uLuuka 21

Impuutile iya muziishe

(uMaaliko 12:41-44)

1UYeesu lwe ali pa Nyumba iMfinjile, ahavhalola avhadumbwe vhakufumwa impuutile zyavho mu shiliilo isha kufumwizya impuutile. 2Ahamulola umuziishe wumo umupiina akuvhiiha muumwo utukoovheli tuvhili vhweleele.#21:2 Utukoovheli tuvhili vhweleele zyámile mpiiya nyinsi nkaani kuluusya impiiya zyonti izya havhaliilizyo iho. 3Pe uYeesu ahati, “Nalyoli nkuvhavhuuzya kuuti, umuziishe umupiina uno, we aafumwa inyinji kuluusya avhanji vhonti. 4Nkuvhavhuuzya isho, mwe pe avhanji vhonti, vhaafumwa ivintu ivinsi, mu vintu vwavho ivwinji. Ileelo umuziishe uno mu vhupiina vhwakwe, aafumwa vwonti vwe vwaamile vwa kumwavwa mu vhulanzi vhwakwe!”

UYeesu akukuvhwa izya kumongolwa iNyumba iMfinjile

(uMataayi 24:1-2; uMaaliko 13:1-2)

5Avhasundikwa vhamo avha Yeesu, vhahayangaga izya Nyumba iMfinjile vwe yázengwilwe na mavhwe aminza, pooka ni vintu ivwa nsavho vwe avhantu vháfumwizye kwa Mulungu. Pe uYeesu ahati, 6“Ivwo vwonti vwe mukuvilola ishi, ziliyinza insiku zye te lihasyale ivhwe naalimo pamwanya pa lyamwavho. Amavhwe gonti igo galimongolwa!”

UYeesu akusambiilizya izya mayimba aga ku vhusililishilo

(uMataayi 24:3-14; uMaaliko 13:3-13)

7Avhantu ivho vhahamuvhuziilizya vhahati, “Musambiilizi, izyo zilifumila lii? Havhili shilolesyo vhuli she shilitulolesya kuuti zyapalamila kufumila?” 8Ahavhavhuuzya ahati, “Muvhanje minso, inga vhatahinze vhavhahopenkanye! Nkuvhavhuuzya vhwevhulo, mwe pe avhantu avhinji vhaliyinza kwi izina lyane, vhaliiti, ‘Ine ne ne Chilisiti!’ Havhili, vhaliiti, ‘Ahavhaliilizyo hapalamiiye!’ Avhantu ivho, mutahasheele muvhalandate! 9Imwe lwe mwivwa inkoolo izya vhulugu, nu kusambuha ukwa vhantu, mutahogopaje. Poosye zivhe vhuli, izyo zikwanzilwa kufumila suuti, ileelo ahavhaliilizyo aheene aha kumpeleela haliivha hashiili.”

10UYeesu ahajendeelela kuyanga kuuti, “Insi yililwanga ni nsi iyamwavho, vhwope uvhumwene vhulilwanga nu vhumwene uvhwamwavho. 11Havhili kuliivha ivisumbi ivipiti uku nuukwo, imbazu zimo kuliivha inzala impiti na mavhinu aga kwambushila galiivha ukwinji. Havhili, kuliivha ivintu ivwa kwogofwa ni shilolesyo ishipiti kufuma ku mwanya.

12“Izyo zyonti lwe zishiili kufumila, avhantu vhalivhalema imwe nu kuvhayimvwa. Vhalivhatwalaga kulongwa mu masinagoogi, nu kuvhakunga mu jeela. Havhili vhalivhatwalaga ku vhamwene na ku vhantu avhanji vhe vhali na maha kuuti mulongwe, mwe pe imwe mwe vhasundikwa vhaane. 13Ileelo kuli imwe, iho he haliivha havhaliilizyo aha kufumwa uvhwahoome uvhwa lwitiho lwinyu. 14Ishi, mutayimbaje mu mooyo giinyu amazwi ge muliyanga lwe mukulongwa. 15Nkuvhavhuuzya isho, mwe pe ine ndiivhapa amazwi aga kuyanga nu vhushindamu uvhwa njeele, vhwe avhalugu vhiinyu vhatangatumvanya navhwo, poosye kuvhudinda.

16“Havhili, poosye avhapaafi vhiinyu na vhanine vhiinyu na vhajenzi vhiinyu na vhamanyani vhiinyu vhalivhahaana, havhili vhamo muli imwe avhalugu ivho vhalivhagoga. 17Avhantu vhonti, vhalivhavitilwaga, mwe pe mukundandata ine. 18Ileelo te luhateeje poosye ulusisi inga lwoka, mu matwe giinyu! 19Niimwe inga mulijimbiilila, pe muliposheela uvhulanzi uvhwa shiima shiima.”

