uLuuka 19

UYeesu akuhomaana nu Zakaayo

1UYeesu ahinjila mu nkaaya iya Yeeliko, ahavhanga akutuuha pahati mu nkaaya iyo. 2Mu nkaaya iyo, mwáli umuntu wumo, we vhahatinji uZakaayo. UZakaayo áamile mupiti uwa vhasonchezya musonko, havhili áamile wu dumbwe. 3Umuntu uno ahanzaga kumulola uYeesu kuuti ali vhuli, ileelo áposiitwe kumulola, mwe pe ivhungaana ilya vhantu lyámile lipiti nkaani, woope áamile mufupi. 4Pe ahashimbila kusogola kwilongolela ilya mpuga iya vhantu, ahazuvha mwi ituvhu, inga amulole uYeesu lwe akutuuha paala. 5Lwe uYeesu aafiha paala, aheenya kumwanya kwi ituvhu ilyo, ahamulola uZakaayo, ahati, “Zakaayo, yiiha luvhiilo! Ileelo ili kuuti ndinde mu nyumba yaaho.” 6UZakaayo ahiiha naluvhiilo, ahamuposheela uYeesu ku nkaaya yaakwe ku luseshelo.

7Avhantu vhonti vhe vhámuvhwenyi uYeesu lwe akwinjila muula, vhahanda kukwinkwina, vhahati, “Shooni she asogola kutendama mwa muntu umutalamalandu!” 8Ileelo uZakaayo ahimiilila, ahamuvhuuzya uMwene uYeesu ahati, “We Mwene! Ishi, ivintu vwane kuuti mvigavhanye pahati, vimo kuuti mbape avhapiina. Ileelo umuntu we imufwuye ishintu shonti ku vhwivha, kuuti imugalusizye lune ku viila vwe imufwuye.”#19:8 aVhalaawi 6:1-5 9Pe uYeesu ahamuvhuuzya ahati, “Ileelo ili, uvhuposhi vhwinza mu vhantu avha mu nyumba ino, mwe pe umuntu uno woope wa mu luho ulwa Aabulahamu. 10Mukumbushe kuuti, ne Mwana wa Aadamu ninzile kulondola nu kuvhapoha avhantu vhe vhateezile.”

Ishiholanyo isha vhavhomvi vhe vhápeliilwe impiiya

(uMataayi 25:14-30)

11Avhantu vhe vhahamutejelezyaga uYeesu vhahasiivhaga kuuti uvhumwene uvhwa Mulungu vhupalamiiye,#19:11 Uvhumwene uvhwa Mulungu vhupalamiiye: Avhantu vhahasiivhaga kuuti uYeesu akusogola ku Yelusaleemu kukonzya. mwe pe vhápalamiiye kufiha ku Yelusaleemu. Pe uYeesu ahavhavhuuzya ku shiholanyo ahati, 12“Kwáli umuntu wumo uwa mu luho ulwa shimwene, we ashuuye kusogola insi iya kutali. Ásogooye ku nsi iyo, inga aposheele amaha aga kukonzya uvhumwene, pe agalushe kuyikonzya insi yaakwe.

13“Lwe ashiili kusogola, ahavhiita avhavhomvi vhaakwe 10, ahaamupa wooka wooka impiiya inyinji,#19:13 Impiiya inyinji: IShiyunaani shikuti imina. Impiiya izyo zihakwilaga kumuposheelezya umuvhomvi ameezi gatatu. ahavhavhuuzya ahati, ‘Mutananiaje impiiya izi kufishila ahavhaliilizyo he ndivhwela, inga nkaaje zyapaapa.’ 14Ileelo avhantu avha mu nsi yaakwe vhámuvitiliilwe, pe vhahasonteelezya avhantu kuuti vhamulandate ku nsi yiila iya kutali, vhasogole vhayanje vhati, ‘Tutakwanza kuuti umuntu uno avhe wu mwene wiitu!’ 15Ileelo poosye she vháyanzile izyo, ápeliilwe amaha aga kuvha wu mwene. Lwe avhwela, ahavhiita avhavhomvi vhaala vhe ávhapiiye impiiya, inga amanye zye wooka wooka ayambuliiye mu mbombo yaakwe iya kutaanania.

