya Ndajizyo 5:16-20” 21Uweene ahati, “Indajizyo zyonti izyo nkazilema kufuma kwe ku vhunsi vhwane.”
22UYeesu lwe ayiivwa izyo, ahamuvhuuzya ahati, “Usovheliilwe ishintu shooka. Sogoola ukazye ivintu vwonti vwe uli navwo, impiiya zye waposheela uuvhape avhapiina. Inga wavhomba vhwevhulo, ukuvha wayisengulila inkoma ku mwanya. Pe uyinze, undandate.” 23Umupiti uyo, lwe ayiivwa izyo, ahaswimiililwa nkaani, mwe pe áamile wu dumbwe nkaani. 24UYeesu lwe amulola kuuti aswimiililwa, ahati, “Shigomu nkaani avhadumbwe kwinjila mu vhumwene uvhwa Mulungu! 25Shipupuusu nkaani ingamila kutuuha pi indovhoolwi ilya nsindaani, kuluusya udumbwe kwinjila mu vhumwene uvhwa Mulungu!”
26Avhantu vhe vhívuuye izyo, vhahati, “Ishi inga vwe zili vhwevhulo, pe wu naanu we angaapokwa?”#18:26 AVhayuuda vhahitihaga kuuti avhadumbwe vhonti vhaliipokwa. 27UYeesu ahavhavhuuzya ahati, “Zye ku vhantu zitangavhombeha, kwa Mulungu zikuvhombeha.” 28Pe uPeeteli ahamuvhuuzya uYeesu ahati, “Yeenya, iswe tuvilesile ivintu vwonti vwe tuli navwo, tukukulandata iwe!” 29UYeesu ahati, “Nalyoli nkuvhavhuuzya kuuti, umuntu wonti we ayilesile inyumba yaakwe, poosye umushi waakwe, poosye avhanine vhaakwe, poosye avhapaafi vhaakwe, poosye avhaana vhaakwe, kuzya vhumwene uvhwa Mulungu, 30uyo ahavhaliilizyo iha he ali mu nsi umu, akuposheela ivwinji kuluusya vwe avilesile. Havhili, ahavhaliilizyo he hakwinza, aliposheela uvhulanzi uvhwa shiima.”
UYeesu akukuvhwa ulwa vhutatu izya kufwa nu kuzyuha kwakwe
(uMataayi 20:17-19; uMaaliko 10:32-34)
31UYeesu ahavhanyatula avhasundikwa vhaakwe 12, ahasogola navho kukwilu, pe ahavhavhuuzya ahati, “Yeenyi, tukuzuvha ku Yelusaleemu. Ukwo, zyonti zye avhakuvhwi vhásimvile mu Vhusimbe uVhufinjile ku zyane ne Mwana wa Aadamu, kwe zilunjishe. 32Avhalugu vhaane kwe vhambiishe mu nyoovhe izya vhe te Vhayuuda nu kunjevhula nu kundiga nu kunswilila amati. 33Havhili kwe vhankome nu muchaapu nu kungoga. Ileelo isiku ilya vhutatu uMulungu alinzyusya.”
34Avhasundikwa vhaakwe vhatázimanyinsiinye inga hansi zye ahavhavhuzyaga, mwe pe zyázyisiilwe kuuti kwe kuuti vhuli. Vhatámanyile kuuti akuyanga shintu vhuli.
UYeesu akumuponia untonko
(uMataayi 20:29-34; uMaaliko 10:46-52)
35UYeesu na vhasundikwa vhaakwe lwe vhapalamila pa nkaaya iya Yeeliko, umuntu wumo we áamile wu ntonko átendiime pa luvhazu pi idala, ahalaavhaga ivintu. 36Lwe ayiivwa avhantu ivhungaana vhakutuuha, ahavhuziilizya ahati, “Kuli shooni?” 37Vhahamuvhuuzya vhahati, “UYeesu uwa ku Naazaleeti akutuuha.” 38Pe ahahoola kwi izwi ipiti ahati, “We Yeesu, Mwana wa Daavhudi,#18:38 UMwana wa Daavhudi: Vhaazya uDaavhudi mu Ntantiho izya Mazwi aMajeni. umfwile uvhwila!” 39Avhantu vhe vháamile pilongolela pa Yeesu, vhahamupilila kuuti apuume. Ileelo uweene ahonjezya kuvhilishila nkaani ahati, “We Mwana wa Daavhudi, umfwile uvhwila!”
40UYeesu ahimiilila, ahalajizya kuuti vhamuleete ku kwakwe. Untonko uyo lwe apalamila pilongolela lyakwe, uYeesu ahamuvhuziilizya ahati, 41“Ukwanza inkuvhombele ishooni?” Ahati, “We Mwene, nkulaavha umponie, intalishe kulola havhili.” 42UYeesu ahamuvhuuzya ahati, “Ishi utalishe kulola havhili! Waapona, mwe pe waniitiha.” 43Ahavhaliilizyo hanaaho untonko uyo ahataliha kulola, pe ahataliha kumulandata uYeesu uku akumutiima uMulungu. Avhantu vhonti lwe vhazilola izyo, vhoope vhahamutiima uMulungu.
Currently Selected:
uLuuka 18: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
