uLuuka 22
22
UYuuda akwanza kumwaniila uYeesu
(uMataayi 26:1-5, 14, 16; uMaaliko 14:1-2, 10-11; uYoohani 11:45-53)
1Ahavhaliilizyo aha shikulukuulu isha makaati ge vhataluziizye#22:1 Ishikulukuulu isha makaati ge vhataluziizye: Vhaazya mu Ntantiho izya Mazwi aMajeni. hápalamiiye, ishikulukuulu isho vhahatinji iPasaaka. 2Avhapiti avha vhapuuti na vhasambiilizi avha ndajizyo, vhahalondolaga idala ilya kumugojela uYeesu. Vhahavhombaga izyo ku vhuzigizigi, mwe pe vhahavhogopaga avhantu.
3USeetano ahamwinjila uYuuda, we vhahatinji uwa ku Kaalyoti. Umuntu uno áamile wooka mu vhasundikwa avha Yeesu 12. 4Pe uYuuda ahasogola ku vhapiti avha vhapuuti, na ku vhapiti avha vhasikaali vhe vhahayigulilaga iNyumba iMfinjile. Ahitinkana navho vwe kuuti vhamuleme uYeesu. 5Izyo, zihavhavhiiha avhapiti ivho kuuti vhaseshele nkaani, pe vhahitinkana nu weene kuumupa impiiya. 6UYuuda ahiitiha, pe ahanda kulondola ahavhaliilizyo he ivhungaana ilya vhantu naalimo, inga amwaniile uYeesu.
Kusengaanya ishaakulya isha Mwene
(uMataayi 26:17-25; uMaaliko 14:12-21; uYoohani 13:21-30)
7Isiku ilya shikulukuulu isha makaati ge vhataluziizye, lihafiha. Isiku ilyo, lye avhantu vhahanzilwaga kuvhoola utugonzi twe twávhisiilwe kuvha twa Pasaaka. 8Pe uYeesu ahavhasonteelezya avha Peeteli nu Yoohani, ahavhavhuuzya ahati, “Sogooli mutusenganizanye ishaakulya isha Pasaaka, inga tulye pooka.” 9Vhahamuvhuziilizya vhahati, “Ukwanza tusengaanye kwoshi?” 10Ahavhavhuuzya ahati, “Lwe mukwinjila mu nkaaya,#22:10 Mu nkaaya kwe kuuti, iYelusaleemu. kwe muhomaane nu mwanaavuli wumo, ayitwinsile insonta iya minzi. Mumulandate umuntu uyo kufishila mu nyumba ye kwe ayinjile. 11Pe mumuvhuziilizye umuhaata nyumba iyo muti, ‘UMusambiilizi akuvhuziilizya kuuti, “Ishumba isha vhajeni shili kwoshi? Nkwanza kulya ishikulukuulu isha Pasaaka pooka na vhasundikwa vhaane.”’ 12Woope kwe avhalanje ishumba ishipiti isha pamwanya mu nyumba injelenkanu, she vhasengiinye nziila apa kutendama. Umwo mwe mutusenganizanye.”
13Avhasundikwa ivho vhahasogola. Lwe vhaafiha, vhahaaga zyonti zili sheshiila inza vwe uYeesu ávhavhuziizye. Pe vhahasengaanya ishaakulya isha shikulukuulu isha Pasaaka.
Ishaakulya isha Mwene
(uMataayi 26:26-30; uMaaliko 14:22-26; 1 aVhakolinto 11:23-25)
14Ahavhaliilizyo aha kulya hahafiha. Pe uYeesu ahatendama kulya ishaakulya pooka na vhatumwa vhaakwe. 15Ahavhavhuuzya ahati, “Naseshela nkaani kulya ishikulukuulu ishi isha Pasaaka pooka niimwe, lwe inshiili kusogola mu mayimba. 16Nkuvhavhuuzya kuuti, te nkaalye havhili ishikulukuulu isha Pasaaka kufishila uMulungu lwe avhapoha avhantu vhaakwe vhonti nu kukonzya.”
17Pe uYeesu ahanyatula ulupindi, ahamusalifwa uMulungu, ahati, “Nyatuuli, mumwele mwenti! 18Nkuvhavhuuzya imwe kuuti, kwandila ishi, nalyoli te nkamwele havhili idivaayi kufishila lwe uvhumwene uvhwa Mulungu vhwinza.”