16“Umuvhomvi uwa kwanda ahinza, ahayanga ahati, ‘We mwene, impiiya zye wándesheeye, zipaafile izyamwavho amabundwa 10.’ 17Umwene uyo ahamuvhuuzya ahati, ‘Uvhomvile ahinza nkaani, iwe we muvhomvi umwinza! Mwe pe waamile we mutungamu ku vintu ivinsi nkaani, kuuti nkupe amaha aga kukonzya inkaaya 10.’ 18Umuvhomvi uwa vhuvhili woope ahinza, ahayanga ahati, ‘We mwene, impiiya zye wándesheeye, zipaafile izyamwavho amabundwa gasaano.’ 19Umwene waakwe ahamuvhuuzya ahati, ‘Niiwe nkuukupa amaha aga kukonzya inkaaya zisaano.’

20“Umuvhomvi uwamwavho ahinza, ahati, ‘We mwene, nyatuula impiiya zyaho zye wándesheeye izi ipa. Názisenguuye ahinza mu shitambaala, inga zitahateeje. 21Návhomvile vhwevhulo, mwe pe nkukwogopa, iwe we muntu umugomu. Ukunyatula vwe utavhiisile, havhili ukuvuna vwe utavhwaye.’

22“Umwene ahamuvhuuzya ahati, ‘Iwe we muvhomvi umuvhiivhi! Ishi, nkuukupa isunde ku mazwi gaaho ge wayanga. Waamanyile kuuti ine ne muntu umugomu nkaani, nkunyatula vwe ntavhiisile, havhili nkuvuna vwe ntavhwaye. 23Ishi shooni she utavhiihaga impiiya zyane ku vhe vhakupaafwa, inga lwe navhwela inyatule pooka na zye zipafwilwe?’

24“Pe ahavhavhuuzya avhantu vhe vhímiliiye paala ahati, ‘Mufwule impiiya izyo, muumupe we apafwizye izyamwavho amabundwa 10.’ 25Ileelo avheene vhahamuvhuuzya vhahati, ‘We mwene, nze uyo ali nazyo amabundwa 10!’

26“Ahati, ‘Nkuvhavhuuzya kuuti, umuntu wonti we akusaajila she ali nasho, vhalimwonjezya ivwamwavho. Ileelo we atakusaajila she ali nasho, shoope isho alifwulwa. 27Pooka niizyo vhaleeti avhalugu vhaane vhaala vhe vhatanzaga kuuti mbakonzye, muvhagoje pilongolela lyane!’”

UYeesu akwinjila mu Yelusaleemu nu ludovhelo

(uMataayi 21:1-11; uMaaliko 11:1-11; uYoohani 12:12-19)

28UYeesu lwe ayanga izyo, ahajendeelela kusogola ku Yelusaleemu she alongoleeye ku mpuga yiila iya vhantu. 29Lwe apalamila pa lutala ulwa Besifaage nu lwa Besaniya, muntende mwi igamba lye vhahatinji igamba ilya Mazayituuni,#19:29 Amazayituuni makwi aga mantonongwa amansi aga mafuta. ahavhasonteelezya avhasundikwa vhaakwe vhavhili, 30ahavhavhuuzya ahati, “Sogooli mu lutala lwe luli pilongolela lyinyu. Lwe mukwinjila mwenemwo, kwe muyilole inyaana iya ndogomi ye yitahalimbilwa nu muntu naalumo, vhayikunjiliiye. Muyisatule, muyileete ipa. 31Inga umuntu avhavhuziilizya ati, ‘Shooni she mukuyisatula?’ Muhatinji, ‘UMwene uYeesu akuyanza.’”