Ahavhaliilizyo aha mayimba amapiti

(uMataayi 24:15-21; uMaaliko 13:14-19)

20“Lwe mwalola avhasikaali vhayizyunguluuye inkaaya iya Yelusaleemu, pe muhamanyaje kuuti ahavhaliilizyo aha kumongolwa inkaaya iyo hapalamila. 21Pe vhe vhali mu shigavho isha nsi isha Yudeeya vhahashimbililaje mu magamba. Vhe vhali mu nkaaya iya Yelusaleemu, vhahafumaje nu kushimbila, na vhe vhali mu magunda, vhatahasheele kuvhwela mu nkaaya. 22Nkuvhavhuuzya isho, mwe pe insiku izyo ziliivha zya mayimba, inga amazwi gonti ge gasimviilwe mu Vhusimbe uVhufinjile galunjishe. 23Vhasheela avhantanda vhe vhaliivha pa vhumwamu na vhe vhaliyonsyaga insiku izyo! Nkuti vhasheela, mwe pe kuliivha amayimba amapiti mu nsi ino, woope uMulungu alivhasunda ku vhuhalazu vhwakwe avhantu avha havhaliilizyo iha. 24Avhantu vhamo, vhalivhagoga ni ipanga, avhamwavho vhalivhatwala mu nsi izinji kuvha vhazya. Ileelo avhantu vhe te Vhayuuda, vhaliyinza kuyikonzya inkaaya iya Yelusaleemu, kufishila pe insiku zyavho izya kukonzya zililunjiha.”

Kwinza ukwa Mwana wa Aadamu

(uMataayi 24:29-31; uMaaliko 13:24-27)

25“Vililoleha ivilolesyo kwi izuvha na ku mwezi na ku nzota. Poope pa nsi ipa, avhasumbi vhaliivha na mavhilingwa amapiti ge gakupoma. Ilyo lilivhavhiiha avhantu avha nsi zyonti kuvha na malavha ni lyoga. 26Izyo zyonti, lwe zikwinza mu nsi, avhantu vhaliziliha kuzya ilyoga ipiti. Vhalisiivhaga kuuti likwinza isunde ipiti, mwe pe ivintu ivwa kumwanya viliyingaana.

27“Pe ne Mwana wa Aadamu ndililoleha nkwinza mu mavhingo na maha nu vhushindamu uvhupiti. 28Izyo zyonti, lwe zyaakwanda kuvhombeha, muhavhanje nu lusuuvhilo nu luseshelo, mwe pe izyo zililolesya kuuti uMulungu apalamiiye kuvhatavhula!”

Ishiholanyo isha ituvhu

(uMataayi 24:32-35; uMaaliko 13:28-31)

29Pe uYeesu ahavhavhuuzya avhasundikwa vhaakwe ishiholanyo, ahati, “Yeenyi ituvhu na makwi aganji gonti. 30Ahavhaliilizyo he mwalola ganda kulemba, naluvhiilo mukumanya kuuti ishisiku shipalamiiye.

31“Vhwevhulo, niimwe lwe mukuzilola izyo zikuvhombeha, pe muhamanyaje kuuti uvhumwene uvhwa Mulungu vhupalamiiye kwinza. 32Nalyoli nkuvhavhuuzya kuuti, avhantu avha havhaliilizyo iha te vhatuushe she izi zyonti zishiili kulunjiha. 33Imwanya ni nsi viliyeepa, ileelo poosye zivhe vhuli amazwi gaane galilunjiha.”

Muvhanje minso

34“Muvhe minso, inga mutahinze mumenwe ni mpapilo mbiivhi nu vhwashimwela ni ntamwo izya mu vhulanzi uvhwa mu nsi umu, isiku ilya kumpeleela ilyo lilivhitushizya kuvhinzila. 35Nkuyanga isho, mwe pe isiku ilyo lilivhitushizya avhantu vhonti mu nsi zyonti. 36Ishi, muvhanje minso ahavhaliilizyo honti, mumulaavhaje uMulungu, inga avhapanje amaha aga kupoota mu zyonti zye zilifumila, inga muhimiilile ku luseshelo pilongolela lyane ine ne Mwana wa Aadamu.”

37Insiku izyo, umusanya, uYeesu ahasambilizyaga avhantu pa Nyumba iMfinjile. Uvhusiku, ahasogolaga kukaata mwi igamba ilya Mazayituuni. 38Insiku zyonti, avhantu vhonti vhahadamulaga inzanshi nu kusogola pa Nyumba iMfinjile, inga vhamutejeelezye.

Currently Selected:

uLuuka 21: nih

Highlight

Copy