19Pe ahanyatula ikaati ahamusalifwa uMulungu, ahalimensula, ahayanga ahati, “Uno we muvhili waane we nkuwufumwa ku zyinyu. Muvhombaje vhwevhulo, kunkumbuha ine.” 20Lwe vhaalya, ahavhomba havhili sheshiila, ahanyatula ulupindi lwe lwáli ni divaayi, ahati, “Ulupindi ulu lwa lufingwi ulupwa, lwe lukuvhombeha kwi idala ilya mavhanda gaane ge gakwitiha ku zyinyu.#22:19-20 “We nkuwufumwa ku zyinyu. Muvhombaje vhwevhulo, kunkumbuha ine.” Lwe vhaalya, ahavhomba havhili sheshiila, ahanyatula ulupindi lwe lwáli ni divaayi, ahati, “Ulupindi ulu lwa lufingwi ulupwa, lwe lukuvhombeha kwi idala ilya mavhanda gaane ge gakwitiha ku zyinyu.” IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na mazwi iga.
21“Ileelo mumanyaje kuuti, umuntu we akwanza kunaniila, tukulya pooka nawo ipa. 22Ne Mwana wa Aadamu kwe vhavhale vhangoje, inza vwe uMulungu ákasiime. Ileelo asheela, umuntu uyo we akunaniila!” 23Pe avhatumwa avha Yeesu vhahanda kuvhuzilizanya vhuuvho vheeka kuuti, wu naanu mu mpuga yiitu we kuuti avhombe izyo.
Wu naanu we mupiti
24Avhasundikwa avha Yeesu vhahanda kudalinkana kuuti, wu naanu mu vheene we mupiti. 25Pe uYeesu ahavhavhuuzya ahati, “Avhamwene avha vhe te Vhayuuda vhakuvhakonzya avhantu vhaavho ku maha, havhili vhakuvhavijiilizya kuvhomba, ileelo avhamwene ivho vhakuti, vhali nu vhwila ku vhantu.
26“Ileelo imwe, mutahasheele kuvhomba isho. Umuntu we mupiti kuli imwe, uyo avhanje ngati munsi ku vhonti. We akuvhalongozya avhantu, avhanje ngati muntu we muvhomvi wa vhanji. 27Ishi, umupiti wu naanu? We akutendama kulya ishaakulya! We akuvhomba imbombo iya kuvhasenganizanya avhanji? Vhuli! Te we wula we akutendama kulya ishaakulya? Ishi ine indi pooka niimwe, indi ngati muntu we akuvhavhombela.
28“Imwe mwe mwaamile niine ahavhaliilizyo honti aha ndingo zyane. 29Ishi, niine nkuuvhapa amaha aga kukonzya mu vhumwene vhwane, inza vwe uTaata waane ámpiiye amaha aga kukonzya. 30Pe kuuti mulyanje nu kumwela niine, mu vhumwene vhwane. Havhili kuuti mutendame mu vitengo ivwa vhumwene, kuzikonzya inkolo 12 izya Vhaisilayeeli.”
UYeesu akuyanga kuuti uPeeteli kwe amuhaane
(uMataayi 26:31-35; uMaaliko 14:27-31; uYoohani 13:36-38)
31UYeesu ahati, “Siimoni, Siimoni! Umanye ahinza kuuti uSeetano amulaavile uMulungu nu kwitishilwa kuvhalinga imwe, inza uhavuna uwa ngana vwe akupementa ingana yaakwe. 32Ileelo ine, nkulavhiiye kwa Mulungu, inga utahinze uleshe ulwitiho lwaho kuli ine. Niiwe lwe wangalushila ine, uvhagomwe na vhamwinyu.” 33USiimoni ahati, “We Mwene! Ine njifumwizye kuvha niiwe, yivhe kwe kukungwa mu jeela, poosye yivhe kwe kufwa!”
34UYeesu ahamwamula ahati, “Peeteli! Nkukuvhuuzya kuuti, ileelo inkanda lwe yishiili kuvhilishila, kuuti uvhe wankaana lutatu kuuti utamanyile.”
