Éxodo 21

Tembiguaikuéra rehegua tembiaoukapy

1Ko’ãva hína tembiapoukapy reme’ẽtava Israelguakuérape:

2Rejogua ramo peteĩ tembiguái Israel retãgui 6áñonte ha’e oikóta ne rembiguái ramo; ha peáño 7-hápe repoi jevyva’erã ichugui, opaga’ỹre mba’eve ndéve.

3Oike ramo ha’eño, ha’eño osẽva’erã; hembireko ramo, ha’e osẽva’erã hembireko ndive.

4Ha ijára omohembireko ramo ichupe, ha upéva ome’ẽ ichupe ita’ýra térã itajyrakuéra, pe kuña ha imembykuéra ijára mba’erã, ha’e katu osẽva’erã ha’eño.

5Ha pe tembiguái he’i ramo: Che ahayhu che járape, che rembireko ha che ra’ykuérape, apytátante, nasẽmo’ãi.

6Upéicharamo ijára ogueraháta ichupe umi oñembojovakéva rendápe ha ombojáta ichupe pe okẽ rehe térã pe okẽ horcon rehe; ha ijára ombokuáta inambi peteĩ mba’e akuápe ha oikóta hembiguái ramo hekove pukukuépe aja.

7Ha oimeraẽva ovende ramo itajýra, tembiguái ramo, ha’e nosẽiva’erã osẽ háicha tembiguái kuimba’éva.

8Ndo’aporãi ramo ijárape ha upévagui ndoipotái ichupe hembirekorã ramo, upérõ opoikuaa ichugui sã’ỹre pirapire repy rehe; novendeiva’erã katu tetã ambueyguápe, ha’e ndoipotavéi ramo ichupe.

9Ha omomenda ramo ita’ýrare ojapova’erã hese ku tajyrakuéra rehe ojepokuaa háicha.

10Ha ogueru ramo ambue kuña ita’ýrape g̃uarã, pe hembi’urã ha ijao naimbovyveiva’erã, ha omendáva rembiapo avei naimbovyveiva’erã.

11Ha peteĩva ko’ã mbohapy mba’égui ndojapói ramo, opoi reiva’erã ichugui, ndikatúi ovende ichupe.

Tembiapoukapy oñeñangareko hag̃ua tekove rehe

12Peteĩ oinupã vai ramo hapichápe ha omano ramo, ojejukava’erã avei ichupe.

13Ha upe oporojukáva ojuka ramo hapichápe ojukase’ỹre, Ñanderuete ohejánte ho’a ipópe, upévape g̃uarã ahechaukáta peteĩ táva okañy hag̃uáme.

14Ha oimeraẽ oñemoĩva hapicha rehe ojuka hag̃ua ichupe, péva peguenohẽva’erã che kuave’ẽmby rendágui jepe, ha pejukava’erã ichupe.

15Pe oinupãva itúvape térã isýpe, ojejukava’erã katuete.

16Upéicha avei peteĩ omondáva hapichápe térã ovende ramo ichupe, térã ojejohu ramo ipoguýpe, ojejukava’erã avei ichupe.

17Upéicha avei upe omaldecíva itúva térã isýpe ojejukava’erã.

18Kuimba’e oñorãirõva apytépe peteĩ oinupã ramo hapichápe itápe térã ipópe, ha nomanóirõ, ho’ánte ramo hupápe;

19ha opu’ã ha oguatakuaa ramo ijyvyra po’i reheve jepe, upéicharamo ojepoíta inupãharégui; omyengovianteva’erã ichupe omba’apo’ỹ hague arakuéra rehe ha oipohãnoukava’erã ichupe.

20Oimeraẽva oinupã ramo hembiguái kuimba’e térã kuñáme yvyrápe ha omano ramo ipoguýpe, ojehavirava’erã ichupe;

21ha oikove ramo peteĩ ára térã mokõi ára, ndojehaviraiva’erã, imba’égui pe tembiguái.

22Oime ramo kuimba’ekuéra oñorãirõva ha peteĩ oinupã kuña hyeguasúvape ha ha’e omomembykua ichupe ha avave nomanói ramo, upe oinupãva’ekue opagava’erã pe kuña ména he’i háicha ha umi oporombojovakéva oipota háicha.

23Ha oĩ ramo omanóva katu, ojehepyme’ẽva’erã upe tekovekue tekove rehe,

24tesa, tesa rehe; tãi, tãi rehe; po, po rehe; py, py rehe;

25jehapy, jehapykue rehe; jekutu, jekutu rehe; ñenupã, ñenupã rehe.

26Oimeraẽva ombyai ramo hembiguái kuimba’e resa térã hembiguái kuña resa, opoiva’erã ichugui hesa ñembyaikue rupi.

27Ha oity ramo hembiguái kuimba’e térã kuñágui peteĩ hãi, pe hãi je’akue rupi ojepoiva’erã ichugui.

28Peteĩ tóro oikutu ramo kuimba’e térã kuñáme, ha upévare omano, upe tóro ojejukava’erã itápe ha ndoje’uiva’erã ho’okue; ha ijárape katu ojeheja reiva’erã.

29Pe tóro oporokutu ramo oikóvo are guivéma ha oñemombe’úma ijárape, ha’e katu nopenái ha noñangarekói ramo hese ha ojuka ramo kuimba’e térã kuñáme, ojukava’erã pe tóro itápe ha ojejukava’erã avei ijárape.

30Ha ojerure ramo ichupe omoĩ hag̃ua pirapire osalva hag̃ua hekove, ome’ẽva’erã ojejeruréva ichupe hekove repy rehe.

31Ha peteĩ tóro oikutu ramo mitãkuimba’e térã mitãkuñáme tojehepyme’ẽ itúva ha umi ombojovakéva he’i háicha.

32Pe tóro oikutu ramo tembiguái kuimba’e térã kuñáme, ijára ohepyme’ẽva’erã 335 grámo óro morotĩ, ha pe tóro ojejukava’erã itápe.

33Ha oĩ ramo ojo’óva yvykua, térã ojo’óva ykuarã, ha ndojaho’íri ha ho’a ramo ipype guéi térã búrro,

34pe yvykua jára ohepyme’ẽva’erã upe tymba rehe, ha he’õngue opytava’erã imba’erã.

35Ha oimeraẽ rymba tóro oikutu ramo hapicha rymba tórope ha péva omano ramo, upéicharamo pe tóro oikovéva oñevendeva’erã ha hepykue oñemboja’ova’erã ha pe tóro re’õngue oñemboja’ova’erã avei ijarakuéra apytépe.

36Ha herakuã ramo pe tóro oporokutu oikóvo kuehe árama, ha ijára noñangarekói, upéicharamo ome’ẽva’erã pe tóro ambuetóro rehe, ha tóro re’õngue opyta ijárape g̃uarã.

Currently Selected:

Éxodo 21: ÑÑP2015

Highlight

Copy