32Pe avhasundikwa ivho vhahaaga zili sheshiila inza vwe uYeesu ávhavhuziizye. 33Lwe vhakuyisatula inyaana iyo iya ndogomi, avheneesho vhahavhavhuziilizya vhahati, “Shooni she mukuyisatula inyaana ino iya ndogomi?” 34Vhahavhaamula vhahati, “UMwene uYeesu akuyanza.” 35Vhahamutwalila uYeesu, vhahaala amenda gaavho gamo pamwanya pa ndogomi#19:35 Indogomi: Ku Vhayuuda indogomi vwáli vihanu ivwa kuvhanyatula avhantu na maligo. UYeesu álimbiiye pa ndogomi lwe akwinjila mu Yelusaleemu, kulolesya kuuti wu mwene uwa vhutehamu. iyo, pe vhahamulimbizya penepo.

36Lwe uYeesu akutuuha, avhantu vhahaalaga amenda gaavho gamo mwi idala. 37Lwe apalamila kwiha igamba ilya Mazayituuni, impuga yonti iya vhasundikwa vhaakwe yihanda kudovhela, vhahanda kumutiima uMulungu kuzya mafindango gonti ge vhágavhwenyi lwe uYeesu akuvhomba. Vhahamutiimaga nkaani 38vhahatinji,

“Alosiitwe uMwene we akwinza

kwi izina ilya MWENE uMulungu!#19:38 iZabuuli 118:26

Ishi kuvhe uvhutehamu nu vhushindamu ku mwanya.”

39Mwi ivhungaana ilyo, mwáli aVhafalisaayi vhamo, vhahamuvhuuzya uYeesu vhahati, “Musambiilizi, vhapilile avhasundikwa vhaaho, vhaleshe kuyanga izyo!” 40UYeesu ahati, “Nkuvhavhuuzya kuuti, inga ivha vhapuuma, amavhwe igo kwe gazume ahalanga nkaani!”

UYeesu akukuvhwa kumongolwa ukwa nkaaya iya Yelusaleemu

41UYeesu lwe apalamila nu kuyilola inkaaya iya Yelusaleemu, ahanda kukuuta kuzya mayimba ge gakwinza ku nkaaya iyo. 42Ahati, “Kwashi ileelo ili inga waamanyile zye ukwanzilwa kuvhomba inga uvhe nu vhutehamu! Ishi zizyihiime pa minso gaaho. 43Insiku zye zikwinza, avhalugu vhaaho vhalizenga uluvhumba ulugomu kuzyunguula inkaaya yaaho yonti, ipo pe vhalitaliha kukuvhuushila kufuma imbazu zyonti. 44Vhalikugwisya pansi, iwe na vhantu vhaaho vhonti. Te vhahakuleshele poosye ivhwe lye lilisyala pamwanya pa lyamwavho,#19:44 Te vhahakuleshele poosye ivhwe lye lilisyala pamwanya pa lyamwavho: Inkaaya iya Yelusaleemu yámongoliilwe na Vhaluumi umwaha uwa 70 kufuma pe uYeesu ápafwilwe. mwe pe utahanzaga kumanya ahavhaliilizyo he uMulungu akukuleetela uvhuposhi!”

UYeesu akuyizelufwa iNyumba iMfinjile

(uMataayi 21:12-17; uMaaliko 11:15-19; uYoohani 2:13-22)

45UYeesu ahinjila pa Nyumba iMfinjile, ahanda kuvhashimbizya vhonti vhe vhahakazyaga ivintu ipo. 46Ahavhavhuuzya ahati, “Yisimviilwe mu Vhusimbe uVhufinjile kuuti, ‘INyumba yaane yiliivha Nyumba iya kupuutila.’#19:46 uYisaayi 56:7 Ileelo imwe, muyivhiisile kuvha lishembo ilya vhapumula vintu.”#19:46 uYelemiya 7:11

47Pe uYeesu ahavhanga akusambiilizya avhantu insiku zyonti pa Nyumba iMfinjile. Avhapiti avha vhapuuti na vhasambiilizi avha ndajizyo izya Moose na vhasongo avha Vhayuuda, vhahavhanga vhakulondola idala ilya kumugoga, 48ileelo vhahapootwa, mwe pe avhantu vhonti vhahamulandataga uYeesu nu kulema ahinza amazwi gaakwe.

Currently Selected:

uLuuka 19: nih

Highlight

Copy