Kuyisengaanya nu kujimbiilila mu mayimba
35Pisinda, uYeesu ahavhavhuziilizya avhasundikwa vhaakwe ahati, “Lwe navhasonteelezya ishisita impiiya, poosye imbuguulu, poosye ivilyatu, mwásovheliilwe ishintu shonti?” Vhahamwamula vhahati, “Haa.” 36Pe uYeesu ahavhavhuuzya ahati, “Ishi, inga umuntu ali ni mpiiya, poosye imbuguulu, anyatule. Woope we atali ni ipanga, akazye ikooti lyakwe, inga akale lyoka. 37Nkuvhavhuuzya isho, mwe pe yisimviilwe mu Vhusimbe uVhufinjile kuuti, ‘Ávhaziliilwe pooka na vhatalamalandu.’#22:37 uYisaayi 53:12 Amazwi igo gásimviilwe ku zyane. Ishi nkuvhavhuuzya kuuti, agenego gakwanzilwa galunjishe kuli ine, havhili gapalamiiye kuvhombeha.” 38Vhahamuvhuuzya vhahati, “We Mwene! Yeenya, ipa pali amapanga gavhili!” Woope ahati, “Mutahajendeelele kuyanga inongwa izya mapanga.”
UYeesu akumulaavha uMulungu mwi igamba ilya Mazayituuni
(uMataayi 26:36-46; uMaaliko 14:32-42)
39Pe uYeesu aheepa, ahasogola kwi igamba ilya Mazayituuni, inza vwe gáamile amaata gaakwe. Vhoope avhasundikwa vhaakwe, vhahamulandata. 40Lwe aafiha mwi igamba ilyo, ahavhavhuuzya ahati, “Mumulaavhaje uMulungu, kuuti aavhape amaha, inga indingo zitahinze zivhapoote.”
41Pe ahavhaleha ipo, ahasogola pilongolela hansi, uvhutali uvhwa kusumba ivhwe. Ahasugamila, ahamulaavha uMulungu ahati, 42“We Taata! Inga ukasiime, nkulaavha uneefwezye amayimba iga.#22:42 Uneefwezye amayimba iga: IShiyunaani shikuti, Uneefwezye ulupindi ulu. Ileelo te kuuti zivhombeshe zye ine nkasiime, nkandi zivhombeshe zye weneewe ukasiime!” 43Pe uhavhizya kufuma ku mwanya ahamwinzila, ahamugomwa. 44Ileelo uYeesu ahonjezya kulaavha, mwe pe áamile nu vhuvhaavi nkaani. Lwe akulaavha, amatwinsi ge gáali inza amavhanda ge gahazwilaga pansi.#22:43-44 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 43 na ha 44.
45Lwe alaavha, ahimiilila, ahasogola ku vhasundikwa vhaakwe, ahaaga vhakaasite utulo, mwe pe vháamile nu vhuswimiilizu. 46Ahavhavhuuzya ahati, “Shooni she mukaasite utulo? Damuuli! Mumulaavhaje uMulungu, kuuti aavhape amaha, inga indingo zitahinze zivhapoote.”
UYeesu akulemwa
(uMataayi 26:47-56; uMaaliko 14:43-50; uYoohani 18:3-11)
47Lwe uYeesu akuyanga izyo, lihinza ivhungaana ilya vhantu vhe uYuuda ávhalongooye. UYuuda uyo we wooka mu vhasundikwa vhaakwe 12. Pe uYuuda ahamupalamila uYeesu, inga amwofwe. 48UYeesu ahamwamula ahati, “We Yuuda! Ukunaniila ne Mwana wa Aadamu kwi idala ilya kunoofwa?” 49Pe avhasundikwa avha Yeesu lwe vhaalola izyo nu kumanya zye kwe zivhombeshe, vhahamuvhuziilizya vhahati, “We Mwene! Tuvhadibanye na mapanga?”
50Pe wumo muli vhuuvho ahamuhoma umuvhomvi uwa mupuuti umupiti, ahamudumula ni ipanga ikutwi ilya kundiilo. 51UYeesu ahayanga ahati, “Leha kuvhomba izyo!” Ahalema ikutwi ilyo, ahamuponia.
52UYeesu ahavhavhuziilizya avhapiti avha vhapuuti na vhapiti avha vhaguulizi avha Nyumba iMfinjile, pooka na vhasongo avha Vhayuuda, ahati, “Shooni she mwaninzila na mapanga ni nduugu, ngati mwinzile kumulema umupumula vintu? 53Insiku zyonti, twavhanga pooka pa Nyumba iMfinjile, ileelo mutandemaga! Ishi, iha he havhaliilizyo hiinyu, ahavhaliilizyo he umwene uwa shiisi akukonzya.” 54Pe avhantu ivho vhahamulema uYeesu, vhahamutwala mu nyumba iya mupuuti umupiti.#22:54 Umupuuti umupiti: Vhaazya avhapuuti mu Ntantiho izya Mazwi aMajeni. Woope uPeeteli ahavhanga akulandata mwisinda ukutali.
UPeeteli akumuhaana uYeesu
(uMataayi 26:57-58, 69-75; uMaaliko 14:53-54, 66-72; uYoohani 18:12-18, 25-27)
55Avhantu ivho lwe vhaafiha mu nyumba iya mupuuti umupiti, vhahapemba umwoto pahati pa luvhungaano, vhahatendama kwota. Woope uPeeteli ahapalamila, ahatendama pooka navho. 56Ileelo ku vhuzelu uvhwa mwoto umuvhomvi wumo umwantanda, ahamutontomela uPeeteli, ahati, “Umuntu uno, aamile pooka nu Yeesu.” 57Ileelo uPeeteli ahahaana ahati, “We mwantanda weewe we! Ine ntamumanyile haa!”
58Pisinda, umuntu uwamwavho ahamulola uPeeteli, ahati, “Niiwe uli pooka na vhaala.” Ileelo uPeeteli ahamwamula ahati, “We muntu weewe we! Te neene haa!”
59Lwe hatuuha ahavhaliilizyo aha isaala lyoka ishi, umuntu uwamwavho ahahomeelezya ahati, “Nalyoli umuntu uno aamile pooka nu Yeesu! Nkuyanga vhwevhulo, mwe pe woope muntu wa ku Galilaaya!” 60Ileelo uPeeteli ahati, “We muntu weewe we! Zye ukuyanga izyo ine ntazimanyile!”
Lwe akuyanga izyo, inkanda yihavhilishila pepaala. 61UMwene uYeesu ahagalunkana, ahamwenya uPeeteli. Pe uPeeteli ahalikumbuha izwi ilya Mwene lye átili, “Lwe inkanda yishiili kuvhilishila, kuuti uvhe wankaana lutatu.” 62Pe ahafuma panzi nu kukuuta ku vhuswimiilizu nkaani.
Vhakumujevhula uYeesu
(uMataayi 26:67-68; uMaaliko 14:65)
63Avhanaavuli vhe vhahamugulilaga uYeesu, vhahamujevhulaga nu kumuhoma. 64Vhahamupinya ni shitambaala ku minso. Pe vhahamuvhuziilizya kuuti, “Twivwe kuvhwa, wu naanu we akuhoma?” 65Vhahajendeelela kumusaamula indigo inyinji.
UYeesu pilongolela ilya vhalongozi avha Vhayuuda
(uMataayi 26:59-66; uMaaliko 14:55-64; uYoohani 18:19-24)
66Lwe kwasha, avhasongo avha Vhayuuda na vhapiti avha vhapuuti na vhasambiilizi avha ndajizyo, vhahavhungaana. Vhahamuleeta uYeesu pilongolela lyavho, vhahati, 67“Tuvhuuzye! Iwe we we Chilisiti?” UYeesu ahavhaamula ahati, “Poosye inga navhavhuuzya, te mwitishe inga hansi. 68Havhili inga navhavhuziilizya, te munaamule inga hansi. 69Ileelo kufuma isaala ili, ne Mwana wa Aadamu kwe ntendame ku luvhazu ulwa kundiilo ulwa Mulungu uwa Maha Gonti pa vhushindamu uvhupiti nkaani.”
70Ipo pe vhonti vhahati, “Kwe kuuti iwe we Mwana wa Mulungu?” UYeesu ahavhaamula ahati, “Imwe mwe mukuti ine ne neene!”
71Pe avhapiti ivho vhahati, “Tukwanza avhahoome avhanji vhaashi? Iswe sweneeswe twivwa izwi ili kufuma mwe mwi ilomu lyakwe wuuyo!”
Currently Selected:
uLuuka 22: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
